– Lege Esparrua.

Euskal Unibertsitate Sistemaren otsailaren 25eko, 3/2004 Legeak -II. kapituluko 3. eta 4. sailak- jardueraren aurretiazko ebaluazioa eskatzen du irakasle kontratatuak (irakasle osoak, agregatuak eta atxikiak) hartzeko. Irakasle lankideak eta irakasle elkartuak kontratatzeko ere aurretiazko txostena egiteko eskatzen du. Azkenik, doktore-tituludun unibertsitate pribatuetako irakasleen hezkuntza- eta ikerketa-jardunaren kanpoko ebaluazioa ere eskatzen du. Lege horrek Uniquali (Euskal Unibertsitate Sistemaren Kalitatea Ebaluatzeko eta Egiaztatzeko Agentzia) esleitzen diio paragrafo horretan aipatutako ebaluazio-funtzioak eta txostenak egitea.

Unibertsitate ez-publikoek Uniqualekin hitzarmenak egin behar dituzte beren irakasleen kanpo-ebaluazioa egiteko, Euskal Unibertsitate Sistemaren otsailaren 25eko 3/2004 Legearen 113. artikuluak eta abenduaren 21eko Unibertsitateei buruzko 6/2001 Lege Organikoaren 72.2 artikuluak (apirilaren 12ko 4/2007 Lege Organikoaren idazkeran) agintzen dutenez.

Bere estatutuetan aurreikusitakoaren arabera, Uniqualen funtzioen artean dago Euskal Unibertsitate Sistemaren otsailaren 25eko 3/2004 Legean aipatzen diren txostenak egitea, unibertsitate publikorako irakasleak eta ikerlariak kontratatzeko euren merezimenduak ebaluatuz eta, unibertsitate ez-publikoetan, irakasleen irakasle- eta ikertzaile-lana ebaluatzea.

– Sarrera.

Uniqualen Irakasleak Ebaluatzeko Programak, alde batetik, bere gain hartzen du, irakasle kontratatuak eta ikertzaileak hartzeko,, irakasle- eta ikerlari-lana ebaluatzea edo aurretiazko txostena egitea. Bestalde, unibertsitate ez-publikoei dagokienez, Uniqualen ebaluazioa irakaslea kontratatu aurretiazkoa izan daiteke, edo, bestela, lehendik kontratatuta dauden eta irakasle- edo ikertzaile-lanetan dabiltzan irakasleena.

Unibertsitateek eurek zehaztu behar dituzte irakasleak eta ikerlariak kontratatzeko prozesuan aplikatu beharreko baldintzak, irizpideak eta prozedurak. Uniqualek egindako ebaluazioa ez da sarrera-prozesuaren lehen fasea besterik, ondoren unibertsitateen berezko kontratazio-prozesua baitator. Unibertsitate ez-publikoetako irakasleei dagokienez, unibertsitatean hasi behar duten irakasleen hezkuntza- eta ikerketa-lana ez ezik, jada bertan irakasle- eta ikertzaile-lanetan ari diren irakasleena e5re ebaluatuko du Uniqualek. Agentziaren Etika Kodeko irizpide hauek hartu behar ditu aintzat ebaluazio-prozesuak:

• Independentzia. Aditu ospetsuz osatutako batzorde teknikoek egingo dute eskaeren balorazioa, eskatzailearen ekarpenen kalitatearen arabera aplikatuz irizpide orokorrak.

• Gardentasuna. Bermatu behar da eskatzaileek prozesua gardena dela sentitzea, baina konfidentzialtasuna arriskuan jarri gabe. Neurri hauek hartu behar dira horretarako:

• Eskaera-prozesuak egiteko, dokumentuak jasotzeko, merezimenduen ebaluazioa egiteko, txostenak bidaltzeko eta erreklamazioei erantzuteko beharrezkotzat jotzen den informazio guztia argitaratu behar da.

• Konfidentzialtzat sailkatutako dokumentu eta/edo txosten guztien konfidentzialtasuna gorde egin behar da, eta kontuz erabili ebaluazioa egiteko behar den gainerako informazioa.

