Eskaera telematikorako laguntza

TRAMITAZIO TELEMATIKOA

  1. Derrigorrezkoa da deialdi honetan eskaera eta ondorengo izapideak telematikoki egitea?
  2. Zertan datza izapide telematikoa?
  3. Zer abantaila ditu izapide telematikoak?
  4. Zer desabantaila ditu izapide telematikoak?
  5. Zer da “Nire kudeaketak”?
  6. Nola sinatzen da telematikoki?

ZIURTAGIRIAK

  1. Zer ziurtagirik balio du izapidetze telematikoa egiteko?
  2. Nola lor dezakegu informazio gehiago eskaera telematikoki izapidetzeko beharrezkoak diren ziurtagiri digitalei buruz?
  3. Nola lor dezaket informazio gehiago Ordezkarien Erregistro Elektronikoari buruz?

ESKARIA

  1. Zer egin behar da eskaera egiteko?
  2. Datu guztiak batera sartu behar dira ala eskaeraren zirriborroa gorde daiteke bidali gabe?
  3. Nola sartzen dira eskaeraren datuak?
  4. Nola eransten zaio dokumentazioa eskaerari?
  5. Nola sartzen dira aurrekontuaren datuak?
  6. Nola dakigu eskaera telematikoa modu egokian bidali dela?

DOKUMENTAZIOA / JUSTIFIKAZIOA AURKEZTEA

  1. Eskaera aurkeztu eta gero gehi dakioke espedienteari dokumentaziorik? Nola?

JAKINARAZPEN TELEMATIKOA

  1. Zertan datza jakinarazpen telematikoa?
  2. Nola dakigu zain daukagula jakinarazpen telematiko bat?

 

 

TRAMITAZIO TELEMATIKOA

  1. Derrigorrezkoa da deialdi honetan eskaera eta ondorengo izapideak telematikoki egitea?

Bai, Herri Administrazioen Administrazio Prozedura Erkidearen urriaren 1eko 39/2015 Legea indarrean sartu denez, erakunde interesdunak laguntza-programa honek eskatzen duen izapidetze oro modu telematikoz egitera derrigortuta daude.

Horrek esan nahi du ezin izango direla aurrez aurre aurkeztutako eskaerak onartu, “paperean”, Zuzenean-eko bulegoetan, postaz, etab.

 

  1. Zertan datza izapide telematikoa?

Izapidetze telematikoak Administrazioarekin bitarteko elektronikoen bidezko harremana gauzatzeko modua da, zerbitzu publikoetara sartzeko edo administrazio prozeduren izapideak egiteko, hala nola diru-laguntza eskaerak.

 

  1. Zer abantaila ditu izapide telematikoak?

Izapide telematikoak egiatasuna, osotasuna, isilekotasuna, erabilgarritasuna eta informazioaren kontserbazioa bermatzen du. Honetaz gain, izapidea arindu egiten du, eta ondorioz diru-laguntza deialdiak lehenago ebaztea ahalbidetzen du, erakunde eskatzaile guztien onerako dena.

Erabiltzaileei ondokoak eskaintzen dizkie:

  • Berehalakotasuna: Eskaera edo eransten den dokumentazioa berehala iristen zaie Zuzendaritza kudeatzaileei.
  • Ez lekualdaketarik: Ez da zertan lekuz aldatu dokumentuak Ordezkaritzetara edo posta-etxeetara eramateko. Lantokitik bertatik izan daitezke harremanak administrazioarekin.
  • Ordu mugarik ez: Ez dago ordu-mugarik, kudeaketak guk aukeratzen dugunean egin daitezke.

  

  1. Zer desabantaila ditu izapide telematikoak?

Urte hauetako ibilbideak irakatsi digu prozesu hau berria izateak eta, beraz, txartela digitalak erabiltzeko edo Administrazioarekin harreman telematikoa izateko esperientzia faltak, erakunde askok izapide telematikoa errefusatzea dakartela.

