Kultura eta Hizkuntza Politika Saila

Pio

Hamabi Aita Santuren izena. v Pio I.a santua. 10. Aita Santua [140-155(?) urteetan] eta martiria. Jaieguna, uztailaren 11n.  v Pio II.a (Enea Silvio Piccolomini). 208. Aita Santua, 1458-1464 urteetan (Pienza, Siena, 1405 - Ancône, 1464). Humanista eta poeta ere izan zen Æneas Silvius ezizenez. Basileako kontzilioan idazkari izan zen eta Eugenio IV.aren aurka agertu zen. Sienako apezpiku izendatu zuten (1449) Triestekoa izan ondoren (1447) eta kardinal 1456an. Aita Santu hautatu ondoren turkiarren aurkako gurutzada bultzatu zuen; Anconan hil zen itsasoratu baino lehen.        n Pio III.a (Francesco Todeschini-Piccolomini). 213. Aita Santua, 1503. urteko 26 egunetan (Siena, 1436 - Erroma, 1503). Sienako artzapezpikua izan zen Aita Santu izendatu zuten arte. Pio II.aren iloba zen.  v Pio IV.a (Giovanni Angelo Medici). 222. Aita Santua, 1559-1565 urteetan (Milan, 1499 - Erroma, 1565). Trentoko kontzilioa berriro abiarazi zuen 1562. urtean, eta Benedictus Deus bulda eman zuen. Iloba Karlos Borromeo eta Filipe Neri santua izan zituen laguntzaile. Pio V.a, santua (Antonio Ghislieri). 223. Aita Santua, 1566-1572 urteetan (Bosco Marengo, Lonbardia, 1504 - Erroma, 1572). Domingotarra izan zen, Lonbardiako inkisidorea, Sutri-ko apezpikua (1556), kardinala (1557) eta inkisidore nagusia (1558). Pio IV.aren ondorengo hautatu zuten eta elizaren erreformaz arduratu zen. Trentoko kontzilioaren erabakiak indarrean jarrarazi zituen. 1566an Trentoko kontzilioko dotrina, Santo Tomasen obrak, otoitz-orduen liburua eta meza-liburua berriro argitaratu zituen. Ingalaterrako Elisabet eskumikatu zuen 1570. urtean eta Maria Estuardoren alde agertu zen. Veneziarekin eta Espainiarekin batean Kristau Liga sortu zuen turkiarrei aurre egiteko eta Lepantoko gudua irabazi zuen (1571). Garaipen hori zela eta Ama Birjinaren Errosarioko jaia ezarri zuen. Jaieguna, apirilaren 30a.  v Pio VI.a (Giannangelo Breschi). 248. Aita Santua, 1775-1799 urteetan (Cesena, Italia, 1717 - Valence, Dauphiné, 1799). Kardinal egin zuten 1773an eta babesle izan zuen Klemente XIV.aren ondorengo izan zen. Nepotismoa eta estatu boteretsuen arteko elkartasunezko politika bultzatu zituen. Auctorem fidei buldaren bidez (1794) jansenismoa gaitzetsi zuen berriro ere. Frantziako iraultzak ekarri zizkion ordea arazorik larrienak; duda-mudan ibili zen apaizgoaren konstituzio zibilari zegokionez (1790) eta bera bezala frantses apaiz asko zer egin jakin gabe geratu ziren. 1791. urtean konstituzioa eta iraultza gaitzetsi, eta bere inguruan onartu zituen Frantziatik egotzitako apaizak. Frantziako iraultzak Italian izan zezakeen arrakasta ikusirik, Bonapartek 1796. urtean eskaini zizkion bake baldintza gogorrak onartu behar izan zituen. Hala Pastoralis sollicitudo buldaren bidez Frantziako iraultza onartu zuen. Elizaren Estatuak gordetzen saiatu zen, baina Frantziak inbaditu zituen eta Tolentinoko ituna sinatzera behartu zuten (1797). Josef Bonaparte ministro izendatu zuten Erroman eta Direktorioak Erromako Errepublika aldarrikatu zuen 1798an. Pio VI.a Aita Santua atxilotu zuten eta Valenceko presondegian espetxeratu. Hantxe hil zen handik gutxira.  