Master ofizialak ikasi nahi dituzten ikasleek baldintza hauek bete behar dituzte:

1. Titulu hauetako bat izatea: lizentziatua, ingeniaria, arkitektoa, diplomatua, arkitekto teknikoa edo ingeniari teknikoa.

2. Master ofizialaren proposamenean ezarritako baldintza espezifikoak betetzea.

3. Graduondoko programa ofizialean onartua izatea, arautegi honetako 2. artikuluan eta hurrengoetan zehaztutako prozedurari jarraiki.

   Graduondoko ikasketa ofizialetan sartzeari buruzko 56/2005 Errege Dekretuko 3.1. artikuluan aipatutako salbuespena ez da aplikatuko graduko titulazioak onartu arte.

1. – Master ofizial baten matrikula egiteko prozesua baino lehen, izena emateko epea irekiko da. Izena emateko prozesuan ikasleak hautatzeko erabiliko diren irizpideak master ofizial bakoitzean ezarritakoak izango dira, arautegi honetako 4. artikuluak 1. atalean dioen moduan.

2. – Masterraren arduradunak argitara emango ditu irizpide horiek masterra irakatsiko duen ikastegiaren, sailaren edo institutuaren iragarki oholean, eta bertan egongo dira jarrita eskariak aurkezteko epea amaitu artean. Masterraren arduradunak, era berean, ikastaroak noiz eta non emango diren argitaratuko du, eta bai eskolen ordutegia ere.

3. – Izena eman nahi duen ikasleak, lehenik eta behin, aukeraturiko master ofizialak zehaztuko duen idazkaritzan eman beharko du izena horretarako prestatutako inprimakia erabilita eta horietako bakoitzerako ezarriko den epearen barruan.

   Inprimakia bete ondoren, hauek dira aurkeztu beharreko dokumentuak izena emateko:

   1. Ziurtagiri akademikoa, titulazioko irakasgai guztietako kalifikazioak eta deialdia adierazita.

   2. Master ofizialak eskatutako baldintzak.

   3. Ikasleak eginiko lan, artikulu edo argitalpenak.

   4. Beste meritu batzuk.

      Eskatutako dokumentuak master ofizial bakoitzak zehaztuko duen idazkaritzan aurkeztuko dira.

Ikasleok ez dute homologatu beharko atzerriko titulua graduondoko ikasketa ofizialetan sartu ahal izateko. Halakoetan, titulua eta gainerako dokumentuak legeztatu egin beharko dira eta, behar izanez gero, itzulpen ofiziala egingo da EAEko hizkuntza ofizialetara. Arautegi honi erantsi zaizkio dokumentuak legeztatu eta itzultzeko argibideak.

Dokumentazio hori hau da:

1. Atzerriko titulua legeztatuaren fotokopia konpultsatua, edo fotokopia eta jatorrizkoa parekatzeko.

2. Ziurtagiri akademikoa, karrerako irakasgai guztietako kalifikazioak eta deialdia adierazita.

3. Master ofizialak eskatutako baldintzak.

4. Ikasleak eginiko lan, artikulu edo argitalpenak.

5. Beste meritu batzuk.

   Atzerriko titulua homologatzeke daukaten ikasleak onartzeko, beharrezkoa izango da Doktoregoko Azpibatzordearen onespena.

   Master bakoitzeko arduradunak Doktoregoko Azpibatzordera bidali beharko du atzerriko titulua homologatzeke daukaten ikasleen dokumentazioa. Izena emateko epea bukatu eta handik 10 egunera bidali beharko da dokumentazioa, beranduenez.

1. – 2007-2008 ikasturtean graduondoko programa ofizialak osatu eta onartzeko prozedurari buruzko arautegiko 1. kapituluko 1. artikuluko 7. atalaren arabera (Gobernu Kontseiluak 2006ko maiatzaren 10ean onartutako arautegia), master bakoitzeko batzorde akademikoak hautatuko ditu ikasleak, masterra justifikatzeko memorian merituak ebaluatzeko zehaztuta dauden irizpideei jarraiki.