Gaur egun, izapide mota honen desabantaila handiena hasierako hesi hau da, eta hori dela eta, kasu batzuetan beharrezkoa izaten da erabiltzen den lehenengo aldian laguntza bat izatea. Horretarako eskaintzen dira IZENPEren eta zuzendaritza kudeatzaileetako langileen zerbitzuak, prozesu honetan aholkatuko dutenak.

Hasierako hesi hau gaindituta, eta oinarrizko ezagutza hartuta, prozesua oso erraza da, eta aurrez-aurreko izapidearen aldean abantaila handiak eskaintzen ditu.

 

  1. Zer da “Nire kudeaketak”?

Nire kudeaketak atalean zure espedienteak kontsulta eta tramitatu ditzakezu, bai linean bai zuzenean tramitatutakoak. www.euskadi.eus-eko Egoitza Elektronikoan kokatzen da.

Administrazioarekiko izapideak kontsultatzeko aukera ematen du.

  • Espedienteak ikusi, bai izapidetan daudenak, bai bukatutakoak ere.
  • Sortutako espedienteetan dokumentuak erantsi.
  • Jakinarazpenak eta komunikazioak jaso. Jasotzeko dauden jakinarazpenetara sar zaitezke, bai eta jasotakoetara edo baztertutakoetara ere.
  • Ordainketak egin. Egindako ordainketak eta egiteko daudenak ikus ditzakezu. Ordaintzeko dauden ordainketei dagokienez, pagamendu-pasagunera sar zaitezke zuzenean ordainketa on-line egiteko.
  • Ziurtagirien kontsulta egin.

Nire kudeaketak sailaren azalpen-bideoa.

Nire kudeaketak atalean sartzeko, modu seguruan identifikatu beharko duzu zeure burua, ziurtagiri digitalaren bidez. “Sartu nire kudeaketak-en” sakatzen duzunean, leiho berri bat irekiko da identifika zaitezen. Ziurtagiri digitala sartu beharko duzu irakurgailuan, eta ziurtagiri digitalaren PINa edo itsasontzi-jokoa sakatu.

“Nire Kudeaketak” atalean hainbat bandeja dago, eta konektatu den pertsonak horiei buruzko berebiziko informazioa jaso dezake.

 

  1. Nola sinatzen da telematikoki?

Txartela digitala txartela irakurgailuan sartu behar da, eta PIN zenbakia sartu behar da eskatzen denean, edo ziurtagiri elektronikoaren pasahitza eta itsasontzi-jokoa sartu. Horrela, agiri elektronikoari lotutako datuak egindako kudeaketa edo dokumentuan islatuta geratzen dira. Sinadura elektronikoak idatzitakoak besteko baliotasun eta lege-ondorioak ditu.

 

 

ZIURTAGIRIAK

  1. Zer ziurtagirik balio du izapidetze telematikoa egiteko?

Beharrezkoa da identifikazio elektronikorako bitarteko bat izatea.

Norbanakoaren edo pertsona fisikoaren ziurtagiria erabili ahal izateko, ezinbestekoa izango da pertsona hori, erakundearen izenean jarduten duena, Ordezkarien erregistro elektronikoan horretarako izena emanda egotea. Aplikazio berri honek kudeatzen ditu erakundeek pertsona batzuei bere izenean jarduteko ematen dizkieten ordezkaritzak.

Kontuan izan behar da eskaera bakoitza hasi, sinatu eta bidaltzeko ziurtagiri elektroniko bera erabili behar dugula. Hau da, eskaera bat hasi dezakegu, zirriborroa gorde eta beste egun batean beste ziurtagiri batekin jarraitu, baina sinatu eta bidaltzeko hasi zen ziurtagiria erabili beharko dugu.