v Pio VII.a (Gregorio Luigi Barnaba Chiaramonti). 249. Aita Santua, 1800-1823 urteetan (Cesena, 1742 - Erroma, 1823). Familia noble bateko semea zen eta beneditarren ordenan sartu zen. Tivoliko apezpiku izendatu zuen Pio VI.a bere senideak 1783. urtean, eta Imola-ko hirira joatearekin batean kardinal egin zuten (1785). Veneziako konklabeak Pio VI.aren ondorengo hautatu zuen hiru hilabetez eztabaidatu ondoren (1800). Erdi mailako politikaria izan zen arren, ongi bete zituen Aita Santu gisa zegozkion lanak. Erroman bildu zen Bonaparterekin 1800. urtean konkordatu bat lortzeko negoziazioak hasteko. 1801ean sinatu zuten akordioa eta bi urte geroago haren antzeko hitzarmena sinatu zen Italiako errepublikarekin. Pio VII.a Parisa joan zen 1804an enperadorea koroatzera baina ez zuen Frantzian bizi nahi izan. Frantziak Elizaren Estatuak beretzat hartu zituen eta Aita Santuak enperadorea eskumikatzen zuen Cum memoranda buldaren bidez erantzun zion. 1814an Fontainebleautik irten eta Erromara iritsi zen Pio VII.a, eta Vienako kongresuak Aita Santuaren esku utzi zituen Elizaren Estatuak berrantolatzen hasi zen. Bonaparteren familia onartu zuen han. Konkordatuak sinatu zituen Piemonterekin (1817), Bi Sizilietako Erresumarekin (1818) eta Prusiarekin (1821), eta Frantziarekin, 1801. urtekoa errespetatu eta hobetzen zuena. Jesusen Lagundia berriro antolatu zuen 1814an. Pio VIII.a (Francesco Saverio Castiglioni). 251. Aita Santua, 1829-1830 urteetan (Cingoli, 1761 - Erroma, 1830). Montalto-ko apezpiku zen 1800an, Cesena-ko kardinal eta apezpiku 1816an eta Frascati-ko apezpiku 1821ean. Balio handiko legegilea zen eta Aita Santu hautatu zuten izaera gaiztotzen zion gaitz batek joa zen arren (1829). Eliza hierarkia berriro antolatu zuen Herbehereetan eta Leon XII.ak bezala, liberalismoaren aurka agertu zen.  v Pio IX.a (Giovanni Maria Mastai Ferretti). 253. Aita Santua, 1846-1878 urteetan (Senigallia, Elizaren Estatuak, 1792 - Erroma, 1878). Familia noble bateko semea zen. Spoleto-ko artzapezpiku zen 1827an eta Imola-ko apezpikua 1832tik aurrera. 1840an kardinal egin zuten eta sei urte geroago, Gregorio XVI.a hil zenean, Aita Santu egin zuten. 1848. urteko Italiako iraultza hasi zenean politika liberalagoa ezarri nahi izan zuen Elizaren Estatuetan, baina iraultzak sortutako giroak Erromatik ihes egitera behartu zuen. Frantziaren eta Austriaren babesean Aita Santuaren egoitzara itzuli zenean autoritarismoa indartu zuen eta aurre egin zien iraultzaile abertzaleei. Hurrengo urteetan Elizaren Estatuen autoritarismoa sendotzeko ekimenak bideratu zituen. Ama Birjina Sortzez Garbiaren dogma aldarrikatu zuen 1854an eta Quanta cura entziklikan (1864), eta honekin batera argitara emaniko Syllabus idazkietan gaitzetsi zuen ideologia liberala. Vatikano I.a kontzilioa antolatu zuen 1869an; kontzilio horrek Aita Santuak fede eta ohitura gaietan zuen hutsezintasunaren dogma ezarri zuen. 1870. urtean Italiako osteek Erroma inbaditu zuten eta urte berean Erroma Italiako erresumaren barne egotea erabaki zuten hango biztanleek erreferendum bat egin ondoren. Aita Santuak ez zituen emaitzak onartu eta preso gisa aurkeztu zuen bere burua Vatikanon.  