Hezkuntza, Unibertsitate eta Ikerketako sailburuaren 2012ko abuztuaren 27ko Aginduaren bidez (EHAA, 2012-09-11koa) onartu zen Euskal Autonomia Erkidegoko unibertsitatez kanpoko ikastetxe publikoetan egon daitezkeen aldi baterako irakasleen beharrak estaltzeko hautagaien zerrendak kudeatzeko araudia; II. eranskinean, espezialitateen eta irakasgaien zerrenda biltzen da, eta III. eranskinean, irakaskuntza-maila ezberdinetako espezialitateetan ordezkapenak egiteko hautagaien zerrendetan sartzea ahalbidetzen duten titulazioen taulak.

Agindu horren azken xedapenetako bigarrenaren bidez, Langileak Kudeatzeko Zuzendaritza gaitzen da, behar izanez gero eta dagokion ebazpenaren bidez, ordezkaritza sindikalarekin dagokion negoziazioa egin ondoren, ikasturtean zehar eta bereziki birbaremazio-prozesu bakoitza hasi aurretik, aipatutako taulan jasotako espezialitateren bat emateko gaitasuna emango duten titulazio berriak sar ditzan, edo lehendik daudenak alda ditzan. Horretarako, batzorde batek, Hezkuntza Berrikuntzako Zuzendaritzako, Langileak Kudeatzeko Zuzendaritzako, Unibertsitate Politika eta Koordinazioko Zuzendaritzako, Plangintza eta Antolaketako Zuzendaritzako eta Hezkuntza Ikuskaritzako ikuskatzaile bateko teknikariek osatuta, egin daitezkeen txertaketak, aldaketak eta baliokidetasunak ebaluatuko ditu, eta Langileak Kudeatzeko Zuzendaritzari proposamen egokiak egingo dizkio.

Azaldutakoarekin bat etorriz, ordezkapenetarako hautagaien zerrendetan sarbidea ematen duten titulazio berriak gehitzeko beharra ikusi da, aipatutako Batzordeak titulazioen ikasketa-planak aztertu eta zerrenda horietako espezialitate jakin batzuk emateko egokiak diren aztertu ondoren. Bestalde, Batzorde horren azterketa behar izan ez duten beste titulazio batzuk ere gehitzeko beharra ikusi da, dagoeneko dauden titulazioen beste Hezkuntza plan bateko titulazio baliokideak direlako edo dagoeneko dauden titulazioekin lotuta daudelako.

Halaber, aipatutako Batzordearen azterketaren ondoren, Medikuntzako Lizentziatura, Medikuntzako Gradua, Albaitaritzako Lizentziatura eta Albaitaritzako Gradua birkokatzeko beharra ikusi da espezialitate hauetako zerrendetara 1. kidetasunarekin sarbidea eman dezaten: Biologia eta Geologia (0255), Curriculum Desberdinak Eratzekoa: Zientzia eta Teknologia (0989) eta Helduen Hezkuntza: Ezaguera Zientifiko Teknologikoaren Esparrua (1585).

Beraz, horretarako eratutako Batzordeak egin beharreko aldaketak ebaluatu eta sindikatuen ordezkariekin negoziatu ostean, honako hau,