• Eraginkortasuna. Prozesu bakoitzerako, ahalik eta ebaluazio-prozedura sinpleena bilatu behar da, ebaluazioaren emaitza ahalik eta lasterren emateko.

• Zuzentasuna: eskaera guztiak berdin aztertuko direla bermatu behar da. Batzordeko kideek banaka ebaluatu behar dituzte esparru bereko eskaerak eta, ondoren, kide guztiek bilera egin behar dute eskaera bakoitzaren ebaluazioaren emaitza guztien artean bateratzeko eta adosteko.

– Ebaluazio-Organoak.

Bere ebaluazio-organoen bidez jasotako eskaerak ebaluatuko ditu Uniqualek. Organo horietako (ebaluazio-batzordeak) kideek erabateko inpartzialtasunez jardun behar dute, ager daitezkeen interes-gatazkak jakitera eman behar dituzte eta, hala badagokie, ez dute parterik hartu behar prozesuan (osoan edo zati batean).

Konfidentziala da ebaluazio-prozesuan eskuratzen den informazio guztia.

Ebaluazio-Batzordeak.

Ebaluazio-batzordeak dira ebaluazio-prozesuaren koordinazio-organoa, prozedura guztiaren planifikazio-, kontrol-, eta azterketa-lanak egin eta, iritzi teknikoak ikusita, banakako behin betiko txostenak egin behar dituena.

Zazpi kide izan behar ditu ebaluazio-batzorde bakoitzak, ebaluatu behar denaren maila berekoak edo goragokoak. Gutxienez aldeko hiru ebaluazio dituzten (hamabost urteko lan-esperientziari dagokiona) eta, gutxienez, bi ikerketa-jarduera garairen (seiurteko) aitortza duten doktoreen artetik (irakasle eta/edo ikerlari) aukeratu behar dira batzordeko kideak. Unibertsitate ez-publikoetako irakasleei dagokienez, antzeko merezimenduak (kanpotik egiaztatuak) eskatu behar dira. Uniqualeko zuzendariak izendatu behar ditu, batzorde bakoitzeko kideen artetik, haietako lehendakariak eta idazkariak, zeinek kargu horiei dagozkien lanak egin behar dituzten organo horietan.

Ebaluazio-batzordeko kideek independentziaz, inpartzialtasunez eta gardentasunez bete behar dituzte beren eginkizunak, eta ez dute izan behar horrekin batera inongo ordezkaritza-kargurik Euskal Autonomia Erkidegoko unibertsitateetan. Batzordeko kideetatik hiruk, gutxienez, Euskal Herriko unibertsitateren bateko irakasleak izan behar dute. Era berean, azaroaren 13ko 192/2997 dekretuaren 5.2 artikuluak agintzen duenez, batzordeetako kideen erdiek, gutxienez, ebaluatzen den irakasleak lan egiten duen unibertsitate publiko edo pribatu berean ez dute lan egin behar, eta, otsailaren 18ko 4/2005 Legearen (Emakumezkoen eta Gizonezkoen arteko Berdintasunari buruzkoa) 3. artikuluak agintzen duenez, ahaleginak egin behar dira ebaluazio-batzorde bakoitzean sexu bakoitzak % 40ko ordezkaritza, gutxienez, izan dezan.

Ebaluazio-prozesuaren zehaztasunen eta Uniqualeko administrazio-kontseiluak hitzarmenean onartutako Ezagutza Arloen Katalogoaren arabera, eta, betiere, Agentziaren beraren estatutuetan ezarritakoarekin bat, zientziaren arlo nagusiei lotutako ebaluazio-batzordeak eratu behar dira, jakintza-arlo guztiak aintzat hartzen dituztenak:

Zientzia Esperimentalak.

Medikuntza eta Osasun Zientziak.

Irakaskuntza Teknikoak.

Gizarte eta Ekonomia Zientziak eta Zientzia Juridikoak.

Giza Zientziak.

Prozesu bakoitzaren egoera zehatzen arabera, ezagutza-arlo bakoitzeko ebaluazio-batzorde bat baino gehiago era daiteke.