v Pio X.a, santua (Giuseppe Sarto). 255. Aita Santua, 1903-1914 urteetan (Riese, 1835 - Erroma, 1914). Veneziako aitagoia eta kardinala zen 1893. urtean. Leon XIII.aren ondorengo hautatu zuen 1903. urteko konklabeak. Berrikuntza sakonak ekarri zizkion Elizaren barne-bizitzari eta aldaketa handiak egin zituen elizaren administrazioan. Musika sakratua ere berritu zuen, eta izaera ofiziala eman zien kantu gregoriarrari eta Palestrinaren gisako polifoniari. Otoitz-orduen liburua ere berriro antolatu zuen eta arindu egin zuen santuen egutegia. Erlijioaren irakaskuntza sistematikoa eta eguneroko jaunartzea bultzatu zituen. Frantzian gaitzetsi egin zuen estatuaren eta elizaren arteko bereizketa, Vehementer nos eta Gravissimi officii entzikliken bidez (1906). Modernismoaren aurka ere azaldu zen: Houtin, Loisy eta Laberthonnière-ren obrak gaitzetsi zituen. Frantzian kristau-demokrazia gaitzetsi zuen. Biblia aztertzeko eta Vulgata berrikusteko batzorde bat eratu zuen 1907an. Lehen Mundu Gerra hasi eta handik gutxira hil zen. 1954. urtean kanonizatu zuten. Jaieguna, abuztuaren 21a.  v Pio XI.a (Achille Ratti). 257. Aita Santua, 1922-1939 urteetan (Desio, Lonbardia, 1857 - Erroma, 1939). 1879. urtean egin zen apaiz. Humanismo gaietan jakituna zen eta Milango apaizgaitegian izan zen irakasle. Vatikanoko Anbrosiar Liburutegiko zuzendari izendatu zuten 1907an, eta 1921ean Milango kardinal eta artzapezpiku. Benedikto XV.a Aita Santuaren ondorengo izan zen hurrengo urtean. Hasiera-hasieratik munduan zehar Elizaren jarduera berritu nahi izan zuen. Misio berriak antolatu zituen eta Ekintza Katolikoa eta gisako mugimenduak bultzatu zituen. Politikan, berriz, Letrango Hitzarmena sinatu zuen Italiarekin 1929. urtean, eta hitzarmen guztiz garrantzitsu baten bidez Italiak onartu zuen Vatikanoko Hiriaren burujabetza. Alemanian eta Italian gertatzen ari ziren eraso arrazista eta xenofoboak gaitzetsi zituen azken urteetan.  v Pio XII.a (Eugenio Pacelli). 258. Aita Santua, 1939-1958 urteetan (Erroma, 1876 - Castel Gandolfo, 1958). Teologiako eta Zuzenbide Kanonikoko ikasketak egin zituen Unibertsitate Gregoriarrean eta 1899an, apaiz egin ondoren, Vatikanoko estatuko idazkaritzan sartu zen. Artzapezpiku egin zuten 1917an eta Bavariako nuntzio izan ondoren Berlinen izan zen sei urte geroago. 1929an kardinal izendatu zuten eta Erromara itzuli zen Pio XI.aren estatu idazkari izateko. 1939. urtean hautatu zuten Aita Santu eta Pio XII.a izena hartu zuen aurreko Aita Santuaren omenez. Lehen hilabeteetan Bigarren Mundu Gerra geldiarazten saiatu zen eta gerra garaian nazionalsozialismoaren eta faxismoaren gehiegikeriak salatu zituen, jarrera ofiziala neutraltasunezkoa hartu bazuen ere. Laguntza Batzorde Pontifikala sortu zuen gerrak eragindako sufrimenduak arintzeko. Gerra amaitutakoan idazki eta mezu ugari bidali zituen komunikabideetara kristauen munduari jarrera moralari buruzko gida bat eskaintzeko. Teologiaren arloari dagokionez Bibliaren azterketa bultzatu, Ama Birjina Sortzez Garbiaren dogma aldarrikatu eta dotrinaren desbideraketak gaitzetsi zituen Humani generis entziklikaren bidez (1950).