"3. artikulua.– Honako kide hauek izango ditu ikastetxe pribatuen Eskola Kontseiluak:

• Zuzendaria.

• Ikastetxearen titularraren hiru ordezkari.

• Ikastetxea zer udalerritan dagoen, hango udaleko zinegotzi edo ordezkari bat.

• Ikastetxeko irakasleen lau ordezkari.

• Ikastetxeko ikasleen gurasoen edo tutoreen lau ordezkari.

• Ikastetxeko ikasleen bi ordezkari, Derrigorrezko Bigarren Hezkuntzako lehen kurtsotik aurrera.

• Ikastetxeko administrazio eta zerbitzuetako langileen ordezkari bat.

  Gainera, Hezkuntza Bereziko zentro espezifikoetan eta gela espezializatuak dituztenetan, hezkuntza-arreta osagarria ematen duten langileen ordezkari bat ere izango da Eskola Kontseiluko partaide."

"5. artikulua.– 1.– Lanbide Heziketa ematen duten itunpeko ikastetxeek enpresa-munduko ordezkari bat ekartzeko aukera izango dute euren Eskola Kontseiluetara.

2. – Horretarako, ikastetxeak Lanbide Heziketako zer irakaskuntza ematen duen, horrekin zerikusia duen ordezkaritza handieneko enpresa-erakundera joko du ikastetxeko titularrak, erakunde horrek ordezkaria izendatu dezan.

3. – Izendatutako ordezkariaren agintaldia, gehienez ere, lau urtekoa izango da. Izendatu zuen enpresa-erakundearen erabakiz utziko du kargua pertsona horrek."

"14. artikulua.– 1.-Ordezkariak hautatzeko eta ordezkari izateko eskubidea hauek daukate: gurasoek eta legezko tutoreek, irakasleek, administrazio eta zerbitzuetako langileek, Derrigorrezko Bigarren Hezkuntza, Batxilergo eta Lanbide Heziketako ikasleek, eta Hezkuntza Bereziko zentro espezifikoetan eta gela espezializatuak dituztenetan, hezkuntza-arreta osagarria ematen duten langileek, beti ere hautesle-erroldan baldin badaude."

"17. artikulua.– 1.– Zuzeneko eta isilpeko sufragioz egingo dira botazioak. Hezkuntza-sektore guztiek ikastetxeetako eskola-kontseiluko kideak hautatzeko prozesuetan parte hartzea errazte aldera, Hezkuntza, Unibertsitate eta Ikerketa Sailak bide egokiak ezarri ahal izango ditu botoa ordezkatzeko edo botoa postaz emateko.

2. – Boto-emaile bakoitzak dagokion hautestontzian utziko du boto-txartel bana, eta bertan idatzita egongo dira botoa ematen dien pertsonen izena edo izenak. Gurasoek eta irakasleek gehienez bina izen jarriko dituzte euren boto-txarteletan; ikasleek, administrazio eta zerbitzuetako langileek eta hezkuntza-arreta osagarriko langileek, ostera, izen bakarra.

3. – Baliogabeak izango dira aurreko paragrafoan ezarritakoak baino hautagai-izen gehiago dauzkaten botoak eta hautagai-izen errepikatuak dauzkaten botoak."

"23. artikulua.– 1.– Titularrak eta Eskola Kontseiluak adostu ondoren izendatuko da itunpeko ikastetxeetako zuzendaria. Kideen erabateko gehiengoz hartuko da ikastetxeko Eskola Kontseiluaren akordioa.

2. – Adostasunik ez bada, ikastetxeko Eskola Kontseiluak izendatuko du zuzendaria, titularrak proposaturiko irakasle-hiruko batetik. Kideen erabateko gehiengoz hartuko da ikastetxeko Eskola Kontseiluaren akordioa.

3. – Zuzendariaren agintaldiak hiru urte iraungo du.

4. – Ikastetxeko titularraren eta Eskola Kontseiluaren arteko akordioa beharko da zuzendaria kargutik kentzeko.

5. – Zuzendariaren izendapena edo kargu uztea noiz gertatu den, ikastetxeetako titularrek hamar eguneko epea izango dute, egun horretatik aurrera, Hezkuntzako lurralde-ordezkariari horren berri emateko."

   ALDIBATERAKO XEDAPENA

   Ikastetxe itunduetan Dekretu hau indarrean sartu aurretik izendatutako zuzendarien agintaldiaren iraupena, izendatzean indarrean zegoen arautegiak ezartzen zuena izango da.