Guztira lau kontzertu eskainiko ditu Dazz klubak antolatutako Dazz Jazz jaialdiak Gasteizen, uztailaren 5etik 8ra bitartean, Gasteizko Udalaren, Jesus Guridi musika-kontserbatorioaren eta Vital Fundazioaren laguntzarekin.

Hezkuntza eta Kultura zinegotzi Estíbaliz Canto, Jesus Guridi musika-kontserbatorioko zuzendariorde Ibon Zamacola, Vital Fundazioko zuzendari Arantxa Ibáñez de Opacua eta jaialdiaren antolatzaile Beñat Lasagabaster izan dira ekimenaren seigarren edizioaren aurkezpenean.

Antolatzaileek egin duten ahalegina azpimarratu du Estíbaliz Cantok. “Pandemia dela eta, ahalegin berezia egin beharra daukagu kultur jarduerak eskaintzeko, parte-hartzaileen segurtasuna bermatzeko behar diren neurri guztiak hartuz, eta kostu handia dauka horrek, baina merezi du. Artistak publikoarekin berriro biltzea da saririk onena.”

Uztailaren 5ean, astelehenez, hasiko da egitaraua, Jorge Pardo Tríoren kontzertuarekin, eta hilaren 6an Alfredo Rodríguez Tríoren txanda izango da. Andrea Motis Quartet hilaren 7an arituko da, asteazkenez, eta hilaren 9an, ostiralez, Sacatubón.

Jesus Guridi musika-kontserbatorioan izango dira emanaldiak, 20:00etan. Sarrerak 5 euroan erosi daitezke, www.musikaze.net webgunean, eta abonamenduak, berriz, bai webgune horretan, bai Dazz klubean (Aiztogile kalea, 60; Gasteiz).

Bi master class ere izango dira. Hilaren 8an, ostegunez, Roberto Pachecorena, eta hilaren 9an, ostiralez, Alfredo Rodríguezena, biak ere 11:00etan.

Programazioa