1. – Lanpostuaren arduraldi-erregimenaren eta kategoriaren arabera hilero jasotzen den ordainsaria da oinarrizko soldata; soldataren zenbatekoa I. eranskinean ezartzen da.

2. – Aparteko ordainsariak: urtean bi daude, eta ekainean eta abenduan irabazten dira; zenbatekoak I. eranskinean ezartzen dira.

1. – Kontratatutako irakasle eta ikertzaileek II. eranskinean ezarritako zenbatekoak jasoko dituzte antzinatasunagatik, Universidad del País Vasco / Euskal Herriko Unibertsitateko irakaskuntza- edo ikerketa-eremuetan jardundako hiru urteko aldi bakoitzarengatik. Universidad del País Vasco / Euskal Herriko Unibertsitateak ofizioz aitortuko eta ordainduko du ordainsaria, hamalau ordainketan.

2. – Antzinatasuna sortzeko, edozein administrazio publikotan emandako zerbitzu guztiak zenbatuko dira, karrerako funtzionario zein bitarteko funtzionario izan, administrazio-kontratatua zein lan-legepeko kontratatua izan.

   Doakionak eskatuta aitortuko dira aurretik emandako zerbitzu horiek; eskakizunarekin batera, zerbitzuok justifikatzeko agiriak aurkeztu behar dira. Ondorio ekonomikoak eskakizuna aurkeztu eta hurrengo hileko lehen egunean hasiko dira, eskakizuna hilaren 1ean bertan aurkeztu ezean.

Lanaldi osoan kontratatutako irakasleek eta ikertzaileek kargu akademikoetan jarduteagatiko ordainsaria jasotzeko eskubidea izango dute; zenbatekoak IV. eranskinean ezartzen dira.

Universidad del País Vasco / Euskal Herriko Unibertsitateak bere Estatutuetan edo horiek garatzeko arautegian ezarri dituen gainerako kargu akademikoei ordaindu beharreko osagarria ere bere gain hartuko du Unibertsitateak, aipatutako eranskinean jasotzen den bezala.

1. – Behin betiko kontratatutako irakasleek eta ikertzaileek irakaskuntza-jarduerari buruzko ebaluazio-txosten bat eskatu ahal izango diote beren Saileko Batzordeari bost urtean behin, lanaldi osoko arduraldian jardun badute, edo horren baliokide den aldian, lanaldi partzialeko arduraldian jardun badute. Aipatutako txostenean, eskatzailearen lanpostuari dagokion irakaskuntza-jardueraren merezimenduak balioetsiko dira, ezarritako ebaluazio-irizpide orokorren arabera.

2. – Ebaluazio-txostenak bi kalifikazio baino ez ditu izango: aldekoa eta kontrakoa. Txostena ikusita, errektoreak hartuko du eskakizunari buruzko azken erabakia.

3. – Txostena aldekoa bada, ebaluazio bakoitzarengatik, irakaskuntza-merezimenduengatiko atal edo osagarri bana jasoko du irakasleak hortik aurrera; zenbatekoak honako hauek izango dira, urtean:

   • Irakasle osoak: 1.834,32 euro.

   • Irakasle agregatuak: 1.485,72 euro.

   • Irakasle lankideak: 1.257,24 euro.

4. – Kategoriaz aldatzen duten edo kategoria berean lanpostuz aldatzen duten irakasleek aurreko kategorian edota postuan irakaskuntza-merezimenduengatik zuten osagarria mantenduko dute beste kategoria edo postuan, eta, aurrerantzean beste ebaluazioetan beste osagarririk lortuko balute, aurrekoekin pilatuko litzaieke.

5. – Unibertsitatetik kanpoko irakaskuntzatik unibertsitateko irakaskuntza-kategorietara behin-betiko sartzen diren irakasleei unibertsitateaz besteko irakaskuntza publikoan emandako zerbitzuak aitortuko zaizkie, irakaskuntza-merezimenduengatiko osagarria jaso ahal izateko; eskakizuna egiteko unean duten unibertsitate-kategoriari dagokion zenbatekoa emango zaie.

