Urtarrilaren 23ko 25/1996 Dekretuaren bidez (urtarrilaren 26ko EHAA), 1996/97 ikasturtean zehar derrigorrezko bigarren hezkuntzaren lehen zikloa ezarri zen, oinarrizko hezkuntza orokorreko zazpigarren eta zortzigarren kurtsoei zegozkien irakaskuntzak bertan behera utziz.

Ondoren, 1997/98 eta 1998/99 ikasturteetan, derrigorrezko bigarren hezkuntzako bigarren zikloko lehen eta bigarren kurtsoak ezarri ziren hurrenez hurren, irakaskuntza homologoak, hau da, Batxilergo Bateratu Balioanitzaren 1. eta 2. kurtsoak iraungiz.

Era berean, apirilaren 29ko 97/1997 Dekretuaren (maiatzaren 7ko EHAA) 6. artikuluan xedatutakoaren arabera, 1997/98 ikasturtean EAEko Institutu guztietan batxilergoko lehen kurtsoari zegozkion irakaskuntzak emateari ekin zitzaion, urrutiko hezkuntza, gaueko batxilergoa, batxilergo artistikoaren modalitatea eta heziketa-zikloak izan ezik.

1998/99 ikasturtean, batxilergoaren ezarpen-prozesua amaitu zen eta erdi-mailako eta goi-mailako heziketa-zikloen ezarpena finkatu zen, horrekin irakaskuntza korrelatiboak ordezkatuz, hau da, batxilergo bateratu balioanitzaren hirugarren kurtsoa, unibertsitatera bideratzeko ikasturtea eta lehen mailako lanbide-heziketa, eta arian-arian bigarren mailako lanbide-heziketa.

Prozesu honen burutzapenak zera ekarri du: batxilergo bateratu balioanitzaren (BBB) irakaskuntzak, unibertsitatera bideratzeko ikasturtea (UBI) eta 1. eta 2. mailako lanbide-heziketa iraungitzea, eta DBHko 2. zikloko irakaskuntza korrelatiboak, LOGSE batxilergoa y erdi-mailako eta goi-mailako heziketa-zikloak ezartzea, hezkuntza-sistemaren egitura 1/1990 Legearen aurreikuspenetara egokituz, honek derrigorrezko oinarrizko irakaskuntzako aldia 16 urteetaraino zabaltzen baitu, eta derrigorrezko bigarren hezkuntza gainditu ondoren batxilergoko ikasketetara edo heziketa-zikloetara sartzea ahalbidetzen du.

Derrigorrezko bigarren hezkuntza, herriaren plangintza-tradizioan aurrekaririk izan ez duen etapa, lehengo oinarrizko hezkuntza orokorrarekin ez eta batxilergo bateratu balioanitzarekin ere identifikatzen ez dena, helburu, ikasle eta irakasleei dagokienez ezaugarri definitzaileekin aurkezten da, erabat berritzailea den curriculuma ekarriz –pentsamendu zientifikoaren bereizgarria den pentsamendu hipotetiko-deduktiboaren agerpeneko bilakaera-egoeran dagoen ikaslearen neurrira–, bai eta ikastetxe-tipologia berria ere, gizarte-eragileek hala eskaturik, eta bere bigarren zikloan bigarren hezkuntzako irakasle egokiekin hornitu behar dira.

LOGSEk, batxilergo bateratu balioanitzean eta erregimen bereziko lanbide-heziketan ikusitako disfuntzioak gainditzeko ahaleginean, aldakortasun handiko derrigorrezkoa ez den bigarren etapa diseinatu du, unibertsitaterako edo lan-merkaturako ateak irekitzen dituena, batxilergo-institutua – lanbide-heziketako institutua dikotomia tradizionala ikastetxe-paradigma berri batean laburbilduz; batxilergoak eta heziketa-zikloak eskaintzen dituen bigarren hezkuntzako institutua da, goi-mailako lanbide-heziketako berariazko institutuen existentziaren kaltetan izan gabe.