2. – Hautatutako ikasleen zerrendak argitaratzea:

   Ikasleak hautatzeko prozesua behin bukatuta, master ofizialaren arduradunak gestio hauek egin beharko ditu:

   • Ikasle onartuen eta ez onartuen behin-behineko zerrendak argitaratu, ikasleak onartzeko epea bukatu eta, gehienez ere, 5 lan eguneko epean.

   • Erreklamazioak aurkezteko epea ezarri (gehienez ere hurrengo 4 lau egunak).

   • Erreklamazioak aurkezteko epea amaitu eta hurrengo sei lan egunen barruan, ikasle onartuen behin betiko zerrenda argitaratuko du, horretarako dagoen ereduari jarraiki. Gora jotzeko errekurtsoa aurkeztu ahal izango zaio errektoreari behin betiko zerrenden kontra, zerrendak argitaratu eta biharamunean hasiko den hilabeteko epearen barruan.

   • Masterretan onartutako ikasle guztiek tutore bana izango dute, masterreko irakaslea izango dena.

   • Tutore horrek zehaztuko du ikasle bakoitzak egin beharreko ikasketa-plana. Horrez gain, jarraibideak emango ditu, ikasle bakoitzaren aholkularitza akademiko eta profesionalerako.

   • Tutoreak dokumentu batean jasoko du ikasle bakoitzak ikasturtean egin beharreko ikasketa-plana, kredituak eta gaiak adierazita. Dokumentu hori sinatu egingo du eta ikasle bakoitzari emango dio, matrikula egin dezaten.

   • Dena dela, ikasleek, onartuak izateko, matrikula egin beharko dute.

   • Master bakoitzeko arduradunak Doktoregoko Azpibatzordera bidali beharko du atzerriko titulua homologatzeke daukaten ikasleen dokumentazioa. Izena emateko epea bukatu eta handik 10 egunera bidali beharko da dokumentazioa, beranduenez.

Master eta Doktoregoko Atalak ezarritako prozedurari jarriki egingo da matrikula. Ikasleek dokumentu hauek aurkeztu beharko dituzte:

1. – Tutoreak sinatutako dokumentua, ikasleak ikasturtean egin beharreko ikasketa-plana zehaztuko duena, kredituak eta gaiak adierazita.

2. – NAN edo pasaportearen fotokopia.

3. – Graduondoko ikasketetarako sarrera tituluaren fotokopia konpultsatua, edo fotokopia eta jatorrizkoa, biak parekatzeko; edo titulua eskatu izanaren agiria.

   Homologatu gabeko atzerriko tituluen kasuan, titulua eta gainerako dokumentuak legeztatu egin beharko dira eta, behar izanez gero, itzulpen ofiziala egingo da EAEko hizkuntza ofizialetara.

4. – Ikaslearen txartela lortzeko, argazki bat aurkeztu beharko du ikasleak, eta txartel hori emateko beharrezkoa den informazioa bete.

5. – Tasak ondoko kontu hauetako batean sartzeko beharrezkoak diren bankuko dokumentuak betetzea:

   Araba:

   UPV/EHU. Graduondoko Ofizialen Tasak

   2097-0178-14-0018349532

   Bizkaia:

   UPV/EHU. Graduondoko Ofizialen Tasak

   2095-0260-90-9107713464

   Gipuzkoa:

   UPV/EHU. Graduondoko Ofizialen Tasak

   2101-0381-01-0012143624

6. – Tasen murrizketa edo salbuespenerako eskubidea izanez gero, hori egiaztatuko duten agiriak (8. artikuluan aipatuak).

7. – 28 urtetik beherako ikasle guztiei eskola asegurua kobratuko zaie. 28 urtetik gorako ikasleek, berriz, asegurua egin beharko dute nahitaez. Arautegi honetako 11. artikuluak dioenez, nahitaezko aseguru hori unibertsitatearen bidez egiteko aukera egongo da.

   Matrikula aldatu nahi izanez gero, eskari arrazoitua aurkeztu beharko da, eta masterreko tutoreak eta arduradunak baimendu beharko dute. Batzorde akademikoak baimena ematen ez badu, erreklamazioa aurkeztu ahal izango zaio graduondoko batzorde akademikoari eta, beharrezkoa izanez gero, UPV/EHUko Doktoregoko Azpibatzordeari.

