Apirilaren 12ko 4/2007 Lege Organikoak aldatutako Unibertsitateei buruzko 6/2001 Lege Organikoan, abenduaren 21ekoan, titulazio ofizialak lortzeko gauzatu behar diren ikasketen prezio publikoak Autonomia Erkidegoak finkatuko dituela xedatu da, betiere, Unibertsitate Politikarako Konferentzia Orokorrak ezarritako mugen barruan. Gainerako ikasketen prezio publikoak finkatzeko, berriz, dagokion unibertsitateko Gizarte Kontseiluak xedatutakoari eutsi beharko zaio.

Bestetik, Euskal Unibertsitate Sistemari buruzko otsailaren 25eko 3/2004 Legearen 95.3 artikuluan, ikasketen prezioak zehazteko oinarrizko irizpideak ezarri dira. Artikulu horretako a) paragrafoan xedatutakoari jarraikiz, kontuan hartu beharko dira, batetik, esperimentazio-mailaren barruan irakasgai bakoitzari esleitu zaizkion kredituen kopurua eta, bestetik, ikaslea zenbatgarrenekoz matrikulatu den ikasgaian lehenengoz, bigarrenez, hirugarrenez edo gehiagoz matrikulatu den.

Titulazio ofizialak lortzeko gauzatu behar diren eta Euskal Herriko Unibertsitatean ematen diren unibertsitate-ikasketen esperimentazio-maila irailaren 26ko 190/2000 Dekretuan arautu zen. Arau honen bidez indargabetu den Dekretu horretan, lau esperimentazio-maila ezarri ziren. Horretarako, ondoko alderdi hauek hartu ziren kontuan: titulazio bakoitzeko ikasketa-ordu teorikoak; titulazioaren alde praktikoa; eta ikaskuntzaren esperimentazio-maila, hau da, ikasketak laborategian egin izana edo ikasketetan tresna teknologiko bereziak erabiltzea beharrezko izatea.

Gradu, Master eta Doktorego tituluak lortzeko gauzatu behar diren unibertsitate-ikasketa ofizialak ezartzeari eta kentzeari buruzko urtarrilaren 20ko 11/2009 Dekretuaren (urtarrilaren 29ko EHAA, 20. zk.) 3. artikuluan ikasketa horiek Europako Goi Mailako Hezkuntzaren eremura egokitzeari buruzkoan irakaste-metodologiak aldatu beharko direla xedatu da. Irakaste-metodologia horien helburu nagusia ikaslearen ikaskuntza-prozesua izan behar da, bizitza osoan gertatuko den ikaskuntza-prozesua, hain zuzen. Hainbat kontu uztartuko ditu eredu horrek: ikaskuntza teorikoa, praktikak egitea, mintegiak, irakurketa osagarriak, eta bestelako ikaskuntza-bideak. Eredu berri horrek, halaber, aurrez aurreko irakaskuntza nahiz urrutiko irakaskuntza uztartuko ditu.

2010-2011 ikasturtean, Euskal Herriko Unibertsitatean eskaintzen diren titulazio guztiak Europako Goi Mailako Hezkuntzaren Eremuan unibertsitate-ikasketak batzeko helburuetara egokituko dira bete-betean. Hori dela eta, Gradu, Master eta Doktorego ikasketa ofizialak ECTS kredituen arabera egituratuko dira, betiere, Unibertsitateko Ikasketa Ofizialen Antolamendua ezartzen duen urriaren 29ko 1393/2007 Errege Dekretuan ezarri diren egiaztatze- eta akreditazio-zuzentarauekin, -baldintzekin eta -prozedurekin bat etorriz.

Era berean, titulazio ofizialen esperimentazio-koefizienteak unibertsitate gaietan eskumena duen kontseilariaren proposamenari jarraiki onetsitako dekretuaren bidez zehaztuko direla xedatu da Euskal Unibertsitate Sistemari buruzko otsailaren 25eko 3/2004 Legearen laugarren xedapen gehigarrian.

Horrenbestez, dagozkion nahitaezko txostenak egin ondotik, Euskadiko Unibertsitate Kontseiluaren eta Unibertsitate Irakaskuntza Publikoa Koordinatzeko Kontseiluaren txostenak azterturik, Euskadiko Aholku Batzorde Juridikoarekin bat etorriz, Hezkuntza, Unibertsitate eta Ikerketa sailburuaren proposamenari jarraikiz, eta (hilabete)aren (egun)ean Gobernu Kontseiluak gai honi buruz eztabaidatu eta erabaki bat hartu ondotik,