Santa Maria basilika

XV. mende amaierako estilo gotiko-errenazentista du eta egun Monumentu nazional izendapena dauka.

1691n hasi ziren dorrearen eraikuntza lanak. Azkeneko Karlistaldian (1874) suntsituta geratu zen eta berreraiki egin behar izan zuten.

Kanpotik, horma bularren gainean, Erdi Aroko bi gargola ageri dira, animalia fantastikoak irudikatzen dituztenak. Atari nagusia kanpandorrearen azpian dago kokatua, kanpandorrea era berean sarrera da eta.

Eliza barruan, pilare zatikatuetan oinarritutako gurutzeria gangak daude baina aipagarriena erretaula nagusia da, euskal berpizkundearen adibide interesgarria. XVI. mendean Beaugrant anaiek eta Ayalako Juanek egin zuten.