1. – Bi epe egongo dira matrikula egiteko, eta egutegiak Doktoregoko Azpibatzordeak onartuko ditu. Matrikula egiteko lehenengo epea irailean hasiko da, eta bigarrena bigarren lauhilekoa hasi baino lehen.

   Salbuespen moduan, Master eta Doktoregoko Ataleko arduradunak ontzat ematen badu, eta behar bezala justifikatutako arrazoiengatik, UPV/EHUko Doktoregoko Azpibatzordeak baimena eman dezake matrikula arautegi honetan zehaztutako epeetatik kanpo egiteko.

   Matrikula egiteko epea amaitu ondoren, Master eta Doktoregoko Atalak Doktoregoko Azpibatzordeko kideei jakinaraziko die master ofizial bakoitzean zenbat ikasle matrikulatu diren eta eskolak noiz hasiko diren. Doktoregoko Azpibatzordeak aztertu egingo ditu aurkeztutako dokumentuak, eta masterrak irakasteko baimena emango du. Azken bi ikasturteetan 10 ikasle baino gutxiago izan dituzten masterrak UPV/EHUren eskaintzatik kanpo gera daitezke. Jarduera akademikoa ez da hasiko matrikula egiteko epea bukatu arte.

1. – Ikasleek unibertsitateari ordaindu beharrekoa Eusko Jaurlaritzako Hezkuntza, Unibertsitate eta Ikerketa Sailak urte bakoitzerako zehaztutakoa izango da.

2. – Prezio publiko murriztuak ordaintzeko edo preziook ordaintzetik salbuetsita egoteko eskubidea izateko, matrikula egiteko epearen barruan bete beharko dira horretarako baldintzak.

3. – Ikasleak epeka ordaintzea erabakitzen badu, Eusko Jaurlaritzak prezio publikoei buruzko aginduan zehaztutako epeak errespetatu beharko ditu.

4. – Bigarren matrikulaldian eta beka ukatzen denean, matrikula ezin izango da zatika ordaindu.

5. – Eskola asegurua, ikaslearen txartela eta gainerako tasa administratiboak epe bakarrean ordainduko dira (matrikula egiterakoan).

6. – Kredituak baliozkotzeko kontuan hartuko da arautegi honetako II. kapitulua. Dena dela, kreditu horiei dagozkien prezioak ordaindu egin beharko dira, Eusko Jaurlaritzako Hezkuntza, Unibertsitate eta Ikerketa Sailak ikasturte bakoitzerako ezarriko duenaz bat.

7. – Aurkeztutako matrikulak behin-behinean onartuko dira, UPV/EHUko Doktoregoko Azpibatzordeak masterra irakasteko baimena eman arte. Matrikula aurkezten denetik hiru hilabete igarotzen badira Master eta Doktoregoko Atalak horren kontra ebatzi eta jakinarazpenik eman barik, matrikula onartu egin dela ulertuko da.

1. – Ikasle bakoitzak ordaindu beharreko diru-kopurua bere egoeraren araberakoa izango da, matrikula mota hauen barruan:

   1. Ohikoa. Tasa guztiak ordaindu beharko dira, hau da, ikasleek ez daukate prezio publikoak murriztu edo ez ordaintzeko eskubiderik.

   2. Familia ugari orokorra: % 50eko salbuespena, eskola-asegurua izan ezik, ordaindu behar bada (1982-08-17ko Agindua, 2. artikulua; 1982-08-17ko BOE). Familia ugari bateko kide izatea aldundiak edo erakunde eskudunak emandako agiri ofizialaren fotokopia konpultsatu baten bidez egiaztatuko da, edo fotokopia eta jatorrizkoaren bidez, biak parekatzeko (25/1971 Legeko 7. artikulua, 1971-06-24ko BOE). Agiri hori iraungi gabe egongo da eta, iraungita badago, agiri hori berritzeko tramiteak egiten ari dela egiaztatu beharko du ikasleak.

   3. Familia ugari berezia: % 100eko salbuespena, eskola-asegurua izan ezik, ordaindu behar bada (1982-08-17ko Agindua, 2. artikulua; 1982-08-17ko BOE).

