Ekimenarekin bat egin dute Beasaingo lau ikastetxeek: Murumendi eskolak, Andramendi ikastolak, Alkartasuna Lizeoak eta La Salle Beasain ikastetxeak. Izan ere, eskolatik kanpo ere, aisialdian eta denbora librean, dinamika honen bidez, gurasoen eta haurren artean euskaraz hitz egiteko helburuak eta aitzakia betetzen dira.

Leire Artola alkateak azaldu du nola beteko diren helburuak: "Euskara modu dibertigarrian erakargarri bihurtzea eta, bide batez, kantua eta euskal kultura gazteei helaraztea. Aldi berean, gurasoak ere erakartzen ditugu ondo pasatzera, euskara gozamenarekin lotuz. Goierri telebistaren proposamenari baiezkoa eman ondoren, herriko ikastetxeen laguntza eta parte-hartzea eskertu behar dugu. Kantari programa, azken batean, gazteenak modu dibertigarrian euskarara erakartzeko modu bat da, haur eta gazteak euskaraz abesten eta dantzatzen jartzen dituen ikuskizuna, ikuskizunaren protagonista bihurtuz.

Emanaldiak otsailaren 24an, larunbatean, eta 25ean, igandean, izango dira Usurbe Antzokian. Guztira 11 emanaldi egingo dira eta publikoak zuzenean gozatu ahal izango du. Sarrera doakoa izango da eta ez da sarrerarik edo gonbidapenik beharko.

Gainera, Jon Aldanondo Goierri Telebistako zuzendariak azaldu duenez, emanaldi guztiak streaming bidez jarraitu ahal izango dira. Larunbatean, 15:00etatik aurrera eta igandean, goizeko 11:00etatik aurrera, www.gitb.eus webgunean. Zuzeneko emanaldien ondoren, webgunera igoko dira eta guraso guztiei bidaliko zaie programaren zuzeneko lotura.

Astero bi saio estreinatuko dira telebistan, astearte eta ostegunetan, 21:00etan. Asteburuetan errepikatuko dira.