3. Herri Kontuen Euskal Epaitegiak herritarren eskura jarriko du Gardentasun Atarian, modu zentralizatuan, Gardentasunari, informazio publikoa eskuratzeko bideari eta gobernu onari buruzko abenduaren 9ko 19/2013 Legean aurreikusitako publizitate aktiboaren betebeharrari lotutako informazio guztia eta, betiere, Herri Kontuen Euskal Epaitegiak egindako behin betiko fiskalizazio-txostenak, bere urteko lan-programa, urteko memoriak eta Eusko Legebiltzarrak onartutako urteko aurrekontua.

1. Herri Kontuen Euskal Epaitegiko kideak goi-mailako titulu akademikoa dutenen artean aukeratuko dira, besteak beste, Zuzenbidean, Ekonomia Zientzietan edo Enpresa Zientzietan lizentziadun edo graduatuen, edo goi-mailako titulu baliokideak dituztenen artean, baldin eta gaitasun aitortua eta bermatua badute Epaitegiaren eremu funtzionalean eta, betiere, gutxienez hamabi urteko esperientzia profesionala badute.

2. Eusko Legebiltzarraren Osoko Bilkurak hautatuko ditu Herri Kontuen Euskal Epaitegiko kideak eta haren hiru bostenen aldeko botoa beharko da. Hautagaien aurkezpenean gizon eta emakumeen presentzia orekatua zaindu beharko da.

3. Hautaketa efektiboa izango da hautatua bere karguaz jabetzen den egunetik hasita, dagokion izendapena Euskal Herriko Agintaritzaren Aldizkarian behin argitaratu ondoren.

4. Herri Kontuen Euskal Epaitegiko kideek epaileentzat jarrita dauden ezgaitasun-arrazoi, bateraezintasun eta debeku berberak izango dituzte. Betiere, bateraezina izango da ondorengo egoerekin:

   1. Eusko legebiltzarkidea izatea.

   2. Diputatuen Kongresuko diputatua izatea.

   3. Senataria izatea.

   4. Kontuen Auzitegiko kidea edo sektore publikoko kanpo-kontroleko beste edozein organotako kidea izatea.

   5. Alderdi politikoetan, zentral sindikaletan edo enpresa-elkarteetan zuzendaritza-funtzioak edo funtzio exekutiboak betetzen dituen kidea izatea.

   6. Estatuko, beste autonomia-erkidego batzuetako edo lege honen 2.1.a artikuluan aipatzen diren erakundeekin parekagarriak diren erakundeetako edozein kargu politiko edo administratibo betetzea.

   7. Euskal Autonomia Erkidegoko edo lege honen 2.1.a artikuluan aipatzen diren erakundeetako edozein kargu politiko edo administratibo betetzea.

   8. Bere lanbidean edo beste edozein jarduera liberalean, merkataritzakoan edo laboralean aritzea, ordaindua izan edo ez, Kargu Publikodunen Jokabide Kodea eta Haien Interes Gatazkak arautzen dituen ekainaren 26ko 1/2014 Legearen 17. artikuluan aurreikusitakoetan izan ezik, betiere artikulu horretan ezarritako baldintzak betetzen badira.

   9. Herri-hautapeneko beste edozein ordezkaritza-manamendu izatea, aurreko ataletan jasota ez dagoena.

   10. Izendapen askeko edozein kargu politiko betetzea.

   11. Herri Kontuen Euskal Epaitegian kontu-emaile den elkarte edo fundazio batean zuzendaritza-funtzioak betetzea.

   12. Edozein administrazio publikotan zerbitzu aktiboan egotea.

       Herri Kontuen Euskal Epaitegiko kideek, jardunean dauden bitartean, ezin izango dute beste kargu publikorik bete. Halaber debekatuko zaie alderdi politiko edo sindikatu baten ordezkaritzan jardutea.

       Herri Kontuen Euskal Epaitegiko kideek utzi egin beharko dute eragin diezaiekeen bateraezintasun-egoera oro izendapena egin eta hamar eguneko epean eta karguaz jabetu baino lehen. Idatziz egingo da ukoa eta Legebiltzarreko Mahaiari zuzenduko zaio, lehendakariaren bidez. Hala egiten ez badute, ulertuko da izendapenari egiten diotela uko.

6. Epaitegiko kideen agintaldia sei urtekoa izango da gehienez, hautaketa gauzatzen denetik zenbatzen hasita, eta kideak beste agintaldi baterako baino ezingo dira berriz hautatu. Hautaketa egiten bada plaza hutsak betetzeko, horrela hautatua izan den kidearen agintaldia aurrekoarentzat aurreikusitako agintaldiaren iraupenera mugatuko da.

7. Osoko Bilkuraren eztabaidak isilpekoak dira. Eztabaidetan dauden pertsonek, bai eta Herri Kontuen Euskal Epaitegian dituzten funtzioen ondorioz eztabaida horien berri dutenek ere, isilpean gorde beharko dituzte eztabaidok, orobat datuen babeserako araudia errespetatuz.

