Lehenengoa. Euskaltegi pribatu eta euskararen autoikaskuntzarako zentro homologatuei zuzendutako 2026-2027 ikasturteko dirulaguntza-deialdia egitea eta oinarriak onartzea.

Bigarrena. Jakinarazten zaie interesdunei, ebazpen honek ez duela Administrazio-bidea agortzen eta, beraz, interesdunek gora jotzeko errekurtsoa jar dezakete horren aurka, Jaurlaritzako lehenengo lehendakariorde eta Kultura eta Hizkuntza Politikako sailburuaren aurrean, hilabeteko epean, urriaren 1eko 39/2015 legeari eta bertako 121 eta 122 artikuluei jarraikiz.

Donostia, 2026ko uztailaren 29a.

HABEko zuzendari nagusia,

JOKIN AZKUE ARRASTOA.

OINARRIAK

1. oinarria. Helburua eta zuzkidura ekonomikoa.

1. Oinarri hauen helburua da 2026-2027 ikasturtean (2026ko urria eta 2027ko iraila bitartean) euskaltegi pribatuek eta autoikaskuntzarako zentro homologatuek euskara-ikastaroengatik jasoko dituzten dirulaguntzak nola esleituko diren, zein baldintzetan eta nola izapidetuko diren arautzea.

2. Euskal Autonomia Erkidegoaren Aurrekontu Orokorretan xede horretarako HABEren urteko aurrekontuan aurreikusitako funtsen konturakoak izango dira, guztira 37.530.000 euroko zuzkidura ekonomikoarekin.

3. Deialdi honek bi eskaera-aldi izango ditu:

   1. Deialdi honen lehen eskaera-aldirako, 36.745.000 euroko zuzkidura ekonomikoa aurreikusita dago. Diruz lagunduko diren jarduera-unitateen gehieneko kopurua II. eranskinean ezarritakoa izango da, eta muga hori ezin izango da gainditu.

   2. Bigarren eskaera-aldirako, 10.448 jarduera-unitate diruz laguntzeko 785.000 euroko zuzkidura ekonomikoa aurreikusi da. Zenbateko hori 2026-2027 ikasturtean zehar II. eranskinean aurreikusitako jarduera-unitateen % 103tik gorako kopurua gainditu eta talde-ratioa betetzen duten euskaltegiei zuzenduta dago. Bigarren eskaera-aldia lehen eskaeran onuradun izan diren euskaltegiei soilik dago zuzenduta.

4. Bigarren eskaera-aldian aurkeztutako jarduera-unitateen eskaerak oinarri honetako 3.b. atalean zehaztutako unitate-kopurua gainditzen badu, euskaltegi bakoitzari diruz lagunduko zaion jarduera-unitateen kopurua proportzionalki esleituko da, deialdian ezarritako irizpideei jarraikiz. Halaber, oinarri honetako 3.a) atalean soberakinik balego, 3.b) atalean erabil daiteke.

5. Hala ere, bigarren eskaerarako eskatutako dirulaguntzen zenbateko osoa kontuan hartuta, eta bigarren esleipen-ebazpena eman baino lehen, bigarren eskaera-aldirako aurreikusitako zuzkidura ekonomikoaren % 200era arte handitu ahal izango da. Aldaketa hori HABEko zuzendari nagusiaren ebazpen baten bidez onartu beharko da eta Euskal Herriko Agintaritzaren Aldizkarian (EHAA) argitaratu.

2. oinarria. Onuradunak.

1. Onuradun izan daitezkeen erakundeak.

   Ebazpen honen bidez deitutako dirulaguntzen onuradunak izango dira HABEren Erregistroan euskaltegi pribatuak eta euskararen autoikaskuntzarako zentro homologatuak edo horiek eratutako Aldi Baterako Enpresa Elkarteak, betiere oinarri honetako 2. atalean ezarritako baldintzak betetzen badituzte eta ez badaude Dirulaguntzen Araubidea Erregulatzeko Legearen 13. artikuluan aurreikusitako egoeretan.

   Dirulaguntzen Araubidea Erregulatzeko Legearen 13. artikuluan aurreikusitako egoeretan ez egotea erantzukizunpeko aitorpen bidez egiaztatuko da.

