Dialektoak etengabe ari dira aldatzen eta are azkarrago gaur egun, populazioaren mugimendua gero baino gero handiagoa denean. Lan honetan, hainbat adituk dialektoek nozitu dituzten aldaketen gaineko gogoeta egiten dute, dialektoen konbergentzia eta dibergentziak helburu. Europako hainbat herrialdetako adibideak oinarri hartu eta dialektoen arteko ukipena eta isolamendua aztertzen dituzte, eta Europako herrien arteko egoera soziolinguistikoak zein ezberdinak diren azaltzen.

Dialekto baten baitako aldaketa era askotara ager daiteke. Besteak beste, konbergentziak eta dibergentziak dialektoen arteko harremana baldintzatzen dute. Konbergentzia eta dibergentzia berezko zaizkio dialektoari, sortze beretik gertatzen dira bata zein bestea, hau da, dialektoen arteko berdintasunak handitzea (konbergentzia, alegia), edota txikitzea (dibergentzia). Munduaren bilakaera historikoak, gizartearen modernizazioak barne, arrastoa utzi du dialektoen ohiko ezaugarrietan eta, partez bada ere, aldatu egin ditu dialektoen konbergentzia-dibergentziak. Are gehiago, dialektoen eta hizkuntza estandarraren arteko konbergentzia eragin du.

Liburuaren lehenengo atalean, dialektoen konbergentzia eta dibergentziari dagozkion hainbat alderdi jorratzen dituzte adituek. Batetik, gaiari buruzko sarrera orokorra egiten da eta, aldi berean, ondoko kapituluetan eztabaidatuko diren aztergaien oinarria jartzen da. Gainera, terminologia nagusia aurkezten da, aditu ez denarentzako informazio nagusia azaltzen, ikerketa metodo behinenak aletzen, eta bateko eta besteko ataletan sakonduko diren gai denak batera aurkezten.

Uste komuna da hizkuntza prozesuak gertakari "multikausalak" direna. Bakanak dira oso, konbergentziari edota dibergentziari eragin eta multikausalak ez diren gertakariak. Ohikoena zera da, alegia, berrikuntzek barruan (egiturazko aldaketak, espezifikoak, orokorrak, edo unibertsalak) nahiz kanpoan (ukipenak eragindakoak) izatea iturria. Gainera, hizkuntzaz kanpoko faktore eragileak bi eratakoak ohi dira: eskala handikoak (soziologikoak), edota txikikoak (soziopsikologikoak, psikologikoak eta elkarreraginezkoak). Bestalde, faktoreetan bakoitzak gradu ezberdinean eragiten du aldaketa; eragileak ez dira aldatuko, seguru askorik, baina bai faktoreen eragiteko modua.

Liburua elementu horien arabera banatu da. Lehenengo partean barne faktoreei dagozkien alderdiak lantzen dira eta bigarren eta hirugarrenean, aldiz, kanpo faktoreak dira nagusi; dimentsio makrosoziala lantzen da bigarrenean, eta mikrosoziala, berriz, hirugarrenean. Kapitulu denetan ere bertsua da eskema. Batetik, gaiari buruz idatzitakoaren aipamen laburra egiten dute egileek, aztergai nagusienen gaineko eztabaida laburrarekin batera; bestetik, beraiek ikertu duten adibide zehatz bat aurkezten dute artikulugileek.

Europako dialektoen gaineko lehenengo lana dugu eta, beraz, interes handikoa soziolinguistikan, dialektologian eta Europako hizkuntzen egoeran jakin-mina duten guztientzat.

Aurkibidea:

1. The study of dialect convergence and divergence: conceptual and methodological considerations
   F. Hinskens, P. Auer, and P. Kerswill

   Part 1. Convergence, Divergence and Linguistic Structure

2. Internal and external factors in phonological convergence: the case of English /t/ lenition
   J. Kallen
3. Dialect/standard convergence, mixing, and models of language contact: the case of Italy
   G. Berruto
4. Convergence and divergence in grammar
   L. Cornips and K. Corrigan
5. Phonology, grammar, and discourse in dialect convergence
   J. Cheshire, P. Kerswill, and A. Williams

   Part 2. Macrosociolinguistic Motivations of Convergence and Divergence

6. Processes of standarisation in Scandinavia
   I. L. Pedersen
7. The birth of new dialects
   P. Kerswill and P. Trudgill
8. Dialect convergence in the German language islands (Sprachinseln)
   P. Rosenberg
9. Political borders and dialect divergence/convergence
   C. Woolhiser
10. The influence of urban centres on the spatial diffusion of dialect phenomena
    J. Taeldeman

    Part 3. Microsociolinguistic Motivations

11. Subjective factors in dialect convergence and divergence
    T. Kristiansen and J. Jorgensen
12. How similar are people who speak alike? An interpretive way of using social networks in social dialectology research
    J. A. Villena - Ponsoda
13. The role of interpersonal accommodation in a theory of language change
    P. Auer and F. Hinskens

Liburuaren ezaugarriak:

• Hizkuntza: Ingelesa
• Argitaratzailea: Cambridge University Press, Cambridge
• Urtea: 2005
• Orriak: 418
• ISBN: 13 978-0-521-80687-9