Lanbidek bere langile-beharrak aztertuko ditu enpresekin, estalduran laguntzeko eta eskaera horri aurrea hartzeko
2022-06-30
- Prestakuntza-premiak aztertzeko eta detektatzeko Aholku Batzordea enpresek eskainitako lanpostuetara egokitutako profil profesionalak aurkitzeko dituzten zailtasunak identifikatzen saiatuko da, inkesta baten bidez
Lanbide-Euskal Enplegu Zerbitzu Publikoak Euskadiko enpresekin batera aztertuko du zer zailtasun dituen eskaintzen dituzten lanpostuetara egokitutako profil profesionalak aurkitzeko eta, horrela, erantzun arin bat eman ahal izateko, merkatuak dituen beharrak estaliko dituena. Prestakuntza-premiak aztertzeko eta detektatzeko Aholku Batzordearen bidez, haiekin lan egingo da, politika aktiboak eskariari aurrea hartu eta egokitu ahal izateko.
Prestakuntza-premiak aztertzeko eta detektatzeko Aholku Batzordea gaur bildu da Gasteizen, Alfonso Gurpegui Enplegu eta Gizarteratzeko sailburuordea eta Gloria Múgica Lanbideko zuzendari nagusia bertan direla. 2019ko uztailean sortu zenetik egiten den bosgarren bilera da, eta laugarrena, 2021eko apirilean Idoia Mendia lehendakariorde eta Lan eta Enpleguko sailburuak legegintzaldi honetan berraktibatu eta aldizkako bilerekin lan-plan bat proposatu zuenetik. Enplegu-politika aktiboak eraldatzeko foro horren helburuen artean, non Hezkuntza eta Garapen Ekonomikoko sailetako ordezkariek ere parte hartzen duten, langileen prestakuntza-beharrak eta enpresen profesionalen beharrak lotzea nabarmentzen da.
Zehazki, gaurko bileran inkesta bat aurkeztu da, eta euskal enpresei helaraziko zaie, enpresa horiek, adierazi duten bezala, dituzten lanpostuak betetzeko orduan lanbide-profil egokiak aurkitzeko dituzten arrazoi nagusiak ezagutzen saiatzeko. Horretarako, honako hauei galderak egingo zaizkie: betetzeko gai ez diren lanpostuen kopurua, lanpostu horietarako baloratu eta eskatutako baldintzak, eskaintzen eta egiten dituzten hautaketa-prozesuen ezaugarri zehatzak, eta lanpostu horiek ez betetzearen aurrean erabiltzen dituzten estrategiak. Era berean, Aholku Batzordeak balioetsi du kontsulta hori ikastetxeetara eta enplegu-eskatzaileetara zabaltzea, ikusteko eragile guztiak bat datozen okupazio-profil jakin batzuk aurkitzeko zailtasunaren arrazoietan.
Batzordearen jarduera 2030erako Enpleguaren Euskal Estrategian zehaztutako helburuen barruan kokatzen da, eta Futurelanen oinarritzen da. Tresna horrek enpleguaren proiekzioak ditu Euskal Autonomia Erkidegoko sektore ekonomikoetan eta talde okupazionaletan 2032ra arte. Aurrea hartzeko zeregina da, eta Lanbide Euskal Enplegu Zerbitzu Publikoa bere hobekuntza-prozesuan dago, enpresek eskaintzen dituzten aukera berrietara eta hobetu nahi dituzten pertsonen prestakuntza-beharretara egokitzeko.