6. – Ezin izango da kontrako balioespena jaso duten denboraldien gainean beste ebaluazio-txostenik eskatu.

7. – Irakasleek eta ikertzaileek ohiko irakaskuntza-lanetan jardun ez duten denboraldia aldeko ebaluazioa jaso duen denboraldiaren baliokidea izango da. Irakasleek eta ikertzaileek honako egoera hauetan utz dezakete irakaskuntza-lana: kargu akademikoetan jardutea, zerbitzu berezien egoeran egotea edo liberatuta egotea (sindikaturen batean jarduteko, euskara ikasteko, denboraldi sabatikoa, irakaskuntzan edo ikerketan eguneratzeko eta abar), irakaskuntzako erabateko salbuespenerako eskubidea badakarte, eta nahitaezko eszedentzian, seme-alaba zaintzeko eszedentzian, kidetasuneko edo odol-ahaidetasuneko bigarren mailara arteko senide bat zaintzeko eszedentzian edota genero indarkeriagatiko eszedentzian egotea.

1. – Behin betiko kontratatutako irakasleek eta ikertzaileek ikerketa-jarduerari buruzko ebaluazioa eskatu ahal izango dute sei urtean behin, lanaldi osoko arduraldian jardun badute, edo horren baliokide den aldian, lanaldi partzialeko arduraldian jardun badute; han, denboraldi horretan zehar egindako ikerketa-lanaren errendimendua epaituko da.

2. – Uniqual Euskal Unibertsitate Sistemaren Kalitatea Ebaluatu eta Egiaztatzeko Agentziako Administrazio Kontseiluak landuko eta onetsiko ditu ebaluazio-irizpide orokorrak, Dekretu honetako V. eranskinean agertzen direnak kontuan hartuz.

3. – Uniqualek, Euskal Unibertsitate Sistemaren Kalitatea Ebaluatu eta Egiaztatzeko Agentziak, ebaluatuko du ikerketa-jarduera, CNEAI/Ikerlana Ebaluatzeko Estatuko Batzordearekin batera; izan ere, batzorde hori irakasle eta ikertzaile funtzionarioen ebaluazioak egiteaz arduratzen da. Ebaluazioaren emaitza aldekoa, kontrakoa edo nabarmenki eskasa izango da.

4. – Ebaluazioaren emaitza aldekoa bada, ikerketa-merezimenduengatiko soldata-osagarria esleituko zaie irakasleei; zenbatekoak honako hauek izango dira, urtean:

   • Irakasle osoak: 1.834,32 euro.

   • Irakasle agregatuak: 1.485,72 euro.

   • Irakasle lankideak: 1.257,24 euro.

5. – Horren ostean, ikerketa-jardueran aldeko ebaluazioa jasotzen den sei urteko aldi bakoitzeko, doakionaren ikerketa-merezimenduengatiko soldata-osagarria areagotuko da, hasierako sei urteetarako ezarritako zenbateko berean, asko jota, seigarren aldeko ebaluazioa lortu arte. Hori gertatuz gero, gehikuntza guztiak finkatutzat joko dira.

6. – Ebaluazioren batean ikerketa-jarduera nabarmenki eskasa dela balioetsiz gero, ebaluazio-aldi bati dagokion ikerketa-merezimenduengatiko osagarria murriztuko da.

7. – Ezin izango da kontrako balioespena jaso duten denboraldien gainean beste ebaluaziorik eskatu. Hala ere, aurkeztutako azken ikerketa-aldian kontrako ebaluazioa jaso duten irakasleek eta ikertzaileek beste sei urteko denboraldi bat osatu ahal izango dute, azken eskakizunean kontrako balioespena jaso zutenetako batzuekin eta, gutxienez, ondorengo beste hirurekin.

8. – Kategoriaz aldatzen duten irakasleek edo kategoria berean lan-legepean kontratatuta beste postu bat hartzen duten irakasleek aurreko kategorian edota postuan ikerketa-merezimenduengatik zuen osagarria mantenduko dute beste kategoria edo postuan, osagarri hori lortu eta sei urte igaro arte.

