OHARRA: eguraldi onarekin, San Martin parkean izango da; eguraldi txarra eginez gero, Altuna Anaiak frontoian.

Estitxu abeslari eta konposatzaile nafarra (Bera, 1987) 15 urterekin hasi zen musika-munduan, Egan erromeria-talde ezagunaren teklatu-jotzaile eta koru-egile. Handik aurrera, eta abeslari gisa, zenbait proiektutan ibili da, musika-estilo desberdinekin, euskal musikaren kanta tradizionaletik hasi eta jazz edo erritmo latinoagoetara. Gainera, Estitxuk euskal abeslari ospetsuen aldeko omenaldi-kontzertu berezietan hartu du parte, egun musika-munduan ospetsuak diren beste artista batzuekin batera, hala nola Alex Sardui, Eñaut Elorrieta, Mikel Urdangarin, Petti eta Miren Narbaizarekin.

2019ko azaroan argitaratu zuen bere lehen diskoa. Haize gorri batek izenburupean, berak sortutako kantez osatuta dago. Euskaraz idatzitako testuak ukitu beltzeko musikarekin jantzi ditu, eta agerian utzi ditu bere ahots ahaltsuaren kalitatea eta distira, musikari bikainez lagunduta.