2. Eskatzaileek bete beharreko baldintza orokorrak.

   1. HABEren euskaltegien eta euskararen autoikaskuntzarako zentroen Erregistroan inskribatuta egotea, eta datu guztiak egunean edukitzea.

   2. Dirulaguntzen Araubidea Erregulatzeko Legearen 13. artikuluan aurreikusitako egoeretan ez egotea, eta batez ere, zerga guztiak ordainduta edukitzea eta Gizarte Segurantzarekiko ordainketak egunean izatea.

      Deialdi honen organo kudeatzaileak egiaztatuko du dirulaguntza eskatzen duten erakundeek zerga-betebeharrak eta Gizarte Segurantzarekiko betebeharrak egunean dituztela. Honetarako, aintzat hartuko da honakoa: Agindua, 2023ko otsailaren 13koa, Ekonomia eta Ogasuneko sailburuarena, Euskal Autonomia Erkidegoko aurrekontu orokorren kontura ematen diren laguntzen eta dirulaguntzen esparruan bai zerga-betebeharrak eta Gizarte Segurantzarekikoak bai dirulaguntzak itzultzeari buruzkoak betetzen direla egiaztatzeari buruzkoa.

   3. Dirulaguntza-eskaera zuzen osatzea, deialdiaren III. eranskinean jasotako ereduaren arabera eta, eskariarekin batera 3. oinarrian eskatzen diren agiriak zuzen betetzea eta aurkeztea.

   4. Giza eskubideak eta pertsonen arteko bizikidetzaren balioak errespetatzea. Ondorioz, dirulaguntza hauen onuradunek ezin izango dituzte agerian jarri herritarrentzat laidogarriak izan daitezkeen, erabiltzaileen duintasuna urratzen duten edo indarkeria iradokitzen duten ikurrak edo elementuak.

   5. Ezingo dira deialdi honen onuradun izan: laguntza publikoak eskuratzeko aukera kentzen dieten legezko debekuren batean dauden erakundeak, edo zigorrik jasota duten erakundeak, kasuan kasuko epea amaitu arte, eta bereziki: sexu-bereizkeriagatik zigortutako erakundeak, martxoaren 16ko 1/2023 Legegintzako Dekretuak onartutako Emakumeen eta Gizonen Berdintasunerako eta Emakumeen aurkako Indarkeria Matxistarik gabe bizitzeko Legearen testu bateginak ezarritakoari jarraikiz.

3. Eskatzaileek bete beharreko bestelako baldintzak.

   1. Helduen Euskalduntzearen Oinarrizko Curriculuma (HEOC) uneoro aplikatzea, Hezkuntza, Hizkuntza Politika eta Kulturako sailburuaren 2015eko uztailaren 22ko Aginduaren arabera (EHAA, 2015eko uztailaren 31a, 144. zk.).

   2. Euskaltegi eta autoikaskuntzarako zentroetako ikasleek Helduen Euskalduntzearen Oinarrizko Curriculumean ezarritako gaitasun-mailen ziurtagiriak eskura ditzaten, Kultura eta Hizkuntza Politikako sailburuaren 2020ko irailaren 9ko Agindua, euskarazko komunikagaitasun-mailen ebaluazioa eta egiaztatzegintza arautu eta euskara-ikasle helduentzako dirulaguntzen deialdietarako irizpideak finkatzen dituena betetzea.

   3. Uztailaren 22ko 179/2003 Dekretuak ezarritako hurrengo baldintzak betetzea: irakaskuntza lokalak, irakasleak eta material didaktikoa.

      Halaber, diruz lagundutako C2 mailako ikastaroetako irakasleek C2 mailako euskara-agiria edo baliokidea izan beharko dute, edo maila hori egiaztatzetik salbuetsita egon beharko dute, apirilaren 3ko 47/2012 Dekretuaren eta otsailaren 26ko 28/2019 Dekretuaren arabera.

   4. Ikasleek matrikula finantza-entitate baten bitartez ordaindu beharko dute, eta gutxienez zenbateko osoaren herena, ikaslea ikastaroan hasi eta 10 laneguneko epean. Salbuespena izango dira matrikula erakunde publiko batek ordaintzen dien ikasleak.

