Euskal Sektore Publikoaren Antolaketa eta Funtzionamenduari Buruzko Lege Proiektua

Lege-proiektu honen xedea hauek arautzea da:

1- Euskal Autonomia Erkidegoko Sektore Publikoaren antolamendua, erakunde multzo konplexua, hainbat izaera juridiko dituena eta zuzenbide publikoaren edo pribatuaren mende egon daitekeena, eta bere izatea justifikatzen duena interes orokorrei erantzunez eta funtzio publikoak eskainiz. 

2- Euskal Sektore Publikoko erakundeen kontzeptua, oinarri nagusiak eta arauak, Herri Kontuen Euskal Epaitegiari buruzko Legean aipatuak Epaitegiaren kontrol-eremua zehazteko.

3- Euskal Autonomia Erkidegoko Sektore Publikoaren funtzionamendurako funtsezkoak diren ardatzak, berritasunekin izapide administratiboei dagokienez eta gure gobernantza-eredua sendotuta; besteak beste, honako arlo hauek arautzen ditu: kudeaketa publiko aurreratuko sistemak eta horien ebaluazioa, administrazio elektronikoaren egitura, herritarren eta administrazioaren arteko harremanak eta gure jardunean bi hizkuntzen erabilera sendotzea, Gardentasunaren eta Gobernu Onaren Lege Aurreproiektuan araututako gainerako osagaiekin bat etorrita (politika publikoen plangintza eta ebaluazioa, gardentasuna eta herritarren partaidetza), horiek baitira gobernu demokratikoa, gizarte-egonkortasuna eta ekonomia-garapena lortzeko funtsezko baldintzak.

Horrela, jasota gelditu da Euskal Administrazio Publikoaren Lege-proiektua, proiektu honen berehalako aurrekaria, Eusko Legebiltzarrean arbuiatu zuten talde politikoen aldarrikapena, gobernu onaren (gardentasuna, ebaluazioa, partaidetza) arauketari garrantzi eta ikusgarritasun handiagoa ematea eskatzen baitzuten, bere nortasuna izango zuen testu bereizi bat onartuta.

Herritarren ikuspuntutik irekiagoa, eskuragarriagoa, azkarragoa eta eraginkorragoa izango den administrazio bat egituratzen lagunduko duten alderdi guztiak arautzea, horiek baitira gobernu demokratikoa, gizarte-egonkortasuna eta ekonomia-garapena lortzeko funtsezko baldintzak.

Legebiltzar-taldeek proposatutako zuzenketa gehienak txertatzea –legez onartezinak zirenak salbu– eta, bereziki, "euskal sektore publikoa" terminoak adierazten duen kontzeptua birbideratzearekin lotutako guztia; gainera, ikuspuntu-aldaketa bat egin da, legearen funtsa aplikagarria izan dadin foru-aldundietako eta udaletako sektore publikoetan. Era berean, lege-proiektuak modu esplizituagoan hartzen du aintzat euskal sektore publikoa arrazionalizatu eta neurriratzeko helburua, euskal administrazio publiko guztientzat, bai eta EAEko eraginkortasun publikoari buruzko adostasun teknikoa bilatzeko erakunde-arteko egitura berri bat sortzea ere.

Lege honen antolamendu-aurreikuspenak honako hauei aplikatuko zaizkie, kasu bakoitzean ezartzen den moduan:

a) Euskal Autonomia Erkidegoko Administrazio Orokorrari.

b) Organismo autonomo, zuzenbide pribatuko erakunde publiko, sozietate publiko eta Euskal Autonomia Erkidegoko sektore publikoko fundazio eta partzuergoei.

c) Aurrekoen partaidetza, zuzenekoa zein zeharkakoa, jasotzen duten erakunde, sozietate eta pertsona juridikoei.

d) Gainerako erakunde publikoei, hala xedaturik egonez gero haiek sortzeko arauan edo lege honetan bertan.

Jarduteko printzipio orokorrak, herritarren eskubide eta betebeharrak eta koordinaziorako erakunde-arteko egiturak aplikagarriak izango dira, baita ere, lurralde historikoetako foru-organoetan eta Euskal Autonomia Erkidegoko tokiko erakundeetan, horien antolamendu-, araubide- eta funtzionamendu instituzionaleko arauek xedatzen duten moduan.