Karrera artistikoen profesionalizazioa

Azterlanaren helburua da sortzaileen profesionalizaziorako bidea ikertzea, prestakuntza amaitzen denetik karrera artistikoa sendotzen den arte. Alde batetik, deskribatu nahi dugu zer urrats eman behar dituzten sortzaileek ibilbide profesionaletan sartzeko, eta, bestetik, zer laguntza-tresna erabili ditzaketen ibilbide horretan aurrera egiteko. Hau da azken xedea: proposamenak egitea egungo gabeziak konpondu ahal izateko. Arte-irakaskuntzen analisiarekin jarraitu nahi izan dugu, eta horrez gain, kontuan hartu dugu karrerak zer gizarte- eta lan-testuingurutan gauzatzen diren. Beraz, bi alderdiak uztartu nahi izan ditugu.

Azterlan honen ondorioetarako, profesionalizazioa da jarduera ekonomiko bat garatzeko gaitasuna, lanbide artistiko baten bidez gauzatzen dena. Premisa horretatik abiatuta, hainbat gai argitu nahi izan ditugu; adibidez, ea gaur egungo tresnek errazten ote duten garapen autonomorako bidea, edo ez ote duten betikotzen testuinguru ezegonkor bat, ozta-ozta bizimodua ateratzen uzten duena.

Lehen atalean, lanbide artistikoen espezifikotasunak azaltzen ditugu, bai eta horien bereizgarri diren funtsezko gaiak ere. Jarraian, ibilbideak deskribatzen ditugu, lehen urratsetatik karrerak finkatzen diren arte, eta bide horretan erabili daitezkeen tresna lagungarri nagusiak zerrendatzen ditugu.

Azkenik, profesionalizazioa erraztea xede duten zenbait proposamen aurkezten ditugu, ideia hau oinarri hartuta: sistema batek ez du ezertarako balio aukerak eman arren ibilbide artistikoak finkatzea ahalbidetzen duen egitura instituzionalik ez badago. Sorkuntza ez da inoiz halabeharrez gertatzen, eta ikuspegi profesionaletik mamitu dadin, baliabideak behar ditu, denbora eskaini behar zaio eta sistema publiko sendo baten laguntza behar du.

Karrera artistikoen profesionalizazioa [pdf, 740 kB]