Getxophoto 2023 jaialdiaren barruan.

Zentzurik lauenean, lapsus bat deskuidu bat da, normalean hitz egiteko unean egiten den akats bati erreferentzia egiten diona. Sigmund Freudek garatutako zentzu psikoanalitikoan, lapsusa inkontzienteak eragindako nahaste bat da, pentsamendu, beldur edo desira erreprimitu bat azaleratzen duena. Latinezko etimologiaren ikuspegitik, lapsusak une batetik bestera igarotzeari ere egiten dio erreferentzia, igarotzen den denborari.

Esanahi horiek guztiak ageri dira Susana Blascok Getxophoto 2023rako bereziki egindako proiektu berri honetan. Bertan, collagearen teknika eta geometria erabiltzen ditu, ohikoak bere lanean, Fototeka Kutxa Fundazioaren artxiboko argazki-sorta batean esku hartzeko. Irudi bakoitzak, bi zatitan banatuta, lasaitasunaren eta zarata mentalaren, etenaldiaren eta asalduraren arteko tentsioa adierazten du. Baina bi egoeren arteko igarotzeari ere egiten dio erreferentzia, oreka emango digun benetako atsedenaldia hartzeko beharrari.

1972an Zaragozan jaioa, gaur egun Bilbon bizi da Susana Blanco. Diseinatzaile grafikoa, ilustratzailea eta collage-egilea da, eta lotura berezia du geometriarekin, zatiketarekin eta errepikapenarekin. Publizitate eta Enpresa ikasketak egin zituen, eta prestakuntza hori arte eta diseinuko ikastaroekin osatu zuen. Ikastaro horien artean, Londresko Central Saint Martins College of Art and Design-en egindako prestakuntza nabarmentzen da. Hainbat estudio eta publizitate-agentziatan 10 urte baino gehiagoz diseinatzaile grafiko eta arte-zuzendari gisa lan egin ondoren, bere estudio grafikoa sortu zuen. Hainbat sari jaso ditu, besteak beste, Zaragozako Diputazioaren beka eta Gràffica saria collage teknikari egindako ekarpenengatik. Bere lana, grafikoa zein artistikoa, komunikabide espezializatuetan aipatua izan da eta bakarkako eta taldeko erakusketa ugaritan parte hartu du Los Angelesen, Miamin, Lisboan eta Espainiako hainbat hiritan.