Izendapena: aditu-batzordearen proposamenetan oinarrituta, batzordeko kideak Uniqualeko zuzendariak izendatu behar ditu, aurretiaz administrazio-kontseiluaren oniritzia jasota (Agentziaren estatutuetako 12.2 artikulua). Izendatutako hautagaiaren ordezkoa hautatzeko, hiru hautagai izendatu behar dira postu bakoitzeko. Hautagai guztiek hartu behar dute parte batzordeko kideak izendatu aurretiko trebakuntza-jardunaldietan. Bi urtez jardun behar dute karguan batzordeetako kideek, eta bigarren agintaldi baterako bakarrik hautatu ahal dira. Bigarren hori amaitutakoan, ezin dira berriro hautatu bi urte igaro arte kargua utzi zutenetik. Agintaldia amaitutakoan, beren eginkizunekin jarraitu behar dute, batzordeko kideek harik eta ordezkoak hautaut eta izendatu arte.

Euskal Herriko Aldizkari Ofizialean eta Uniqualen web gunean argitaratu behar dira batzordeko kideen izenak.

– Prozesuaren Deskribapena.

Prozesua hasten da deialdia -Uniqualen administrazio-kontseiluak onartuta- Euskal Herriko Aldizkari Ofizialean argitaratzen denean. Argitalpenarekin abiatuko den ebaluazio-prozesurako oinarriak ezarri behar dira deialdian, protokolo honen arabera. Urtero egin behar da ohiko deialdia, behar diren ohiz kanpoko deialdien kalterik gabe.

Unibertsitate ez-publikoetako irakasleekin egin beharreko ebaluazio-prozesua, berriz, hitzarmen bidez egin behar da, protokolo honen arabera. Dagokion unibertsitatearekin sinatuko du hitzarmena Uniqualek, Euskal Unibertsitate Sistemaren otsailaren 25eko 3/2004 Legearen arabera.

Eskaerak.

Interesatuaren eskaera, deialdiarekin batera argitaratuko den eredu arautuari egokitua, Uniqualeko zuzendariari bidali behar zaio, dagokion dokumentazioarekin batera. Historia akademikoaren kopia bat gehitu behar zaio eskaerari, deialdiarekin batera argitaratu behar den curriculum vitae eredu arautuaren arabera idatzita. Deialdi bakoitzak ezarri behar ditu horretan parte hartzeko bete beharreko formak, epeak eta dokumentazioa.

Zehaztu egin behar da, eskaeran, ebaluazioa edo txostena kontratuzko zein modalitaterako eskatzen den. Bestalde, zer eremutan eta arlotan ebaluatua izan nahi duen zehaztu behar du eskatzaileak. Kapitulu hau osatzeko, eskatzaileak, Uniqualen administrazio-kontseiluaren adostasunarekin onartu beharreko kontratu-mota bakoitzerako, Agentziako batzorde eta ebaluazio-eremuei esleitutako Ezagutza Arloen Katalogoa kontsultatu behar du.

Deialdian zehaztutako lekuetan aurkeztu behar da eskaera, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 38.4 artikuluak ezarritakoari kalterik egin gabe. Uniqualen jasotzen den eskaera bakoitza identifikazio-zenbaki batekin erregistratu behar da, identifikazio-zenbakia jarriz eskatzaile eta postu-mota bakoitzeko, eta espedientea ireki behar da sarrera-data adierazteko. Interesdunak espediente bat baino gehiago irekitzen badu (eskatzaile eta postu-mota bera), erregistro publiko batean paperean aurkeztutako lehen eskaerari dagokiona baizik ez da hartu behar kontuan.

Eskaera bakoitzean, datu hauek begiratu behar dituzte Uniqualeko langileek:

– Eskatutako kontratu-modalitateetarako legeak aurrez ezarritako baldintzak betetzen diren. Indarrean dagoen legediaren arabera, hauek dira baldintzak:

1. Irakasle osoaren modalitatea kontratatzeko ebaluazioan, doktoretza-titulua eskatzen duen unibertsitateko edozein irakasle-taldetako kide izatea, edo irakasle agregatu izatea eta, gutxienez, unibertsitateko irakasle edo ikertzaile gisa hiru urteko jarduna egiaztatzea.

