UPV/EHUko Uda Ikastaroen baitan, Guggenheim Bilbao Museoak, Euskal Herriko Unibertsitatearekin lankidetzan, bi eguneko nazioarteko sinposioa antolatu du, Lur-sistemarako eredu artistikoak / Art Models for the Earth System izenburupean. Foroa ekainaren 14an eta 15ean egingo da Museoko Entzungelan, eta artearen eta ikerketa zientifikoaren arteko sinergietan oinarrituko da, hainbat esparrutako adituen arteko harreman berriak ezarriko ditu gure planetaren dinamika hobeto ulertzeko, eta krisi klimatikoarentzat konponbide berritzaileak bilatuko ditu.

Kontuan izanik egungo egoera zeharo konplexua dela eta diziplina bakar batetik lantzea ezinezkoa dela, Guggenheim Bilbao Museoak sortzaileak —artistak, arkitektoak, diseinatzaileak eta komisarioak— ez ezik, Lur-sistemarekin zerikusia duten arloetako ikertzaile nabarmenak ere bilduko ditu, egun garatzen ari diren lana aurkezteko eta gure planetan eragin positiboa izan dezaketen lankidetza-moduei buruzko ideiak proposatzeko. Praktika artistiko garaikideen zeharkakotasunean oinarrituta —eta, bereziki, artearen, zientziaren, ekologiaren eta teknologiaren elkarguneetan dauden haietan oinarrituta—, ikastaroak gai konplexu bat aztertzea eta hartan sakontzea proposatzen du, baita esparru ugaritako espezialisten artean harreman berriak ezartzea ere.

Hala, nazioarteko eragile nabarmenek hainbat hitzaldi eskainiko dituzte, eta, haiekin batera, gaikako mahai-inguruak egingo dira interakzioak sustatzeko. Funtsezko arloen edo azpisistema planetarioen inguruan egituratuta —tartean Biosfera, Geosfera, Hidrosfera eta Atmosfera, baita Noosferari buruzko epilogo bat ere—, sinposioko moduluek helburu bikoitza izango dute: alde batetik, ekologiaren arloko lankidetza artistiko-zientifikoaren ardatzak indartzea eta, bestetik, ingurumenarekiko ditugun inpaktuak eta interakzioak aurreikusteko, aztertzeko eta horiei konponbidea bilatzeko aukera-esparru berriak sortzea. Inspirazioz beteriko elkarrizketen bidez, Lur-sistemarako eredu artistikoak ikastaroak konexio eta elkartze berriak bultzatzea bilatzen du eta, era horretan, metodologiak eraldatzea.