Oñatiko Sancti Spiritus Unibertsitatean, Gipuzkoako eraikin enblematiko eta ondare-balio handienetako batean, Foru Aldundiak 60 mantentze-jarduera baino gehiago sustatu ditu azken bi hamarkadetan. Hala ere, fatxadaren narriadura progresiboak ezinbesteko bihurtu du sakoneko esku-hartzea, Azahara Dominguez diputatuak zuzentzen duen Sailak Europako finantzaketa lortzeko egindako kudeaketari esker gauzatuko dena.
Gaur egun, eraikina osorik birgaitzeko proiektua idazten ari dira. Maiatzaren amaieran esleitu zen, 239.792,96 euroan (BEZa barne). Next Generation EU Europako funtsek Berreskuratze, Eraldaketa eta Erresilientzia Planaren bidez finantzatutako proiektuaren parte da jarduera hau. "Ondare historiko artistikoa berreskuratzearen eta turismo kulturalarekin duen harremanaren aldeko apustua ere egiten duten funtsak dira, Gipuzkoako eskualdeen jarduera ekonomikoaren eta enpleguaren motorra ere badena".
Planak 2,9 milioi euroko inbertsio globala aurreikusten du, Industria, Merkataritza eta Turismo Ministerioaren 2023ko deialdiaren bidez lortutakoa, fatxada zaharberritzeko eta etorkizuneko Oñatiko Turismo Bulegorako espazioak egokitzeko. Aurreikusitako obren artean daude fatxadaren eta erretaularen zaharberritze zientifikoa, irisgarritasuna hobetzea, eraginkortasun energetikoko neurriak ezartzea eta eraikina erabilera kultural eta turistiko berrietara egokitzea.
Ikus informazio osoa (Iturria: Gipuzkoako Foru Aldundiaren webgunea)
EIES - Europako informazioaren Euskal Sarea: Europako gaurkotasuneko beste edukietarako sarbidea