2. Irakasle agregatuaren modalitatea kontratatzeko ebaluazioan, doktore-titulua edukitzea eta, gutxienez, irakasle edo ikerlari gisa hiru urtez jardun izana, doktore egin eta gero, ahal dela.

3. Irakasle atxikiaren modalitatea kontratatzeko ebaluazioan, doktore-titulua edukitzea eta egiaztatzea bi urtez, gutxienez, ez duela Euskal Herriko Unibertsitatean kontratuzko edo estatutuen araberako harremanik izan edo bekadun gisa jardun, eta, denbora-tarte horretan, unibertsitate horrekin loturarik ez duten zentroetan irakasle- edo ikerlari-lanak egin dituela edo doktore-titulua beste unibertsitateren batean eskuratu duela.

4. Unibertsitate Pribatuko Irakasle modalitatea kontratatzeko ebaluazioan, doktore-titulua edukitzea.

5. Irakasle lankide modalitatea kontratatzeko eskaera-txostenean, lizentziatu, arkitekto edo ingeniari-titulua, edo unibertsitateko diplomatu, arkitekto tekniko edo ingeniari tekniko titulua edukitzea.

6. Irakasle elkartua modalitatea kontratatzeko eskaera-txostenean, jarduera profesionala unibertsitatetik kanpokoa izatea.

7. Kontratupeko ikerlariak, ikerketako langile doktoreak eta/edo irakasle ikertzaileak kontratatzeko ebaluazioan, aipatutako kategoria bakoitzari dagozkionak.

   Baldintza horiek beti bete behar dira ebaluazioa eskatzeko ezarritako epemuga baino lehen.

– Dokumentazioak deialdian ezarritako baldintza formalak betetzen dituela egiaztatzea.

Uniqualeko Zuzendariaren erabakiaren bitartez jakinarazi behar zaie interesatuei epez kanpo jasotako eskaeren artxibatzea, baita ebaluazioa edo txostena eskatu den kontratuzko modalitaterako hautagai izateko legez ezarritako baldintzak betetzen ez dituztenena ere. Epeen barruan aurkeztutako eskariek deialdian ezarritako baldintzak betetzen ez badituzte edo prozeduraren izapideak egiteko beharrezko dokumentazioa aurkeztu gabe geratu bada, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 71.1 artikuluak agintzen duenez, eskatu behar zaio interesdunari falta diren dokumentuak ekartzeko, hamar laneguneko epean, eskaera jaso eta hurrengo egunetik hasita. Aipatutako epean falta diren dokumentuak aurkeztu ezean interesdunak, eskatzaileak atzera egin duela joko da. Uniqualeko zuzendariak hartu behar du erabakia, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 42. artikuluak agintzen duenez.

Ebaluazio-eskaerak Euskal Autonomia Erkidegoko edozein hizkuntza ofizialetan aurkez daitezke.

Ebaluazioa.

Prozesua koordinatzen duen organoa izaki, ebaluazio-batzordeak egin behar du, deialdi bakoitzaren hasieran, ebaluazio-prozesuaren planifikazio orokorra. Batzorde bakoitzak bere ebaluazio-zereginak egiteko dituen epeak zehaztu behar dira planifikazioan interesdunek Uniqualen erabakia deialdian zehaztutako gehienezko epeen barruan jasoko dutela ziurtatzeko. Batzordeak adostutako planifikazioarekin bat, eskaerak Uniqualek jaso ahala ebaluatu behar dira, denbora-ordena jarraituz.

Oro har, aurkeztutako eskaerak eskatzaileak zehaztutako ezagutza-arloari eta eremuari dagokion ebaluazio-batzordeari esleitu behar zaizkio. Hala ere, eskatzaileak zehaztutako eremua ez den beste bati esleitu ahal zaio eskaera, eta, ondorioz, aurkeztutako merezimenduak beste zientzia-eremu bati hobeto egokitzen zaizkiola irudituz gero, beste batzorde bati.