9. – Lan-legepeko irakaskuntza- eta ikerketa-kategorietan behin betiko sartzen diren unibertsitate-irakasleei jatorrizko irakaskuntza-funtzio publikoan aitortuta zeukaten ikerketa-merezimenduengatiko osagarria ordainduko zaie, zenbateko berean, aipatutako kategoriotan sartzean.

10. – Uniqual Euskal Unibertsitate Sistemaren Kalitatea Ebaluatu eta Egiaztatzeko Agentziak hartzen dituen erabakien aurka berraztertze-helegitea aurkeztu ahal izango da, agentzia horretan bertan hilabeteko epean, edo Administrazioarekiko Auzietarako Epaitegian zuzenean, bi hileko epean; hitzarmena jakinarazten denetik aurrera zenbatuko dira epe horiek.

1. – Irakaskuntza- edota ikerketa-merezimenduengatiko osagarriak eskatzeko, jardunean egon behar da, modu iraunkorrean.

2. – Ondorio ekonomikoei dagokienez, kontratu iraunkorra izan gabe egindako jarduera-aldia kontratatu iraunkorrarekin hasitako kategorian egin izan balitz bezala onartuko da.

3. – Ebaluazio bat egiteko behar den denbora bete baino lehen kategoriaz edo postuz aldatzen bada, igarotako denboraldia emandako zerbitzutzat hartuko da kontuan beste kategoria edo postuan.

4. – Osagarriok eskatzerakoan, nahitaezko eszedentzian, seme-alaba zaintzeko eszedentzian, kidetasuneko edo odol-ahaidetasuneko bigarren mailara arteko senide bat zaintzeko eszedentzian edota genero-indarkeriagatiko eszedentzian izandako denboraldiak jardunean egotearen baliokide izango dira.

5. – Ebaluazioa jasotzeko eskubidea bereganatzeko urteak zenbatzerakoan, lanaldi osoaz besteko arduraldi-erregimenean zerbitzua eman den denbora 0,5eko koefiziente murriztailearekin balioetsiko da.

6. – Universidad del País Vasco / Euskal Herriko Unibertsitateak eta Uniqualek, Euskal Unibertsitate Sistemaren Kalitatea Ebaluatu eta Egiaztatzeko Agentziak, urtean behin egingo dituzte ebaluazioak. Hortaz, ebaluatu beharreko aldia amaitzen den urtean egin behar dira eskakizunak, abenduaren 31a baino lehen. Ondorio ekonomikoak hurrengo urteko urtarrilaren 1ean abiatuko dira, ebaluazioa geroago egiten bada ere.

7. – Ebaluatu beharreko aldia amaitzen den urteko abenduaren 31ren ostean aurkeztutako eskakizunei dagozkien ondorio ekonomikoak, aurkeztu eta hurrengo urteko urtarrilaren 1ean abiatuko dira. Beraz, aldi horretatik kanpo egiten den irakaskuntza- edo ikerketa-jarduera hurrengo ebaluazioetarako hartu ahal izango da aintzat.

8. – Irakaskuntza- edo ikerketa-merezimenduengatik urtean jaso beharreko ordainsariak ez du inoiz gaindituko aldeko sei ebaluazioren eta sei osagarri onartzearen ondorioz jaso beharreko zenbatekoa.

1. – Irakasle lankideek, bitarteko irakasle kontratatuek eta irakasle elkartuek doktore-titulua lortzen dutenean jasoko dute doktore izateagatiko osagarria; horren zenbatekoa III. eranskinean ezartzen da.

2. – Doakionak eskatuta ordainduko da doktore izateagatiko osagarria; eskakizunarekin batera, titulua justifikatzeko agiriak aurkeztu behar dira. Ondorio ekonomikoak eskakizuna aurkeztu eta hurrengo hileko lehen egunean hasiko dira, eskakizuna hilaren 1ean bertan aurkeztu ezean.

3. – Zenbait irakaskuntza-kategoriatan sartzeko, ezinbestekoa da doktore-titulua izatea; horietan lan egiten dutenek, ordea, ezin izango dute doktore izateagatiko osagarria jaso.