1. – Hauek izango dira Ikastegiko Batzarraren osakideak: dekanoa, idazkari akademikoa, ikastegiko administratzailea eta 51 kide Fakultateko taldeen artean aukeratuak eta era honetara banatuak:

   • Irakasle titularrak eta katedradunak: 26.

   • Ikasleak: 10.

   • Administrazio eta Zerbitzuetako Pertsonala: 6.

   • Irakasle kontratatuak 9.

   • Guztiak: 51.

2. – Dekanordeak, batzarreko berezko kide dira. Ikastegiko atalei atxikita dauden ataletako koordinatzaileak batzarreko kide izango dira, eta hitza eta botoa izango dute. Ikastegiari atxikita ez dauden ataletako koordinatzaileek, berriz, bileretan parte hartu ahal izango dute, eta hitza izango duten arren, ez dute botorik izango.

   Dekanoak, dekanotza taldeko kideen izendapenak proposatzean, honako hau bete beharko du: Fakultateko Batzarreko kideen % 51 irakasle funtzionarioak izan daitezela.

3. – Fakultateko Batzarreko kide hautatuak lau urterik behin aldatuko dira. Salbuespena ikasleen ordezkariak izango dira, horiek urtero aldatuko baitira.

4. – Fakultateko Batzarreko kideak hautatzeko Estatutuek xedatutakoa eta UPV/EHUko Hauteskunde Arautegi Orokorrean zehaztutako prozedura bete beharko da.

1. – Fakultateko Batzarra da kide anitzeko ohiko gobernu organoa fakultatean.

2. – Fakultateko Batzarrak ikastegiaren bizitza akademikoan eragina daukaten oinarrizko erabaki guztiak hartu behar ditu, eta batez ere honakoak egin:

   1. Fakultatearen arautegia prestatu eta Gobernu Kontseiluari proposatzea, hark onar dezan.

   2. Dekanoa hautatzea.

   3. Gobernu-organoei fakultateko irakasleen eta administrazio eta zerbitzuetako langileen plantillako beharrizanak aurkeztea.

   4. Unibertsitateko planetan biltzen diren helburuak fakultatera egokitzeko plana onartzea.

   5. Fakultateko Batzarrak ohiko bileran eztabaidatu eta bozkatuko ditu urteko memoria, eginkizun plana eta urteko txosten ekonomikoa. Dokumentu horiek dekanoak aurkeztuko ditu bileran. Memoria eta eginkizunen plana behin onartuta, campuseko batzarrari eta Gobernu Kontseiluari bidaliko zaizkio, jakitun egon daitezen.

   6. Hizkuntza normalkuntzako planak betetzeko eta planoi jarraipena egiteko ikastegiak dauzkan premien memoriak aurkeztea Campuseko Errektoreordetzari, hark errektoreari edo, hala dagokionean, Gobernu Kontseiluari bidera diezazkion.

   7. Fakultateari atxikitako irakasle lanpostuen eskariez iritzia ematea.

   8. Ikasketa planak eta euren aldaketak egin eta proposatzea Gobernu Kontseiluari, bai eta titulazioak ezarri, aldatu eta kentzeko proposamenak ere.

   9. Irakasteko behar diren azpiegituren planak edo irakaskuntzan nahiz ikerkuntzan sortutako bestelako premien planak aztertu eta onartzea, kontuan hartuta ikastegiari atxikitako sailen iritzia.

   10. Ikastegiak eskaintzen dituen ikasketen kalitatea aldiro ebaluatuko dena bermatzea, eta unibertsitatearen zerbitzu publikoa hobetzeko neurriak proposatzea.

   11. Bere zereginak betetzeko egoki diren batzordeak eratzea.

   12. Irakasleen eta ikasleen ordezkaria izendatzea Campuseko Batzarrerako. Ikasleen ordezkaria izendatzeko proposamena fakultateko Ikasleen Kontseiluak egingo du.