 

  1. Nola lor dezakegu informazio gehiago eskaera telematikoki izapidetzeko beharrezkoak diren ziurtagiri digitalei buruz?

Izenperen web orrian, edo 902 542 542 telefonoan. Izenpe Eusko Jaurlaritzak eta Foru Aldundiek bultzatutako ziurtapen erakundea da. Ziurtapen-zerbitzuetako egile batek sinadura elektronikoko zerbitzuak eskaintzen ditu. Sinadura elektronikoa honela defini daiteke: Internet bidez eta telefono bidez lehen bertaratuta egin behar ziren izapideak egin ahal izateko ohiko eskuzko sinadura “ordezkatu” dezaketen prozedura tekniko eta juridikoen multzoa.

 

  1. Nola lor dezakegu informazio gehiago Ordezkarien Erregistro Elektronikoari buruz?

Ordezkarien Erregistro Elektronikoaren inguruko kontsultak use@euskadi.eus posta elektronikoan edo 945 06 20 16 telefonoan egin daitezke.

 

 

ESKARIA

  1. Zer egin behar da eskaera egiteko?

Eskaera-orrira Enplegu eta Gizarte Politiketako webgunean dagoen diru-laguntzaren fitxaren bitartez sartu ahal da, “Eskaera eta Agiriak aurkeztea” atalean. Eskaera egiteko orri hau tramitazio elektronikoarekin lotzen da zuzenean. Horretarako, ziurtagiri digital bidez identifikatzeko eskatuko dizu.

Eskaera orriarekin batera aparteko dokumentazioa eman behar da. Honela jokatzea gomendatzen da: tramitazioari ekin aurretik, eman behar den dokumentazio guztia biltzea eta ordenagailuan gordetzea.

 

  1. Datu guztiak batera sartu behar dira ala eskaeraren zirriborroa gorde daiteke bidali gabe?

Ez da beharrezkoa datu guztiak aldi berean betetzea. Gorde daitezke eskaeraren zirriborroak, eta jarrai daiteke hasitako batekin: “Aurreko eskaeraren bilaketa” sakatuz, pantailaren goiko ezkerreko aldean.

Kontuan izan behar da eskaera bakoitza hasi, sinatu eta bidaltzeko ziurtagiri elektroniko bera erabili behar dugula. Hau da, eskaera bat hasi dezakegu, zirriborroa gorde eta beste egun batean beste ziurtagiri batekin jarraitu, baina sinatu eta bidaltzeko hasi zen ziurtagiria erabili beharko dugu.

 

  1. Nola sartzen dira eskaeraren datuak?

Aplikazioak 6 pantaila ditu eta horietan sartu behar dira eskatzen diren datuak, eta pantaila batetik bestera joan daiteke “Itzuli” eta “Hurrengoa” botoiak sakatuz:

  • Lehenengo bi pantailetan elkartearen datuak jasotzen dira.
  • Hirugarrenean dokumentazioa erantsi behar da.
  • Laugarrenean eta bosgarrenean, diru-laguntza jasotzeko aurkezten den proiektua azaltzen da.
  • Seigarrenean proiektuaren aurrekontuaren berri ematen da.

Beste pantaila batera pasatu baino lehen, pantailak gordetzea komeni da.

Beste dokumentu batetik "Kopiatu" eta "Itsatsi" egin daiteke, baina iturburuko formatua mantentzeko, W duen karpetaren ikonoan klikatu behar da, "Wordetik itsasteko".

Datuak sartu ondoren, eskaeraren laburpena azalduko zaigu, sartu ditugun datuen araberakoa. Daturen bat aldatu nahi izanez gero, atzera itzuli eta aldaketa egin ahal izango dugu. Ados bagaude, sinatu egiten da eskaera -“Sinatu”-ri emanez eta ziurtagiri digitaleko PINa edo itsasontzi-jokoa sartuz- eta ondoren bidali egiten da sinatutako eskaera, “Bidali”ri emanez. Une honetan, bidali dugun eskaera inprimatzeko aukera dugu.

Goiko eskuinaldean laguntzarako dokumentua dugu, zalantzarik izanez gero kontsulta dezakeguna.

