Retrato underground (Libros del K.O.) liburuaren argitalpena dela eta, Ernest Lluch Kultur Etxeak AEBetako kronika sozial eta kulturalaren ahots ausartenetako bat jasoko du. Lucy Sante Begoña del Teso kazetariarekin solasean arituko da garaikidetasuna, abangoardia eta kontrakulturari buruz egiten duen analisiaz.

Lucy Santek, besteak beste, gure kultur historiaren kontakizunean mugarri garrantzitsuak diren Mata a tus ídolos edo Bajos fondos lanak idatzi ditu. Retrato undergroundekin itzuli da eta bertan topa dezakegu idazleak berak 1993tik 2020ra gai anitzei buruz argitaratutako artikuluen bilduma: New York hirurogeita hamarreko eta laurogeiko hamarkadetan, Patti Smith, Poliziak eta FBIk bilatuenen zerrendak, kolore itsas- urdina, cowboy-en irudi mitikoa, David Wojnarowicz, fotonobelak, Vivian Maier, collageak, gaztaroaren eta etorbideen erritmo iheskorra...

Artikuluen formatua askea da: saiakera luzeak, iruzkin laburrak, ohar autobiografikoak, fikziozko piezaren bat. Baina guztiak ahalegin komun batek lotzen ditu: garaikidetasunak gure eguneroko esperientzian eta hain nabarmenak ez diren adierazpen kulturaletan uzten dituen sedimentuak biltzea.

Topaketa ingelesez eta gaztelaniaz egingo da eta itzulpen zerbitzua eskainiko da. Hitzordua maiatzaren 3ko 19:00etan da Ernest Lluch Kultur Etxeko Ekitaldi Aretoan.

Lucy Sante

Lucy Sante Belgikan jaio zen 1954an, baina Estatu Batuetara emigratu zuen bost urte zituela. Retrato underground da gaztelaniara itzulitako bere laugarren liburua, honako hauen ondoren: Mata a tus ídolos ( 2011 ), Bajos fondos 2016) eta El populacho de París (2018), guztiak K.O.- aren. Liburuak-ek argitaratuak. Bestelako argitalpen askotan ere kolaboratu du, hala nola, The New York Review of Books, The Paris Review, The New York Times, Harper’s, Granta... 2021ean genero trantzisioa egin zuen. Gaur egun New York estatuan bizi da eta idazketa eta argazkigintzaren historiako irakaslea da Bard Collegen. Eduardo Lago idazleak "gaur egungo kultura estatubatuarraren iruzkingile zorrotzenetako bat" zela esan zuen.

Begoña del Teso

Geminis eta txinatar horoskopoan txerria, Begoña del Tesok (Donostia, 1959), 30 urte baino gehiago daramatza idazten, zinema ikusten, jendearekin hitz egiten, filmak aurkezten, solasaldiak moderatzen eta betelako bihurrikerietan. Donostiako Gros auzoko zine-klubean hasi zen eta komunikatzaile menderakaitz honek egindako lanen artean daude Deia, Beldurrezko Astea, Diario Vasco eta Berria, besteak beste. 2021ean, Euskal Kazetarien Elkarteak eta Kazetarien Euskal Elkargoak Euskal Kazetariak saria eman zioten.