Batzordeen ebaluazioa: Uniqualeko administrazio-zerbitzuek, ebaluatu beharreko eskaerak, behar bezala ordenatuta eta sailkatuta, ebaluatzaile bakoitzaren esku jarri behar dituzte, baita eskaeren laburpen-zerrenda ere. Batzorde bakoitzeko kideek bakarka eta independenteki ebaluatu behar dituzte espedienteak, aurrez ezarritako egutegian zehaztutako epeen barruan.

Oro har, batzordeko kideek ebaluatu behar dute eskaera bakoitza. Horretarako, bakarkako azterketa eta ebaluazioa egin ostean, batzorde bakoitzeko buruak, espedienteen ebaluazio bateratua egiteko, kide guztien arteko batzarra egiteko eguna eta ordua ezarri behar ditu. Batzar horrek txosten bakarra egin behar du ebaluazio-eskaera bakoitzeko, eta ebaluazio-batzordeko buruak izenpetu. Idazkariak jaso behar ditu, bilerako aktan, ebaluazioaren jazoerak eta batzordeak egindako txosten guztiak. Batzordeen txostenek iritzi teknikoa eman behar dute, ebaluazio-irizpide bakoitzean jasotako puntuazioarekin eta iritziaren laburpen arrazoituarekin. Puntuazioa aldekoa ez bada, arrazoitu egin behar da zergatik.

Ebaluazio-eskaerei dagokienez, laburpen horrek eskatzaile bakoitzaren curriculumaren balorazio orokor motibatu pertsonalizatua izan behar du, iritzi teknikoa adieraziz eta diagnostikorako eskema bat aplikatuz. Aholkuak ere eman behar ditu, eskatzailearen indarguneak azpimarratuz eta bere etorkizuneko ibilbide profesionala hobetzeko ekintzak proposatuz. Txosten-eskaerei dagokienez, kasu bakoitzean kontratazioa onartzeko baldintzak betetzen direla egiaztatu behar du laburpenak, ez besterik.

Salbuespen gisara, ebaluazio-batzordeak Uniquali espezialisten aholkularitza eskatu ahal dio, egoki deritzonean. Era berean, batzordearen bileraren ostean interesatuari dokumentazio gehiago eskatu ahal zaio, edo beste batzorde bati esleitzeko.

Dagokion batzordeak ebaluazioa edo txostena egindakoan, Uniqualeko zuzendariari bidali behar zaio. Ebaluazioak edo txostenak, iritzi teknikoari dagokionez, lotesleak dira.

Ebazpena.

Eskaera bakoitzeko ebaluazio-ebazpen bat plazaratu behar da, eta ebaluazioaren aldeko edo kontrako iritzia edo txostenaren aldeko edo kontrako zentzua adierazi behar ditu, eta zer kontratu-modalitatetarako egiten den. Halaber, dagokion batzordeak egindako ebaluazioaren edo txostenaren laburpena erantsi behar zaio ebazpenari. Uniqualeko zuzendariak banan-banan jakinarazi behar dio interesdun bakoitzari deialdi bakoitzean eskatutako ebaluazio-ebazpenaren edukia, akta sinatu eta hamar eguneko epean.

Ebaluazioa jakinarazteko epeak ez du izan behar sei hilabetetik gorakoa, deialdian aurreikusitako eskaerak egiteko epea amaitzen denetik hasita. Interesatuari dokumentu osagarria edo kanpoko adituei aholkularitza eskatu behar bazaie edo eskaera beste Ebaluazio Batzorde bati esleitu behar bazaio, ebazpena erabakitzeko epea bertan behera geratzen da, betiere, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 42.5. artikuluak ezarritako baldintzak betetzen badira.

Hartutako erabakiak ondorioak izango ditu Euskadiko Autonomia Erkidegoko unibertsitateetan, baita beste autonomia-erkidego batzuetako unibertsitateetan ere, Uniqualek erkidego horietako ebaluazio-agentzia edo -organoekin dagokion homologaziorako eta elkar onartzeko hitzarmenik izenpetu badute.

Kontratu-modalitate jakin baterako kontrako ebaluazioa edo txostena jaso duen eskatzaileak ezin du kontratuzko modalitate bererako eskaera berririk egin, ebazpena jakinarazi eta sei hilabete pasa arte.

