Arkitekturako unibertsitatean elkarrekin ikasten genuenetik, argi genuen gure arkitektura-estudioa sortuko genuela, taldean lan egiten jarraitzeko eta gure jakin-nahiak garatzeko.

Gure ingurukoak asko lagundu gaituzte, baina egia da pertsona batzuk harri eta zur geratzen zirela krisi-garaian eraikuntzaren esparruan enpresa bat sortzeko asmoa genuela kontatzen genienean.

Maila pertsonalean, zalantzak enpresa batek sortzeak dakarren ziurgabetasunarekin lotuta zeuden batez ere, sakrifizioari, ezegonkortasun ekonomikoari, ordutegi amaiezinei eta abarri dagokionez. Profesionalki, berriz, zenbait zalantza genituen, arkitekto baten unibertsitateko prestakuntza ez baitago bideratuta enpresa bat sortu eta zuzentzera: kudeaketak, kontularitza, merkataritza-lana...

Arquineak behar espazialak, ekonomikoak, teknikoak, legezkoak, sormenezkoak... asetzen ditu, arkitektura eta diseinua uztartuz eskaintzen dugun zerbitzu sorta oso zabala baita. Gure zerbitzuek barne hartzen dute, bai esparru teknikoa, eraikuntzako, eraberritzeko eta dekorazioko txostenak eta proiektuak idatziz, bai alderdi sortzaileagoa ere, arkitektura tenporaleko, diseinu grafikoko, web-orrietako eta publizitateko lanak eginez.

Lan-esperientzia faktore garrantzitsua da, baina ez da ezinbestekoa. Izan ere, esperientzia-eza sektoreko adiskideei kontsultatuz konpentsa daiteke eta ikastaroen eta hitzaldien bidez etengabe prestatuz.

Gure ustez, edozein enpresarentzat beharrezkoa da berariazko prestakuntza, merkatua aldakorra da eta. Gure sektorearen berezitasuna da eraikuntza-irtenbideak, materialak eta araudi-betekizunak etengabe aldatzen ari direla.

Berrikuntza edozein negoziotan funtsezkoa dela iruditzen zaigu, bezeroak planteatzen dizkigun beharren aurretik egon ahal izateko. Gure enpresan, zehazki, sormena gure oinarri nagusietako bat da.

Abantaila nagusia da gure negozioaren ibilbidea zuzen dezakegula eta gauzatzen ditugun proiektuen fase bakoitzean parte har dezakegula.

Oztopo nagusiak, oro har, bezeroak bilatzea eta gure enpresa ezagutaraztea izan dira, pazientzia asko eskatzen duten lanak baitira.

Gure ustez, edozein une ona da ekiteko ilusioz eta lana eginez egiten bada. Enpresok tartea bilatu behar dugu merkatuan eta desberdinak izaten saiatu, lehiari gailentzeko, krisia egon nahiz ez.

Arrakasta izango litzateke beti ilusioari eustea, gogoko duguna egiten jarraitu ahal izatea eta horrekin bizitza aurrera ateratzea.

Egiaz gogoa duen eta negozio bat sortzeko ideia duen orori abian jartzera animatzen dugu, orain baita unea eta besteren kontura lana bilatzea beti izango baita aukera bat. Horrez gainera, gaur egun, erakunde eta organismo batzuek ekintzaileei lagundu egiten diete eta haien lana errazten dute, hala nola UPV/EHUko ZITEK programa eta Beaz (gure bulegoa bertan dago).

Ez dugu gogoko porrotari buruz hitz egitea, eta gaizki ateratzen bada ere, bertan eman dugun denbora ez da alferrik galdutakoa izango, asko ikasiko baitugu, eta bai, gure ustez, berriz saiatuko ginateke.