Monterron Jauregia

Monterron Jauregia XVII. mendeko eraikin barroko herrerotarra da. Apaindura gutxi ditu eta leihoetan burdin sareak dauzka. Aurrealdea harlanduzkoa da eta bi armarri ditu, Andikano-Zelaa familiarena eta Aranguren-Unzueta sendiarena. Antzinako sarrera nagusia kate sendo batzuek babesten dute, eta egungo sarreraren aurrean Marta Medici argentinarrak 1986an egindako eskultura bat ikus daiteke. 1964ko urtarrilaren 17an Monumentu Historiko-Artistiko izendatu zuten. Antzinako lorategia parkea da orain. Espezie botaniko ugari daude bertan: gaztainondoak, pagoak, haritzak, bananondoak, magnoliak... Alboetan, gainera, oso zaharrak diren sekuoia erraldoiak ikus daitezke.