Bestalde, Euskal Herrian jaiotza-tasetan dagoen atzerakada iraunkorrak, bai eta azken urte hauetako saldo migratorio negatiboak ere, eskola-populazioaren murrizketa nabarmena ekarri dute. Baliabideen optimizazioa Administrazioaren printzipio orokor bat eta eskola-maparen garapenaren lehen irizpidea izanik, Hezkuntza Sailak hezkuntza-sistemaren razionalizazioari ekin zion, eta honela, ikastetxeen egungo kokaera eta antolaketa abiapuntutzat hartuz, bigarren hezkuntzako 27 institutu berri sortu ziren bategite-prozeduren bitartez, prozesu hori ikastetxeak egokitzeari buruzko uztailaren 1eko 163/1997 Dekretuaren bitartez (uztailaren 4ko EHAA) legezkotu zelarik, derrigorrezko irakaskuntzaren ondokoaren ezarpenetik eratorriz.

Azken emaitza irakaskuntza publikoko ikastetxe-sarearen fisonomiaren eraldakuntza izan zen: DBHko ikastetxe independenteak, bigarren hezkuntzako institutuak eta goi-mailako lanbide-heziketako berariazko institutuak.

Hezkuntza-erreformak ez du derrigorrezko irakaskuntzaren ondoko ikastetxe-sarearen fisonomia bakarrik aldatu; bere ondorioek garrantzi handiagoa izan dute espezialitateen eremuan, zeinak antolamendu berritik eratorritako premien ondorioz irakasleen atxikimenduaren erreferentziazko ardatz bihurtuko baitira.

Azaroaren 19ko 1701/1991 Errege Dekretuaren bidez, bigarren hezkuntzako irakasle-kidegoaren espezialitateak finkatu ziren, Kidego horretako irakasleak horietara atxiki beharko direlarik, dagokion irakasleriak DBHn eta batxilergoan irakatsi behar dituen alorrak eta jakintzagaiak zehaztuz.

Ondoren, urriaren 6ko 1635/1995 Errege Dekretuaren bidez, bigarren hezkuntzako irakasleen eta lanbide-heziketako irakasle teknikoen kidegoen espezialitateak finkatu ziren, era berean irakasleen espezialitate horietarako atxikimendua erregulatuz, xedapen horretan ezarritako egokitzapenaren arabera.

Ondorioz, espezialitate berriak sortu dira (ekonomia, informatika, teknologia, psikologia eta pedagogia), eta bereziki garapen zientifiko-teknologikoari eta erabat aldatzen ari den lan-merkatuari hertsiki loturik dagoen lanbide-heziketaren alorrean aniztu dira, BHIetan batxilergoko nahiz heziketa-zikloetako espezialitateak barne hartuz.

Era berean, hezkuntza-sistemarako berritzaileak izan dira ekainaren 14ko 1007/1991 Errege Dekretua, 13. artikuluan curriculum desberdinak eratzeko programen oinarrizko alderdiak finkatu zituena; 1998ko uztailaren 10eko Agindua, EAEn pertsona helduentzat oinarrizko heziketako irakaskuntzak ezarri zituena, ezarpen hori 1998-99 ikasturtean gauzatu zelarik; urriaren 27ko 289/1998 Dekretua, Urrutiko Oinarrizko Hezkuntzarako Euskal Ikastegiaren (UOHEI) helburuak eta egitura LOGSEk ezarritako oinarrizko hezkuntzaren kontzeptu berrira egokitzen dituena, hiru ikastetxe eratuz, hiru lurralde historikoetako hiriburuetan ikastetxe bana, hain zuzen ere; ekainaren 2ko 100/1998 Dekretua, eta irailaren 28ko 332/1999 Dekretua, derrigorrezko irakaskuntzaren ondokoa berregituratzen dutenak; eta ekainaren 23ko 118/1998 Dekretua, hezkuntza-premia bereziak dituen ikaslegoaren erantzuna ezarri eta antolatzen duena, eta Hezkuntza, Unibertsitate eta Ikerketa sailburuaren 1998ko uztailaren 30eko Agindua, berau garatzen duena.

Azkenik, ikastetxeen errealitate soziolinguistikoaren eraldakuntza gaineratu behar da, eredu elebidunetako ikasleen igarotzearen ondorioz, irakasleek hizkuntz eskakizun bat lortu beharra ekarri duelarik.

