Ziburuko Euskal Liburu eta Disko Azokaren seigarren edizioa ekainaren 7an izango da, Lapurdiko kostaldeko herrian. "Euskaraz bagara" lelopean, Aurelia Arkotxa poeta, ikertzaile, irakasle eta euskaltzain osoa omenduko du kultur hitzorduak.

Guztira, 43 argitaletxe, diskoetxe eta autoekoizle izango dira 120 metro koadroko eremuan, iaz baino lau gehiago.

Lehen ekitaldia, Arkotxak jasoko duen omenaldia, 10:00etan izango da, eta bertso eta marrazki saioa, rol jokoak, liburu aurkezpenak (Garbiñe Ubeda, Celine Mounole, Joxe Auxtin Arrieta, Ainhoa Urien), ipuin kontaketak eta kontzertuak izango dira gero: Ekhi Lambert, Sara Zozaya, Madame Birrots eta Esanezin.  

•  Ziburuko 6. Euskal Liburu eta Disko Azoka - Egitarau osoa (pdf)