Liburu honen arabera, hizkuntza erabat da zer politikoa, goitik hasi eta beheraino, bai norbanako hiztunari dagokionez, bai erretorika politikoari edota nazio hizkuntzen sorrerari dagokienez ere. Liburu honetan hizkuntza eta politikaren artean gertatzen diren askotariko elkarreragiteak aztertzen dira: hizkuntza eta nazioa; politika eta hizkuntza; erretorika, propaganda eta interpretazioa, etab.

Lanaren argitaratzaileek liburuaren sarrerakoan esaten digutenez, lan hau Europan izan ziren bi une historikoren kointzidentziatik sortu da. Izan ere, 2004an, hamabost urte bete ziren 1989an Gerra Hotzari amaiera eman zioten gertakariak izan zirenetik, eta, horrekin batera, baita Europako Batasunak hamar kide berri onartu zituenetik ere; honek, zalantzarik gabe, bultzada berria eman zion, Europa osoan zehar, gizartearen aldakuntza-prozesuari. Giro horretan, piztu egin dira nazio mailako eta nazioz gaindiko interesen arteko tentsioak eta, besteak beste, bata bestearen kontra jarri dira hizkuntza ideologia ezberdinak, politikak eta praktikak. Su horretan egosi da, beraz, liburu hau.

Liburuak bi parte ditu. Lehenengoan, kapitulu guztietan zehar ageri diren oinarri teoriko eta kontzeptualak biltzen dira. Editoreen asmoa ez da, aitzitik, egileek bertan diotena zuzen-zuzen onartzea, eta bai, aldiz, Europan egiten diren hizkuntza politikak munduko beste zenbait lekutan egiten direnekin alderatzea. Ondorioz, galderak berez datoz: Zer nolako hizkuntza gertakariak aztertzen dira testuinguru honetan? Zenbateraino dira gaur egungo hizkuntza ideologia eta politikak XVIII. eta XIX. mendeko hizkuntzalaritza nazionalistaren ondorio? Zein mailataraino eragin ditu europarren hizkuntza ikuspegiak kolonietan garatu diren identitate nozioak? Zer eta nola eragiten dute esperientzia berri hauek Europaren eraikuntzan? Zer lotura dago nazioz gaindiko eta "mundu" mailako hizkuntzen eta berorien europar sorlekuaren artean?

Bigarren partean, berriz, ideologiak zein era espezifikotan eragin dituen hizkuntzen aldeko politikak aztertzen da, bai eta politiken eta praktiken arteko harremana Europako zenbait herrialde jakinetan ere. Atal honetako artikuluetan gogoetagai diren beste hainbat galdera egiten dira. Adibidez, zergatik azpimarratzen dira oraindik nazio hizkuntzak, eta nazio kulturak, balizko Europa post-nazionalean? Zein leku du hizkuntzak hiritartasunari buruzko diskurtsoetan? Zein neurritan balio dute hizkuntzaren erabilerari buruzko inkestek, emigranteak baztertu eta diskriminatzeko? Noraino erantzuten diete gizabanako eta erakundeek (Internet nabigatzaileak, web eragileek), ingurune eleanitzak eta globalizazioak egiten dizkieten eskariei?

Lan honen funtsa da, oinarri-oinarrian, nazio elebakarrari buruz Herderrek ezarri zuen axioma plazara ekartzea, Europako estatuetako gaur egungo errealitate eleanitz eta agerikoa kontuan harturik. Editoreen arabera, Europako Kontseiluak hizkuntza politiken gainean zabaldu duen asmo oneko erretorikak Europako Batasunaren konstituzioak egiten duen etorkizuneko diseinuarekin bat etorri beharko du. Hala ere, oraindik ez dago jakiterik nola uztartuko diren hizkuntza dibertsitatearen sustapen sinbolikoa eta estandarizazio eta homogeneizaziorantz bultza egiten duen indar zentripeto handia.

Liburuan parte hartzen duten egileek orain arte baino modu estu eta zorrotzagoan aztertu nahi izan dituzte gero baino gero agerikoago diren, eta izango diren, kontraesan horiek guztiak.

Aurkibidea:

1. Language, the National and the Transnational in Contemporary Europe.
   Patrick Stevenson and Claire Mar-Molinero.

   Part I The European Legacy: Theoretical Issues

2. Migration, Minorities and Multilingualism: Language Ideologies in Europe
   Susan Gal

3. A European Perspective on Language as Liminality
   Christopher Brumfit

4. Americanization, Language Ideologies and the Construction of European Identities
   Thomas Ricento

5. The Role of "Europe" in the South African Language Debate, with Special Reference to Political Traditions
   Gerrit Brand

6. The European Linguistic Legacy in a Global Era: Linguistic Imperialism, Spanish and the Instituto Cervantes
   Clare Mar-Molinero

   Part II New Formations in Europe: Language and Social Change

7. Why "New" Newspeak? Axiological Insights into Language Ideologies and Practices in Poland
   Anna Duszak

8. Language Planning and National Identity in Sweden: A Performativity Approach
   Tommaso M. Milani

9. The Macedonian Standard Language: Tito-Yugoslav Experiment or Symbol of "Great Macedonian" Ethnic Inclusion?
   Christian Voss

10. Language Loyalty in the Baltic: Russian Artists and Linguistic Nationalism in Estonia
    Remy Rouillard

11. "National" Languages in Transnational Contexts: Language, Migration and Citizenship in Europe
    Patrick Stevenson

12. The European Paradox: Swiss Discourses of Identity Between Dependence and Xenophobia
    Robert Gould

13. Conducting Dissonance: Codeswitching and Differential Acces to Context in the Belgian Asylim Process
    Katrijn Maryns and Jan Blommaert

14. Multilingual Migrants and Monolingual Teachers: The Discursive Construction of Identity in an Flanders Primary School
    Massimiliano Spotti

15. Changing Media Spaces: The Transformative Power of Heteroglossic Practices
    Brigitta Busch

16. 16 Dobry den Kosice - üdvözlöm Kassat - Hello Kosice: Language Choice in a Slovak Internet Guestbook
    Lukas Bleichenbacher

Liburuaren ezaugarriak:

• Hizkuntza: Ingelesa
• Argitaratzailea: Palgrave Macmillan, New York.
• Urtea: 2005
• Orriak: 270
• ISBN: 1-4039-9731-4