Faktore hauek guztiak bilduta, derrigorrezko bigarren irakaskuntzaren ondokoaren eremuan panorama berria sortu du, lanpostuak espezialitate eta hizkuntz eskakizunei loturik agertzea ekarri duelarik, zeinak dagokion lanpostuen zerrendaren bitartez definituko diren.

Ondorioz, hezkuntza-administrazioek beren plantilak egituratu behar dituzte sistema berrira egokitutako espezialitate eta hizkuntz eskakizunetan oinarrituz, lanpostuen zerrenda batean gauzatuko diren baldintza objektiboen eremu bat eta lanpostu horiek lortzeko baliagarriak izango diren espezialitateak definituko dituzten baldintza subjektiboen eremu bat proiektatuz.

Zentzu honetan, 1635/1995 Errege Dekretuaren 12. xedapen gehigarriak jadanik Autonomia Erkidegoetako dagozkien organoei gaitasuna ematen zien irakasleen birbanaketarako irizpideak eta prozedurak ezartzeko, derrigorrezko bigarren hezkuntzako bigarren zikloa, batxilergoa eta lanbide-heziketa Administrazio bakoitzak erabakitzen duen moduan ezartzeko. Ondoren, urriaren 2ko 2112/1998 Errege Dekretuak, bere hamabosgarren xedapen gehigarrian, gaikuntza bera barne hartzen du.

Horretarako, hezkuntza-administrazio honek bi elkarren segidako jarduketetan egituratzen den birbanaketa-prozedura bat diseinatu du; lehenengoa, egungo destinoko ikastetxean finkatu eta berratxikitzeko, orain aurkezten den eta memoria hau gauzatzen duen dekretuaren arabera burutuko dena, eta bigarrena, aurrekoa amaitu eta berehala deitzen den lekualdaketa-lehiaketaren bitartez burutuko dena.

Jarduteko erabiliko den lanpostuen zerrenda 2000/2001 ikasturteari dagokiona izango da. Honek esan nahi du, gero azalduko den bezala, atxikimenduaren ondorioak 2000ko irailaren 1ekoak izango direla, ondorengo lekualdaketa-lehiaketarentzat bezalaxe. Erreforma ezarrita egonik, bere finkapenaren ikasturtea 1999-2000koa izango delarik, erabateko ezarpenak sortzen duen ikuspegi orokorrarekin, etorkizunari begira dagoen lanpostuen zerrenda diseinatu ahal izango da, barne hartzen diren lanpostuen gutxieneko iraunkortasuna ziurtatuz. Aurreko lanpostuen zerrenda batekin egitea arriskutsuegia litzateke.

Ikastetxean atxikitzeko prozedura, behin betiko destinoa duen irakasleria duten ikastetxeetan ahalik eta irakasle-kopururik handiena mantentzeko printzipioa abiapuntutzat hartuz egiten da. Beti aldarrikatu den klaustroen egonkortasuna izango da printzipio honi eusteko arrazoi nagusia. Hezkuntza-zereginak proiektuen jarraitasuna eta epe ertainerako plangintza eskatzen du, eta hori ezinezkoa da irakasleek ikastetxean ez badute denbora luzez irauten. Printzipio hau betetzeko, jarraian azaltzen dugun prozedura diseinatu da, zeinak bi fase dituen; lehena, atxikimenduaren finkapen-mantenimendukoa, eta bigarrena, institutuan bertan berratxikitzekoa, zeina, era berean, elkarren segidako hiru txandarekin diseinatzen den.

Lehen fasean, irakasle bakoitza bere espezialitate eta hizkuntz eskakizunarekin bat datorren lanpostuan finkatzen da. Azken finean, bakoitza dagoen lanpostuan mantentzea besterik ez da, beti ere lanpostu hori baldin badago, noski. Lanpostu korrelatiboaz hitz egiten da, dagoeneko aipatu diren 1701/1991 eta 1635/1995 Errege Dekretuetan eta bigarren hezkuntzako irakasleak eta lanbide-heziketako irakasle teknikoak berariazko lanbide-heziketako espezialitateetara atxikitzeari buruzko uztailaren 1eko 162/1997 Dekretuan ezarritako espezialitateen korrespondentzia oraindik formalizatu gabe dagoelako.