   5. Euskaltegi pribatuek edo euskararen autoikaskuntzarako zentro homologatuek ikasleen matrikulen transferentzien ordain-agiriak gorde beharko dituzte.

   6. HABEko zuzendari nagusiak 2026-2027 ikasturterako Ebazpenaren bidez ematen dituen jarraibideak osotasunean bete beharko dira. Halaber, euskaltegiek helduen euskalduntze-jardun osoaren berri eman beharko diote HABEri.

   7. Diruz lagungarria den jardueraren aldetik, deialdi honen I. eranskinean jasotzen diren irizpideak bete beharko dituzte.

   8. Euskaltegiek edo autoikaskuntzarako zentro homologatuek diruz lagungarria den jarduerari buruzko informazioa bidali beharko dute HABEra, honek adierazitako euskarri eta epeen arabera, eta bereziki, honako hauek:

      Euskaltegiaren oinarrizko informazioa, aurreko ikasturteko informazioarekiko aldaketarik egonez gero.

      Euskaltegiaren barruko karguak, aurreko ikasturteko informazioarekiko aldaketarik eman bada.

      Ikasturtean aritzen diren irakasle eta beste langile guztien jarduera, titulazioarekin batera.

      Ikasle guztiak, bakoitzaren oinarrizko datuak eta ezaugarriak: matrikula-ordainketak, ikasten emandako denbora eta aprobetxamendua. Barnetegien kasuan, ikaslea zein pentsio-motatan dagoen ere adieraziko da.

      Ikastalde bakoitzaren ezaugarriak, HABEren kudeaketa-aplikazioan (Q87) eskatzen direnak, besteak beste, maila, ordutegia eta egutegia.

4. Bigarren eskaera-aldiarekin lotutako berezitasunak.

   1. Deialdi honen barruan bigarren eskaera-aldia aurreikusten da, jarduera-unitateen kopurua II. eranskinean ezarritakoa baino % 103tik gora burutu duten euskaltegi eta autoikaskuntzarako zentro homologatuentzat, betiere, ezarritako talde-ratioa betez gero. Bigarren eskaera-aldian parte hartu ahal izango dute lehen eskaeran dirulaguntza esleitua izan duten euskaltegi pribatu eta autoikaskuntzarako zentro homologatuek.

   2. Bigarren eskaeraren izapidetzea lehen eskaerarako ezarritako prozeduraren bidez egingo da, eta eskaerak aurkezteko epea honakoa da: 2027ko ekainaren 24tik 2027ko uztailaren 24ra arte. Barnetegi iraunkorren kasuan, epea 2027ko irailaren 1era arte zabalduko da.

   3. Oro har, bigarren eskaerarako ez da dokumentazio osagarririk aurkeztu beharko, HABEk bestelakorik eskatzen ez badu.

      3. oinarria. Eskabideen aurkezpena, epeak eta aurkeztu beharreko dokumentuak.

      1. Aurkezteko modua.

         1. Euskaltegiek eta autoikaskuntzarako zentro homologatuek dirulaguntza-eskabideak, izapideak eta beharrezko dokumentazioa soilik aurkeztuko dituzte Eusko Jaurlaritzaren egoitza elektronikoaren bitartez: https://www.euskadi.eus/zerbitzuak/1045510

         2. Eskabidearen ondorengo izapideak jakinarazpenak eta justifikazioak barne Euskal Autonomia Erkidegoko Administrazio Publikoaren egoitza elektronikoko «Nire karpeta»-ren bidez egingo dira: https://www.euskadi.eus/nirekarpeta

         3. Identifikazio eta sinadura elektronikorako onartzen diren bitartekoak honako helbide honetan daude eskuragarri: (https://www.euskadi.eus/ziurtagiri-elektronikoak). Era berean, izapideak ordezkari baten bidez egin daitezke elektronikoki. Horretarako, ordezkaritza Euskal Autonomia Erkidegoko Administrazio Publikoaren ahalordeen erregistro elektronikoan inskribatu beharko da, helbide honetan: https://www.euskadi.eus/ordezkariak

      2. Lehen eskaerarako epea eta dokumentuak.

         Lehen eskaerarako eskabidea eta dagokion dokumentazioa aurkezteko epea izango da: Ebazpena Euskal Herriko Agintaritzaren Aldizkarian argitaratu eta hurrengo egunetik hasi eta 2026ko azaroaren 3ra arte. Lehen eskaerarekin batera aurkeztu beharreko dokumentuak honako hauek dira:

