Leioa, 2008ko abuztuaren 18a.

Idazkari nagusia,

IΡAKI ESPARZA LEIBAR.

1. – Bileretarako deiak ohikoak eta ezohikoak izango dira.

2. – Bileretarako deiak, oro har, ohikoak izango dira. Ikastegiko Batzarrak ohiko bilera bi egingo ditu, gutxienez, seihileko bakoitzean.

3. – Ezohiko bilera egingo da bileran aztertuko den gaiak hala eskatzen duenean eta, baita ere, arautegi aplikagarriak xedatutako kasuetan. Ezohiko bileretako aztergaien zerrendan ez dira agertuko gai hauek: aurreko akten onespena eta galde-eskeak.

4. – Presazko bilerak ezohikoak izango dira eta deia gutxienez 24 ordu lehenago egin beharko da. Halakoetan, bilera egiteko arrazoia benetan premiazkoa dela onartu beharko da bileraren hasieran. Onartzen ez bada, bilera bertan behera geratuko da besterik gabe.

1. – Kide anitzeko organoetako buruek egin behar dute kasuan kasuko organoaren bilerarako deia.

2. – Dena dela, kide anitzeko organoko kideen % 25ek hala eskatzen badute, bilerarako deia egin beharko da. Bilera ezohikoa izango da eta gehienera ere zazpi egun balioduneko epean egingo da, eskaera egiten denetik hasita.

3. – Bilerarako deia organoko idazkariak bideratuko du, denbora nahikoarekin eta, edonola ere, bileraren data baino hiru egun lehenago. Deialdian adieraziko da bilera non egingo den, zein ordutan, eta zeintzuk gai aztertuko diren bertan. Organoko kideek denboraz eskuratu beharko dituzte aztergaiei dagozkien dokumentuak eta, edonola ere, bileraren data baino 24 ordu lehenago.

4. – Edonola ere, aztergaiak osatzen dituzten puntuak zehatz eta mehatz jasoko dira deialdian. Puntu horien artean agertu beharko dira organoko kideen % 10ek, gutxienez, idatziz eskatutakoak bilerako eguna baino bost egun lehenago behintzat.

5. – Aztergaietan puntu gehiago sartu nahi dituzten batzarreko kideek bilera-eguna baino 72 ordu lehenago egin behar diote eskaera ikastegiko idazkari akademikoari. Eskaera gutxienez bost kidek egin behar dute.

6. – Aztergaietan agertzen ez diren puntuei buruzko erabakirik ezingo da hartu; baina organoko kideen bi heren baino gehiago badaude bileran, eta botazioa eginda gehiengo absolutuak gaia premiazkoa dela uste badu, erabakia hartu ahal izango da.

7. – Organoak jarduera daukan egoitzetan eta gainerako tokietan eman beharko da argitara deialdia, organoko kideei bilerarako deia egiten zaien egun berean, jende guztia jakinaren gainean egon dadin.

1. – Kide anitzeko organoko kide izatea norberari dagokion ezaugarria da eta ezin da beste inoren gain utzi. UPV/EHUko Estatutuetako 228. artikuluan aipatutako egoeretan utziko dio organoko kide batek kide izateari.

2. – Organoa behin eratuta, hutsik geratuko diren lekuak kasuan kasuko zerrendetako ordezkoek beteko dituzte. Aipatutako irizpideari jarraitu ondoren bete gabe geratzen den plaza kopurua talde bateko kideen % 50 baino handiagoa edo organoko kideen % 30 baino handiagoa bada, hauteskunde partzialak egingo dira. Modu horretara hautatuak kide izango dira agintaldia amaitu arte.

1. – Kide anitzeko organoetako kideek organoen bileretara joateko eskubidea eta joan beharra daukate, eta arautegi honek betearazten dizkien eginkizunak betetzekoa. Bileretara joateak unibertsitateko gainerako betebeharrak betetzetik salbuetsiko ditu organoetako kideak, baina kasuan kasuko organoek beharrezko neurriak hartuko dituzte betebehar horiek bete egiten direla eta zerbitzua eman egiten dela bermatzeko.

2. – Kide anitzeko organoetako kideek eskubidea dute euren eginkizunetarako beharrezko izan dezaketen unibertsitateko dokumentazioa eta informazioa eskatzeko. Eskaera formala aurkeztu beharko dute horretarako Erregistroan, eta jasota utzi eskaeraren data.

1. – Kide anitzeko organoak balioz eratzeko beharrezkoa izango da kideen gehiengo absolutua egotea bertan lehen deialdian; edo kideen heren bat, gutxienez, bigarren deialdian. Edonola ere, organoko burua eta idazkaria beti egon beharko dira edo, bestela, euren ordezkoak.

