Chillida Lekuko egitaraua:

Keler Guneko programazioa:

Zurriolako hondartzan, Keler Gunea izango da Jazzaldiko gunerik heterogeneo eta jendetsuena. Uztailaren 23tik 26ra, zortzi kontzertu eskainiko dira dohainik. Talde eta artista euskaldunak, britainiarrak, estatubatuarrak, katalanak, frantziarrak arituko dira bertan, eta askotariko estiloak entzungo dira, Jazz, rock, soul, country, blues, pop eta R&B tartean.

Uztailaren 23an (asteazkena) hasiko gara iluntzean, Jamie Cullumekin. 60. Jazzaldi honetan eskainiko dituen kontzertuetako bigarrena izango da, baita aukera paregabea ere musikari britainiarra doan ikusteko, bere alaitasun kutsakorrarekin, eta alde guztietatik darion energia sinpatiarekin. Ondoren, Donostian lehen aldiz, The War & Treaty bikotea izango dugu, Trotter senar-emazteek osatua. Beren ahots ahalmentsu eta gospel eta country fusioarekin, Estatu Batuetan izaten ari diren arrakastaren berri emango digute, inolako zalantzarik gabe.

Uztailaren 24an, ostegunean, Keler Guneko lehen txanda Anari artista, abeslari, gitarrista eta konpositorearentzat izango da; ezaguna da bere estilo musikal paregabea, sakontasun poetiko eta hunkigarritasun gordinez betetako bere letra zainduekin batera. Osteguneko bigarren kontzertua EXTC taldeak eskainiko du, Terry Chambers lider duena. Bateria ospetsu hau errepidera itzuli da bere EXTC bandarekin, XTC talde mitikoaren oinordekoarekin.

Uztailaren 25ean, ostirala, munduko izar handi bihurtzeko bidean dauden bi emakume gazte izango dira protagonista. Lehenik, Judith Hill abeslari, konpositore eta instrumentista estatubatuarra izango dugu, bere ahots ahalmentsuagatik, gitarragatik eta soul, R&B, funk, jazz eta rock generoetan erakusten duen moldakortasunagatik ezaguna, gospel eta bluesaren eraginekin. Ondoren, 23:30ean, Crystal Murray abeslari gazte paristarra arituko da; Bartzelonako Sonar eta Parisko Rock En Seine jaialdietan arrakasta handia izan duen ahots aparta.

Keler Guneko kontzertuei amaiera emateko, uztailaren 26an, Bulego izango dugu lehenengo eta Sidonie ondoren. Talde arrakastatsuen artean finkatu da Bulego, poparen aldeko apustua irmotu eta publikoaren arreta bereganatu duen proposamen musikal freskoarekin, halako nostalgia ukitua dariona, eta energiaz eta melodia itsaskorrez betea. Sidoniek, azken bi hamarkadetan Espainian izan den talde arrakastatsuenetakoak, inoiz ez du huts egiten bere zuzenekoetan energia nonahi zabalduz. Talde honen abestiak, horietako asko milaka pertsonarentzako belaunaldi arteko ereserki bihurtuak, aldi berean dira bizitasun handikoak eta malenkoniatsuak, dibertigarriak eta dramatikoak, rockeroak eta poperoak, euforikoak eta introspektiboak, ganberroak eta serioak…

KELERek, 60 Jazzaldiaren babesle nagusiak, jarri dio izena gune honi, KELER GUNEAri. Eta, aurreko edizioetan bezala, Zurriola hondartzan kokatuko da, kai-muturraren ondoan.

Uztailaren 23tik 26ra doako bi kontzertu izango dira egunean:

Uztailak 23:
-Jamie Cullum (20:45)
-The War and Treaty (23:30)

Uztailak 24:
-Anari (21:00)
-EXTC (23:30)

Uztailak 25:
-Judith Hill (21:00)
-Crystal Murray (23:30)

Uztailak 26:
-Bulego (21:00)
-Sidonie (23:30)

Kutxabank Kursaal Auditorioa:

Uztailaren 22an hasiko da guztia Kutxabank Kursaal Auditorioan, Jazzaren eta egungo poparen izar handienetako baten kontzertuarekin: Jamie Cullum britainiarra, Jazzaldian biltzen den publikoaren benetako idoloa, eta Donostian aritu den bakoitzean gailendu izan dena.

Egun horretatik aurrera, Kursaaleko Auditorioak beste 5 kontzertu aurkeztuko ditu, guztiak ere lehen mailakoak. Uztailaren 23an, musikaren historiak eman duen talde mitikoetako bat arituko da, The Beach Boys, bere sorreratik kide duen Mike Love buru dela, eta Bruce Johnstonekin, taldekidea 60ko hamarkadaren erdialdeaz geroztik.

Ostegunean, 24an, etorkizun handiko gitarrista bat izango dugu gure artean, Yerai Cortés flamenkoa, estiloen gainetik dagoen bere proposamen gazte eta garaikidearekin. Oso denbora gutxian, bere ospea berehala zabaldu eta publiko handiarentzat irekitako era askotako agertoki eta jaialdietan izana da.

Jazzaldia behin baino gehiagotan saiatu da Hermeto Pascoal brasildar bikain, tropikal eta bakana ekartzen. Bere parte-hartzea bertan behera utzi behar izan genuen COVID-19aren pandemiaren ondorioz. Azkenik, uztailaren 25ean, ostirala, Hermetok kontzertua eskainiko du Kursaaleko Auditorioan.

Uztailaren 26an, larunbata, aukera izango dugu musika garaikidean den figura sailkaezin, moldakor eta originalenetako baten hirukotea, Andrew Bird abeslari eta biolinistarena, ikusi eta entzuteko. Programazio honek dakarren beste berritasun interesgarria.

