20. artikulua.– Eraldaketa Digitalaren eta Ikaskuntza Aurreratuen Zuzendaritza.

Saileko zuzendaritzen egiteko orokorrez gain, honako egiteko eta jardun-arlo hauek dagozkio Eraldaketa Digitalaren eta Ikaskuntza Aurreratuen Zuzendaritzari:

1. Lanbide-heziketan eta dagozkion prozesuetan digitalizazioaren aurrerapena eta garapena bultzatu eta zuzentzea, Lanbide Heziketako Sailburuordetzaren jarraibideak betez.
2. Lanbide-heziketan aplikatutako adimen artifizialaren garapena eta ezarpena bultzatzea, baita irakaskuntza-lanean eta irakasleei laguntzean ere.
3. Lanbide-heziketan konputazio kuantikoaren garapena eta ezarpena bultzatzea, Zientzia, Unibertsitate eta Berrikuntza Sailarekin lankidetzan.
4. Ikasketa-metodologia aktiboen ezarpen orokorra sustatzea, hezkuntza-sistemako lanbide-heziketan berrikuntza metodologikoa indartzeko xedez.
5. Lanbide-heziketako irakasle eta ikasleen artean, sormen-gaitasuna, berrikuntzarako gaitasuna eta pentsamendu konstruktiborako gaitasuna sustatzen duten ekintzak bultzatzea.
6. Hezkuntza Politiketako Sailburuordetzarekin eta Zientzia, Unibertsitate eta Berrikuntza Sailarekin koordinatuta, STEAM kultura sustatzea lanbide-heziketako ikaskuntza-maila guztietan.
7. Lanbide-heziketako ikastetxeetan ikerketa aplikatuko proiektuak sustatzea, enpresekin lankidetzan egin ahal izango direnak, bereziki Lanbide Heziketako Sailburuordetzatik ezarritako estrategiekin bat datozen ETEekin.
8. Sektore emergenteetan ingurune estrategiko espezializatuak eta espezializazio-arloak sor daitezen sustatzea, zenbait sektore produktibotan lanbide-heziketako zentroen eta enpresen artean elkartze eta lankidetza eraginkorra bultzatzeko, batez ere ETEen, mikroETEen eta autonomoen artean, betiere enpleguaren eta lehiakortasunaren erronka berriei erantzuteko.
9. Lanbide-heziketako ikastetxeetan, egungo eta etorkizuneko teknologia aurreratuak aztertzea, sustatzea eta ezartzea, ingurune konplexuetan irakasleen eta ikasleen konpetentziak hobetzeko xedez.
10. Lanbide-heziketako irakasleentzako etengabeko prestakuntza-planak diseinatu, aplikatu eta gauzatzea, barnean hartuta eguneratzea eta espezializatzea.
11. Irakasleen konpetentziak hobetzeko prestakuntza-ekintzak diseinatzea, ikasgelan zenbait ikasketa-metodologia garatzeko.
12. Irakasleen prestakuntzara zuzendutako ekintzak diseinatu eta gauzatzea, ingurune teknologikoki oso aurreratuetan behar bezala erantzuteko gai izan daitezen.
13. Lanbide-heziketako ikasleen artean espiritu ekintzailea eta enpresa-kultura sustatzeko beharrezkoak diren ekintzak ezartzea, ekintzailetza pertsonala sustatuz eta ikasleei enpresa-proiektu berriak hasteko gaitasuna emanez.
14. Lanbide-heziketako zentroei laguntzea enpresa-proiektuak garatzen eta enpresak sortzen, barnean hartuko dituztenak digitalizazioa, jasangarritasuna, berrikuntza, konpromiso soziala eta pertsonetan oinarritutako antolaketa-egiturak, euskal produkzio-sarea berroneratzen, modernizatzen eta zabaltzen joateko.
15. Lanbide-heziketako ikastetxeetan kudeaketa- eta antolaketa-eredu berritzaileak garatzeko jarduerak planifikatu eta zuzentzea, ikastetxe horietan konplexutasunaren kudeaketa eta ikerketa eta berrikuntza aplikatuak lantzeko.
16. Lanbide-heziketako sistema osoaren nazioartekotzea bultzatzea.
17. Lanbide-heziketarekin lotutako Europako eta nazioarteko programetan parte hartzeko beharrezko diren ekintzak sustatzea.
18. Unibertsitateen eta lanbide-heziketaren arteko lankidetza sustatu, bultzatu eta ezartzea prestakuntzaren eta ikerketa eta berrikuntza aplikatuen esparruan, Zientzia, Unibertsitate eta Berrikuntza Sailarekin lankidetzan eta hargatik eragotzi gabe hari esleitutako eskumenak.