2. – Kide anitzeko organoko kide bakoitzak beste baten ordez baino ezin izango du eman botoa. Organoa eratzeko quorumerako ez dira zenbatuko organoko kideek beste batzuen esku utzitako botoak.

3. – Organoa bigarren deialdian eratzeko beharrezkoa izango den quoruma beharrezkoa izango da bozketa guztietan.

4. – Lehen eta bigarren deialdiaren artean 15 minutuko tartea egongo da.

5. – Ezingo da utzi botoa kide anitzeko organoko beste kide baten esku.

1. – Kide anitzeko organoko buruak bilera behar bezala antolatuko du eta, horretarako arrazoirik egonez gero, bertan behera utzi ahal izango du.

2. – Eztabaidak aztergaiei jarraituz egingo dira. Dena dela, beharrezkoa izanez gero, kide anitzeko organoak bileraren ordena aldatzeko erabakia har dezake, organoko buruak proposamena egin ondoren.

3. – Organoko buruak, beharrezko ikusten badu, eztabaidaren denbora mugatu ahal izango du, bai eta gaiaren botazioa egin aurretik egon daitezkeen parte-hartzeen kopurua ere.

4. – Kide anitzeko organoetako kideek aktan agerrarazi ahal izango dute euren botoa eta horren azalpena. Azalpen hori idatziz eman beharko dute botazioa egitean. Unibertsitateko beste organo batzuei egindako proposamenak badira, kideen boto partikularrak beti agerraraziko dira haiekin batera.

5. – Kide anitzeko organoko buruak organoko kide ez diren pertsonak gonbidatu ahal izango ditu bileretara egoki deritzonean, aztergaietako punturen batekin zerikusia daukan iritzia edo informazioa eman diezaioten kide anitzeko organoari. Gonbidatuen izen-abizenak bilerako aktan jasoko dira, botoa emateko eskubidea izango ez duten arren.

1. – Berdinketa izanez gero, berriro egingo da botazioa; eta hala ere berdinketa izanez gero, organoko buruaren kalitate botoak erabakiko du.

2. – Botazioa isilpekoa izango da kide anitzeko organoko kideren batek eskatzen duenean. Dena dela, botazioa beti izango da isilpekoa pertsonei buruzkoa denean.

3. – Aurkako botoa ematen dutenek eta horretarako arrazoia azaldu, ez dute erantzukizunik izango kide anitzeko organoak hartutako erabakietan, eta ezta ere abstenitzen direnek. Botazioa isilpekoa bada, interesatuak boto-txartela emango dio organoko idazkariari botazioko unean eta, txartel horrekin batera, emandako botoaren arrazoia azaltzen duen testua. Boto-txartela eta testua aktari erantsiko zaizkio.

4. – Erabakiak hartu ahal izateko, emandako boto baliodunen gehiengo soila beharko da. Beraz, proposamen bakarra dagoenean, onartua izango da aldeko botoak kontrakoak baino gehiago badira. Bi proposamen daudenean, aldeko boto gehien lortzen dituena onartuko da. Proposamenak bi baino gehiago direnean, emandako botoen gehiengoa lortzen duena onartuko da; edo, lehenengo botazioan boto gehien lortu dituzten bi proposamenak hartuta, bigarren botazioan boto gehien lortzen dituena.

1. – Idazkariak bilerako akta egingo du. Aktak bileran bertan edo hurrengoan onartuko dira, eta hurrengo bilerako aztergaiei dagozkien dokumentuekin batera banatuko dira akten zirriborroak. Aktak, behin onartuta, idazkariak sinatuko ditu eta organoko buruak ontzat emango.

2. – Aktan honako hauek jasoko dira nahitaez: bilerara etorri direnen eta etorri ez direnen zerrenda; aztergaien zerrenda; bileraren tokia eta eguna; bileran aztertutako puntuak; botazioak (nola egin diren) eta emaitzak; hartutako erabakien edukia eta, egokitzat ikusiz gero, arrazoiaren azalpen laburra.

3. – Aktan boto partikularrak ere jasoko dira, kide anitzeko organoko kasuan kasuko kideek hala eskatzen badute. Kide anitzeko organoko edozein kidek eskatu ahal izango du bere parte-hartzea edo proposamena hitzez hitz jasotzeko aktan. Horretarako, idatziz aurkeztu beharko du testua eskaera egin eta segituan edo, bestela, organoko buruak esango duen moduan.

4. – Kide anitzeko organoko kideek aktan aldaketak egiteko proposamenak egin ahal izango dituzte akta onartzeko unean. Idazkariak proposatu den aldaketa egiaztatuko du, eta gehiengoak aldeko botoa ematen badu, onartu egingo da.

