Ekitaldiak

Zinemateka Azkuna Zentroa: "Akira"

Bilbao 2023(e)ko urriaren 17(e)tik 2023(e)ko urriaren 19(e)ra
  • Zinemateka Azkuna Zentroa: "Akira"

Azkuna Zentroko Zinematekak Japoniako zinema garaikidearen monografiko batekin amaituko du urtea. Fundación Japón Madridekin elkarlanean hautatutako bederatzi filmek elkarrizketa bat proposatzen dute manga-sorkuntzaren eta animazio-zinemaren artean.

Herrialde honetako ikus-entzunezkoen aberastasuna ezagutzeko zikloa, hala Japonian, nola haren mugetatik kanpo, ikusleen eta kritikarien arreta erakarri duten zinemagileen lanaren bidez.

Besteak beste, Katsuhiro Otomo, zuzendari, gidoilari eta mangaka; Ayumu Watanabe, Doraemonen film gehienak zuzentzeagatik ezaguna; eta Kenji Iwasawa, Annie sarietarako izendatua bere lehen film luzearekin. Era berean, nabarmentzekoak dira zinemagile berrien lanak: Mari Okada, gaur egungo artistarik emankorrenetako bat; Haruka Fujita, film luzeen eta telesailen zuzendaria; Naoko Yamada, anime zinemaren zuzendaririk onenetariko bat; eta Atsuko Ishizuka, duela 20 urtetik Madhouse animazio-estudioari lotua.

Zinematekaren programazioa Mediateka BBKra zabalduko da. Bertan, Japoniako zinema garaikidearen inguruko liburuak eta filmak maileguan kontsultatu eta eskatu ahal izango dira. Gainera, Komikiari Buruzko Ezinbesteko Elkarrizketak eta Zinema Elkarrizketak . Argiak, kamera, akzioa! programak animearen klasiko batean sakontzen dute: “Akira”, Katsuhiro Ôtomo zinemagileak zuzendua 1988an, zikloa hasteko erabili zen filma.

Programa Katsuhiro Otomoren “Akira” (1988) klasiko garaikidearekin hasiko da: Japoniako animazio-zinemaren arrakasta handienetako bat, zuzendariaren beraren manga ezagun batean oinarritua, Mendebaldean animea ezagutzera eman zuena. Horren ondoren, anime postmodernoaren adibidea den “Maindo Gemu” (2004) izango dugu. Bertan, Masaaki Yuasak egungo animazio-tekniken bilduma bat uztartzen du: stop motionetik infografia poligonaleraino, muturreko karikaturizazioa, olio-pintura, arkatzez egindako marrazkia eta manipulatutako irudi erreala barne hartuta.

Tradizioa eta artisautza-teknikak dira ziklo honetako protagonistak, besteak beste, Naoko Yamadaren “Koe no Katachi” (2016) lanarekin —non pertsonaien gorputz-hizkuntza eta Hanakotoba, loreen japoniar hizkuntza eta duen sinbolismo nabaria gailentzen diren—, eta Sunao Katabuchiren “Kono sekai no katasumi ni” (2016) lanarekin —Bigarren Mundu Gerran girotua, eskuz eginak diruditen marrazkiak dituen benetako artisautza-lana—.

Ayumu Watanaberen “Kaiju no kodomo” (2019) lan murgiltzaile eta sentsoriala eszenaratze bisual bat da, errealismo ia magiko baten bidez, ozeanoaren hondoan kutsu fantastikoko istorio bat sortzen duena. Narrazio esperimental honek Andrei Tarkovski edo Stanley Kubrick bezalako zinemako zuzendari handiak ekartzen dizkigu gogora. Zeruak eta itsasoak osatzen dituzte Haruka Fujitaren “Blue Thermal” (2022) filmeko paisaia onirikoak eta agertoki murgiltzaileak, eta argiaren tratamendua nabarmentzen da bertan.

“On-Gaku” (2020), crowdfunding-ari esker Kenji Iwaisawak film luzeen errealizadore gisa egindako debuta, anime ekoizpen garaikideen ohiko estetikatik urruntzen da, arkatzekin eta akuarelekin egindako marrazkiaren bidez.

Mari Okadak, Japoniako animearen gidoilaririk emankorrenetako batek, debuta egin zuen zuzendari gisa “Maquia” (2018) filmarekin. Fantasiazko istorio horren azpian, amatasuna, heriotza, bakardadea eta maite kutunak galtzeko beldurra agertzen dira. Atsuko Ishizukaren “Nogemu Noraifu Zero” (2017) lanak amaiera emango dio programari, mundu postapokaliptiko baten istorioarekin.

PROGRAMA
  • Akira (1988)
    Zuzendaritza: Katsuhiro Otomo
    Data: Urriak 17, asteartea eta 19, osteguna
    Iraupena: 124’
    Adinaren araberako kalifikazioa: Ez da gomendatzen 13 urtetik beherakoentzat
    Animazioa

2019 urtea. Neo-Tokio Hirugarren Mundu Gerraren ondoren suntsitutako hiriburu japoniarraren hondakinen gainean eraikitako hiria da. Japonia kolapsotik gertu dagoen herrialdea da, etengabeko krisi politikoetan murgilduta. Isilpean, zientzialarien talde batek esperimentu bati ekin dio berriz, “energia absolutua” izeneko indarra kontrola dezaketen pertsonak aurkitzeko.

