Euskal enpresen kanpoko lantokietan kontratatzeko laguntzen deialdia

Laguntza hauek modu berezituan zuzenduta daude, batetik, esperientziarik gabeko gazte tituludunen kontratazioari eta, bestetik, 35 urtetik gorakoen kontratazioari; berariazko bi programa dira, eta nazioartekotzea eta mugikortasuna sustatzea dute helburu, enpresen lehiakortasuna eta enplegu-aukerak gehitzeko.

 

 

 

Diru-laguntza jaso dezaketen jarduerak

Gazte tituludunak

Diru-laguntza jaso ahal izateko, praktikaldiko kontratuek baldintza hauek bete behar dituzte:

  • Kontratuaren hasiera-datan Lanbiden inskribatuta dauden eta 34 urte edo gutxiago dituzten gazteei egindakoak izango dira.
  • Gutxienez 12 hilabete iraungo dute, eta lanaldi osokoak izango dira.
  • Haien xedea Espainiatik kanpoko lantokietan lanpostuak betetzea izango da, egoitza EAEn duten enpresei lotuta.
  • Kanpoko lantokietan gutxienez 9 hilabeteko egonaldia bermatuko dute; 7 hilabetekoa enpresak egiaztatzen badu zailtasunak izan direla beharrezkoa den bisatua edo administrazio-baimena lortzeko.
  • Kontratatutako pertsonaren prestakuntza akademiko-profesionalarekin bat datozen lanpostuak betetzeko izango dira.

35 urtetik gorakoak

Diru-laguntza jaso ahal izateko, kontratuak honelakoak izango dira:

  • Kontratuaren hasiera-datan Lanbiden inskribatuta dauden eta 35 urte edo gehiago dituzten gazteei egindakoak izango dira.
  • Gutxienez 12 hilabete iraungo dute, eta lanaldi osokoak izango dira.
  • Haien xedea Espainiatik kanpoko lantokietan lanpostuak betetzea izango da, egoitza EAEn duten enpresei lotuta betiere.
  • Kanpoko lantokian gutxienez 6 hilabeteko egonaldia egitea bermatuko dute.
  • Kontratatutako pertsonaren prestakuntza akademikoarekin eta/edo kualifikazio profesionalarekin bat datozen lanpostuak betetzeko izango dira.

Enpresa onuradunak

Diru-laguntzaren zenbatekoa

Egiten den kontratu-kopuruak zehaztuko du diru-laguntzaren gehienezko zenbatekoa. Kontratu bakoitzeko emango den diru-laguntzaren zenbatekoa kopuru hauek batuz zehaztuko da:

Gazte tituludunak

  • Soldata-kostua eta Gizarte Segurantzakoa, kontratuaren indarraldiko lehen 12 hilabeteetakoak, eta gehienez ere 2017ko urriaren 31ra artekoak. Kontzeptu horregatik urtean eman daitekeen gehienezko diru-laguntza kontratatu beharreko pertsonaren titulazio-taldearen arabera zehaztuko da:

    I. taldea: 26.200 euro
    Unibertsitateko lizentziatua, diplomatuak, ingeniaria eta arkitektoa
    II. taldea: 23.600 euro
    Lanbide Heziketako Goi edo Erdi mailako teknikaria edo baliokideak eta Ziurt. Profesionala
  • Kontratazio bakoitzaren soldataren eta gizarte-segurantzaren kostuen % 3, enpresa onuradunak aseguru bat kontratatzeak eragingo dituen gastuak finantzatzeko. Aseguru horrek, gutxienez, hauek estali beharko ditu: bidaia, mediku-arreta, istripuak, gaixotasun larria, ospitaleratzea eta aberriratzea. Aseguru hori nahitaezkoa da, eta kanpoan igarotzen den denbora guztia estali beharko du
  • Kontratazio bakoitzaren soldataren eta gizarte-segurantzaren kostuen gaineko % 4 gehigarria, lanpostua betetzeko beharrezkoa den bisatua edo administrazio-baimena lortzeko gastuen finantzazioaren kontzeptuan, horiek eskatzen dituzten herrialdeen kasuan.

35 urtetik gorako pertsonak

  • Soldata-kostua eta Gizarte Segurantzarena, kontratuaren indarraldiko lehen 12 hilabeteetakoak, eta gehienez ere 2017ko urriaren 31ra artekoak. Kontzeptu horregatik urtean eman daitekeen gehienezko diru-laguntza kontratatu beharreko pertsonaren adin-taldearen arabera zehaztuko da:

    35 eta 44 urte bitarte: 40.500 euro.

    45 urtetik gorakoak: 45.000 euro

  • Kontratazio bakoitzaren soldataren eta gizarte-segurantzaren kostuen % 2, enpresa onuradunak aseguru bat kontratatzeak eragingo dituen gastuak finantzatzeko. Aseguru horrek, gutxienez, hauek estali beharko ditu: bidaia, mediku-arreta, istripuak, gaixotasun larria, ospitaleratzea eta aberriratzea. Aseguru hori nahitaezkoa da, eta kanpoan igarotzen den denbora guztia estali beharko du
  • Kontratazio bakoitzaren soldataren eta gizarte-segurantzaren kostuen gaineko % 2 gehigarria, lanpostua betetzeko beharrezkoa den bisatua edo administrazio-baimena lortzeko gastuen finantzazioaren kontzeptuan, horiek eskatzen dituzten herrialdeen kasuan.