         1. Eskabidea: III. eranskinean jasotako agiria telematikoki beteta. Bertan adierazi beharko da eskatzen den jarduera-unitateen kopurua, II. eranskinean agertzen denarekin bat ez badator. Diruz lagunduko diren jarduera-unitateen gehieneko kopurua II. eranskinean ezarritakoa izango da. Esleitutako jarduera-unitateen kopurua baino gehiago eskatu nahi izanez gero, bigarren eskaera-aldian eskatu ahal izango da, baldin eta esleitutakoa baino % 103tik gorakoa bada eta talde-ratioa betetzen bada, betiere, bigarren eskaera-aldirako aurreikusitako baldintzetan.

         2. Pertsonalaren fitxa: egun osoko jarduera duen irakaslearen ordainsaria, emango dituen eskola-orduen kopurua eta antzinatasuna berezita ordainduko zaion ala ez biltzen dituen agiria («Ordainsariak 2026-2027» fitxategia egoitza elektronikoan). Euskaltegi pribatu homologatuak edo autoikaskuntzarako zentroak egun osoko jarduera baina ordainsari edota eskola-ordu kopuru desberdinak dituzten irakasleak baditu, horiek guztiak zehaztuko ditu eskabidean. Langileen zerrendak bat etorri behar du HABEren kudeaketa aplikazioan (hemendik aurrera «Q87») dagoen langileen zerrendarekin. HABEk Q87n agertzen diren pertsonak eta haien datuak baino ez ditu aintzat hartuko.

         3. 2026-2027 ikasturterako plana, euskaltegiak ikasturte horretan garatuko dituen jardueren aurreikuspenarekin.

         4. Zerga eta Gizarte Segurantza arloko betebeharren egiaztagiriak, baldin eta erakunde eskatzaileak ez badu HABEk ofizioz egiaztatzea baimentzen.

         5. Dirulaguntzen Araubidea Erregulatzeko 20/2023 Legearen 13. artikuluan aurreikusitako egoeretan ez egoteari buruzko erantzukizunpeko aitorpena, III. eranskinaren bidez.

      3. Bigarren eskaera-aldiko epea eta dokumentazioa.

         1. Bigarren eskaera-aldiko eskabideak 2027ko ekainaren 24tik uztailaren 24ra bitartean aurkeztu beharko dira. Barnetegi iraunkorren kasuan, eskaera-epea 2027ko irailaren 1era arte luzatuko da. Eskaera horiek lehen eskaerarekin batera aurkeztutako dokumentazioan oinarrituko dira.

         2. Oro har, ez da dokumentazio berririk aurkeztu beharko, baldin eta HABEk espresuki beste agiri osagarriren bat eskatu ezean. Lehenengo eskaerako dokumentazioa baliagarria izango da.

         3. Hala ere, nahitaezkoa izango da IV. eranskina telematikoki betetzea eta aurkeztea egoitza elektronikoaren bidez, eskatutako jarduera-unitate gehigarrien kopurua adierazteko. II. eranskinean esleitutako jarduera unitateen % 103tik gorako jarduera-unitateak soilik eskatuko dira IV. eranskinean. Jarduera-unitate gehigarriak kalkulatzeko, kontuan hartuko dira:

            2027ko ekainaren 30era arte burutu eta HABEk onartutako jarduera-unitateak.

            2027ko ekainaren 1etik irailaren 30era bitartean egitea aurreikusten dituen jarduera-unitateak, horien gehieneko muga izanik 2025-2026 ikasturtean epealdi berean HABEk onartu eta benetan egindako jarduera-unitateak.

         4. Barnetegi iraunkorren kasuan, jarduera-unitate gehigarriak kalkulatzeko kontuan hartuko dira:

            2027ko abuztuaren 31ra arte burutu eta HABEk onartutako jarduera-unitateak.

            2027ko irailaren 1etik irailaren 30era bitartean egitea aurreikusten dituen jarduera-unitateak, horien gehieneko muga izanik 2025-2026 ikasturtean epealdi berean HABEk onartu eta benetan egindako jarduera-unitateak.

