Ekainean, haur eta familientzako aire zabaleko kultura-programazioa izango da erabateko protagonista Getxon. Kultur Etxeak abian jarriko duten ekimen honek kultura haurrei hurbiltzeko asmoa du eta 2023ko Aurrekontu Parte-hartzaileetan kulturaren alorrean herritarren aldetik jasotako eskaerak egia bihurtzeko gauzatu da. TxikiFesteko programazioak hainbat diziplinatako arte eszenikoen ikuskizunak (clown, antzerkia, musika, zirkua, dantza) eta parte hartzeko ekintzak bilduko ditu, hala nola arte plastikoetako tailerrak, bertsolaritza eta ahozkotasun dinamikak, ginkanak, jolasguneak eta irakurzaletasuna sustatzeko guneak, besteak beste.

Ekainaren 2tik 4ra bitartean, egitaraua Areeta eta Romo auzoetan garatuko da, kokapen irisgarrietan, hala nola Geltokia plaza eraberrituan, Santa Eugenia plazan eta Eskoletako plazan. Hurrengo asteburuan, ekainaren 9tik 11ra, Algorta auzoaren txanda izango da. Bertan, Algortako Geltokia plaza, San Nikolas plaza eta Biotz Alai plaza izango dira agertoki nagusiak. Euria edo eguraldi txarra egiten badu, programazioaren zenbait ekintza estalpeko espazio alternatiboetan garatuko da.

Programazioa

Programazioan Getxoko, Bizkaiko, Euskadiko eta Estatuko erakunde eta konpainien lanak daude. Lehenengo egunean, ekainaren 2an, Bartzelonako La Baldufa Teatre konpainiaren “Zeppelin” ikuskizun ibiltariarekin hasiko da jaialdia, Bizkaia Zubitik Santa Eugenia plazaraino. Ondoren, publikoak “Numenak” (Yarleku Teatro) antzezlanaz gozatu ahal izango du Areetako Geltokia plazako aire zabaleko entzunareto berrian.

Bigarren eguneko goizean, hilak 3, larunbatean, Areeta zirku azoka tradizionala bihurtuko da Bambolea taldearen eskutik, kaseta eta zirku-joko tradizionalekin, eta publikoak familiei zuzenduriko Dantza Plaza ekitaldiaren saio berezia izango du, bertoko dantza taldeek bultzatuta, Eskoletako plazan. Arratsaldean, eskaintza Romo auzora pasatuko da, “Iratxoen Kantu Sekretuak” (Gookapi) musika-ikuskizunarekin, eta egunari amaiera emango zaio “Glubs” (Nacho Vilar Producciones) kalejira ibiltariarekin. Bertan, lau marinel zoro noraezean agertuko dira Santa Eugenia plazan, eta publikoak ontziratzeko portu bat aurkitzen lagundu beharko die.

Hurrengo egunean, hilak 4, igandean, animalia itxurako tamaina handiko txotxongilo artikulatu batzuek hiri-eremuan ezarriko dute beren kanpamendua. “Animalia” ikuskizunak (Sandal Productions) animalien portaera aztertzen duten naturzaleen kanpamentuak birsortzen ditu. Antzezpenaren ondoren, haurrek zurezko jolasak balira bezala jokatu ahal izango dute txotxongilo horiekin, tipi estiloko denda betetako espazio natural batean. Eguerdian, Dantzaz talde euskaldunak bere “Menu” ikuskizun ibiltaria ekarriko du eta Izaskun Rueda getxotarrak antzerkia eta zirkua uztartzen dituen “Bidaibizitzen” obra. Arratsaldean, Tor eta Txoborro magoek “TNT” magia ikuskizuna eskainiko dute eta jardunaldiari amaiera emateko, “Candido” (La Nördika) zirku ipuina izango da.

TxikiFestek hurrengo asteburuan jarraituko du programazioa, ekainaren 9tik 11ra, Algorta auzoan. “Gora Bihotzak” (Eidabe) taldeak hasiera emango dio Biotz Alai plazan eta, iluntzean, publikoak "Herentzia" (La Industrial Teatrera) clown erako ikuskizunaz gozatuko du, non zaborrontzi baten barruan dauden bi pertsonaiek datozen belaunaldiei utziko diegun munduari buruz hausnartzen lagunduko duten.

Ekainaren 10ean, mekanika klasikoaren sekretuak goizeko protagonista izango dira, “Ingenii Machina” (Alauda Teatro) instalazio parte-hartzaileari esker. Instalazio horrek gorputzen mugimendua eta oreka eragiten duten indarrak eta makinak asmatu, eraiki eta maneiatzeko teknikak aztertzen ditu. Halaber, haurrek “Baserriko Porrusalda” (Bapatean Zirko) eta “Piraten istorio bat” (Erre Produkzioak) antzezlanez gozatuko dute. Iluntzean, Andaluziako Vaivén Circo konpainiak bere zirkuko koreografia ikuskizun berria aurkeztuko du, barrea, presa, enpatia, mina, beldurra eta itxaropenaz hitz egiteko. Larunbateko egunari amaiera emango zaio Algortako kaleak argiz eta musikaz beteko dituzten txotxongilo erraldoien kalejira ibiltari batekin.