Diru-laguntzaren zenbatekoak ezin izango du gainditu egindako kontratazio bakoitzaren egiazko kostua, kontratatutako pertsonen soldata-kostuak eta Gizarte Segurantzakoak kontuan hartuta. Gainditzen badu, kostu errealeraino murriztuko da diru-laguntza.

Ondorio horietarako, soldataren eta gizarte-segurantzaren kostuak izango dira sektoreko hitzarmen kolektiboan edo enpresako negoziazioan hitzartu edo ezarritako ordainsari gordinei dagozkienak, hauek barne hartuta: oinarrizko soldata, jardueratik eratorritako osagarriak (ezagutza bereziak, konfidentzialtasuna, lan-txandak...) aparteko ordainsariak, mozkinen partaidetza, ekoizpenerako pizgarriak, aparteko orduak eta geografiako toki jakin batean lan egiteagatiko bizileku-osagarria, baita enpresaren konturako gizarte-segurantza eta langilearen kargurako gizarte-kotizazioak eta zergak ere.

Ez dira soldata-kostutzat hartuko, besteak beste, espezietan emandako prestazioak, bidaia, ostatu eta mantentzeagatiko dietak, eta enpresaren "gizarte-ekintza" deiturikoaren parte diren gainerako soldataz gaindiko ordainsariak eta gastuak.

Ez da diruz lagunduko honako hauek kontratatzea: ez enpresaburuaren edo enpresaren kontrola duenaren ezkontidea, oinordekoak eta gainerako senideak, bigarren mailara arteko odol- edo ezkontza-ahaidetasuna arte, ezta sozietate izaera juridikoa duten enpresetako administrazio-organoetakoenak edo zuzendaritzako kideenak ere; eta azken horiek kontratatzea ere ez da lagunduko diruz.

Deialdi hauetako laguntzek bete behar dute Batzordeak 2013ko abenduaren 18an egindako 1407/2013 (EE) Erregelamenduan (DOUE L352, 2013 abenduaren 24koa) ezarritako minimis araubidea, zeinaren arabera Enpresa bati emandako guztizko minimis laguntza ez baita 200.000 eurotik gorakoa izango segidako hiru zergaldiko edozein alditan.

Deialdi hauetako laguntzek Europako Gizarte Funtsaren finantzazioa ere badute.

Ebazpena

Aurkezten diren hurrenkeran aztertuko dira eskabideak, eta hurrenkera horretan emango zaizkie diru-laguntzak deialdiko baldintzak eta eskakizunak betetzen dituzten guztiei, harik eta finantzaketarako funtsak amaitu arte.

Eskabide bakoitzari buruzko ebazpen espresuan honako hauek jasoko dira: enpresa bakoitzari ematen zaion kontratazio-plana, ordaintzeko modua eta zenbatekoa, eta diru-laguntzaren justifikazioa.

Kontratatuko diren pertsonak hautatzeko prozesua

  • Ebazpenaren ondoren, enpresa onuradunak diru-laguntzaren onarpena helarazi beharko dio Lanbideri, eta kontratazio-planaren araberako enplegu-eskaintzak aurkeztuko dizkio.
  • Lanbidek hautagaien lehen hautaketa egin beharko du, enplegu-eskatzaile gisa inskribatutakoen artean, kontuan hartuta onartutako kontratazio-planean aurreikusitako betekizun eta irizpide zehatzak bete behar dituztela enplegu-eskatzaileek.
  • Gehienez ere hamar eguneko epean, Lanbidek zerrenda bat bidaliko dio enpresari, eskatutako lanpostu bakoitzeko hiru hautagai jasotzen dituena.
  • Behin lehen hautaketa hori jasotakoan, enpresa onuradunak langileak hautatuko ditu. Horretarako, hautagaiak zer hizkuntza-maila duen eta lanpostuari egokitzen zaion ala ez aztertzeko beharrezkotzat jotzen dituen probak egingo ditu enpresak. Hautaketa egindakoan, enpresak horren berri emango dio Lanbideri, eta kontratatutakoen dokumentazioa bidali.
  • Hamar eguneko epean Lanbidek ez badu proposatzen kontratatzeko pertsonarik, edo Lanbidek proposatutako pertsonek hautaketa-probak gainditzen ez badituzte, enpresak beste hautagai batzuk proposatu ahal izango ditu, eta Lanbideri jakinarazi beharko dio hautagai horiek nor diren, bai eta kontratazioak zein egunetan egitekoak diren ere. Gehienez ere 2 egun balioduneko epean, Lanbidek egiaztatu beharko du ea proposatutako pertsonek betetzen dituzten bai deialdiko betekizunak bai onartutako kontratazio-planekoak; eta enpresari horren berri emango dio.