Kutxabank Kursaal Auditorioko emanaldiak igandean, hilak 28, amaituko dira. Egun horretan, Jazzaren kondaira handienetako baten jaiotzaren mendeurrena ospatuko dugu: 1925ean Montrealen jaiotako Oscar Petersonena. Eta hiru musikari aparten eskutik egingo dugu: Sullivan Fortner, New Orleanseko interpreteen azken belaunaldietatik gailendutako pianista, eta baxuak eta bateriak osatutako duo legendarioa, John Clayton eta Jeff Hamilton (azken hau, Petersonen taldeko bateria urte askotan), ezinbesteko figurak gure musikaren historian.

Trinitate Plaza:

Jazzaldiko agertokirik enblematikoenak, beti bezala, 4 gau eskainiko ditu, eta bi kontzertuz osatutako saio bikoitzaz gozatzeko aukera emango digu. Aurtengo programazioak izen handiak eta proposamen interesgarriak bildu ditu.
Uztailaren 24an, Steve Coleman maisuarekin eta bere Five Elements taldearekin hasiko gara; sutsu eta bizia beti, Coleman egungo Jazzaren eszenako saxo karismatikoenetakoa da. Kurt Ellingekin jarraituko dugu, egungo Jazz kantaririk onenetakoarekin; gogoan dugu oraindik Branford Marsalisekin Trinitate plazan hark eman zuen kontzertu bikaina. Oraingoan, Yellowjackets taldea izango du lagun, edizio honetarako beste berritasun nagusietakoa. Elkarrekin, Kurt Ellingek eta Yellowjacketsek, Weather Report taldearen abesti bikainen bertsioak aurkeztuko dituzte.

Ostiralean, hilak 25, Marc Ribot gitarrista handiarekin eta Hurry Red Telephone bere talde berriarekin hasiko da gaua. Ondoren, Jazz bokalaren dama handienetakoa, Dee Dee Bridgewater, “We Exist!” bere proiektua aurkezten izango dugu bertan.

Uztailaren 26an, Crosscurrents Trio, bi musikari bikain, Dave Holland kontrabaxuan eta Chris Potter saxofoian; Zakir Hussain handiak osatzen zuen hirukotea baina, tamalez, duela egun gutxi hil da eta oraindik ez dakigu zeinek beteko duen bere lekua perkusioa jotzen. Bigarren kontzertua, berriz, artista berritzaile, harrigarri eta ustekabeko batek emango du: Chief Adjuah (Christian Scott) tronpetista, konpositore eta ekoizleak.

Trinitateko azken saio bikoitzean, uztailaren 27an, kalitatea eta hurbiltasuna uztartzen dituzten bi proposamen. Lehenik eta behin, Marco Mezquida pianista eta Chicuelo gitarrista kolider dituen hirukotea; iberiar panoraman sasoi bete-betean dauden musikarietako bi, best seller formatuan. Ondoren, Melody Gardot, The Essential Melody Gardot (2024) bere azken diskoa aurkeztera datorren emakume abeslari bikain eta berezienetakoa.

Škoda San Telmo Museoa:

Hiru pianista frantses, hirurak sormenez gainezka eta piano soloan izugarrizko talentua erakutsiz, Frantziako Jazzaren eszenan beren estilo bereziak bizi duen goraldiaren berri ematera datoz San Telmoko klaustrora. Bertan, goizeko saioetako lehen hiru emanaldien protagonistak izango dira: Baptiste Trotignon, Bojan Z eta Pierre de Bethman.
Uztailaren 26an, Marc Ribot gure gonbidatu bereziaren txanda izango da, eta kontzertu bat eskainiko digu bakarlari gisa, gitarran eta ahotsean. Sortzaile bikain baten nortasunaz gozatzeko abagunea.

Azkenik, uztailaren 27an, solo formatutik aterata, baina eskaintza akustikoari eutsita, Kirk Knuffke kornetistaren laukotea izango dugu, Stomu Takeishi baxuarekin, Bill Goodwin bateria ospetsuarekin eta Ray Anderson tronboi zoragarriarekin batera osatua.

FCC Victoria Eugenia Antzokia (XI JazzEñe):

JazzEñe 2025ek zortzi kontzertu eskainiko ditu lau saio bikoitzetan, uztailaren 23tik 26ra. Emanaldiak 12:30ean hasiko dira Donostiako Victoria Eugenia Antzokian. Nazioarteko programatzaileei zuzendutako Espainiako Jazzaren erakustaldiak aurten betetzen du bere hamaikagarren edizioa, eta bost urtez jarraian, Donostiako Jazzaldiaren baitan programatu da hiriko Udalarekin eta Donostia Kulturarekin lankidetzan.

Talde hautatuak

Uztailak 23 (12:30)

J. Fox

Juanfe Pérez: Prohibido el toque

Uztailak 24 (12:30)

Maite Akustik Quintet

Román Filiu: Suite Oriental

Uztailak 25 (12:30)

EME·EME·PROJECT: Mutatis Mutandis

El Cuarteto Federal: Cuatro puntos cardinales

Uztailak 26 (12:30)

Pere Bujosa

Daniel Román Jazz Quintet: Bruegel sound

Sarrerak salgai

Sarrerak salgai daude dagoeneko (prezioa 8 €) baita Victoria Eugenia Antzokirako abonamenduak ere (prezioa 56,95 €). Abonamenduan JazzEñeko 4 egunak eta Marc Ribot Ceramic Dog taldearen kontzertua (uztailaren 27an 12:30ean) sartzen dira. Jazzaldiaren webgunean, Donostia Kulturaren webgunean eta Victoria Eugenia Antzokiko leihatiletan eros daitezke.