         5. Jarduera-unitate gehigarriak onartzeko, hiru baldintza bete beharko dira:

            HABEk onartutako jarduerak izatea.

            2. eranskinean ezarritako talde-ratioa betetzea (euskaltegiaren 2026-2027 ikasturteko talde-ratio ponderatuak II. eranskineko talde-ratioa berdindu edo handiagoa izan behar du). 2026-2027 ikasturteko talde-ratio ponderatua kalkulatzeko, ikasturtea hasi eta 2026ko urriaren 31ra arteko aurrez aurreko ikastereduan onartutako taldeen eta ikasleen datuak erabiliko dira. Barnetegi iraunkorren kasuan, berriz, 2027ko abuztuaren 31ra arteko datuak erabiliko dira haien ratio-ponderatua kalkulatzeko.

               Lehenik, herri-tamainaren araberako tarte bakoitzean talde-ratioa kalkulatuko da (ikasle kopurua zati talde kopurua). Ondoren, tarte bakoitzeko ratio hori euskaltegi horrek berak herri-tarte bakoitzean duen ikasle-proportzioaren arabera ponderatuko da. Hau da, euskaltegi batek jardueraren zati handiena herri-tarte jakin batean badu, tarte horrek pisu handiagoa izango du bere azken talde-ratioan.

               Tarte bakoitzean lortutako balio ponderatuen batura izango da euskaltegi bakoitzaren talde-ratio ponderatua.

               Talde-ratioa kalkulatzeko ez dira aintzat hartuko ebazpen honetako I. eranskinean 6. eta 7. puntuetan jasotzen diren helburu zehatzetarako ikastaro bereziak.

               Onartutako hondar-taldeen jarduera-unitateak II. eranskinean euskaltegiari esleitutako aurrez aurreko eskola-orduen % 5 baino gutxiago izatea.

      4. Baldintzen onarpena.

         Eskabidea aurkezteak esan nahi du erakunde eskatzaileak berariaz eta formalki onartzen dituela deialdi honetan ezarritako baldintzak.

      5. Aurkezteko modua eta sinadura elektronikoa.

         Eskabideak eta harekin batera aurkezten diren agiriak bitarteko elektronikoen bidez aurkeztu beharko dira, eta, hala dagokionean, interesdunaren edo haren ordezkariaren nortasuna eta borondatea modu fede-emailean egiaztatzen duen sinadura elektroniko baliozkoa erabili beharko da.

         Ez dira onartuko identifikazioa, benetakotasuna, osotasuna edo aldaketarik eza bermatzen ez dituzten agiri elektronikoak.

         Ez da baliozkotzat joko sinadura guztiak formalki baliozkoak izan arren azken sinaduraren ondoren aldaketak dituen dokumentua. Halakoetan, agiria ez-aurkeztutzat edo zuzendu beharreko agiritzat joko da.

      4. oinarria. Aurkeztutako eskabidearen akatsen eta hutsuneen zuzenketa.

         Ikusten bada eskabidea onartzeko eskatzen den dokumentazioan zerbait falta dela edo forma-akatsak daudela, edo balorazioa egiteko aurkeztu diren dokumentuetan akatsak direla, hamar egun balioduneko epea emango zaio interesdunari akatsa zuzentzeko edo aurkeztu beharreko agiriak aurkezteko. Era berean, ohartaraziko zaio ezen, epe hori igaro eta zuzenketarik egin ez badu, ulertuko dela eskabidean atzera egin duela edo dagokion izapidea egiteko eskubidea galdu duela, eta hala jakinaraziko zaiola aurrez, ebazpen baten bidez.

         Epe horretan zuzenketarik egiten ez bada, interesdunak bere eskaeran atzera egin duela ulertuko da, urriaren 1eko 39/2015 Legea, Administrazio Publikoen Administrazio Prozedura Erkidearen Legearen 68. artikuluan xedatutakoaren arabera, eta horren gaineko ebazpena emango da.

      5. oinarria. Dirulaguntzen esleipen-prozedura eta organo kudeatzailea.

         1. Dirulaguntza esleipen jarraituaren prozeduraren arabera izapidetuko da. Hau da, oinarri hauetako betekizunak zein baldintzak betetzen dituzten eskabide-egile guztiek jasoko dituzte dirulaguntzak, aurrekontu-partidako zenbatekoa agortu arte.

