Posta bidez nork eman ahal du botoa?

EAEn erroldatuta dauden pertsona batzuek aurreikusten baldin badute bozketa-egunean ez direla egongo botoa eman behar duten herrian, posta bidez bozkatu ahal dute Eusko Legebiltzarrerako hauteskundeetan.

Horrez gain, gaixorik dauden edo desgaitasun fisikoa dutenek ere posta bidez eman ahal dute botoa.

Posta bidez bozkatzeko eskaera egin ondoren, ezin da boto presentziala erabili.

Zer egin behar da, posta bidez bozkatzeko?

• Posta bidez bozkatzeko eskaera betetzea:

  Apirilaren 5eko Eusko Legebiltzarrerako hauteskundeetan posta bidezko botorako eskaera egin bazenuen, uztailaren 12ko hauteskundeetarako ez du baliorik.

  Uztailaren 12an posta bidez bozkatu nahi baduzu, eskabide bat bete behar duzu. Horretarako, honako aukera hauek izango dituzu:

  1. Correos-en webgunerako estekaren bidez, identifikazio-sistema baliozkotzat onartuz Industria Ministerioak onartutako pertsona fisikoaren ziurtagiriak eta NAN elektronikoa (NAN-e). Neurri hori boto-emaileen eta Correoseko langileen osasuna babesteko hartu da, COVID-19k sortutako ezohiko egoeraren aurrean.
  2. INEren webgunerako estekaren bidez. Bete ondoren, inprimatu eta sinatu. Jarraian, joan zaitez Correos-eko bulego batera.
  3. Eskabide-orria aurkeztu beharko dute, posta-bulegoetan, eskuz bete dezaten.

• Aurkezteko lekua, hala badagokio:
  

  1. aukeran ez da aurkeztu beharko. Hautesleen eta Correoseko langileen osasuna babesteko egindako modalitate bat da, COVID-19k sortutako ezohiko egoeraren aurrean.
  2. eta 3. aukeretan, eskabidea edozein posta-bulegotan aurkeztu beharko da. Posta elektronikoko funtzionarioek nortasuna egiaztatzeko agiria erakusteko eskatuko diote interesdunari, eta sinadura bat datorren egiaztatuko dute. Inola ere ez da onartuko haren fotokopiarik.

• Botoa posta bidez emateko eskaera egiteko epea:

  Botoa posta bidez emateko eskaera maiatzaren 19tik uztailaren 2ra egin daiteke.

  Dena den, azken unera arte ez itxaroteko eta eskaera lehenbailehen egiteko gomendatzen dizugu.

• Botoa posta bidez ematea:

  Dagokion Hautesle Erroldaren Bulegoaren Ordezkaritzak ekainaren 22tik uztailaren 5era  posta ziurtatu bidez bidaliko dizkizu botoa posta bidez emateko behar dituzun agiriak, posta bidez bozkatzeko eskaeran zehaztu duzun Estatuko helbidera, edo, helbiderik zehaztu ezean, erroldan jasotako helbidera:

  • Hauteskunde-erroldako inskripzio-ziurtagiria.
  • Zure botoa hartu behar duen mahaiari zuzendutako gutun-azala.
  • «Eusko Legebiltzarrerako Hauteskundeak 2020 Elecciones al Parlamento Vasco» menbretedun gutun-azal bat, eta bertan sartu beharko duzu «Eusko Legebiltzarra» osatzeko bozketa-papera.
  • «Eusko Legebiltzarra» osatzeko aldarrikatu den hautagai-zerrenda bakoitzeko paper bat.
  • Jarraibideak azaltzeko orri bat.

  Agiriok zuk zeuk hartu behar dituzu, eta, segidan, honako urrats hauek egin beharko dituzu:

  • Eusko Legebiltzarra osatzeko aldarrikatu den hautagai-zerrenda bateko papera aukeratu, eta honako gutun-azal honetan sartu: «Eusko Legebiltzarrerako Hauteskundeak 2020 Elecciones al Parlamento Vasco» menbretedunean. Behin sartuta, itxi gutun-azala
  • Hauteskunde-mahaiburuari zuzenduta dagoen gutun-azalean sartu behar dituzu:
    • Hauteskunde-erroldako inskripzio-ziurtagiria.
    • «Eusko Legebiltzarrerako Hauteskundeak 2020 Elecciones al Parlamento Vasco» menbretedun gutun-azala.

  COVID-19k eragindako ezohiko egoera dela eta, dokumentazioa entregatzeko unean, hautesleak, nahi izanez gero, aukera izango du postariari betetako hauteskunde-gutun-azalak emateko, bere botoa gordailutu dela egiaztatzen duen frogagiri baten truke, eta, horrela, ez du postetxera joan beharrik izango. Horrek guztiak ez dio kalterik egingo hautesleak une horretan bere botoa ez emateko eta, ondoren, legezko epeen barruan, Correos-eko bulego batean emateko duen eskubideari.

• Posta bidezko botoa bidaltzea (postariari ematea erabaki ez badu): 

  Hauteskunde-mahaiburuari zuzendutako gutun-azala bidaltzeko azken eguna uztailaren 8a izango da (luzatutako epea uztailaren 10eko 14:00ak arte -ostirala-).

  Bidal ezazu lehenbailehen, gutun-azala jasotzen dela ziurtatzeko. Gutun-azal hori ez da frankeatu behar, baina presako posta ziurtatu bidez bidali behar da posta-bulego batean .