5. – Kide anitzeko organoa aldatu baino lehen bilera bat egin beharko da onartzeke dauden akta guztiak onartzeko. Bilera hori egitea ezinezkoa gertatzen bada, akten zirriborroak bidaliko zaizkie kide anitzeko organoko kide zirenei eta hamar eguneko epea emango zaie erreklamazioak egiteko. Ez bada aurkezten erreklamaziorik esandako epearen barruan, aktak onartutzat emango dira; erreklamaziorik aurkeztuz gero, kide anitzeko organo aldatuak egingo duen lehen bileran onartu beharko dira aktak.

6. – Aktak onartu ostean, kasuan kasuko kide anitzeko organoko kide guztiei bidaliko zaizkie bai posta elektronikoz bai posta arruntez, pertsonen intimitatea behar bezala babestuta. Era berean, iragarki-oholean emango dira argitara.

1. – Idazkariak kide anitzeko organoak hartutako erabakien fede emango du eta ziurtagiriak egingo ditu.

2. – Organoko buruak eta idazkariak ziurtatu beharko dute hartutako erabakiak argitara ematen direla iragarki-oholean, eta gutxienez hilabete egongo direla argitaratuta jendaurrean. Izan ere, epe horren barruan egongo da aukera kasuan kasuko errekurtsoa aurkezteko errektoreari.

3. – Aipatutakoaz gain, pertsonei buruzko erabakiak jakinarazi egin beharko zaizkie interesatuei. Erabakiak jakinarazpena egiten den unetik aurrera izango ditu ondorioak. Jakinarazpena Administrazio Prozeduraren Legean xedatutako moduan egingo da.

4. – Hartutako erabakiak hiru egun balioduneko epean emango dira argitara, gehienera ere, eta pertsonen intimitatea babestuta.

1. – Kide anitzeko organoak hartutako erabakiek onartzen direnetik aurrera izango dituzte ondorioak, erabakian bertan beste ezer adierazi ez bada behintzat. Erabakiak publikoak dira eta unibertsitateko kasuan kasuko organoak jakinaren gainean jarriko dira.

2. – Arautegi honetako 5. artikuluan aipatzen diren kide anitzeko organoek hartzen dituzten erabakien kontra gorako errekurtsoa aurkeztu ahal izango zaio errektoreari, hilabeteko epean.

1. – Lan Harremanen Unibertsitate Eskolako kide bakarreko gobernu, ordezkaritza eta administrazio-organoa da zuzendaria.

2. – Estatutuetan xedatutakoari jarriki hautatuko da, unibertsitatearekin lotura iraunkorra duten irakasleen artetik.

3. – Ikastegiko zuzendaria errektoreak izendatu behar du, eta izendatu ondoren hasiko da bere eginkizunak betetzen. Agintaldia lau urtekoa izango da.

4. – Zuzendaria sufragio unibertsal haztatuaren bidez aukeratuko da, Hauteskunde Arautegi Orokorrean xedatutakoaren arabera.

5. – Eskola Batzarrak finkatuko du zuzendaria aukeratzeko hauteskundeen hasiera, eta baita ere hautagai-zerrendak aurkezteko epea.

6. – Eskolakoak diren eta arduraldi osoan dauden irakasle guztiak izan daitezke hautagaiak. Agintaldia lau urtekoa izango da, eta berriro aukeratu ahal izango da jarraian, baina behin baino ez.

7. – Hautagai-zerrendak eskolako erregistroan aurkeztuko dira, interesatuak sinaturik eta programa eta zuzendaritza-taldeko kideen izenekin batera.

8. – Hautagaien zerrendak eta euren programak eskolako iragarki-oholean jarriko dira, zerrendak aurkezteko epea amaitu ondoren.

1. – Lan Harremanen Unibertsitate Eskolako zuzendariaren kargua hutsik balego, hauteskundeetarako deia egingo litzateke. Zuzendariaren kargua hutsik geratu eta handik hilabetera, gehienez ere, Eskola Batzarrak ezohiko bilera egingo du, hauteskundeetako egutegia ontzat emateko. Hauteskunde-prozesua organo eskudunaren erabakiaren bidez irekiko da. Zuzendaria da organo eskuduna hauteskundeetarako deia egiteko, Eskola Batzarraren aldez aurreko onespenaz.

2. – Hautagai-zerrendak unibertsitateko Erregistro Orokorrean aurkeztuko dira. Idatzia ikastegiko hauteskunde-batzordeko buruari zuzenduko zaio eta epea hamar egunekoa izango da hauteskundeetarako deia egiten duen erabakia argitaratu eta biharamunetik kontatzen hasita.

