Gipuzkoako Foru Aldundiak, «GI-3520 errepidea 2300 eta 2680 KP-en artean zabaltzeko eta hobetzeko proiektuaren proiektu berrikusia (2-EM-27/2020-RP)» delakoaren espedientea formalki onartu eta gero, proiektua gauzatzeko lur guztiak erabiltzeko beharra adierazi zuen.

Bide Azpiegituretako Departamentuko foru diputatuak 2021eko azaroaren 24an emandako Foru Aginduaren bidez, honako hau ebatzi zen: nahitaezko desjabetze-espedientea hastea eta ondasunen eta eskubideen zerrenda jendaurrean jartzea, hilabeteko epean, prentsan eta 2021eko abenduaren 10eko Gipuzkoako Aldizkari Ofizialean (235. zk.). Geroago, 2022ko urtarrilaren 25ean egindako bilkuran, Gipuzkoako Foru Aldundiak Eusko Jaurlaritzari proiektuak ukitzen dituen eskubideak eta ondasunak okupatzeko urgentziaren adierazpena eskatzea erabaki zuen, Nahitaezko Desjabetzearen Legearen 52. artikuluan ezarritakoa betetzeko.

Urgentziaz okupatu beharreko ondasunak eta eskubideak zehaztuta eta banakatuta agertzen dira espedientean jasotako zerrendan, identifikazioak egiteko datu askirekin agertu ere. Zerrenda hori jendaurrean jarri zen egoki zenean, eta ez zen alegaziorik aurkeztu, administrazio-espedientean adierazten denez.

Zerbitzu teknikoek ikusi dutenez, ez dago espedientea izapidetzeko inolako hirigintza-oztoporik.

Ondasun eta eskubide horiek okupatzea luzaezintzat jotzen da, honako arrazoi hauengatik:

GI-3520 «Segura-Legazpi (Motxorro), Zerainen barrena» errepideko 2300 eta 2680 KPen arteko zatiak trazatu bihurgunetsua du eta galtzadaren zabalerak ez ditu 4,00 metroak gainditzen luzeraren zati handi batean. Horrek zailtasunak sortzen ditu ibilgailuen zirkulaziorako. Gainera, 2,635 KPan bidepeko erreten-estolda bat dago, drainatze-obra gisa balio duena. Horrek are eta gehiago murrizten du galtzada, eta bertan zabalera erabilgarria 3,50 m-koa baino ez da.

Baldintza geometriko horiek ez dira egokiak. Tarte estua da, trazaduraren homogeneotasuna hausten duena, 5,50 metroko zabalera baitu aurreko eta atzeko aldeetan.

Proiektuak jasotzen dituen lanak gauzatzeak tarte horren segurtasun-baldintzak nabarmen hobetzea ahalbidetuko du.

Aurrez aurreko istripuak izateko arriskua murriztuko du. Gaur egun, bereziki aipatzeko arriskua egoten da eskola-autobusa edo inguruko baserrietako esnea biltzeko eta pentsua hornitzeko kamioiak zirkulatzen ari direnean. Aldi berean, eta ez du garrantzi txikiagorik, oinezkoak galtzadaren ertzetik ibiltzeko aukera emango du. Hori gaur egun ez da batere segurua, galtzadaren estutasuna dela eta.

Euskal Autonomia Erkidegoko Lurralde Antolamenduari buruzko maiatzaren 31ko 4/1990 Legearen 26.1.f artikuluan xedatzen denez, Eusko Jaurlaritzari dagokio nahitaez desjabetu beharreko ondasunak eta eskubideak urgentziaz okupatu behar direla deklaratzea, nahitaezko desjabetzeak honako hauek hartzen dituenean: burutze-unitate osoak, lurraldearen hirigintza-antolaketari dagozkion sistema orokorrak edo antolaketa horren elementuren bat eta hiri-lurzoruan egin beharreko banakako jarduketak. Goian aipatutako lege horrek 26.2 artikuluan ezarritakoaren arabera, lurralde-antolamenduaren eskumenak dituen sailburuari dagokio horretarako proposamena aurkeztea Jaurlaritzaren Kontseiluari.

Hori dela eta, Lurralde Plangintza, Etxebizitza eta Garraioetako sailburuak proposaturik, Gobernu Kontseiluak, 2022ko maiatzaren 10eko bilkuran gaia aztertu ondoren, honako hau