16 bis artikulua. Abstentzioa.

1. Herri Kontuen Euskal Epaitegiko kideentzat abstentzio-arrazoi dira ondoren zehazten diren hauek:

   1. Interes pertsonala izatea fiskalizatutako gaian, enpresan edo erakundean, edo interesdunetako batekin ebatzi gabeko auziren bat edo zerbitzu-harreman bat izatea.

   2. Laugarren mailarainoko odol-ahaidetasuna edo bigarren mailarainoko ezkontza-ahaidetasuna izatea fiskalizazioaren xede den erakundearen kontu-emaile edo administratzaileetako batekin.

   3. Adiskidetasun mina edo etsaitasun nabaria izatea a) eta b) apartatuetan aipatzen diren pertsonetako batekin.

   4. Fiskalizazioaren xede izan diren egintza edo espedienteetan esku hartu izana Herri Kontuen Euskal Epaitegiko kide izendatua izan aurretik.

2. Nolanahi ere, abstentziorako interes pertsonal erabakigarria dagoela ulertu beharko da, fiskalizazio jakin bati dagokionez, Herri Kontuen Euskal Epaitegiko kide bat ondoren aipatzen diren egoeretako batean dagoenean:

   1. Erakundearen diru-sarreren eta gastuen kudeaketa, ikuskapena eta kontu-hartzailetza bere ardurapean egon izatea fiskalizazioaren xede den aldian.

   2. Euskal Autonomia Erkidegoko sektore publikoko edozein erakundetako lehendakari edo zuzendari, edo administrazio-kontseiluko edo organo baliokide bateko kide izatea fiskalizazioaren xede den aldian.

   3. Fiskalizatutako erakundearen edo harekin funtzionalki lotuta dauden erakunde edo organismoen dirulaguntzak jaso izana, funts publikoen kargura, fiskalizazioaren xede den aldian.

   4. Epaitegiaren beraren aurrean kontu-emaile izatea fiskalizazioaren xedeari dagokionez.

   5. Fiskalizazio baten xede diren abal edo zerga-salbuespenen onuradun izatea.

      1. apartatuan zehaztutako abstentzio-arrazoi baten eraginpean dagoen Herri Kontuen Euskal Epaitegiko kideak Epaitegiko lehendakariari jakinarazi beharko dio hark hurrengo osoko bilkurako gai-zerrendan sar dezan. Osoko Bilkurak erabaki beharko du alegatutako abstentzio-arrazoia betetzen den ala ez eta, hala badagokio, beste kide bat izendatu beharko du fiskalizazioaren ardura har dezan.

      4. Osoko Bilkurak erabakitzen badu Herri Kontuen Euskal Epaitegiko kideren batek abstentzio-arrazoi bat betetzen duela beste kide baten zuzendaritzapean egindako txosten bati dagokionez, abstentzio-arrazoiak eragindako kideak ezingo du parte hartu txosten horren eztabaida eta bozketan osoko bilkuran.

16 ter artikulua. Errekusatzea.

1. Herri Kontuen Euskal Epaitegiko kideren bat abstenitzen ez bada hala egin behar duenean, bere errekusatzea sustatu ahal izango da, dagokion prozeduraren bidez, Epaitegiko lehendakariak eskatuta edo ustezko abstentzio-arrazoia tartean den prozeduran interesa duen edozein pertsonak hala eskatuta.

2. Errekusatzea sustatuta, Epaitegiko lehendakariak horren berri eman beharko dio lehenbailehen Osoko Bilkurari. Errekusatutako Herri Kontuen Euskal Epaitegiko kideak errekusatze-arrazoia onartzen badu, abstentzio-kasuetarako ezarritako prozedura jarraitu beharko da.

3. Errekusatutako Herri Kontuen Euskal Epaitegiko kideak errekusatze-arrazoia ukatzen badu, Osoko Bilkurak bi kideko ponentzia bat izendatu beharko du, egokitzat jotzen dituen ikerketa-jarduketak modu sumarioan burutzeko. Jarduketa sumario horietan jaso beharko dira errekusatzea sustatu duen pertsonaren eta errekusatutako kidearen alegazioak.

4. Ponentziak, izendatua izan denetik hamar eguneko epean, egindako jarduketen alderdi guztiak jasoko dituen txosten bat aurkeztu beharko dio Osoko Bilkurari. Osoko Bilkurak, errekusatutako kidea bertaratuko ez den ezohiko bilkura batean, errekusatzea ebatzi beharko du.

5. Egindako jarduketetan errekusatutako Epaitegiko kidearen dolozko edo erruzko jarduketaren zantzurik badago abstenitu beharko zukeen gai batean esku hartu izanagatik, ardurak eskatzeko espediente bat ireki beharko da.