Dekretu honen bitartez, batetik, Ekonomiaren Garapen, Jasangarritasun eta Ingurumen Sailaren berariazko estatistika-organoa sortzen da, eta, bestetik, organo horren antolamendua eta funtzionamendua ezartzen dira, bat etorriz Jaurlaritzako Sailen Estatistikarako Organo Bereziak arautzen dituen ekainaren 22ko 180/1993 Dekretuaren manuekin.

Ekonomiaren Garapen, Jasangarritasun eta Ingurumen Sailaren berariazko estatistika-organoa kide bakarreko organoa da, eta Saileko Zerbitzuen zuzendariaren mende dago zuzenean.

1. Ekonomiaren Garapen, Jasangarritasun eta Ingurumen Sailaren berariazko estatistika-organoa, eskumenei dagokienez, I. motakoa da. Hori dela eta, ekainaren 22ko 180/1993 Dekretuak mota horretako berariazko estatistika-organoei esleitzen dizkien eskumenak izango ditu, eta dekretuak ezarritako ahalmenak erabiliko ditu. Zehazki, honako hauek:

   1. Euskal Estatistika Planaren Proiektuaren oinarri izango den Sailaren estatistika-plana egitea.

   2. Euskal Estatistika Erakundearekin lankidetzan jardutea, Euskal Estatistika Plana eta urteko estatistika-programak egitean.

   3. Urteko estatistika-programetan dauden estatistikak edo haien fase batzuk egitea, bertan zehazten den eran.

   4. Euskal Estatistika Planean eta urteko estatistika-programetan ez dauden sailaren estatistika propioak egitea, apirilaren 23ko 4/1986 Legearen 8.1 artikuluan aurreikusitako moduan.

   5. artikulu honetako c) eta d) letretatik datozen estatistika-funtzioen ondorioz beste erakunde batzuekin harremanak izatea, betiere apirilaren 23ko 4/1986 Legearen 29. artikuluko c) eta d) letretan ezarritakoa errespetatuta.

   6. Bere eskumeneko estatistikak egiteko informazioa lortzea, apirilaren 23ko 4/1986 Legearen 9.etik 16.era bitarteko artikuluetan adierazitako zehaztapenekin bat etorriz.

   7. artikulu honen d) letran aipatutako estatistiken emaitzak argitaratzea eta zabaltzea, eta, halaber, urteko estatistika-programetan zehazten diren estatistikenak, betiere aldez aurretik horien edukia Euskal Estatistika Erakundeari jakinarazita.

   8. Dagokion eremu sektorialean, estatistikako fitxategi direktorioak prestatzen eta eguneratzen parte hartzea, apirilaren 23ko 4/1986 Legearen 29.i) artikuluan aurreikusitakoaren arabera.

   9. Ekonomiaren Garapen, Jasangarritasun eta Ingurumen Sailak interesgarritzat jotzen dituen proiektuak egitea; batez ere, interes sektorialeko eta azpisektorialeko zerbitzuak, azterlanak eta analisiak, ekainaren 22ko 180/1993 Dekretuko 7.2 artikuluan ezarritako esparruaren barruan.

2. Ekonomiaren Garapen, Jasangarritasun eta Ingurumen Sailaren berariazko estatistika-organoak bere eskumenak erabiliko ditu, bai sail horren estatistika-beharrei dagokienez eta bai Euskal Estatistika Erakundetik kanpo sail horri atxikita dauden ente instituzionalei dagokienez, kontuan hartu gabe estatistikak datu estatistiko edo datu administratiboetatik abiatuta egingo diren.

3. Ekonomiaren Garapen, Jasangarritasun eta Ingurumen Sailaren berariazko estatistika-organoak errespetatu egin beharko ditu eskumen hauek: estatistikek ukitutako gaiei dagokienez, sail horretako organo eta instantziei esleitutako legezko eskumenak. Organo eta instantzia horiek eskatutako informazioa eman beharko diote organoari, baldin eta informazio hori beharrezkoa badu dagozkion eskumenak egikaritzeko.

1. Ekainaren 22ko 180/1993 Dekretuaren 4. artikuluan aurreikusitako Estatistikarako Organo Berezien Erregistroan inskribatu ostean, Ekonomiaren Garapen, Jasangarritasun eta Ingurumen Sailaren berariazko estatistika-organoak Euskal Autonomia Erkidegoko estatistikari buruz dagokion jarduera gauzatuko du, estatistikari buruzko legeria errespetatuta, hain justu ere, beste organo eta ente batzuekin izango dituen harremanetan, baita sailari atxikitakoekin eta sailari dagozkionekin dituenetan ere.

2. Bere jarduera garatzeko, Ekonomiaren Garapen, Jasangarritasun eta Ingurumen Sailaren berariazko estatistika-organoak honako lege hauetan xedatutakoari jarraituko die: Emakumeen eta Gizonen Berdintasunerako otsailaren 18ko 4/2005 Legeren 16. artikulua, eta Emakume Nekazarien Estatutuari buruzko urriaren 15eko 8/2015 Legearen 28. artikulua. Bi artikuluak estatistikak eta azterlanak egokitzeari buruzkoak dira, Sailaren politiketan genero-ikuspegia modu eraginkorrean txertatzen dela bermatzeko.

1. Ekonomiaren Garapen, Jasangarritasun eta Ingurumen Sailaren titularrak eskumena izango du Ekonomiaren Garapen, Jasangarritasun eta Ingurumen Sailaren berariazko estatistika-organoak emandako egintzen aurka jarritako errekurtsoak aztertzeko eta ebazteko.

2. Errekurtso horien ebazpena eman aurretik, Euskal Estatistika Erakundearen nahitaezko txostena izan beharko da.