 

  • Kono sekai no katasumi ni (2016)
    Zuzendaritza: Sunao Katabuchi
    Data: Urriak 24, asteartea eta 26, osteguna
    Iraupena: 128’
    Adinaren araberako kalifikazioa: Ez da gomendatzen 7 urtetik beherakoentzat
    Animazioa

Suzu marraztea maite duen 18 urteko neska bat da. Egunero, nola edo hala moldatu behar du janaria prestatzeko, etxe berri batean eta dena eskas dagoen une historiko batean: Pazifikoko Gerra betean. Gerrak aurrera jarraitzen du, eta Kure gogor bonbardatzen dute etengabe, Armada Inperialaren gune neuralgikoa delako. Baina bizitza aurrera doa, errukigabe, eta Suzuk bere eginbeharra betetzen jarraitu behar du etxean. Azkenik, 1945eko zorigaiztoko uda iristen da.

 

  • Kaiju no kodomo (2019)
    Zuzendaritza: Ayumu Watanabe
    Data: Urriak 24, asteartea eta 26, osteguna
    Iraupena: 110’
    Adinaren araberako kalifikazioa: Ez da gomendatzen 16 urtetik beherakoentzat
    Animazioa

Rukaren gurasoak banandu egin dira, eta neska gazteak denbora asko ematen du aitak lan egiten duen akuarioan, bertan bizi diren itsas espezie ugariekin liluratuta. Egun batean, Rukak bi mutil ezagutuko ditu, Umi eta Sora, berak bezala ozeanoarekin lotura berezia dutenak.

 

  • Maindo Gemu (2004)
    Zuzendaritza: Masaaki Yuasa
    Data: Azaroak 7, asteartea eta 9, osteguna
    Iraupena: 103’
    Adinaren araberako kalifikazioa: Ez da gomendatzen 16 urtetik beherakoentzat
    Animazioa

Filmak Nishiren istorioa kontatzen du: bere ametsetako emakumea, Myon, tren batean ezagutzen du. Myonek eta bere ahizpak jatetxera gonbidatzen dute Nishi, eta han hilko da, Myonen zorrak kobratzera iritsitako hiltzaile batzuen esku. Hil ondoren, Nishi zerura joaten da, jainkoen botereari aurre egiten dio, eta Lurrera itzultzea erabakitzen du. Itzuli eta gero, balea batek irentsiko du, eta barruan Nishik gizon bat ezagutuko du, han 30 urte baino gehiago daramatzana.

 

  • Maquia (2018)
    Zuzendaritza: Mari Okada
    Data: Azaroak 7, asteartea eta 9, osteguna
    Iraupena: 115’
    Adinaren araberako kalifikazioa: Ez da gomendatzen 12 urtetik beherakoentzat
    Animazioa

Lorph-tarren bizitza baketsua hautsi egiten da Mezarte armadak inbaditzen dituenean. Odolaren bila dabiltza, horrek aukera ematen baitie mende eta mendeetan gazte izaten jarraitzeko. Etsipenaren eta kaosaren erdian, Maquia gazteak Ariel aurkitzen du, gurasoak galdu ondoren bakarrik geratu den haurra. Ariel koskortuz doa, eta Maquiak, berriz. gaztetasunari eusten dio aroa aldatu ahala.

 

  • On-Gaku (2020)
    Zuzendaritza: Iwaisawa Kenji
    Data: Azaroak 21, asteartea eta 23, osteguna
    Iraupena: 71’
    Adinaren araberako kalifikazioa: Ez da gomendatzen 12 urtetik beherakoentzat
    Animazioa

Baldarren talde batek hirukote musikal bat osatzea erabaki du, haietako inork inoiz musika-tresnarik jo ez badu ere.

 

  • Koe no Katachi (2016)
    Zuzendaritza: Naoko Yamada
    Data: Azaroak 21, asteartea eta 23, osteguna
    Iraupena: 130’
    Adinaren araberako kalifikazioa: Ez da gomendatzen 13 urtetik beherakoentzat
    Animazioa

Istorioak Shôko Nishimiyaren gorabeherak erakusten dizkigu. Lehen hezkuntzako ikasle bat da, entzuteko desgaitasuna du, eta eskola-jazarpena jasan eta beste eskola batera joan da. Ishida Shôya da jazartzen duenetako bat; biktima eskola uztera ere behartzen du. Urte batzuk geroago, gizartean gaitzetsita eta damuz beterik, Ishidak erredentzioa lortu nahi du.

 

  • Blue Thermal (2022)
    Zuzendaritza: Haruka Fujita
    Data: Azaroak 28, asteartea eta 30, osteguna
    Iraupena: 103’
    Adinaren araberako kalifikazioa: Adin guztiak.
    Animazioa

Tamaki Tsuru bigarren hezkuntzako ikasleak beti parte hartu du kirol-taldeetan. Orain, unibertsitatean hastean, gertaera batzuk direla-eta, bere unibertsitateko planeatzaileen klubarekin bat egingo du.

 

  • Nogemu Noraifu Zero (2017)
    Dirección: Atsuko Ishizuka
    Data: Azaroak 28, asteartea eta 30, osteguna
    Iraupena: 110’
    Adinaren araberako kalifikazioa: Ez da gomendatzen 12 urtetik beherakoentzat
    Animazioa

Prekuela hau Sora eta Shiroren istorioa baino 6.000 urte lehenago kokatuta dago, Disboard munduan. Gerra-aro horretan, arraza guztiak borrokan ari dira elkarren artean; modu irrazionalean hiltzen dituzte hiltzeko ahalmenik ez duten gizakiak. Riku egunez egun bizirauten saiatzen den giza koloniako liderra da. Rikuk, azkenean, Shuvi ezagutzen du: exMachina bat (androide arrazakoa), bere jendeak arbuiatua giza bihotza ulertzeko duen obsesio kalkulatugabeagatik. Elkarrekin, abentura bati ekingo diote giza arraza salbatzeko.

 
azkunazentroa.eus

Laburrean

Non