Mende gutxi batzuetan zehar, Europako, Afrikako iparraldeko eta Ekialde Hurbileko zati handi batean hedatu arte bere domeinuak zabaltzen joan den hiri baten ibilbide bikainean, burdinak leku garrantzitsua hartzen du. Burdina, bere armada boteretsuko armetarako, eraikinak egiteko tresnetarako eta materialerako, nekazaritza, lurreko garraiobideak eta bide sarea hobetzeko, nabigaziorako eta eguneroko jardueretarako, hala nola janaria prestatzeko, josteko edo ehizatzeko.

Hedapen prozesuaren hasieran, Elba uharteko meategi bikainak hartu zituzten -botere etruskoaren oinarri ekonomikoetako bat-; ondoren, Galiakoak, Iberiar penintsulakoak, Britaniakoak eta konkistatutako gainerako lurraldeetakoak. Meatze baliabide garrantzitsuak aurkitu zituztenean, ustiapenak berrantolatu zituzten errendimendua hobetzeko, minerala eraldatzeko eta burdina ekoizteko zentroekin egin zuten bezala. Horietako askok jarduera areagotu zuten, tona eta tona mineral prozesatzeko gai ziren industria gune izatera iritsi arte. Lingoteen eskala handiko garraioa ere arautu zuten; eta Erromaren eragina hain handia izan zen, baita mugaz kanpo ere, ezen erabakigarria izan baitzen, adibidez, germaniar tribuen ekoizpen erritmoetan.

Garai horretako burdinari buruzko ikerketak duela gutxikoak dira, eta, gainera, emaitzarik nabarmenenak arkeologiaren arlokoak dira. Hala ere, ikerketa horietatik eratorritako ekarpenek irakurketa osagarria eskaintzen dute, ezagutza historikoaren alderdi estrategikoak berritzeko eta zehazteko aukera ematen duena. Uda Ikastaroaren helburua da merkataritzan, ekoizpen metodoetan, paisaian edo egitura ekonomikoetan eragin handiena duten ekarpenak aurkeztea.