Jarduerak: adierazpena eta bateragarritasuna
1. Bateragarria da Osasun Saileko goi-kargudun bat irabazi-asmorik gabeko erakunde bateko kide izatea baldin eta erakunde horrek Eusko Jaurlaritzaren beste sail baten, demagun Hezkuntza Sailaren, diru-laguntzak jasotzen baditu?
1/2014 Legearen 14 d). artikuluak fundazioetan, elkarteetan edo irabazi-asmorik gabeko erakundeetan parte hartzea eta kultura- edo gizarte-intereseko eta gizarte-balioak sustatzen dituzten jarduerak egitea bateragarria dela arautzen du, baldin eta ordainsaririk jasotzen ez bada.
14.2. artikuluak xedatzen du aurreko paragrafoan adierazitako jardueretan aritzeak ezin izango duela eragotzi edo kaltetu kargu publikodunaren eginbeharrak eta obligazioak zuzen eta zorrotz betetzea, ez duela arriskuan jarriko karguan inpartzialtasunez edo independentziaz jardutea eta ez diola interes publikoari kalterik eragingo.
Horrenbestez, kargu publikodun bat irabazi asmorik gabeko erakunde bateko kide izan daiteke, baldin eta partaidetza horrek ez badio interes publikoari kalterik eragiten eta ez badu haren inpartzialtasuna arriskuan jartzen.
Ondorio horretarako, kargudunak bateragarritasuna eskatu beharko du, irabazi asmorik gabeko erakundearen gizarte helburua zein den ageri den agiria aurkeztu beharko du, eta euskal administrazioaren diru-laguntzarik jasotzen duen edo ez adierazi beharko du, eta, hala bada, zer sailetatik jasotzen duen.
Agiri horiek aztertu ondoren, jarduera hori bateragarri izango da baldin eta erakundearen xedeak eta kargu publikodun gisa egiten duen jarduerak interes publikoa kaltetzen ez badu, eta haren inpartzialtasuna arriskuan jartzen ez badu.
Diru-laguntza Eusko Jaurlaritzaren beste sail batetik jasotzen badu (hau da, kargu publikodun gisa atxikita dagoen sailetik ez baizik eta beste batetik), eta erakundearen xedeak ez badu kargu publikodunaren eskumenekin erlaziorik, jarduera bateragarri izan daiteke.
2. 15. artikuluaren -Bateragarritasuna jarduera publikoekin- barruan daudela ulertuko lirateke fundazio publikoen eta elkarte publikoen patronatuak eta erakunde publikoen administrazio-kontseiluak, esate baterako, Osakidetza? Edo sor daitezkeen batzordeak, esate baterako Osasun Kontseiluaren Batzordea edo Garraioen Batzordea? Kide anitzeko organotzat jotzen al dira egitura-dekretuan jasotakoak? Eta dekretu horretan jasotako batzordeak?
Sail jakin baten egitura-dekretuan jasotako ente, erakunde, fundazio, batzorde, kide anitzeko organo guztiak 15. artikuluaren eremuan hartzeko modukoak dira –Bateragarritasuna jarduera publikoekin–. Horretarako eguneratuta eduki behar da kargu publikoan aritzetik eratorritako jarduera publikoei buruzko informazioa.
3. Osasun sailburuari al dagokio Osakidetzako, BIOEF fundazioko eta OSATEK sozietate publikoko kargu publikodunen bateragarritasun eskabideak ebaztea?
Bai, Osasun sailburuari dagokio bere sektore publikoko bateragarritasun eskabide guztiak ebaztea, Herri Administrazio eta Justizia Saileko titularrak bateragarritasuna baimentzeko txostena eman ondoren.
4. Ogasun eta Finantzetako sailburuari dagokio Lehiaren Euskal Agintaritzako kargu publikodunen bateragarritasun-eskaerei buruz ebaztea?
Ez.
Bereziki, eta ekainaren 26ko 1/2014 Legearen 19. artikuluaren 3.d) atalean ezarritakoaren arabera, Funtzio Publikoaren arloan eskumena duen saileko titularrari dagokio Lehiaren Euskal Agintaritzako kargu publikodunen bateragarritasun-eskaerei buruz ebaztea.
Hala, oro har, eta ekainaren 26ko 1/2014 Legearen 19. artikuluaren 3.d) atalean ezarritakoaren arabera, Funtzio Publikoaren arloan eskumena duen saileko titularrari dagokio honakoen bateragarritasun-eskaerei dagokienez ebaztea: Eusko Jaurlaritzako Lehendakaritzaren mendeko kargu publikodunak, Euskadiko Aholku Batzorde Juridikoko kideak, Euskadiko Ekonomia eta Gizarte Arazoetarako Batzordeko kideak, Lan Harremanen Kontseiluko kideak, Euskadiko Kooperatiben Goren Kontseiluko kideak, Datuak Babesteko Euskal Bulegoko zuzendaria, Lehiaren Euskal Agintaritzako kideak eta Euskal Autonomia Erkidegoko Kontratuen inguruko Errekurtsoen Administrazio Organoko zuzendaria, baita parte hartzeko, aholku eskatzeko, aholku emateko edo kontrolerako organo orotako kide izendatutakoak baldi eta den delako organoa Euskal Autonomia Erkidegoko Administrazio orokorrari edo instituzionalari lotuta badago eta organoaren sorrera-arauan independentzia ematen bazaio bere eginkizunak betetzeko.