Eskatutako kontratuzko modalitaterako aldeko ebaluazioen eta txostenen eragina ez da iraungitzen.

Baliozkotzeak.

Irakasle Osoen eta Agregatuen kontratuzko modalitateetarako aldeko ebaluazioak automatikoki gaituko du eskatzailea Irakasle Atxikia eta Unibertsitate Pribatuko Irakasle modalitateetan kontratatua izateko.

Irakasle ikertzaile modalitaterako aldeko ebaluazioak automatikoki gaituko du eskatzailea Irakasle Oso gisara kontratatua izateko. Ikerketarako langile doktore modalitaterako aldeko ebaluazioak automatikoki gaituko du eskatzailea Irakasle Agregatu gisa kontratatua izateko.

Unibertsitateko Katedratiko Taldeko edo Unibertsitateko Irakasle Titular Taldeko kide izateak edo talde horietako baterako gaitua izateko egoera administratibo eta akademikoan egoteak automatikoki gaituko du eskatzailea deialdi honetan araututako edozein modalitatetan kontratatua izateko.

Unibertsitateko irakasle taldeetako kide diren irakasleek edo Unibertsitateko Lege Organikoaren arabera talde horietan gaituak daudenek eta ebaluazioa edo txostena eskatzen duten modalitateetan kontratatuak izateko aukera izan nahi dutenek horretarako ebaluazioa eskatu behar dute, araututako eskaera-eredua aurkeztuz, baita eredu arautuari egokitutako curriculum vitae-a ere. Era berean, unibertsitateko irakasle-funtzionario maila duela edo gaitua dagoela egiaztatzen duen edozein dokumentu ekarri behar du, Unibertsitateetako Lege Organikoak agintzen duenez, baita doktore-titulua duela egiaztatzen duen dokumentazioa ere. Dokumentazioa originalekin erkatu behar da, Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 38.5. artikuluan aipatzen diren edozein erregistrotan.

Errekurtsoa.

Uniqualeko ebazpenek bide administratiboa agortzen dute, eta, beraz, berraztertzeko errekurtsoa zuzendariari berari aurkeztu behar zaio, edo administrazioarekiko auzi-jurisdikzioari. Berraztertzeko errekurtsoa aurkezten denean, lehen ebaluazioa egin zuen ebaluazio-batzordeak espediente osoa berraztertu behar du. Batzordeak errekurtsoa aurkeztu duenaren alegazioak, lehen ebaluazioko txostena eta horien bien dokumentazioa aztertu behar ditu, eta lehen biei buruzko txostena egin. Uniqualeko zuzendariak, batzordearen txostena ikusirik, berraztertzeko errekurtsoari erantzun egin behar dio, eta erabaki hori interesdunari jakinarazi behar zaio, ezartzen denetik hilabeteko epean.

– Ebaluazio-Irizpideak.

Ebaluazio-irizpideak eta horiei egin lekizkiekeen aldaketak, Uniqualeko administrazio-kontseiluak onartu eta gero eta Ikerketaren Euskal Kontseiluaren aurretiazko txostenarekin, Eusko Jaurlaritzak dekretu bidez onartu behar ditu.

Aurrekoa alde batera utzi gabe, ebaluazio-irizpideei ahalik eta publizitate gehien egin behar zaie, baita bere kuantifikazio orokorrei, ebaluazio-irizpide horiek aplikatzeko printzipioei eta norabideei eta aldeko ebaluazioa eta txostena jasotzeko bete behar diren baldintzei ere. Zehazki, Hezkuntza Sailaren (www.hezkuntza.ejgv.euskadi.net) eta Uniqualen (www.Uniqual.org) web guneen bidez argitaratu behar dira.

Ebaluazio-irizpide horiekin batera, interesdunaren historia akademikoko merezimendu bakoitza egiaztatzeko zer dokumentazio aurkeztu ere zehaztu behar da.

Vitoria-Gasteiz, 2008ko irailaren 1a.

Uniqualeko zuzendaria,

ANA FERNANDEZ SAINZ.