Udaberriko kontzertuen denboraldiaren erdia gaindituta, Bilboko Udal Musika Bandak bosgarren emanaldia eskainiko du bihar, ostirala, ekainak 11. Ohi bezala, Areatzako Kioskoan izango da hitzordua, 19:00etatik aurrera. "Hirutarreko erritmoa: Jotatik balsara” izeneko kontzertua, Iñaki Urkizu Bandaren zuzendariordeak zuzenduko du oraingoan eta erritmo hirutarra oinarri duten partiturak interpretatuko dituzte.

Biharko aukeratutako programa Agustin Lararen “Granada” obrarekin hasiko da eta Tomás Bretónen “Gran Jota de La Dolores”, Cebrián Ruizen “Una noche en Granada”, Léo Delibesen “Coppélia”, Moritz Moszkowskiren “Malagueña de Boabdil” eta Aram Khachaturienan “Vals de Masquerade” obrekin jarraituko du.

Biharko kontzertuaren ostean, Bandak denboraldi honetako kontzertu zikloaren azken txanpari ekingo dio. Datorren ostiralekoa, ekainaren 18koa, azken aurreko hitzordua izango da. "Goazen zirkura!" errezitaldiarekin taldeak Bilboko publikoa programa dibertigarri batekin gozaraziko du . Bertan, zirkuaren munduan eta haurren munduan oinarritutako obrak eskainiko ditu, hala nola, Henry Filmore, Glenn Osser eta Robert Rodgers musikari amerikarrek, Georgi Salnikov errusiarrak, Jef Penders herbeheretarrak, Pérez Prado kubatarrak eta Julius Fuado txekiarrak sinatutakoak.

Orain arte bezala, ikuskizunak artisten, ikusleen eta teknikarien segurtasuna bermatzeko beharrezkoak diren neurri guztiak bete eta jasotzen dituen protokolo berezi bat izango du: kioskoa eta haren ingurua mugatuta egongo dira, maskara nahitaez erabili beharko da, aulkiak ezarritako segurtasun-distantzian kokatuko dira eta ezingo dira tokiz mugitu. Halaber, jendearentzako osasun-jarraibideak jasotzen dituen kartel bat jarriko da, eta aulkiak, instalazioak eta gainerako elementuak jarduera hasi aurretik desinfektatuko dira.

ZUZENDARIA: IÑAKI URKIZU

Bere herriko Udalaren Bandan hasi zen tronpeta jotzen, zortzi urterekin, familiaren tradizioari jarraituta. Handik Tolosako Udal Bandara pasatu zen eta han bakarlari jardun zen hamarkada batez. Donostiako Goi-mailako Kontserbatorioan egin zituen tronpeta-ikasketak Juan Manuel Gómez de Edeta irakaslearekin. Irakasle jardun da Beasain eta Tolosako musika-eskoletan, baita “Arrasate Musical”-en ere.

Instrumentista moduan Euskal Herriko talde askorekin elkarlanean aritu da. Horietako aipagarrienak hauexek: Bilboko Orkestra Sinfonikoa, “Arrasate Musical” Orkestra Sinfonikoa, Juan Crisóstomo de Arriaga Kontserbatorioko Banda Sinfonikoa, Donostiako Talde Barrokoa, Lattor metalezkoen boskotea, Araba Brass Taldea eta Gasteiz Big Band; azken honetan, gainera, zuzendaria izan zen. Bakarlari moduan egindako lana ere aipagarria da, Benantzi Bilbao eta Aitor Olea organistekin, eskainitako organoaren eta tronpetaren kontzertuetan. Banden munduan oso ezaguna da moldaketak eta transkripzioak egiteagatik eta musika-banda askok jaso ohi dituzte bere lanak programetan. Laurogeiko hamarkadatik aurrerako euskal musikaren bilduma bat prestatu du eta horien lehen lau zenbakiak argitaratuta daude: “Jaialdia”, “Dantzaldia”, “Kantaldia” eta “Betikoskorri”. Azken lan hori izenak, adierazten duenez, Oskorrí folk-talde ezagunaren omenez egina. Halaber, moldaketa asko musika-ikuskizunarentzat egin du, besteak beste, Serafín Zubirirentzat “Recordando a Nino Bravo” eta “El Baúl de los 70”.

Ertzaintzako Musika Bandako zuzendaria izan da 1998tik eta banda horretan tronpeta-jole bakarlari-plaza ere izan zuen. Bere batutapean CD bat grabatu da, Bergarako Orfeoiarekin batera, José Franco, Luis Aramburu, José Mª González Bastida eta Juan Arzamendiren lanekin. Bilboko udalaren musika Bandarekin ere zenbait CD grabatu ditu, bata Bilboko Koral Elkartearekin bere 125.urteurrenan “Kantuz Hari den Herria” izeneko musika-lana, bi abesbatza eta Bandarentzat berak idatzita, eta bestea Zarzuelari eskainita, Masa Coral del Ensanche, Miren Urbieta (sopranoa), Vicenç Esteve (tenorra) eta Fernando Latorrerekin (baritonoa).

Zuzendari gonbidatua izan da Euskal Herriko zenbait Bandetan, Barakaldoko udalaren Banda, Durangoko “Tavira” Musika Banda edo Gasteizko Udalaren Banda, besteak beste. SGAEko kidea eta 2017tik Bilboko Udalaren Musika bandaren zuzendariordea da.