Dopajearen aurkako Legea egokitzeko Lege Proiektua

Dopajeek kirol-etikaren oinarrizko printzipioak urratzen dituzte. Eta kirol-iruzur larria ez ezik, osasun publikoarentzat oso arriskutsuak izan daitezkeen jardun ere bihurtu da dopajea; batez ere, kirolari gazteenen bizitzarentzat, haiek baitira errendimendu-kirolaren ohiko protagonistak. Kirol-etikaren esparrua gainditu du dopajeak, eta osasun publikoko benetako arazo bilakatu da; hala aitortzen dute nazioarteko erakundeek, batez ere Europar Batasunekoek. Kirolaren xedearen aurkakoa da substantzia edo metodo debekatuak erabiltzea eta, kasurik gehienetan, norberaren osasunaren kontrakoa ere bai. Kirolaren eta betidanik haren balio eta oinarritzat aldarrikatu izan direnen ifrentzua da dopajea.

Testuinguru horretan, ekainaren 21eko 12/2012 Legea onartu zuen Eusko Legebiltzarrak, Kirolean Dopajea Erabiltzearen Aurkakoa, kirol-alorreko dopajearen aurka jarduten diren nazioarteko erakunde aurreratuenek oro har onartu ohi dituzten irizpideak oinarri harturik. Lehiaketako kirolaren egitura piramidalak eta kirol-lehiaketen arteko loturak, alor eta lurralde-maila desberdinetan, esparru juridiko bateratua eskatzen zuen kirol-arloan dopajearen aurka jarduteko.

Alabaina, 2013ko azaroaren 12tik 15era Hegoafrikako Johannesburg hirian egin zen Dopajearen aurkako IV. Mundu Konferentzian, Dopajearen Aurkako Mundu Kode berri bat onartu zen, Eusko Jaurlaritzako ordezkaritza bat ere han zela. 2015eko urtarrilaren 1ean da indarrean sartzekoa kode berria. Horregatik, egungo legedia (ekainaren 21eko 12/2012 Legea) Mundu Kode berri horretara egokitzeko premiak eragin du aurreproiektuaren prestaketa.

Segurtasun juridikoaren printzipioa bermatzen du ekimen arautzaile horrek, lehendik ere aski konplexua den dopajearen aurkako borrokaren eremu juridiko horretan ziurtasun-ingurune bat eraikitzea baitu xede, eta harmonizazio eske diharduen nazioarteko esparru juridikoarekiko talkak saihestea. 2005eko urriaren 19an, Kirolean Dopajea Erabiltzearen aurkako Nazioarteko Ituna onartu zuen Unescok. Espainiak ere izenpetu zuen hitzarmena, eta Estatuko Aldizkari Ofizialak argitaratu. Honenbestez, gure barne-antolamendu juridikoaren parte dugu Nazioarteko Itun hori, Konstituzioaren 96. artikuluak dioenari jarraikiz. Dopajearen aurkako Mundu Kodearen testua ez dagoen arren Itunean, berariaz dio honek nazioetako legediek Kodearen printzipioak bete behar dituztela, nazioan eta nazioartean  kiroleko dopajearen aurkako jarduerak koordinatzeko.

Ekimen arautzaile horren beste helburuetako bat hau da: 12/2012 Legearen aldaketa aprobetxatzea Dopajearen Aurkako Euskal Agentzia aitortzeko, berariaz, Euskal Autonomia Erkidegoko Administrazio Orokorrari 12/2012 Legearen 10. atikuluak esleitzen dizkion funtzioak garatzeko organo espezializatutzat, eta Euskal Autonomia Erkidegoko dopajearen aurkako antolakuntzaren ordezkari bihurtzeko aipatutako Agentzia. Apirilaren 9ko 193/2013 Dekretuak, zeinaren bidez arautzen baita Sail honen egitura organiko eta funtzionala, espresuki aitortzen du Dopajearen Aurkako Euskal Agentzia, Gazteria eta Kirol Zuzendaritzaren zerbitzu gisara, betiere.

Azkenik, Kirolean Dopajea Erabiltzearen Aurkako ekainaren 21eko EAEko 12/2012 Legeari buruzko Estatuko Administrazioaren eta Euskal Autonomia Erkidegoko Administrazioaren Lankidetzarako Aldebiko Batzordearen erabakiaren edukia jasotzen du testuak.

Dopajeek kirol-etikaren oinarrizko printzipioak urratzen dituzte. Eta kirol-iruzur larria ez ezik, osasun publikoarentzat oso arriskutsuak izan daitezkeen jardun ere bihurtu da dopajea; batez ere, kirolari gazteenen bizitzarentzat, haiek baitira errendimendu-kirolaren ohiko protagonistak. Kirol-etikaren esparrua gainditu du dopajeak, eta osasun publikoko benetako arazo bilakatu da; hala aitortzen dute nazioarteko erakundeek, batez ere Europar Batasunekoek. Kirolaren xedearen aurkakoa da substantzia edo metodo debekatuak erabiltzea eta, kasurik gehienetan, norberaren osasunaren kontrakoa ere bai. Kirolaren eta betidanik haren balio eta oinarritzat aldarrikatu izan direnen ifrentzua da dopajea.

Europako Batzordearen Europako kirol-eredua agiriak dioenez, izugarrizko lehia-giroa nabari da gaur egun kirolean —bai profesionalean, bai amateurrean—, eta kirolarien errendimendua areagotzeko substantzia eta metodo debekatuen erabilera du arazo nagusietako bat. Kezkagarria da dopajearen garapen progresiboa, ikuspegi kualitatibotik zein kuantitatibotik begiratuta. Batetik, ikerketek diote kirolari askok erabiltzen dituztela substantzia eta metodo debekatuak; bestetik, dopaje-jarduerak ez dira jada kirolarien jokabide indibidualaren adierazpen hutsa, baizik eta ekintza antolatuen eta merkatu jakin batzuen emaitza eta ondorio.

Honenbestez, gizarte osoari eta, bereziki, kirolaren sektoreari eragiten die proposatzen den erregulazioak.