      Familia ugariko kideek aurreko atalean adierazitako moduan egiaztatuko dute egoera hori.

   4. Bekadunak. Ikasle bekadunak, master ofizialen matrikularako, Euskal Autonomia Erkidegoak eta Hezkuntza eta Zientzia Ministerioak izendatuak izango dira.

   5. Terrorismoaren biktimak. Ekintza terrorista baten biktimak, euren ezkontideak, seme-alabak eta euren ardurapean legez hartuta dauzkatenak salbuetsita egongo dira unibertsitateko zerbitzu akademikoengatik inongo prezio publikorik ordaintzetik.

      Ekintza terroristen biktimek, izaera hori egiaztatzeko, Eusko Jaurlaritzako Herrizaingo Sailak, Espainiako Barne Ministerioak edo Espainiako gobernuaren ordezkaritzek emandako agiria aurkeztuko dute.

   6. Ikasle gutxitu edo ezinduek, organo eskudunak onartuta ezintasunaren maila % 33tik gorakoa dutenek, ez dute tasarik ordaindu beharko.

      Egoera hori aldundiak edo erakunde eskudunak emandako agiriaren bidez egiaztatu beharko da.

2. – Aipatutako kasuetan baino ezingo dira murriztu edo ez ordaindu graduondoko programa ofizialen matrikulako tasak. Dena dela, ondorengoek egin ahal izango dute eskaria unibertsitateko organoen laguntzak jasotzeko: funtzionarioek edo lan kontratudunek; haien ezkontideek edo bikotekideek; agiri fede emaile bidez egiaztatzen badute egitatezko bikote direla; eta haien kargura dauden seme-alabek.

1. – Aurkeztutako matrikulak ordaintzen diren unean hartuko dira onartutzat, baina matrikula aurkeztu denetik hiru hilabete igarotzen badira Master eta Doktoregoko Batzordeak horren kontra ebatzi eta jakinarazpenik eman barik, matrikula onartu egin dela ulertuko da, eta erabaki irmoa izango da ondorio guztietarako.

2. – Unibertsitateak atzera botatzen badu ikaslearen matrikula, arrazoiak azaldu beharko dira eta kasu horretan baino ez dira itzuliko interesatuak ordaindutako prezio publikoak. Matrikula atzera bota duen ebazpen horren aurka gorako errekurtsoa jarri ahal izango diote interesdun guztiek UPV/EHUko errektoreari, edo berak eskumenak emango dizkion agintariari.

   Matrikula baliogabetzeko arrazoiak honako hauek dira:

   1. Matrikula ez ordaintzea: tasak ez ordaintzeagatik matrikula baliogabetzen zaien ikasleek galdu egingo dute ordura arte ordaindutako dirua, eta ordaintzeko geratzen zaiena zortzat hartuko da, unibertsitatearen alde. Erabaki batean zehaztuko da zorra zenbatekoa den, eta horren berri emango zaio ikasleari. UPV/EHUrekin zorrak dituztenek ezingo dituzte erabili unibertsitatearen zerbitzuak, bereziki honako hauek: ezingo dute egin beste ikasketarik, ez zaie emango titulurik edo ziurtagiririk, ezta ere espediente akademikoari buruzko informaziorik, eta ezingo dute egin beste matrikularik. UPV/EHUri zor dioten dirua ordaindu bezain laster berreskuratuko dituzte eskubideok. Eskubide horiek indarrean dagoen ikasturtean berreskuratu nahi dituzten ikasleek, urte horretako ekainaren 1a baino lehen ordaindu beharko dute diru kopurua.

   2. Matrikula egiteko eskatzen den baldintzaren bat ez betetzea: eskakizuna egingo zaio interesatuari hamar eguneko epean akatsa zuzentzeko edo gainerako tramiteak bideratzeko, azaroaren 26ko 30/1992 Legeko 71.1 artikuluan adierazitako moduan.

   3. Beste alde batetik, interesatuak horrela eskatuz gero baliogabetuko da matrikula, baina ordaindutako diru kopurua ikastaroa oraindik hasi ez denean baino ez da itzuliko, edota ikastegi, sail edo institutu antolatzaileak arautegi honetako aurreko artikuluetan ezarritako baldintzaren bat betetzen ez duenean.