Aurreko fasea amaitu ondoren bigarren faseari ekiten zaio, institutuan bertan berratxikitzeko faseari, zeina borondatezko parte-hartzeko elkarren segidako hiru txandatan burutzen den. Fase honen printzipioa ikastetxean bertan plantilak mantentzearen eta gehieneko finkapenarena da, ondoren azalduko den bezala.

Bigarren fase honetako lehen txandak, 2. hizkuntz eskakizuna egiaztatuta izanik hizkuntz eskakizunik ez zuten lanpostuen titularrak ziren irakasleak 2. hizkuntz eskakizuneko lanpostuetan berratxikitzea ahalbidetzen du. Honela, euskaraz ez dakien eta une horretan finkatuta ez dagoen irakasleria hartzeko lanpostuak liberatzen dira, kolektibo hau finkatzea zailagoa baita. Era berean, txanda honek aukera ematen du titular direnekoaz bestelako espezialitate eta hizkuntz eskakizuneko lanpostuetan finkatu gabekoak berratxikitzeko, lanpostuaren hizkuntza eraldaketa baten aurrean gaudela ulertuz, irudi hori irakaspostuetan hizkuntz eskakizunak eta derrigorrezkotasun-datak zehazteko irizpideak ezartzen dituen martxoaren 9ko 47/1993 Dekretuan aurreikusita baitago.

Bigarren txandak beste espezialitate bateko lanpostuetan berratxikitzea ahalbidetzen du. Txanda hau, era berean, dauden giza baliabideak hobeto aprobetxatzeko ezartzen da. Oro har, aldaketa espezialitate berrietara egiten da, bertan pertsonal funtzionarioaren kopurua lanpostu-kopurua baino txikiagoa baita. Lanpostu hauek ikastetxeko pertsonen berratxikipenarekin betetzen diren neurrian, lortu nahi den helburu bikoitza beteko da, hau da, ikastetxeko pertsonak finkatu ahal izateko lanpostuen liberazioa sortzea eta, ondorioz, egungo irakasleen gehiengoa bertan geratzea.

Beste espezialitate baterako sarbidea, adierazten diren lau baldintzetako bat betetzen bada burutu daiteke, beti ere aurrekoak ondorengoarekiko lehenespena izanik. Lehen baldintza, espezialitatea edukitzea da. Hau oposiziotik eta, beraz, berau burutzeko gaitasunaren zuzeneko egiaztapenetik eratortzen da.

Bigarren baldintza, eranskinean ezartzen diren titulazioetakoren bat edukitzea da. LOGSEk ezarritako hezkuntza-sistemaren ezarpen-prozesuaren egutegia amaitu arte espezialitate horietako lanpostuetara sartzeko 1635/1995 eta 777/1998 Errege Dekretuek ezartzen dituzten titulazioak dira.

Hirugarren baldintza esperientziagatik sartzea da. Esperientziagatik ondoko lanpostuetara sar daiteke: ekonomia, lanbide-prestakuntza eta -orientazioa, derrigorrezko bigarren hezkuntzako edo batxilergoko hautazko informatika, eta berariazko lanbide-heziketakoak. Sarbide hau errazten da irakasleri espezialistarik ez duten espezialitate berriak direlako (horixe da ekonomiaren eta lanbide-prestakuntza eta -orientazioaren kasua), edo bestela, ikastetxeko beste espezialitate batzuetan behin betiko destinoa duten baina espezialitate edo titulazioagatik bertan sartu ezin diren irakasleek kasu askotan martxan jarri dituzten lanbide-moduluei dagozkien lanpostuak direlako. Azken urte hauetan lanbide-heziketa asko garatu da, eta ikastetxeetan institutuetako irakasleek bultzatu dituzten berariazko lanbide-heziketaren espezialitate eta moduluak instalatu eta irakatsi dira. Ohikoa da aipatu diren errege dekretuetan barne hartzen diren berariazko titulaziorik gabeko irakasleek irakaskuntza hauek martxan jarri izana eta gaur egun irakasten jarraitzea. Giza kapital hau aprobetxatu beharra dago, are gehiago kontuan izaten badugu beraiek ordezkatzeko beren esperientzia eta prestakuntzako pertsonalik ez dagoela. Azken finean, ikastetxean bertan behin betiko destinoa duten lanpostu batzuetan jadanik hauek betetzen dituzten irakasleak kontsolidatzea da helburua.