3. – Ikastegiko zuzendariaren kargurako hautagai-zerrendari gobernu-taldearen egitura eta programa erantsi beharko zaizkio.

4. – Hautagai-zerrendak aurkezteko epea behin bukatuta, hauteskunde-batzordeak jendaurrean jarriko ditu zerrenda onartuak, eta jardunean dagoen zuzendariari emango dio horren berri bost eguneko epean.

5. – Hautagai aurkeztu nahi izanez gero, hautagaiak idatzia bidali beharko dio kasuan kasuko organoari, eta Ikastegi Batzarreko kideen % 10aren babesa izan beharko du.

6. – Hautagai izateak hauteskundeko emaitzak onartzea dakar, eta, garaile izanez gero, karguari dagozkion eginkizunak onartzea.

7. – Botazioa egin ahal izateko, kide anitzeko organoa balioz eratzeko beharrezko den kide-kopurua egon beharko da bertaratuta.

8. – Botazio-egunean bere hauteskunde-barrutian egoterik ez dutenek botoa aldez aurretik eman dezatela onartuko dute hauteskunde-batzordeek, botazio eguna baino lehenagoko hiru egun baliodunetan eta behar den ziurtagiria emanda.

9. – Boto horiek gutunazal ofizial itxian bidali beharko dira. Gutunazal itxi hori eta NANaren fotokopia bat beste gutunazal batean sartu beharko dira, dagokion mahaiburuari zuzendurik. Gutunazal horren kanpoaldean hauteslearen izen-abizenak eta zein taldetako kidea den adierazi beharko da, eta hautesleak hegalean sinatu eta zinta itsasgarriarekin ondo itxiko du.

10. – Behin botazioa amaituta, horrela emandako botoak boto-kutxan sartuko dira, hauteslea erroldan agertzen dela egiaztatu ondoren. Hautesleren batek botoa aldez aurretik eman arren hauteskunde-egunean ere ematen badu, aldez aurretik emandako botoak balioa galduko du eta ez da kutxan sartuko.

11. – Hautesleak berak eman beharko dio aldez aurretiko botoa hauteskunde-mahaiko buruari edo eskumenak eskuordetuta dituenari.

1. – Zuzendaria hautatzeko hauteskundeetako botoa haztatua izango da, ikastegiko talde-banaketaren araberakoa. Taldeak eta bakoitzari dagozkion ehunekoak honakoak dira:

   • A taldea, UPV/EHUrekin lotura iraunkorra duten irakasleak, % 51.

   • B taldea, bestelako irakasle eta ikertzaileak, % 18.

   • C taldea, ikasleak, % 20.

   • D taldea, administrazio eta zerbitzuetako langileak, % 11.

2. – Botoen haztapena egiteko, hautagai-zerrendei emandako baliozko botoak baino ez dira kontuan izango. Artikulu honen ondorioetarako, baliozko botoak hautagai bakar bat markatuta dutenak izango dira. Beraz, ez dira baliozko bototzat hartuko ez boto zuriak, ez boto baliogabeak.

3. – Zenbaketaren akta egin ondoren, hauteskunde-batzordeak hautatutako hautagaia aldarrikatuko du behin-behinekoz.

4. – Baliozko botoen haztapena kasuan kasuko hauteskunde-batzordeak egingo du. Botoen haztapenari dagokion koefizientea lortzeko, zatiketa egingo da: talde bakoitzari dagokion ehunekoa zati hautagai-zerrenda guztiek talde horretan lortutako baliozko boto guztiak. Hauteskunde batzordeak koefiziente hori ezarriko die hautagai-zerrenda bakoitzak talde bakoitzean lortutako botoei, ondorengo puntuan adierazitako irizpideei jarraituz.

5. – Gehiengoa osoa izango da boto haztatuen % 50 baino gehiago lortu bada.

6. – Hautagai bakoitzak guztira lortutako boto haztatuak hautagai bakoitzak talde bakoitzean lortutako botoen batura izango dira.

7. – Lehenengo txandan hautetsi aldarrikatuko da baliozko botoen erdiak baino gehiago biltzen dituen hautagaia, aurreko zenbakiak adierazitako haztapenak behin aplikatuta. Inork lortuko ez balu boto-kopuru hori, bigarren botazioa egingo da, baina horretan bakarrik lehiatu ahal izango dira lehen botazioan boto gehien lortu duten hautagai biak, lehen aipatutako haztapenak kontuan hartuta. Bigarren txandan botoen gehiengo soila lortzen duen hautagaia aldarrikatuko da hautetsi, botoen haztapena egin ondoren. Bigarren txanda lehenengo txandako emaitzak argitaratu eta gehienez 10 egunera egingo da.

