1. Polizia-lanarengatiko domina, Euskal Autonomia Erkidegoko udaltzainen kidegoei aplika dakiekeen kondekorazio- eta sari-erregimenari buruzko urtarrilaren 26ko 27/2010 Dekretuaren 2. artikuluan aurreikusita baitago, elementu hauek osatzen dute: Domina, xingola, orratza eta miniatura.

2. Polizia-lanarengatiko dominaren eta bera osatzen duten elementuen diseinua eta ezaugarriak I. Eranskinean ezarritakoak dira.

1. Polizia-lanarengatiko domina uniformean eraman edo jarri ahalko da soilik bera emateko ekitaldian eta tokiko agintariek baimendutako gainerako aldietan. Kasu horietan gala-uniformean jarriko da, bularraren ezkerreko aldean, sakelaren goiko ertzaren edo uniformeko logoaren gainetik.

   Funtzionarioak polizia-lanarengatiko domina bat baino gehiago izanez gero, ezkerralde horretan jarriko dira.

2. Orratza gala-uniformean eraman edo jarri ahalko da tokiko agintariek polizia-lanarengatiko domina uniforme horretan jartzea edo eramatea baimentzen ez duten aldietan, eta bularraren ezkerreko aldean kokatuko da, sakelaren goiko ertzaren edo uniformeko logoaren gainetik. Ekitaldi ofizialetan edo garrantzi berezikoetan, eta gala-trajerik eduki ezean, laneko uniformean eraman edo jarri ahalko dira.

   Funtzionarioak polizia-lanarengatiko domina bat baino gehiago izanez gero, orratz guztiak batuta edo elkarri lotuta egongo dira ezkerreko alde horretan.

3. Polizia-lanarengatiko dominaren miniatura edozein janzkiren hegalean edo botoi-zuloan eraman edo jarri ahalko da, baina ez da ez galako uniformea ez laneko uniformea izango.

   Funtzionarioak polizia-lanarengatiko domina bat baino gehiago izanez gero, ezin izango du miniatura bat baino gehiago eraman.

1. Polizia-zerbitzuarengatiko diplomaren diseinua eta ezaugarriak, bereizgarri zuridun eta bereizgarri gorridun modalitateetan, II. eranskinean ezarritakoak dira.

2. Polizia-zerbitzuarengatiko diplomak, bereizgarri zuridun diplomaren eta bereizgarri gorridun diplomaren modalitateetan, diplomaren modalitateari dagokion orratza eramango du, eta horren diseinua eta ezaugarri teknikoak II. eranskinean aipatutakoak izango dira.

1. Orratza galako zein laneko uniformeetan eraman ahalko da; baina, non jarriko den kontuan hartuta, bere tamainan eta materialean desberdintasunak izango dira. Hori horrela, orratzen diseinuan jasotzen den bezala, galako uniformean eramango dena 30 milimetrokoa izango da, eta bakarrik oihalezkoa. Laneko uniformean eramango dena, ordea, 23 milimetrokoa izango da eta oihalezkoa edo esmaltezkoa izan daiteke.

   Polizia-zerbitzuarengatiko bereizgarri gorridun diploma lortu ondoren, uniformean bakarrik bere orratza eraman edo jarri ahalko da.

2. Diplomaren orratza galako uniformean eramaten denean, eta funtzionarioak aldi berean uniforme horretan polizia-lanarengatiko domina edo dominak eramanez gero; hala badagokio, diplomaren orratza dominaren goiko aldean jarriko da eta, domina batzuk eramanez gero, erdialdean, horien gainetik.

   Diplomaren orratza galako uniformean eramaten denean, eta aldi berean funtzionarioak uniforme horretan polizia-lanarengatiko dominari dagokion orratza jarrita baldin badu, diplomaren orratza dominari dagokion orratzaren ezkerrean jarriko da edo jasotako dominei dagozkien orratz batuen edo elkarri loturikoen ezkerrean.

3. Diplomaren orratza laneko uniformean eramaten denean, ezkerreko aldean jarriko da eta; funtzionarioak polizia-lanarengatiko domina baldin badu, diplomaren orratza dominaren orratzaren ezkerrean jarriko da edo jasotako dominei dagozkien orratz batuen edo elkarri loturikoen ezkerrean.

Udalei dagokie meritudun ekintzengatik egiten diren zorion-oharren diseinua eta ezaugarri teknikoak zehaztea, betiere dominak emateko ezarritako baldintzak betetzen ez badira.

1. Arau honetan aurreikusitako kondekorazio edo sariren bat eskuratu duten funtzionarioek bakarrik erabili edo erakutsi ahalko dute beren udaltzaingoari aplika dakiokeen legedian ezarritako kasuetan eta xedeetarako, baina erakundekoak ez diren hirugarrenek ezin izango dute erabili.

2. Udaltzaingoetako funtzionarioek dauzkaten kondekorazioak eta sariak arduraz zaindu eta gordetzeko betebeharra dute, eta guztiz debekatuta dago kondekorazioen edo sarien forma edo ezaugarriak aldatzeko edozein manipulazio egitea.

3. Arau honetan aurreikusitakoez bestelako kondekorazioak edo sariak erabiltzea edo erakustea bakarrik onartuko da udaltzaingoko langileei aplika dakiekeen legedian aurreikusitako kasuetan eta xedeetarako eta legedi horretan adierazitako moduan.

Polizia-lanarengatiko domina emateko ekitaldia ahalik eta osperik handienaz burutuko da eta, aldi berean, udaltzaingoarentzat esanahi berezia duten egunetan egiten ahaleginduko da, baldin eta presa- edo egokiera-arrazoiengatik beste momentu batean egitea gomendagarria ez bada.