Laugarren eta azken baldintza prestakuntzarena da. Bide honetatik lanbide-prestakuntza eta -orientaziorako lanpostuetara hel daiteke. Gaikuntza hau 162/1997 Dekretuaren 8. artikulutik eratortzen da, LOGSEk ezarritako hezkuntza-sistemaren ezarpen-aldian zehar espezialitate honetako lanpostuetara prestakuntzagatik heltzea ahalbidetzen baitu.

Esperientzia eta prestakuntzagatiko sarrera-baldintzak zehazteko, bigarren hezkuntzako irakasleei gordetako lanpostuen zerrendak eratzeko irizpideak eta irakasle hauek LOGSEtik eratorritako espezialitateetara atxikitzeko baldintzak erregulatuko dituen agindu batera eragortzen da testua.

Bigarren faseko hirugarren txandak, prozeduraren une horretan finkatu gabe eta berratxiki gabe daudenen atxikipena ahalbidetzen du. Ordutegi-soberakinekin sortzen diren eta bi ikastetxetan edo bi espezialitatetan irakastea dakarten lanpostuak dira. Hauen etorkizuna kontsolidazio-fasean dago, eta horregatik une honetan borondatez eskaintzen dira, beren etorkizuna argi ez egon arren eta beste lanpostu batzuekin alderatuz kaltegarriagoa izan daitekeen arren, inolako lanposturen titulaziorik geratu baino lehen hauetara atxikitzea nahiago duten pertsonentzat.

Prozesuaren une bakoitzean irakasleria antolatu egiten da bere eskubideak baremo berarekin gauzatzeko. Lehenik, LOGSE indarrean sartu baino lehen katedradun izaeraren jabe izanik, irakaskuntza bateratuen ikastetxeetako irakasle numerario eta psikologoen edo batxilergoko katedradun numerarioen kidego iraungietarako berariazko lekualdaketa-lehiaketetan lortutako lanpostuan behin betiko destinoa dutenak daude (psikologoak abuztuaren 2ko 30/1984 Legearen bidez sartu ziren katedradunen kidegoan). Katedradunen kidegokoak izanik, kidego horretarako berariazko lehiaketaren batean lortu zuten azken lanpostutik mugitu ez diren pertsonak dira. Bigarren irakaskuntzaren historian lehen aldiz beren destinoko ikastetxeetan jarraitu ezin duten irakasleak daudenez gero, gure ustez lehenespen honen arrazoia zera da, pertsona hauek une hartan beren kidegoari erreserbatutako lanpostuetan jarraitzen dutela eta, beraz, gainontzekoetatik bereizten zirela. Gainera, aipatu behar da beren sarbidea zaila zela, ikastetxe bakoitzean espezialitate bakoitzerako katedradun bakarra zegoela ez baita ahaztu behar. LOGSE indarrean sartu ondoren beren destinoa aldatu dutenek beren borondatez egin dute, bigarren irakaskuntzako irakasleen gainerakoarekin sar zitezkeen lanpostuetara, beren izaera merezimendu gisa erabiliz, eta beraz ez dago lehenespen hau emateko arrazoirik. Hau da, gaur egun dauden lanpostura sartzeko bigarren irakaskuntzako irakasleei aplikagarriak zaizkien mugikortasunerako ohiko mekanismoak jadanik erabili dituzte.