Jaialdiaren azken egunean, hilaren 11n, igandean, jendeak garbigailu erraldoi kolektibo bat prestatzeko aukera izango du, “Garbi Jai” (Eidabe) antzezlanaren eskutik; Agurra Dantza Taldeko erraldoi eta buruhandiek Algortako kaleak zeharkatuko dituzte, San Nikolas plazatik Telletxeko Geltoki plazaraino, eta Lilura Abesbatza Getxoko haur abesbatzak bere errepertorio musikala aurkeztuko du. Arratsaldean, “Menina” (7bubbles) familia osoarentzako poesia ibiltariarekin eta OrainBi konpainiaren pertxa akrobatikoarekin amaituko da jaialdia.

Jarduera parte-hartzaileak: jolasguneak, tailerrak, irakurketa familiarra eta gynkhana

Gainera, egunero, 17:00etatik 19:00etara, jarduera parte-hartzaileen txanda izango da. 0 eta 3 urte bitarteko haurtxoak ludoteka bat izango dute, bereziki adin goiztiarrari zuzendua, ekainaren 2tik 4ra, eta belaunaldien arteko jolasgunea ekainaren 9tik 11ra. Era berean, 3 urtetik gorakoentzat irakurketa gune familiar bat egongo da, eta parte hartzeko gune honetan mota askotariko tailerrak ere egongo dira: ostiraletan (ekainak 2 eta 9); arte plastikoei buruzko horma-tailerra, larunbatetan (ekainak 3 eta 10); bertsolaritza eta ahozkotasunari buruzko tailerra, eta, igandean, ekainak 11; gorputz adierazpenari buruzko tailerra, Getxoko Organik konpainiaren eskutik.

Ekainaren 10ean eta 11n, goizeko ordutegian, haurrentzako "Botasen bila, Athleticeko futbolaria" izeneko ginkanaren hiru emanaldi izango dira Utopian herriko antzerki eskolaren eskutik. Familiek Algortako kaleetan bilatu beharko dute Botas, Ramiro Pinilla getxotar eleberrigileak idatzi zuen “Aquella edad inolvidable” eleberriko pertsonaia nagusia. Jardueran parte hartzeko aldez aurretik doako izen-ematea egin beharko da.

Eskolako paseak goizean

Haurrei eta familiei zuzendutako jaialdia ez da Getxoko ikastetxeez ahaztuko eta hori dela eta, ostiral goizetan ikasleen txanda izango da. Ostiralean, hilak 2, “Numenak” (Yarleku Teatro) antzezlanaz gozatuko dute, eta hilaren 9an, “Gora Bihotzak” (Eidabe) musikalaz.

2009tik aurrera jaiotako biztanleentzako doako gonbidapenak

Bestalde, herritarrek kultura adin goiztiarretara hurbiltzeko joan den urtean burutu zuten eskaerari erantzunez, 2009tik aurrera (14 urte arte) jaiotako haur eta nerabe getxoztarrek kultur jarduera batez gozatu ahal izango dute doan Muxikebarri eta RKE Romo Kultur Etxean urtebeteko epean edo gonbidapen kopurua agortu arte. Gonbidapena haurrei edo familiei zuzendutako jarduerekin trukatu ahal izango da, hala nola Zinematxiki zinema zikloekin, Andres Isasi Musika Eskolako emanaldiekin, Muxikebarri eta RKEko ikuskizunekin eta Gabonetako programazioarekin, besteak beste. Gonbidapenak jasotzeko epea Kultur Etxeak jakinaraziko du laster ohiko kanalen bitartez.

Gonbidapenak jasotzeko, Muxikebarri edo RKEko leihatiletara joan beharko dira ohiko ordutegian z, eta NANa, familia-liburua edo adingabearen ordezkaritza edo tutoretza egiaztatzen duen edota baliokide den beste edozein dokumentu aurkeztu beharko dute.

