Euskal Herriko Meatzaritzaren Museoa

Meatzaritzaren Museoak Euskal Herriko meatzaritzaren kultura eta historia ikertzea eta hedatzea du helburu, bereziki Bizkaiko Meatzaldeari dagokiona. Meatzaritza alorreko Estatuko erreminta eta material bildumarik osoena biltzen du, besteak beste, bagoiak, zaurituen esku-oheak eta mailuak baitaude ikusgai.

Museoa inguratzen duen Concha II meategia garai batean Europako burdina meatze handiena izan zen. Meategi horrek 50 kilometroko lurrazpiko galeriak ditu. Meategietako jarduerak hondar industrialak utzi ditu inguru guztian, eta horien inguruko azalpenak ematen dituzte museoan.

Antzinako burdina-ustiapenetako hainbat pieza, tresna eta makina ikusteko parada dago, baita dokumentazioa ere. Mineralaren garraiorako bagoien eta bagoneten bilduma, balde-lerroen astoak, mineralaren garbiketarako bahe birakariak eta Bizkaiko meatzaritzan erabili izan diren makinen adibide bikainak daude. Horrekin batera, eguneroko erabilerako elementuak ere badaude: lanparak, txokloak (oinetako tipikoak), teodolitoak, laztabinak, zulatzeko koilaratxoak, bagoiak kontatzeko abakoak eta maskarak, besteak beste. Aipatzekoa da, era berean, artista ezagunek egindako meategietako pinturen bilduma.