   13. Fakultateak, beharrezkoa izanez gero, bere esker ona adierazteko erabiliko dituen moduak zabaldu eta arautzea.

   14. Fakultateko Batzarrari dagokio fakultatean sailak sortu, aldatu edo kentzeko txostena Gobernu Kontseiluari aurkeztea.

   15. Estatutuek eta beroriek garatzen dituzten arauek bere gain uzten dituzten gainerako eginkizun guztiak, edo UPV/EHUko beste gobernu organoek eskuordetzen dizkionak.

Honakoak izango dira Batzorde Iraunkorreko kide: dekanoa edo hark bere ordez izendatzen duen dekanordea, eta Fakultateko Batzarreko hamar kide, talde bakoitzak bere kideen artetik aukeratuak eta kontuan izanda taldeek Fakultateko Batzarrean duten banaketa bera izan behar dutela batzorde honetan, hau da:

• Irakasle titularrak eta katedradunak: 5.

• Ikasleak: 2.

• Administrazio eta Zerbitzuetako Pertsonala: 1.

• Irakasle kontratatuak: 2.

  1. – Fakultateko Batzarrak Batzorde Iraunkorrari eskuordetu ahal izango dizkio bere eginkizunak. Edozelan ere, Fakultateko Batzarrak ezin izango ditu eskuordetu UPV/EHUren Estatutuetako 276. artikuluko lehen ataleko a), b), i), eta j) paragrafoetan aipatutako eginkizunak.

  2. – Fakultateko Batzarreko berezko kideek Batzorde Iraunkorraren bileretan parte hartu ahal izango dute, hitz egiteko eskubidea baino izango ez duten arren. Edozelan ere, horrek ez die eragotziko batzordeko kide hautatu izango balira izango lituzketen eskubideei.

  3. – Batzorde Iraunkorreko hiru kideren ustez bilerako aztergaia garrantzia handikoa bada, eskaria egin ahal izango dute eztabaida eten eta Fakultateko Batzarra biltzeko deia egiteko, batzarrak erabaki dezan gai horren inguruan.

  4. – Batzorde Iraunkorrerako deia dekanoak egingo du, dekanoak berak bere kabuz edo batzordeko hiru kideren eskaerari jarraituz. Batzarreko idazkariak bideratuko ditu bilerarako deiak, aurrerapen nahikoaz eta, edonola ere, bilera baino gutxienez hiru egun baliodun lehenago.

1. – Akademia Antolakuntzako eta Ikasketak Baliozkotzeko Batzordea Batzordearen burua dekanoa izango da, edo hark bere ordez izendatzen duen pertsona. Ikastegian irakasten diren titulazioetako irakasle eta ikasleen ordezkariek osatuko dute batzordea, Fakultateko Batzarrerako zehaztutako ehunekoetan, eta ez da izango beharrezkoa Ikastegiko Batzarreko kide izatea beste batzorde honetan aritzeko. Fakultateko zuzendaritzak bermatuko du fakultateko kasuan kasuko bulegoak aholkularitza teknikoa emango diola batzordeari.

   Akademia Antolakuntzako eta Ikasketak Baliozkotzeko Batzordeak, eskuordetuko zaizkion eginkizunez gain, ikasketak baliozkotzeko eta aukera askeko kredituak amortizatzeko ikasleek aurkeztuko dituzten eskariak ebatziko ditu, indarreko legeriari jarraiki. Batzorde horrek hartutako erabakien aurkako errekurtsoak aurkeztu ahal izango zaizkio errektoreari.

2. – Euskarako Batzordea parte-hartze eta aholkularitza organoa izango da. Batzorde horren helburua izango da euskararen erabilera bultzatzea fakultatean, EHUren plangintza orokorrari jarraiki. Horrela, kontuan hartuta berdintasun eta kalitate baldintzak, euskararen normalizazioa sustatuko duten neurriak aztertu eta proposatuko dizkio ikastegiko batzarrari. Fakultateko AZPkoen eta bertan irakasten diren titulazioetako irakasle eta ikasleen ordezkariek osatuko dute batzordea, Fakultateko Batzarrerako zehaztutako ehunekoetan, eta ez da izango beharrezkoa Fakultateko Batzarreko kide izatea batzorde honetan aritzeko. Batzordeak euskaraz jardungo du.

1. – Bileretarako deiak ohikoak eta ezohikoak izango dira.

2. – Bileretarako deiak, oro har, ohikoak izango dira. Fakultateko Batzarrak ohiko bilera bi egingo ditu seihileko bakoitzean.

3. – Ezohiko bilera egingo da bileran aztertuko den gaiak hala eskatzen duenean eta, halaber, arautegi aplikagarriak xedatutako kasuetan. Ezohiko bileretako aztergaien zerrendan ez dira agertuko aurreko akten onespena eta galde-eskeak izeneko aztergaiak.

4. – Presazko bilerak ezohikoak izango dira eta deia gutxienez 24 ordu lehenago egin beharko da. Halakoetan, bilera egiteko arrazoia benetan premiazkoa dela onartu beharko da bileraren hasieran. Berresten ez bada, bilera bertan behera geratuko da besterik gabe.

1. – Kide anitzeko organoetako buruek egin behar dute kasuan kasuko organoaren bilerarako deia.

   Dena dela, kide anitzeko organoko kideen % 25ek hala eskatzen badute, bilerarako deia egin beharko da. Bilera ezohikoa izango da eta gehienera ere zazpi egun balioduneko epean egingo da, eskaera egiten denetik hasita.

2. – Bilerarako deia organoko idazkariak bideratuko du, denbora nahikoarekin eta, edonola ere, bileraren data baino hiru egun baliodun lehenago. Deialdian adieraziko da bilera non egingo den, zer ordutan, eta zeintzuk gai aztertuko diren bertan. Organoko kideek denboraz eskuratu beharko dituzte aztergaiei dagozkien dokumentuak eta, edonola ere, bileraren data baino 24 ordu lehenago.

3. – Edonola ere, aztergaiak osatzen dituzten puntuak zehatz-mehatz jasoko dira deialdian. Puntu horien artean agertu beharko dira organoko kideen % 10ek, gutxienez, behar den garaian eta moduan eskatutakoak. Aztergaietan agertzen ez diren puntuei buruzko erabakirik ezingo da hartu; baina organoko kideen bi heren baino gehiago badaude bileran, eta botazioa eginda gehiengo osoak gaia premiazkoa dela uste badu, erabakia hartu ahal izango da.

4. – Organoak jarduera daukan egoitzetan eta gainerako tokietan eman beharko da argitara deialdia, organoko kideei bilerarako deia egiten zaien egun berean, jende guztia jakinaren gainean egon dadin.

1. – Kide anitzeko organoko kide izatea norberari dagokion ezaugarria da eta ezin da beste inoren gain utzi. Estatutuetako 228. artikuluan aipatutako egoeretan utziko dio organoko kide batek kide izateari.

2. – Organoa behin eratuta, hutsik geratuko diren lekuak kasuan kasuko zerrendetako ordezkoek beteko dituzte. Aipatutako irizpideari jarraitu ondoren bete gabe geratzen den plaza-kopurua talde bateko kideen % 50 baino handiagoa edo organoko kideen % 30 baino handiagoa bada, hauteskunde partzialak egingo dira. Modu horretara hautatuak kide izango dira agintaldia amaitu arte.

1. – Kide anitzeko organoetako kideek organoen bileretara joateko eskubidea eta joan beharra daukate, eta arautegi honek betearazten dizkien eginkizunak betetzekoa. Bileretara joanez gero, organoetako kideek ez dituzte unibertsitateko gainerako eginkizunak bete behar, baina kasuan kasuko organoek beharrezko neurriak hartu behar dituzte betebehar horiek bete egiten direla eta zerbitzua eman egiten dela bermatzeko.

2. – Kide anitzeko organoetako kideek eskubidea dute beren eginkizunak aurrera eramateko beharrezkoa izan dezaketen dokumentazioa eta informazioa eskatu eta eskuratzeko. Eskaria, edonola ere, erregistroan aurkeztutako agiri bidez egin behar dute.

1. – Kide anitzeko organoak balioz eratzeko beharrezkoa izango da kideen gehiengo osoa egotea bertan lehen deialdian; hori lortu ezean, kideen heren bat, gutxienez, bigarren deialdian. Lehen eta bigarren deialdiaren artean egon beharreko tartea 30 minutukoa izango da. Edonola ere, organoko burua eta idazkaria beti egon beharko dira edo, bestela, beren ordezkoak.

2. – Botoa kide anitzeko beste kide baten esku utzi ahal izango da. Kide anitzeko organoko kide bakoitzak beste baten ordez baino ezin izango du eman botoa. Organoa eratzeko quorumari eta dekanoa aukeratzeko bozketari dagokienez, ez dira kontuan hartuko eskuordetutako botoak.

   Kideek idatziz adierazi behar dute botoa eskuordetu egin dutela, eta idatzi hori bilerako aktari erantsi behar zaio.

3. – Organoak bigarren deialdian eratzeko beharrezko quoruma bozketa guztietan da beharrezkoa.

1. – Kide anitzeko organoaren buruak bilera behar bezala gara dadila bermatuko du eta, horretarako arrazoirik egonez gero, bertan behera utzi ahal izango du.

2. – Eztabaidak aztergaiei jarraituz egingo dira. Dena dela, beharrezkoa izanez gero, kide anitzeko organoak bileraren ordena aldatzea erabaki dezake, organoko buruak proposamena egin ondoren.

3. – Organoko buruak, beharrezko ikusten badu, eztabaidaren denbora mugatu ahal izango du, bai eta gaiaren botazioa egin aurretik egon daitezkeen parte hartzeen kopurua ere.

4. – Kide anitzeko organoetako kideek aktan agerrarazi ahal izango dute beren botoa eta horren azalpena. Azalpen hori idatziz eman beharko dute botazioa egitean. Unibertsitateko beste organo batzuei egindako proposamenak badira, kideen boto partikularrak beti agerraraziko dira haiekin batera.

5. – Kide anitzeko organoko buruak organoko kide ez diren pertsonak gonbidatu ahal izango ditu bileretara, egoki deritzonean, aztergaietako punturen batekin zerikusia daukan iritzia edo informazioa kide anitzeko organoari eman diezaioten. Aktan jaso egingo da bileran gonbidatuak izan direla, botoa emateko eskubidea izan ez arren.

1. – Erabakiak hartu ahal izateko, emandako boto baliodunen artetik gehiengo osoa behar izango da, estatutuek, arautegi honek edo gainerako lege-xedapenek beste gehiengoren bat eskatzen ez duten kasuetan izan ezik. Proposamen bakarra dagoenean, onartua izango da aldeko botoak kontrakoak baino gehiago badira. Bi proposamen daudenean, aldeko boto gehien lortzen duena onartuko da. Bi proposamen baino gehiago daudenean, emandako botoen gehiengo osoa lortzen duena onartuko da edo, horrela gertatu ezean, lehenengo botazioan boto gehien lortu dituzten bi proposamenen artean, bigarren botazioan boto gehien lortzen dituena.

   Berdinketa izanez gero, berriro egingo da botazioa; eta hala ere berdinketa izanez gero, organoko buruaren kalitate-botoak erabakiko du.

2. – Botazioa isilpekoa izango da kide anitzeko organoko kideren batek eskatzen duenean. Dena dela, beti izango da isilpekoa pertsonei buruzkoa denean.

3. – Aurkako botoa ematen dutenek edo abstenitu egiten direnak horretarako arrazoia azalduz gero, ez dute erantzukizunik izango kide anitzeko organoak hartutako erabakietan. Botazioa isilpekoa bada, interesatuak boto txartela emango dio organoko idazkariari botazioko unean eta, txartel horrekin batera, emandako botoaren arrazoia azaltzen duen testua. Boto txartela eta testua aktari erantsiko zaizkio.

1. – Idazkariak bilerako akta egingo du. Aktak bileran bertan edo hurrengoan onartuko dira, eta hurrengo bilerako aztergaiei dagozkien dokumentuekin batera banatuko dira akten zirriborroak. Akta onartu ostean, idazkariak sinatu eta batzarraren buruak ontzat eman behar du.

2. – Aktan nahitaez jasoko dira bilerara etorri direnen eta etorri ez direnen zerrenda; aztergaien zerrenda; bileraren tokia eta eguna; bileran aztertutako puntuak; botazioak (nola egin diren) eta emaitzak; hartutako erabakien edukia eta, egokitzat ikusiz gero, arrazoiaren azalpen laburra.

3. – Aktan boto partikularrak ere jasoko dira, kide anitzeko organoko kasuan kasuko kideek hala eskatzen badute. Kide anitzeko organoko edozein kidek eskatu ahal izango du bere parte hartzea edo proposamena hitzez hitz jasotzeko aktan. Horretarako, idatziz aurkeztu beharko du testua, eskaera egin eta segituan edo, bestela, organoko buruak esango duen moduan.

4. – Kide anitzeko organoko kideek aktan aldaketak egiteko proposamenak egin ahal izango dituzte akta onartzeko unean. Idazkariak egiaztatu egin behar ditu proposatutako aldaketak eta, gehiengoak aldeko botoa ematen badu, onartu egin behar dira.

5. – Kide anitzeko organoa aldatu baino lehen bilera bat egin beharko da onartzeke dauden akta guztiak onartzeko. Bilera hori egitea ezinezkoa bada, akten zirriborroak bidali behar zaizkie kide anitzeko organoko kide zirenei, eta hamar egun balioduneko epea eman edukiari buruzko erreklamazioak egiteko. Ez bada aurkezten erreklamaziorik esandako epearen barruan, aktak onartutzat emango dira; erreklamaziorik aurkeztuz gero, kide anitzeko organo aldatuak egingo duen lehen bileran onartu beharko dira aktak.

6. – Behin onartuta, fakultateko iragarki-oholean argitaratuko dira pertsonen intimitatea babestuta, eta ikastegiko kideek eskuratu ahal izango dituzte kontsultetarako ikastegiko dekanotzako idazkaritzan.

1. – Idazkariak kide anitzeko organoak hartutako erabakien fede emango du eta ziurtagiriak egingo ditu.

2. – Hartutako erabakiak argitara emango dira iragarki oholean, gehien dela hiru egun balioduneko epean eta pertsonen intimitatea babestuta. Organoaren buruak eta idazkariak ziurtatu beharko dute hartutako erabakiak argitara ematen direla eta gutxienez hilabete egongo direla argitaratuta jendaurrean. Izan ere, epe horren barruan egongo da aukera kasuan kasuko errekurtsoa aurkezteko errektoreari.

3. – Aipatutakoaz gain, pertsonei buruzko erabakiak jakinarazi egin beharko zaizkie interesatuei. Erabakiek jakinarazpena egiten den unetik aurrera izango dute eragina. Jakinarazpenak Administrazio Prozeduraren Legean xedatutako moduan egin behar dira.

1. – Kide anitzeko organoak hartutako erabakiek onartzen direnetik aurrera izango dituzte ondorioak, erabakian bertan beste ezer adierazi ez bada behintzat. Erabakiak publikoak dira eta unibertsitateko kasuan kasuko organoak jakinaren gainean jarriko dira.

2. – Arautegi honetako 7. artikuluan aipatzen diren kide anitzeko organoek hartzen dituzten erabakien kontra gorako errekurtsoa aurkeztu ahal izango zaio errektoreari, hilabeteko epean.