Trafiko Zuzendaritzak atzerriko ibilgailuei isunak kobratzeko prozedura bat jarri du martxan

Atzerriko matrikula duten gidariei isunak jakinarazteko lanean laguntzeko zerbitzu bat kontratatu du Trafiko Zuzendaritzak. Titularren datuak jasotzea eta titular horiei egindako arau-haustea jakinaraztea izango da zerbitzu horren eginkizuna. Sortutako espedienteen tramitazioa Trafiko Zuzendaritzako funtzionarioen esku egongo da, isunen kontrol eta kobratzeen kudeaketarekin batera (izaera publikoko diru-sartze guztietarako ezarritako kontabilitate-bide eta bide legal ohikoa jarraituko dute).

Salaketak jartzeko eta telefono bidezko atentzioa eskaintzeko honako hizkuntzak erabili ahal izango dira: ingelesa, alemana, gaztelania, italiera, portugalera eta nederlandera. Palman trafiko-autoritateak ekimen honetan lan egiten ere hasi dira eta euren esperientziaren arabera, salatuen erdia baino gehiagok (% 60-70) borondatezko denboraldian ordaintzen du.

Bestalde, Europar Batasuna Zuzendaritza bat prestatzen ari da herrialde kideen Ogasunek datuak elkartrukatu ahal izateko salaketen kobratze exekutiborako. Hala, bide-exekutibo bidez kobratu ahal izango zaie arau-hausle atzerritarrei, nazionalekin egiten den moduan eta edozein diskriminazio mota ezabatuz.

Arau-hausteak Lurralde Historikoaren arabera

Trafikoko Arau-husteak Izapidetzeko Zentro Automatizatuaren sorrerarekin 2011ko ekainean, Trafiko Zuzendaritzak arazo honen benetako dimentsioa aztertu ahal izan du zaintze-politika zigortzailea eta ibilgailuen kontrola sistema automatizatuen bidez modu egokian koordinatuta. Abiadura-mugak gainditzen dituzten matrikula atzerritarreko ibilgailuei dagokienez, emaitza esanguratsuak utzi ditu agerian azterketak.

2011ko ekaina eta 2012ko otsaila artean, gehiegizko abiadura zeramatzaten 133.044 ibilgailu detektatu zituzten ekipoek; horietatik, 46.510 ibilgailuk matrikula atzerritarra zuten eta ezin izan ziren prozesatu.

133.044 ibilgailuen zifra globala lurralde historikoen arabera xehatuta, datuen banaketa honakoa da:

Radarreko arau-hausteak 2011ko ekaina eta 2012ko otsaila artean
	Arau-hauste kopurua	Atzerritarren portzentajea
Araba	11.337	%9,9
Estatuan bideratuak	10.211
Ibilgailu atzerritarrak	1.126
Bizkaia	42.115	%12,69
Estatuan bideratuak	36.769
Ibilgailu atzerritarrak	5.346
Gipuzkoa	79.592	%50,30
Estatuan bideratuak	39.554
Ibilgailu atzerritarrak	40.038

Iturria: Trafikoko Arau-husteak Izapidetzeko Zentro Automatizatua

Gipuzkoan arau-hausteren bat egin duten ibilgailu atzerritarren kopurua handiagoa da, batez ere, mugakidea delako; gauzak horrela, logikoki, zirkulatzen duten ibilgailu atzerritarrak biderkatzen dira.

Honako errepide gipuzkoar hauetan ematen dira matrikula atzerritarreko ibilgailuen arau-hauste gehiago:

Bidea	Estatuko arau-hausleak	Arau-hausle atzerritarrak
A-15	12.594	8.360
AP-8	5.755	14.047
GI-11	7.523	7.182
N-1	9.830	13.528

Gipuzkoako Lurralde Historikoaren barnean gehiegizko abiadura gainditzen duten ibilgailu atzerritarren presentzia nabarmenagoa duten bideak. Espainian matrikulatutako ibilgailu arau-hausleekin konparatiboa (2011ko ekaina eta 2012ko otsaila artean)

Iturria: Trafikoko Arau-husteak Izapidetzeko Zentro Automatizatua

Istripuen % 13an inplikatuta

Ezbehar-kopuruari dagokionez, 2011an, atzerritarren bat gidatutako 1.460 ibilgailuk jasan zuten istripuren bat EAEko errepideetan (errepidean emandako istripuen % 13). Istripu hauetan, 5 hildako eta 37 zauritu larri egon ziren.

Atzerritarren presentzia duten istripuen % 55 Gipuzkoako errepideetan ematen dira, % 27 Bizkaian eta % 17 Araban. AP-8a, % 17arekin, eta N-1a, % 15arekin, atzerritarren inplikazioa duten istripu gehien hartzen dituzten EAEko bi errepideak dira.

2011ko ekaina eta 2012ko otsaila artean, EAEko errepideetan gehiegizko abiadura jasotzen duten ekipo automatizatuek matrikula atzerritarra zuten 46.510 ibilgailu detektatu zituzten baimendutako abiadura gaindituta. Zifra horrek arau-hauste hori egindako ibilgailuen (133.044) % 34,96 suposatzen du. Isun guzti horiek ez ziren heldu arau-hausleen eskuetara euren datuak ez zeudelako ibilgailuen erregistroan. Arazo hau konpontzeko, Eusko Jaurlaritzako Trafiko Zuzendaritzak atzerriko arau-hausleei salaketak jakinaraztea ahalbidetuko duen prozedura bat jarri du martxan.