8. – Hautagai bakarra badago, lehen botazioa baino ez da egingo. Botazio horretan hautesleek alde, kontra edo zuri eman ahalko dute botoa. Hautagai bakar hori ikastegiko zuzendari aldarrikatuko da, baldin eta emandako baliozko botoetatik aldeko botoak kontrakoak baino gehiago badira, lehenago zehaztu diren haztapenak behin aplikatuta.

9. – Hasiera batean hautagai bat baino gehiago egon arren hauteskunde-egunean hautagai bakarra balego gainontzeko hautagaitzak bertan behera utzi dituztelako, txanda bakarra egingo da.

10. – Hautagai hautetsia behin-behinekoz aldarrikatzen denean, erreklamazioak jarri ahal izango dira aldarrikapena egin eta hurrengo bi egunetan. Kasuan kasuko hauteskunde-batzordeak bi eguneko epea izango du (erreklamazioak aurkezteko epea bukatzen denetik kontatzen hasita) erreklamazioak ebazteko, eta, ondoren, behin betiko aldarrikatuko du nor den hautetsia.

11. – Hautagai hautetsia behin betiko aldarrikatzearen kontra errekurtsoa jar dakioke errektoreari hiru eguneko epean, eta hark bost eguneko epea izango du errekurtsoa ebazteko. Epe hori igarota ez badu horren gaineko erabakirik eman, erreklamazioa ez dela onartu ulertu beharko da eta administrazioarekiko auzi-errekurtsoa jarri ahal izango du erreklamazio-egileak.

12. – Hautetsia behin betiko aldarrikatu aurretik, hauteskunde-batzordeak baliogabetu egin ahalko du mahai bateko edo zenbaitzuetako botazioa, baldin eta botazioaren emaitzan eragina izan dezakeen akatsik egon bada. Horrelakoetan, berriro egingo da botazioa ahalik eta arinen.

13. – Hauteskundeetarako deia egin eta hautagairik ez badago, edo aurkeztutako bakarrak ez badu hautetsi izateko behar besteko gehiengorik lortu, ikastegiko zuzendariak jardunean jarraituko du, eta beste hauteskunde batzuetarako deia egingo du, gehienez ere hogeita hamar eguneko epean.

14. – Batzarreko idazkariak errektoreari jakinaraziko dio nor izan den hautetsia, izendapena egin dezan.

1. – Hauteskundeetarako deia egingo duen erabakian jasota egongo da zein izango den hauteskunde-eguna. Erabakia argitaratu eta gutxienez hamar egunera eta gehienez hirurogei egunera izango da, hauteskunde-batzordeak kontrako erabaki arrazoiturik eman ezean.

2. – Erabakian, era berean, jasota egongo da hauteskunde-egutegia:

   1. Errolda ixteko eguna.

   2. Behin-behineko errolda argitaratzeko eguna.

   3. Errolda inpugnatzeko epea.

   4. Behin betiko errolda argitaratzeko eguna.

   5. Hautagai-zerrendak aurkezteko epea.

   6. Behin-behineko hautagai-zerrendak jakinarazteko eguna.

   7. Hautagai-zerrendak inpugnatzeko epea.

   8. Behin betiko hautagai-zerrendak jakinarazteko eguna.

   9. Botazioa.

   10. Behin-behineko emaitzak jakinarazteko eguna.

   11. Behin-behineko emaitzak inpugnatzeko epea.

   12. Behin-betiko emaitzak jakinarazteko eguna.

3. – Hautesle-erroldan akatsik egonez gero, interesdunak hiru eguneko epea izango du (erroldak argitaratzen diren egunetik kontatzen hasita) inpugnazioak egiteko; zuzenketak ofizioz ere egin daitezke, baldin eta hauteskunde-batzordeak berak okerrik antzemanez gero.

4. – Hautagai-zerrendak aurkezteko epea bozketa-eguna baino hamar egun baliodun lehenago amaituko da. Hauteskunde-batzordeak egiaztatu egin beharko du hautagai bakoitzak baldintzak betetzen dituela, egon daitezkeen inpugnazioak ebatziko ditu eta bost eguneko epean, gehienez ere, hautagaiak aldarrikatuko ditu. Era berean, hautagai zerrenden boto-txartel ofizialak egingo ditu.

5. – Botoa deialdian zehaztutako egun eta ordutegian emango da kasuan kasuko mahaian, eta hautesleak berak eman beharko du (hurrengo artikuluan adierazitako kasuan izan ezik). Mahaiak hauteslearen nortasuna eta erroldan dagoela egiaztatuko du. Ondoren, txartel ofiziala boto-kutxan sartuko dute (behar bezala betea eta behar izanez gero gutunazalean sartuta).

