Eusko Legebiltzarrerako Hauteskundeetan goizeko bederatzietatik arratsaldeko zortzietara egingo da bozketa, etenik gabe.

Hautesleak mahaian bertan eta aurrez aurre eman behar du botoa, berari dagokion hauteskunde-erroldan, inskripzioaren arabera.

Boto presentziala denean, hauteslea bozketa-kabinan sartu ahal da. Berak aukeratu duen hautagai-zerrendako boto-papera kabinan hartu, eta bozketako gutun-azal batean sartuko du. Ondoren, mahaira joango da, botoa ematera.

Hautesleek banan-banan hurbildu behar dute mahaira. Txanda heltzen zaienean, izen-abizenak esan behar dituzte, eta titularraren argazkia daraman NANa, pasaportea edo gidabaimena eta bozketako gutun-azala eman behar dizkiote mahaiburuari. Mahaiko bokalek ziurtatu beharko dute hauteslearen nortasuna eta mahaiko hauteskunde-erroldan erroldatua dagoela. Hautesleak mahaiburuari eman behar dio bozketako gutun-azala. Mahaiburuak gutun-azala une oro ikusgai utziko du, eta, aldi berean, hauteslearen izen-abizenak esan behar ditu, bai eta «botoa eman du» adierazi ere. Ondoren, hautesleari emango dio gutun-azala, eta hautesleak hautestontzian sartuko du.

Segidan, bokalek eta, nahi izanez gero, artekariek ere bai, zenbakidun zerrenda batean idatziko dituzte hautesleen izen-abizenak, botoa eman duten hurrenkeran, bai eta mahaiko hauteskunde-erroldan duten zenbakia ere.