Antolamenduko irizpide orokor gisa, aurreko lehentasuna salbu, parte hartzen deneko kidegoan karrerako funtzionario gisa emandako zerbitzu-denbora eta parte hartzen deneko institutuan behin betiko destinoa duen karrerako funtzionario gisa emandako denbora etengabea berdin baloratuko dira. Kolektiboan kidegoko antzinatasunagatiko antolamenduak tradizionalki izan duen garrantzia eta behin eta berriz aipatutako plantilen egonkortasuna bateratzea erabaki da. Berratxikipenaren arrazoia, ikastetxean ahalik eta irakasle-kopururik handienak jarraitzea da, hau da, klaustro bat denbora luzez berdina izateari garrantzia ematea. Ikastetxean jarraitzea saritzea aurrekoaren ondorio da.

5. kapituluari (ondorioak) dagokionez, lekuz aldarazitako pertsonalaren figura nabarmentzen da. Hau lehen aldiz urriaren 6ko 1635/1995 Errege Dekretuak 1701/1991 Errege Dekretuaren 4. artikuluari emandako idazkuntza berrian sortu zen, eta ondoren termino berberetan erregulatu zen urriaren 2ko 2112/1998 Errege Dekretuaren hamahirugarren xedapen gehigarrian. Honela, atxikimendu-prozeduran lanpostua lortzen ez duena bere destinoko ikastetxetik lekuz aldarazita geratzen da. Honelako irakasleei, hala nahi izanez gero, irakasle ezabatuaren izaera lortzeko aukera ematen zaie. Ezabatua izateko aukera ematen da, izaera hori lortu nahi duenak beste destino bat lortzeko borondatea adierazten duela ondoriozta daitekeelako, eta honela lehenago integratuko da eskola-elkarte batean, eta hori ez da gertatuko lekuz aldaraziarekin, hau urteetan zehar bere ikastetxean eta beste zenbait ikastetxetan egon daitekeelako, bere jatorrizko destinoan dauden ordutegi-premien arabera. Aukeratzeko eskubidea bost egunetara mugatzen da, lekualdaketa-lehiaketaren berehalako deialdia egin baino lehen atxikimenduaren emaitzak argitaratu behar direlako.

   Prozesuak 2000ko irailaren 1etik aurrera izango ditu ondorioak, birbanaketa-prozesu batean gaudenez gero, zeinaren bigarren fasea atxikimenduaren lehenengo fase hau ebatzita geratu ondoren berehala deitu beharreko lekualdaketa-lehiaketa den. Are gehiago, 2000-2001 ikasturteko lanpostuen zerrendarekin ari garenez, derrigorrez hala izan behar du.

   Zalantzarik egon ez dadin, espresuki adierazten da hemen lekuz aldarazia edo ezabatua geratzen den pertsonalak atxikimenduaren emaitza EHAAn argitaratu eta berehala deitzen den lekualdaketa-lehiaketan parte hartu ahal izango duela, argitalpena martxoaren hasierarako aurreikusita egonik. Atxikimendua eta ondorengo lekualdaketa-lehiaketa osotasun baten bi zati izatea, bigarren irakaskuntzako irakasleen birbanaketak hala izan dadila eragiten du, bestela birbanaketa ez baitzen erabatekoa izango.

   Lehenengo eta bigarren xedapen gehigarriek bi kolektibo barne hartzen dituzte: lan-legepeko pertsonala eta irakaskuntza ertainetako institutu teknikoetako irakasle berezien Kidegoko funtzionarioak (lehen askotariko pertsonala), atxikimendu-prozesuan parte hartzetik kanpo egonik, orain egituratu nahi diren plantilak dituzten hezkuntza-mailatan eskolak ematen dituen irakaslerian barne hartuta daudenak. Gure ustez irakasleriaren osotasunaren birbanaketa-prozesua erregulatzen duen araudiak maila hauetako definitu gabeko lanpostu-zerrenda duen pertsonal guztiaren egoera barne hartu behar du, beren lotura juridikoa edozein izanik ere.