1. – Zuzendariek arrazoi hauengatik utziko dute kargua:

   1. Hilez gero.

   2. Legezko ezintasuna izanez gero.

   3. Dimisioa aurkeztuz gero.

   4. Ikastegiko kide izateari utziz gero.

   5. Agintaldia amaituz gero.

   6. Ikastegiko Batzarrak zentsura mozioa onartuz gero. Kasu horretan, lehenengo eta behin, zentsura-mozioari buruzko azalpenak emango ditu mozioa sinatu duen batzarkideetako batek. Azalpenen ondoren, erantzuna emango du zuzendariak eta, gero, hitza eskatu duten batzarkideek hartuko dute parte txandaka, behin aldekoek, behin kontrakoek.

2. – Ahal den kasuetan, zuzendariak jardunean jarraituko du zuzendari berria izendatu arte.

3. – Zuzendaria gaixorik edo kanpoan egonez gero, izendapenean beren-beregi hautatutako zuzendariordeak ordezkatuko du. Halako izendapenik ez balego, Ikastegiko Batzarrak izendatuko du ordezkoa egingo duen zuzendaritza-taldeko kidea. Ikastegiko Batzarreko burua, kasu honetan, antzinatasun handieneko kidea izango da. Sei hilabete baino gehiago emango balitu gaixorik edo kanpoan, jarduneko zuzendariak hauteskundeetarako deia egingo luke hilabeteko epean.

4. – Ikastegian pertsona bakarreko organo bat ere ez balego, kategoria eta antzinatasun handiena daukan ikastegiko arduraldi osoko irakasleak hartuko lituzke bere gain zuzendariaren zereginak. Irakasle horrek ikastegiko zuzendaria aukeratzeko deia egin beharko luke gehienez ere sei hilabeteko epearen barruan.

5. – Eskolako Batzarrak erantzukizunak eska diezazkioke zuzendariari, zentsura-mozioa gehiengo osoz onartuta.

6. – Zentsura-mozioak idazkaritzan aurkeztuko dira eta, gutxienez, batzarreko kideen % 25ek sinatuko dute. Mozioarekin batera hautagai baten izena ere emango da.

7. – Mozioa behin aurkeztuta, zuzendariak batzarraren ezohiko bilerarako deia egin beharko du, gehienez ere hiru eskola-eguneko epearen barruan, mozioa eztabaidatu eta botazioa egiteko.

8. – Mozioa onartuko balitz, zuzendariak kargua utzi beharko luke. Halakoetan, berehala emango zaio hasiera hauteskunde-prozesuari. Zentsura-mozioa onartzen ez bada, eskatzaileek ezingo dute aurkeztu besterik ikasturte berean.

1. – Errektoreak irakaslanetik salbuetsi ahal izango ditu zuzendariak, neurri batean edo erabat.

2. – Agintaldia amaituta, eskubidea izango dute irakaslanetik beste urtebetez salbuetsita egoteko, irakaskuntzaren eta ikerketaren arloko gaiak eguneratzeko. Horretarako, gutxienez hiru urte izan beharko dituzte emanda karguan.

Hauek dira ikastegiko zuzendariaren eginkizunak:

1. Ikastegiko ordezkariak izatea eta ikastegiari atxikitako langile guztien zuzendaritza funtzionala izatea.

2. Ikastegiaren jarduera guztiak gidatu, koordinatu eta gainbegiratzea.

3. Ikastegiko kide anitzeko organoetako buru izatea.

4. Ikastegiko Batzarraren, gobernu-organo orokorren eta campus bakoitzeko organoen jarraibideak aplikatzea eta haien erabakiak betetzea.

5. Errektoreari bere eskumeneko izendapenak proposatzea.

6. Ikastegiko Batzarrari urteko memoria eta plana aurkeztea.

7. Dagozkion zerbitzu teknikoekin koordinaturik, ikastegiko leku guztien higiene eta segurtasuna bermatzea, eta horretarako behar diren neurriak hartzea.

8. Ikastegiko kideen eskari eta proposamenak bideratzea.

9. Ikastegiaren ebaluazioa eta etengabeko hobekuntza bultzatzea.

10. Ikastegiari eragiten dioten arauak betetzen direla zaintzea, bereziki zerbitzuen funtzionamendu egokiari dagozkionak eta diziplina akademikoarekin zerikusia daukatenak, UPV/EHUren Estatutuetako 102.2 eta 103.2 artikuluetan adierazitako moduan.

