Ertzaintzak lau mila manifestazio baino gehiago zenbatu zituen iragan urtean

EAEn 4.013 manifestazio egin ziren 2012an, aurreko urtean baino 478 gehiago  (% 13,52ko hazkundea). Gizarteak egun bizi duen krisialdiarekin lotutako  ekitaldiek eragin dute, nagusiki, hazkunde hori. Horrela bada, iaz % 44,18  manifestazio gehiago egin ziren lan-kontuengatik (1.488 ekitaldi iaz eta 1.032  2011n). Horretaz gain, auzo-gaiengatik egindako elkarretaratzeak ere nabarmen  ugaritu dira; 74 izan ziren 2011n, eta 212 izan dira 2012an.

Orain dela urte batzuk arte elkarretaratze eta manifestazioen lehen kausa  zena, politika-gaia alegia (indarkeriarekin eta terrorismoaren ondorioekin  lotutako gertaerak barne), aldiz, egonkor mantendu da azken urteotan.

Manifestazioen erdia, Gipuzkoan

Lurralde historikoei dagokienez, Gipuzkoan egin dira manifestazio gehien, ia  erdia (1.994); guztien % 49,69 egin baitira han. Bizkaian 1.032 egin ziren  (% 25,72) eta Araban 987 (% 24,59).

Hiriburuei dagokienez, halere, banaketa ezberdina dago. Hiruretan 1.609  manifestazio egin dira guztira. Gasteizen egin dira gehien, hiriburua eta Eusko  Jaurlaritzaren egoitza baita; 757 izan dira han (% 47,04). Ondoren Donostian  egin dira gehien, 464 (% 28,83) eta gero Bilbon, 388 (% 24,73).

Manifestazio bat egiteko aldez aurretiko  jakinarazpena

Herritarren biltzeko eta manifestazioa egiteko eskubidea Legez araututa dago.  Horrela bada, era horretako ekitaldi bat igarotzeko espazio publiko batean egin  nahi duten pertsona edo kolektibo orok idatziz jakinarazi behar diete  agintariei, berau egin baino gutxienez hamar eta gehienez hogeita hamar egun  lehenago. Nolanahi ere, deialdiaren urgentzia justifikatzen duen ezohiko edo larria den kausa izanez gero, hogeita lau ordu lehenago baino ez da jakinarazi  beharko.

Idatzian, behar bezala identifikaturik egongo da jakinarazlea, eta hauek  adieraziko dira: manifestazioaren zergatia, egiteko tokia eta ordua, ibilbidea  zein antolatzaileek aurreikusitako segurtasun-neurriak eta agintariek  eskatutakoak.

Agintariek, berriz, debekatu egin ahal izango dute, baldin eta uste badute  haren garapenean ordena publikoko gorabeherak gerta litezkeela, pertsonak eta  ondasunak arriskuan jarrita, edo haren barnean  delituzko zirkunstantziak  badaude. Halaber, manifestazioaren edozer aldagai aldatzea ere proposa dezakete agintariek (hala nola eguna, ordua, iraupena edo ibilbidea).

Nabarmendu beharra dago Euskal Autonomia Erkidegoan herritarrek  manifestazioak egitearen berri jakinarazten dutela, hain zuzen, kasuen % 97an;  horri dagokionez, gainera, gorazko
joera dago iragan hamarkadatik aurrera,  herritarren era horretako ekitaldiak Legearen esparruaren barruan egitea  lortzeko Ertzaintzak etengabe egindako lanari esker.

* Estatistika horietan 20 lagun baino gehiago parte hartutako manifestazioen  datuak daude jasota (9/1983 Legean gutxieneko kopuru hori eskatzen da  horrelakotzat jotzeko); betiere Ertzaintzak haien berri izan badu eta azkenean  egin badira.