1. – UPV/EHUko graduondoko ikasketa ofizialean matrikulatuko diren ikasle guztiek ordaindu beharko dute eskola-asegurua. Eskola-aseguruak 28 urteetara arte babesten ditu ikasleak.

2. – Eskola-aseguruak ere babesten ditu atzerriko ikasleak, baldin eta elkarrekikotasun hitzarmena eginda badago, adierazi gabe edo beren-beregi, euren herrialdeekin.

Unibertsitateak borondatezko asegurua dauka kontratatuta, horren beharra izan dezaketen ikasleentzat. Aseguru hori kontratatu nahi duten ikasleek zuzenean jo behar dute kasuan kasuko aseguru etxera.

Egindako ikastaro eta mintegien ziurtagiriak emateko eskaerak leku hauetan aurkeztuko dira: Master eta Doktoregoko Atalean (Leioako Campusa) eta horretarako egongo diren bulegoetan. Hauek dira aurkeztu beharreko dokumentuak.

• Behar bezala beteriko eskaria.

• Kasuan kasuko tasak ordaindu direla egiaztatzen duen ordainagiria. Tasen salbuespenerako eskubidea duten ikasleen kasuan arautegi honetako 8. artikulua hartuko da kontuan.

Graduondoko titulu ofizialak eta ziurtagiriak ematearren ordaindu beharreko tasak Eusko Jaurlaritzako Hezkuntza, Unibertsitate eta Ikerketa Sailak zehaztutakoak izango dira.

Tasa horien ordainketa arautegi honetako 5. artikuluan adierazitako kontuetako batean egingo da.

Master ofizialen BGGei dirua emango zaie aurrekontutik, ezarriko diren parametroen arabera, masterraren gastuei aurre egiteko. Ekitaldi ekonomikoan zehar kanpoko deialdietatik etor daitezkeen diru-laguntzak masterretako diru-sarreren aurrekontuan sartuko dira.

Masterraren irakasle arduradunak hitzarmena egiten badu erakunde publiko edo pribaturen batekin diru-laguntzak lortzeko, diru hori UPV/EHUren aurrekontuen kontuan sartzeko eskatuko dio. Ondoren, jakinaren gainean jarriko du Master eta Doktoregoko Atala, diru-laguntza jasoko duela egiaztatzen dituen dokumentuak aurkeztuta. Master eta Doktoregoko Atalak, dokumentuak aztertu ondoren, Kontabilitate Zerbitzura bidaliko ditu, kontabilizatu eta aurrekontuan jasotzeko.

Master ofizialaren BGGaren aurrekontua masterreko arduradunek gestionatuko dute.

Master ofizialen irakaskuntzako gastuak guztiz ordaindu beharko dira master bakoitzak bere aurrekontuan jasoko duen diru-kopuruarekin. Gastuen gestioa unibertsitatearen aurrekontuei buruzko arau orokorretara lotuko da, kontuan hartuta ondoko hauek:

1. Gastu arruntak kasuan kasuko kontzeptura atxikiko dira, unibertsitatearen kontuen planaren arabera.

2. UPV/EHUkoak ez diren langileen ordainketak ez ohiko finantziazioaren bidez egingo dira (kanpoko ekarpenak, diru laguntzak...), eta kasu bakoitzean aplikagarria izango den gestiorako araudiaren bidez arautuko dira.

   Aipatutako langileei gehienera ere ordainduko zaizkien diru kopuruak honako hauek izango dira:

   1. Masterrean eskolak ematearren, 120 euro orduko arte.

   2. Bidaiak, joan-etorriak eta mantenua justifikatzeko, berriz, aurrekontua gestionatzeko UPV/EHUn indarrean egongo den arautegiak dioena beteko da.

3. Erositako material inbentariagarria gastuen kasuan kasuko kontzeptuan kontabilizatuko da eta unibertsitatearen ondarean sartuko da. Horrexegatik, inbentario ofizialean agertu beharko da, arlo horretako arautegiak dioenaz bat.