11. Tokiak esleitzea ikastegian diharduten sail, institutu eta zerbitzuei, Ikastegiko Batzarrak onartuko dituen irizpideez bat. Era berean, ikastegiko azpiegitura erabiltzean lehentasunak zeintzuk diren erabakiko du.

12. Lankidetza eta koordinazio-programak adostea sailekin irakaskuntza eta ikerketa-jardueretarako, eta sailen arteko eta arloen arteko ikerlanak bultzatzea.

13. Eskolaren jarduera guztiak gidatu, koordinatu eta gainbegiratzea.

14. Unibertsitateko Klaustroaren, Gobernu Kontseiluaren, Eskolako Batzarraren eta gainerako gobernu-organo orokorren jarraibideak aplikatzea eta haien erabakiak betetzea, indarrean dagoen legeriak dioena betetzeko eta betearazteko.

16. Karguen eta ikastegiari atxikitako langileen izendapenak proposatzea errektoreari, kontuan izanda Eskola Batzarrak bere iritzia eman behar duela aldez aurretik irakasleak kontratatu behar direnean.

17. Bere eskumenekoak diren diziplina-neurriak proposatu eta, beharrezkoa bada, aplikatzea, indarrean dagoen legeriari jarriki.

18. Eskola Batzarraren eta eratuko diren batzordeen buru izatea, edo ordezkoa izendatzea.

19. Administratzailearen izendapenaren berri ematea gerenteari.

20. Unibertsitateko gobernu-organoek hartutako erabakien berri ematea, ikastegiari eragiten diotenean, baina informazioa emateari buruzko legeria errespetatuta.

21. Urteko memoria prestatu eta Ikastegiko Batzarrari aurkeztea, ondoren Gobernu Kontseilura bidaltzeko.

22. LRUko 83. artikuluan aipatutako kontratuak izenpetzea, egonez gero.

23. Errektoreak eskuordetzen dizkion gainerako eginkizunak, edo unibertsitateari buruzko legeriak, Estatutuek edo beroriek garatzen dituzten arauek esleitzen dizkiotenak eta, beren-beregi beste organo batzuei esleituta egon barik, ikastegiarekin zerikusia daukatenak.

    1. Era berean, ikastegiko zuzendariak lankidetza-hitzarmenak sinatuko ditu, Gobernu Kontseiluak emandako jarraibideei eutsiz.

1. – Ikastegiko zuzendaritza-taldeko burua zuzendaria izango da, eta zuzendariordeek eta idazkari akademikoak osatuko dute.

2. – Ikastegietako zuzendaritza-taldeek laguntza eman behar diote zuzendariari bere zereginetan, batez ere honako hauetan:

   1. titulazioetan irakasten diren gaien irakaskuntza koordinatzeko lanean;

   2. ikasketa-planak eguneratzeko zereginean, modu horretara gizartearen premiei hobeto erantzun ahal izateko;

   3. ikasleen laneratzea bultzatzeko eginkizunean;

   4. ikasleek kanpoan egiten dituzten praktikak gainbegiratzeko zereginean, bai eta beste unibertsitate batzuetako pareko titulazioetako ikasleekin egiten diren trukeak ere, esparru akademikoari dagokionez;

   5. irakats-plangintza behar bezala gauzatzen dela zaintzeko zereginean, bai eta titulazioetako irakaslanean gertatutako gorabeherak eta erreklamazioak ebazteko gestio-lanean ere;

   6. titulazioen irakats-kalitatea sustatzeko lanean;

   7. ikastegiko jarduera guztietan etengabeko hobekuntza bultzatzeko lanean.

1. – Errektoreak, zuzendariak proposatuta, zuzendariordeak izendatuko ditu behar diren baldintzak betetzen dituzten ikastegiko arduraldi osoko irakasleen artetik.

2. – Zuzendariordeek zuzendariak agindutako eginkizunak beteko dituzte, eta euren izendapenean zehazten diren arloen zuzendaritza hartuko dute. Eskuordetze horien berri emango zaio Ikastegiko Batzarrari eta, horrez gain, argitara emango dira.

3. – Zuzendariordeetako bat lehen zuzendariordea izango da, eta berak ordezkatuko du zuzendaria gaixo edo kanpoan denean. Zuzendariorde berak hartuko ditu bere gain zuzendariaren eginkizunak kargu hori hutsik geratzen bada, zuzendari berria izendatu artean.

4. – Honakoak izango dira kargua uzteko arrazoi: dimisioa, heriotza, ezintasun legala, ikastegiko kide izateari uztea edo errektoreak hala erabakitzea, zuzendariak proposatuta.

5. – Zuzendariak zuzendaritza-taldean gertatuko aldaketen berri emango du Ikastegiko Batzarraren hurrengo bileran.