   Lan-legepeko pertsonalak enplegu-erlazio juridikoa du, bere lanpostuarekin lotzen duena hau existitzen den bitartean. Honela, lan-legepekoa kontratatua izan zeneko ikastetxean bere espezialitateko lanpostu bat dagoen bitartean, bertan jarraitzeko eskubidea du. Lan-legepeko pertsonala eta pertsonal funtzionarioa duten ikastetxeetan guztientzat lanposturik ez badin badaude, lan-legepekoak bere lanpostuan jarraituko du eta funtzionarioa, zeinak mugikortasuna erabat erregulatuta duen, lekuz aldarazia izango da; horixe dirudi dela eskubide eta interesetan lortu daitekeen kontziliazio-mailarik handiena, kontuan hartuta batzuei eta besteei eragiten dizkien legepideak. DBHko lehen zikloko atxikipenean gertatzen ez zen bezala, ez da ahaztu behar inolaz ere lan-legepeko pertsonalak hemen oso presentzia urria duela, hain zuzen, ehuneko bat inguru, pertsonal funtzionarioaren aldean, eta bakar-bakarrik datozela bat oro har aurretik egindako bat egiteen ondoriozko bi ikastetxetan. Horretarako eman da lehenengo xedapen gehigarria.

   Xedapen berean lan-legepeko pertsonala kontratatua izan zeneko funtzioak desagertzearen kasua ere erregulatzen da, eta kasu honetan beste destino bat esleitzea aurreikusita dago. Kontratatua izan zeneko funtzioen desagerpenak lan-erlazioa kausa objektiboengatik iraungitzea ekar dezake, baina hori ez zen administrazioak publiko bihurtzeko prozesuekin hartu zuen konpromisoa, eta ez da benetako posibilitatea, Euskal Funtzio Publikoaren Legeak eta Irakasle-Kidegoen Legeak aurreikusten dutelako funtzionario bihurtzen ez den lan-legepeko pertsonalak bere hasierako erlazio juridikoa mantenduko duela, beren lanpostuak iraungi beharrekotzat aitortuak izanik. Gainera, laneko epaileek nekez onartuko lukete iraugipen bat edo kargugabetze bat kasu hauetan, enplegu-emaileak, hots, administrazioak bere dimentsio guztiarekin, bere egituraren eta antolaketaren osotasunean beharrezkoa denean lan-legepeko langilea berriz lanpostu batean jartzeko behar adina lanpostu badituela ulertzen delako. Lan-legepeko pertsonalak lanpostuen hornidura-prozeduretan parte hartu ezin duenez, ikasturte hasierako esleipen-prozesua egin baino lehen destino berri bat esleitzea aurreikusten da, behin betiko destinorik gabeko pertsonal funtzionarioari eta bitartekoei bete gabeko lanpostuak une honetan esleitzen zaizkielako. Ordurako lekualdaketa-lehiaketa ebatzita dago, eta beraz karrerako funtzionarioek nahi izanez gero destino berriak aukeratu dituzte. Beraz, eskaintzen dena bete gabe geratu dena da.

   Bigarren xedapen gehigarriak, irakaskuntza ertainetako institutu teknikoetako irakasle berezien Kidegoko funtzionarioen egoera aurreikusten du. Pertsonal hau sailkatu gabeko antzinako askotariko pertsonala da, unibertsitateaz kanpoko ikastetxe publikoetan zerbitzuak egiten dituen askotariko pertsonalaren sailkapenari buruzko abenduaren 2ko 1467/1988 Errege Dekretuak ezarritakoaren arabera funtzionario bihurtu zena. Errege Dekretuaren hirugarren artikuluak ezartzen du pertsonal honek Errege Dekretu hau argitaratu zen unean burutzen ari zen zeregin berberak garatzen jarraituko duela. Azken paragrafoan gaineratzen du atxikitzen direneko unibertsitateaz kanpoko ikastetxe publikoetako lanpostuen zerrendek pertsonal honen ezaugarriak kontuan izango dituela. Honela, lanpostuen zerrendek pertsonal honen lanpostuak barne hartuko ditu, eta hauetara atxikita jarraituko du. Arazoa gorputz-hezkuntzakoarekin sor daiteke, gaur egun ikastetxeetan bigarren irakaskuntzako Kidegoko espezialitate honetako irakasleekin batera baitaude. Institutu hauetako batzuetan ez da biontzako lekurik egongo. 1467/1988 Errege Dekretua aplikatuz, ikastetxe hauetako lanpostuen zerrendak antzinako askotariko pertsonalaren lanpostua barne hartuko du.