PROGRAMAZIOA

EKAINAK 2 Ostirala
Lekua	Ordutegia	Ikuskizuna	Diziplina	Adina
Areetako Geltokia plaza	17:00-19:00	0-3 urteko Ludoteka	Jolasgunea	0-3
Areetako Geltokia plaza	17:00-19:00	Mural tailerra(Garrobi)	Tailerra	4-12
Bizkaia Zubitik Santa Eugenia plazara	18:30	Zeppelin (La Baldufa Teatre)	Kalejira	Adin guztiak
Areetako Geltokia plaza	20:00	Numenak (Yarleku Teatro)	Antzerkia	Adin guztiak

 

EKAINAK 3 Larunbata
Lekua	Ordutegia	Ikuskizuna	Diziplina	Adina
Areetako Geltokia plaza	11:30-14:30	Circus Feria (Bambolea)	Zirkua	Adin guztiak
Areetako Geltokia plaza	17:00-19:00	0-3 urteko Ludoteka	Jolasgunea	0-3
Areetako Geltokia plaza	17:00-18:00	Bertsolaritza tailerra (Albe)	Tailerra	6-12
Santa Eugenia plaza	19:00	Iratxoen Kantu Sekretuak (Gookapi)	Musika	Adin guztiak
Areetako Geltokia plazatik Zugazarte etorbidera	21:00	Glubs (Nacho Vilar)	Kalejira	Adin guztiak

 

EKAINAK 4 Igandea
Lekua	Ordutegia	Ikuskizuna	Diziplina	Adina
Areetako Geltokia plaza	11:30	Animalia (Sándal Produccions)	Titereak	Adin guztiak
Areetako Geltokia plazatik Santa Eugenia plazara	12:30	Menu (Dantzaz)	Dantza	Adin guztiak
Santa Eugenia plaza	13:15	Bidaibizitzen (Zirkun Zirko)	Zirkua	Adin guztiak
Areetako Geltokia plaza	17:00-19:00	0-3 urteko Ludoteka	Jolasgunea	0-3
Areetako Geltokia plaza	17:00	Bidaia Liluragarria (Perli eta Koxkolo)	Ipuinkontalaria	4-12
Eskoletako plaza	18:00	TNT (Thor eta Txoborro magoak)	Magia	Adin guztiak
Santa Eugenia plaza	20:00	Cándido (La NÖrdika)	Zirkua	Adin guztiak

 

EKAINAK 9 Ostirala
Lekua	Ordutegia	Ikuskizuna	Diziplina	Adina
Biotz Alai plaza	17:00-19:00	Larun (Jokai)	Jolasgunea	Adin guztiak
Biotz Alai plaza	17:00-18:00	Mural tailerra (Garrobi)	Tailerra	4-12
Biotz Alai plaza	19:00	Gora Bihotzak (Eidabe)	Antzerkia	Adin guztiak
Algortako Geltokia plaza	20:30	Herencia (La Industrial Teatrera)	Clown	6+

 

EKAINAK 10 Larunbata
Lekua	Ordutegia	Ikuskizuna	Diziplina	Adina
San Nikolas plaza	10:45 | 12:00 | 13:15	GYMKHANA "BOTAS" (Utopian)	Gymkhana	Adin guztiak
Algortako Geltokia plaza	11:30-14:30	Ingenii Machina (Alauda Teatro)	Instalazio partehartzailea	Adin guztiak
San Nikolas plaza	12:00	Baserriko Porrusalda (Bapatean Zirko)	Antzerkia	Adin guztiak
Biotz Alai plaza	17:00-19:00	Larun (Jokai)	Jolasgunea	Adin guztiak
Biotz Alai plaza	17:00-18:00	Bertsolaritza tailerra (Albe)	Tailerra	6-12
Algortako Geltokia plaza	19:00	Piraten istorio bat (Erre Produkzioak)	Antzerkia	Adin guztiak
San Nikolas plaza	20:00	Anónima (Vaivén Circo)	Zirkua	+6
Algortako Geltokia plaza Teilagorrira	21:30	Giant Lumen (Eventus Culture)	Kalejira	Adin guztiak

 

EKAINAK 11 Igandea
Lekua	Ordutegia	Ikuskizuna	Diziplina	Adina
San Nikolas plaza	10:45 | 12:00 | 13:15	GYMKHANA "BOTAS" (Utopian)	Gymkhana	Adin guztiak
San Nikolas plaza	11:30	Garbi Jai (Eidabe)	Antzerkia	Adin guztiak
San Nikolas plazatik Algortako Geltokia plazara	12:30	Buruhandi eta erraldoiak (Agurra)	Kalejira	Adin guztiak
Algortako Geltokia plaza	13:30	Kontzertua (Lilura Abesbatza)	Musika	Adin guztiak
Biotz Alai plaza	17:00-19:00	0-3 urteko ludoteka	Jolasgunea	0-3
San Nikolas plaza	17:00-18:00	Gorputz Adierazpen tailerra (Organik)	Tailerra	8-12
Algortako Geltokia plaza	19:00	Menina (7Burbujas)	Antzerkia	Adin guztiak
San Nikolas plaza	20:00	Mute (Orain Bi)	Zirkua	Adin guztiak