Errektoreak irakaslanetik salbuetsi ahal izango ditu zuzendariordeak, gehienez ere arduraldiaren erdiraino.

Agintaldia amaituta, eskubidea izango du irakaslanetik beste sei hilabetez salbuetsita egoteko, irakaskuntzaren eta ikerkuntzaren alorrean eguneratu ahal izateko. Horretarako, gutxienez hiru urte izan beharko ditu emanda karguan.

1. – Idazkari akademikoa errektoreak izendatu du, zuzendariak proposatuta. Idazkaria unibertsitatearekin lotura iraunkorra izanik jardunean, arduraldi osoan, dagoen irakasle bat izango da.

2. – Gobernu, ordezkaritza eta administraziorako kide anitzeko organoen ekintza eta erabakien fede ematea, akta liburuak osatzea eta zaintzea, eta egiaztagiriak egitea, hala erabakienak nola bere aurrean gertatzen diren ekintza eta jazoera guztienak edo ikastegiko dokumentazio ofizialean jasota daudenenak ere.

3. – Bestalde, irakasleen eta administrazio eta zerbitzuetako langileen espedienteak zainduko ditu. Egoki denean, eskolako gobernu organoen erabakiak argitaratuko ditu pertsonen intimitatea behar bezala gordeta, eta ekitaldi nagusiak antolatuko ditu horretarako zehaztuta dagoen protokoloari jarraituz.

4. – Zuzendariak irakaslanetik salbuetsi ahal izango du idazkaria, gehienez ere arduraldiaren erdiraino. Horrelakorik eginez gero, zuzendariak horren berri emango dio errektoregoari eta kasuan kasuko sailari.

5. – Honakoak izango dira kargua uzteko arrazoi: dimisioa, heriotza, ezintasun legala, UPV/EHUko kide izateari uztea edo errektoreak hala erabakitzea, zuzendariak proposatuta.

Hauek dira ikastegiko idazkari akademikoaren eginkizunak:

1. Idazkari moduan aritzea Ikastegiko Batzarrean, Batzorde Iraunkorrean (halakorik egonez gero) eta, betetzen duen karguagatik, dagokion gainerako batzordeetan; eta organo horien bileretako aktak idatzi eta zaintzea.

2. Zuzendariaren aginduari jarraituz, ikastegiko batzarrerako deia egitea.

3. Gobernu, ordezkaritza eta administraziorako kide anitzeko organoen ekintza eta erabakien fede ematea eta egiaztagiriak egitea, hala erabakienak nola bere aurrean gertatzen diren ekintza eta jazoera guztienak edo ikastegiko dokumentazio ofizialean jasota daudenenak ere.

4. Ikastegiko erregistro nagusiaren funtzionamendua bermatzea, unibertsitateko Idazkaritza Nagusiak emandako arautegi eta zuzentarauei jarraituz.

5. Ikastegiko Batzarrak eta Batzorde Iraunkorrak hartuko dituzten erabakien berri ematea unibertsitateko kasuan kasuko gobernu organoari.

6. Oro har, laguntza ematea ikastegiko o zuzendariari, baita ikastegiko idazkari akademikoari dagozkion gainerako eginkizunak betetzea ere.

1. – Errektoreak irakaslanetik salbuetsi ahal izango du ikastegiko idazkari akademikoa, gehienez ere arduraldiaren erdiraino.

2. – Agintaldia amaituta, eskubidea izango du irakaslanetik beste sei hilabetez salbuetsita egoteko, irakaskuntzaren eta ikerkuntzaren alorrean eguneratu ahal izateko. Horretarako, gutxienez hiru urte izan beharko ditu emanda karguan.

1. – Ikastegiko zerbitzu ekonomiko eta administratiboen burua administratzailea izango da.

2. – Administratzaileak menpekotasun funtzionala izango du dekano edo zuzendariarekiko eta ikastegiko administrazio eta zerbitzuetako langileak zuzendu eta koordinatzeko lanak beteko ditu. Horrez gain, ikastegiko organoen erabakiak betearaziko ditu berari dagokion eremuan eta aipatutako zerbitzuen funtzionamenduaz arduratuko da.

3. – Ikastegiko administratzaileak eguneratuta izango du ikastegiari atxikitako ondasunen zerrenda, eta zerrenda eguneratu hori urtero aurkeztuko dio Ikastegiko Batzarrari, ontzat eman dezan. Ondoren unibertsitateko Gerentziara igorriko da. Era berean, laguntza teknikoa emango dio zuzendaritza taldeari ikastegiaren urteko premien memoria prestatzeko lanean. Memoria hori ere Ikastegiko Batzarrak onartu behar du.