   Bigarren xedapen gehigarriak, era berean, funtzioak desagertzearen ondorioz pertsona hauen lanpostua ezabatu beharreko kasua aurreikusten du, lehen xedapen gehigarriak lan-legepeko pertsonalarentzat egiten zuen modu berean. Lan-legepeko pertsonalarentzat xedatzen den bezala, antzinako askotariko pertsonalari, bere destinoan ezin badu jarraitu, ikasturtearen hasierako esleipena egin baino lehen beste lanpostu bat esleituko zaio.

   Hirugarren xedapen gehigarriak bategin diren ikastetxeetarako berariazko aurreikuspena egiten du. Ikastetxe hauek memoriaren hasieran aipatu ditugu, erreformaren aplikazioan egin diren jarduketak kronologikoki adierazi ditugunean.

   Laugarren xedapen gehigarriak zenbait alderdi finkatzen ditu aipatutako lekuz aldarazitako irakasleen figurari dagokionez. Egoera honetan aurkitzen denak lekuz aldarazia deneko ikastetxean bere destinoa gordetzen du, baina eskolak beste ikastetxe batean ematen ditu. Hala eta guztiz ere, bere ikastetxean ordutegi-premia baldin badago, bertara itzuliko da. Premia kausa ezberdinengatik gerta daiteke, adibidez bertan destinatuta dagoen bat kanpoan egotea baina bere lanpostuaren erreserbarekin, edo espezialitatean ordu liberatuak egotea, espezialitate horretako pertsonaren bat ikastetxeko zuzendaritzan sartu delako. Arrazoia, beraz, ondokoa da: institutuetan ohikoa da lanpostu bat gehiago egon gabe, hala ere, zirkunstantzia bat edo bestea dela medio, orduak liberatzea, eta ordu hauek beste kasu batean pertsona ezabatuaren izaera hartu beharko zukeenari bertan jarraitzeko aukera ematea.

   Gorago aipatu denez, lekuz aldarazitako irakasleek pertsona ezabatuaren izaera har dezakete. Ikus daitekeenez bi irudi hauek ia berdinak dira, baina ezabatuak bere destinoko azken ikastetxearekin duen lotura bakarra lehiaketan bertan lanpostua lortzeko lehenespenezko eskubidea duela eta destino berria lortu arte lanpostuen hornidura-prozesuetan derrigorrez parte hartu behar duela da. Honela, badirudi lekuz aldarazitako irakaslearen egoera hobea dela bere ikastetxean ordurik gabe geratzen denarentzat, ezabatuaren abantaila guztiak eta gainera bere izaeraren berezko abantailak dituelako.

   Azken xedapen gehigarriak, bosgarrenak, Urrutiko Batxilergoko Institutua eratu izanak sorrarazitako egoera berezia arautzen du, hain zuzen, Bilboko Rekaldeberri BHIaren bereizketatik ondorioztua eta irailaren 29ko 332/1999 Dekretuz sortu zena, 1999-2000 ikasturtearen hasieratik ondorioak dituena. Finkatzeke zeuden behin betiko destinoa Rekaldeberri BHIan izanik bertatik bereiztutako zentro berriari atxiki beharra zeukatenak. Xedapen gehigarri honek betekizun hori betetzen du, Bizkaiko UBIari atxiki behar diren irakasleak finkatzeko irizpideak ezartzen baititu.

   Dekretuaren zirriborroa sindikatuen ordezkariekin negoziatu da Plangintzarako Batzorde Teknikoan.

   Bestalde, aginduzko txostenak eskatu zaizkie Euskara Planen Zuzendaritzari, Euskadiko Eskola Kontseiluari, Funtzio Publikoaren Zuzendaritzari, Kontrol Ekonomikoko Bulegoko Zuzendaritzari, Hezkuntza, Unibertsitate eta Ikerketa Sailaren Aholkularitza Juridikoari eta Lege Garapen eta Arau Kontrolerako Zuzendaritzari.

   Ondorioz, Hezkuntza, Unibertsitate eta Ikerketa sailburuaren proposamenez eta Jaurlaritzaren Kontseiluak 2000ko urtarrilaren 18an egindako bilkuran aztertu eta onartu ondoren, hauxe