5. 18. artikulua -kargu publikoa utzi ondoko debekuak- ezin zaie lege hau indarrean sartu aurretik izendatutako kargu publikodunei aplikatu; bai, ordea, esate baterako, Osakidetzaren osasun-zentro bateko langileen zuzendariari, baldin eta 2014ko azaroaren 1aren ostean izendatu badute eta kargua bost hilabetera utzi badu; kasu horretan, lan egin al zezakeen zuzendari izan den osasun-zentroko garbiketa-kontratua esleituta duen garbiketa-enpresa batean?
Langileen zuzendari izan denean garbiketa-kontratuaren esleipen-prozesuan parte hartu duen edo ez.
6. Zerbitzu aktiboan daudela kargu publiko izatera iristen diren funtzionario, lan-kontratupeko eta estatutupeko langileek adierazi behar al dituzte kargu publikodun izaten hasi baino bi urte lehenago egindako jarduerak?
Bai, eta, gainera, zerbitzuak zer administraziotan eman dituzten adierazi behar dute.
7. Lehen Xedapen Iragankorraren arabera, eta ondasunen eta jardueren adierazpenak berriz aurkezteko 6 hilabete daudenez, zer data hartuko da kontuan kargu publikodun gisa hasi aurreko bi urteetan egindako jardueren adierazpena noiztik aurrerakoa izango den zenbatzeko? Adierazpen berria erregistratu den eguna? Edo karguen katalogoa onesten duen dekretua indarrean sartu den eguna?
Lehen xedapen iragankorraren eremuan jasotako kargu publikodunen adierazpenen berritzea egin aurreko bi urteetan egindako jarduerak noiztik aurrerakoak izango diren jakiteko, Euskal Autonomia Erkidegoko kargu publikoen katalogoa onesten duen azaroaren 18ko 216/2014 Dekretua argitaratu zen eguna hartuko da kontuan, hau da, 2014ko azaroaren 19a.
8. Gobernuz kanpoko erakundeetako, elkarteetako edota irabazi-asmorik gabeko entitateetako kide izate hutsa, inolako ordainik jaso gabe eta zuzendaritzan edo kudeaketan inolako kargurik izan gabe, Jarduera Pribatutzat jaso behar al da Jardueren Aitorpenean?
Ez.
Kargu Publikodunen Jokabide Kodea eta Haien Interes Gatazkak arautzen dituen ekainaren 26ko 1/2014 Legearen 14.1.d eta 19.1 artikulu-zatietan ezarritakoa interpretatzean, ulertu behar da gobernuz kanpoko erakundeetako, elkarteetako edota irabazi-asmorik gabeko entitateetako kide izate hutsak ez dakarrela jarduera pribatu bat gauzatzerik, eta, hortaz, ez dela sartu behar jardueren aitorpenean.
Gobernuz kanpoko erakundeetako, elkarteetako edota irabazi-asmorik gabeko entitateetako kide izanez gero, eta zuzendaritzan edo kudeaketan KARGURIK IZANEZ GERO, orduan Jarduera Pribatutzat jaso behar da Jardueren Aitorpenean.
9. Kargu publikoen katalogoan sartuta dauden kargu publiko guztiek aurretiko baimen bat eskatu beharko dute nahitaez, baldin eta zerbitzu jarduera pribatuak egin nahi badituzte zerbitzu-ematea bukatu ondorengo bi urteetan?
Ez.
Betebehar hori 2014ko azaroaren 1etik aurrera izendatutako kargu publikoei aplikatuko zaie, hau da, ekainaren 26ko 1/2014 Legea indarrean sartu ondoren izendatutakoei (Azken xedapenetatik lehena).
10. Zer epe daude jarduera pribatuaren bateragarritasunaren ebazpenerako, zerbitzu-ematea bukatu ondorengo bi urteetako jarduera pribatuak egin ahal izateko?
Interesdunak bere jarduera hasi ahal izango du, baldin eta ez bada jarduera pribatuaren bateragarritasunari buruzko ebazpenik eman hilabeteko epean.
11. Arau-hausteren bat egiten du pertsona interesdunak, edo pertsona interesduna kontratatzen duen enpresa, sozietate edo entitateak?
Interesdunaren kasuan, ekainaren 26ko 1/2004 Legeak dio arau-hauste oso larria dela ez betetzea bateraezintasunen araubide orokorra (III. kapitulua: Kargu publikoen bateraezintasunen araubidea).
Enpresaren kasuan, ekainaren 26ko 1/2004 Legeak honako hau dio: enpresa, sozietate edo entitate batek kontratatzen badu 18. artikuluaren 1. paragrafoan ezarritakoa urratzen duen pertsona bat, legea ez duela betetzen deklaratuko da, eta, ondorioz, debekatuta izango du —enpresa edo sozietate horrek— inolako kontraturik egitea Euskal Autonomia Erkidegoko sektore publikoarekin, kontrataturiko pertsonak erakundean jarraitzen duen bitartean; debeku horren gehieneko epea bi urtekoa izango da, interesdunak kargu publikoa utzi zuenetik kontaturik.
