Migratze-prozesuak aldaketa ugari dakarzkie bai pertsonari berari bai bere familiari. Distantziak erronka emozionalak sor ditzake, eta familia berrelkartu ondorengo uneak esperientzia eta erronka berriak ekar ditzake. Prozesu hori errazteko, Harreragunek, Etorkinentzako Harrera Egiteko Euskal Zerbitzuak, programa bat jarri du abian, Bilbon bizi diren eta beren seme-alaba adingabeak eta/edo ezkontidea berrelkartzeko prozesuan dauden atzerritarrentzat (PDF, 392 KB) .

Programa honen helburua da familiari entzuteko eta trukerako gune bat eskaintzea, harrera erraztea eta Bilboko baliabide eta zerbitzu sozialen sarean integratzen laguntzea, eskolatzea, osasun-arreta eta hezkuntza-ereduak barne. Gainera, familia-loturak eta afektu-harremanak sendotu eta kideen arteko rolak berregituratzen laguntzen du, berrelkarketa-prozesuan sor daitezkeen zailtasunak eta gatazkak prebenitzea du xede, eta migratzeak dakartzan aldaketak eta galera afektiboak kudeatzen laguntzen du, hala nola klima, hizkuntza, elikadura-ohiturak, etxebizitza-estiloa, hezkuntza- eta komunikazio-estiloak, eta lagun-sarearen galera. Horrez gain, bizikidetza-egoera berrira egokitzeko prozesuan laguntza ematen du, berrelkartutako pertsonei gizartean integratzen laguntzen die eta Bilbon familien autonomia sustatzen du.

Horretarako, talde psikosozial espezializatu batek banakako saioen ibilbide bat diseinatzen du bi fasetan. Familia iritsi aurretik, berrelkarketa sustatzen duen pertsonarekin lan egiten da, eta familia berrelkartu ondoren, familia osoari laguntza eskaintzen zaio egokitzapen prozesua errazteko. Zerbitzua Harreragune Bilbon eskaintzen da, Colón de Larreategui 3 helbidean. Hitzordua eskatzeko, 944 00 82 00 telefonora deitu edo harreragune@bilbao.eus helbidera idatzi daiteke. Informazio gehiago eskuragarri dago www.euskadi.eus/harreragune webgunean.