 

  1. Nola eransten zaio dokumentazioa eskaerari?

Hirugarren pantailak, nahi dugun dokumentazioa eransteko aukera eskaintzen digu. “Dokumentuak gehitu”, “Aztertu” eskaerari gehitu nahi diogun dokumentua sakatu eta, azkenik, “Erantsi”ri eman behar diogu.

 

  1. Nola sartzen dira aurrekontuaren datuak?

Aurrekontuaren kopuruak sartu ahal izateko, euroaren “€” ikonoan sakatu behar da.

Atal berriak sartu nahi baditugu “Berria”ri emango diogu sarreretan edo gastuetan, eta atal berriari dagozkion izena eta kopurua sartuko ditugu.

Zuzeneko gastuen xehetasunak sartzeko “Berria”ri emango diogu, atal bat aukeratu eta xehetasuna eta kopurua sartuko ditugu, kontuan izanik atal bateko xehetasunen kopuruen gehiketak bat etorri behar duela “Jardueraren gastu zuzenak” taulan ageri den gehiketarekin.

 

  1. Nola dakigu eskaera telematikoa modu egokian bidali dela?

Eskaera bidali ondoren, Administrazioan izan duen sarrerako erregistro-zenbakia azalduko zaigu, eta hori gorde edo inprimatu ahal izango dugu, eta horrela badakigu eskaera modu egokian egin dela.

Eskaera bidalitakoan, eskaera horrek duen espediente-zenbakia erakutsiko digu aplikazioak.


  

DOKUMENTAZIOA / JUSTIFIKAZIOA AURKEZTEA

  1. Eskaera aurkeztu eta gero gehi dakioke espedienteari dokumentaziorik? Nola?

Bai. Espedienteari dokumentuak gehi dakizkioke “Nire kudeaketak”eko “Espedientea”n sartuz, aukera hori eskaintzen delako “Dokumentazioa erantsi” botoiaren bidez.

Justifikazioari dagozkion eranskinak ere (II-A eta II-B Eranskinak) modu horretan bidal daitezke bete ondoren.

 

 

JAKINARAZPEN TELEMATIKOA

  1. Zertan datza jakinarazpen telematikoa?

Jakinarazpen hau ireki ahal izango da elkartearen ziurtagiri digitalaren bidez edo Ordezkarien Erregistro Elektronikoan erakundearen ordezkari gisa izena emanda dauden pertsonen ziurtagiri digitelen bidez.

Jakinarazi nahi den dokumentua elkartearen eskura jartzen da “Nire kudeaketak”en. Jaso ahal izateko “Jakinarazten den ekintza”ko loturan (azpimarratutako testuan) sakatu behar da. Ondoren ziurtagiri digitala eta PINa edo itsasontzi-jokoa sartu behar dira, jakinarazpena jasotzearen sinadura bezala.

Hamar egun natural igaro badira loturan sakatu gabe, ulertuko da jakinarazpenari uko egin zaiola eta egin beharreko tramitea gauzatu dela, eta ondoren prozedurari jarraituko zaio, posta bidez bidaltzen zaigun jakinarazpena jasotzen ez dugunean egiten den bezala.

 

  1. Nola dakigu zain daukagula jakinarazpen telematiko bat?

Jakinarazpen bat egiten denean, e-mail bat edota SMS bat bidaliko da abisu moduan; abisu horren bidez adieraziko da www.euskadi.eus webgunera jo behar dela, identifikazio-txartela edo pasahitza txertatu eta “Egoitza elektronikoa – Nire kudeaketak” atalean sartu, non eskuratu ahal izango duen elkarteak jakinarazpena osorik.

Oso garrantzizkoa da abisurako e-mailaren edota eskuko telefonoaren datuak ematea; hori ez bada egiten, elkarteak aldiro-aldiro “Nire kudeaketak” atalean sartu beharko du, ea jakinarazpenik duen ikusi ahal izateko.

 

Azken aldaketako data: