GAU ZURIA ekitaldi kulturalak Bilbo argiztuko du uriaren Fundazioaren 725. urteurrenaren ospakizunen barruan. Ekitaldia datorren asteburuan ospatuko da, ekainaren 13an eta 14an, ostirala eta larunbata, 19:30etik 00:30era. Herritarrek 34 proposamen artistikoz gozatu ahal izango dute, artea, diseinua eta teknologia uztartzen dituzten esku-hartze artistiko, argiztapen-lan, ikuskizun ibiltari eta talde koral nahiz instrumentalekin.

Bilboko kultura-gune nagusiek –Arriaga Antzokia, Azkuna Zentroa, Uribitarte40 Aretoa, Arte Ederren Museoa, Itsasmuseum eta Euskalduna Jauregia– hainbat sormen-proposamen hartuko dituzte. Gainera, kaleak, plazak, kaialdeak eta zubiak eszenatoki bihurtuko dira, hiri-paisaia arrunta esperientzia sentsorial eta artistiko bihurtuz. Musikak ere protagonismoa izango du, Bilbo soinuz betez.

Aurten Iberdrola Dorreak bat egingo du arte-esparru gisa, eta GAU ZURIAn site-specific esku-hartze bat aurkeztuko du, asteburu honetako ibilbide gaueko parte izango dena, beste 27 puntu artistikoekin batera.

GAU ZURIA erreferente kultural bihurtu da eta edizio honetan parte hartuko dute munduko argi-festibal ospetsuenetan (Lyon, Australia, Paris, Berlin) presente dauden nazioarteko taldeek, baita nazioarteko proiekzioa duten artista lokalek ere (Logela Multimedia, Javier Riera...).

BILBOREN 725. URTEURRENA

GAU ZURIA Bilbo Fundatu zeneko 725. urteurrenaren ospakizunen barruan dago.

Ekainaren 15ean, igandean, hau da, hiria 1300. urtean sortu zen egunean, Bilboko Banderaren igoera egingo da, alkateak eta Udalbatzako ordezkariek zuzenduta, Plaza Ernesto Erkorekako lorategi nagusietan. Ondoren, Herritarren Lore Eskaintza egingo da Don Diegoren omenez. Juan Mari Aburto alkatea, zinegotziekin batera, dantzari eta txistulariekin, Udaletxetik abiatu eta Plaza Zirkularrera joango dira, uriaren fundatzailearen estatuaren ondoan, non erromeria egingo den.

Barne-esparruetan sarrera librea izango da, edukiera bete arte.

Programa eskuragarri egongo da turismo-bulegoetan eta instalazioak hartzen dituzten zentroetan.

• Bilboko Gau Zuria 2025: egitaraua (pdf)
• Bilboko Gau Zuria 2025: eskuko egitaraua eta mapa (pdf)