         2. Dirulaguntzen zenbatekoa II. eranskinean jasotako jarduera-unitateen arabera zehaztuko da, eta bertan ezarritako mugen barruan emango dira.

         3. Eskabideak aurkezten diren hurrenkeraren arabera izapidetuko dira, eta deialdian ezarritako baldintzak betetzen dituzten eskabideei emango zaizkie laguntzak, aurreko atalean ezarritako mugen barruan.

         4. Eskabide bakoitzak dagokion erregistro-sarrera izango du; banaka aztertu eta ebatziko da, eta interesdunari banaka jakinaraziko zaio ebazpena.

         5. Deialdiak bi eskaera-aldi aurreikusten ditu. Eskaera-aldi bakoitzean aurkeztutako eskabideak bereizita izapidetuko dira.

         6. Deialdi honetan aurreikusitako kudeaketa-lanak burutzea HABEko Kudeaketa Zerbitzuko Ekonomia eta Administrazio Unitatearen eta Ikuskatzailetzaren ardura izango da.

      6. oinarria. Dirulaguntzaren zenbatekoa.

      1. Esleipen-irizpideak.

         Dirulaguntza-deialdi honek 2026-2027 ikasturtean (2026ko urria eta 2027ko iraila bitartean) euskara-ikastaroengatik euskaltegi pribatuei eta autoikaskuntzarako zentro homologatuei zuzendutako dirulaguntzen baldintzak arautzea du helburu, esleipen-irizpide hauen arabera:

         1. Ikasturteko ordainsaria: deialdi honetarako egun osoko jarduera duen irakaslearen erreferentziako ordainsaria 38.293,77 eurokoa izango da.

         2. Irakaslearen eskola-orduak: deialdi honetarako erreferentziazko eskola-orduak 809 izango dira.

         3. Ikasturteko eskola-orduaren kostu-koefizientea: deialdi honetarako erreferentziazko eskola-orduaren kostua (ordainsaria zati eskola-orduak) 47,33 eurokoa izango da.

            Bi parametro hauen arteko zatiketak (alegia, ordainsaria zati eskola-orduak) 2026-2027 ikasturterako koefizientea emango du. Koefiziente honek islatzen du erreferentziazko parametroen betetze-maila, eta, horixe izango da, hain zuzen ere, ordainduko den dirulaguntzaren kopuru zehatzak kalkulatzeko erabiliko dena.

            Euskaltegi bakoitzaren koefizientea jakiteko, euskaltegiak berak eskabidearekin batera aurkeztutako «Ordainsariak 2026-2027» taulan baldintzarik okerrenak dituen irakaslearen datuak izango dira kontuan. Gauzak horrela, koefizienterik txikiena duen egun osoko jardueradun irakaslearen emaitza ikasturteko koefizientearekin alderatu eta haztatuko da.

         4. Jarduera-unitatea: euskaltegiek edo autoikaskuntzarako zentroek egiten dituzten ikasteredu guztiak biltzen ditu:

            Aurrez aurreko talde-orduak (1 = 1,0 jarduera-unitate).

            Jardun biko tutoretza-orduak (1 = 1,0 jarduera-unitate).

            Autoikaskuntzako matrikulak (190 orduko matrikula 1 = 20,23 jarduera-unitate), eta iraupen gutxiagoko matrikulak proportzioan doituko dira.

            Barnetegietan egindako pentsio-egunak: egun osoz (1 = 0,4 jarduera-unitate) eta egun erdiz (1 = 0,2 jarduera-unitate).

            Barnetegi iraunkorretako egun osoz (1 = 0,5 jarduera-unitate), erdiz (1 = 0,2 jarduera-unitate) eta ikasleak familietan (1 = 0,1 jarduera-unitate) egindako pentsio-egunak.

            Onuradun bakoitzari dirulaguntzetarako abiapuntu bezala onartuko zaizkion jarduera-unitateak 2020-2021 ikasturtetik 2023-2024 ikasturtera bere ekimenez ikasteredu guztietan HABEk onartu zizkion jardueren batez bestekoak izango dira).

      2. Kopuru zehatzak.

         2026-2027 ikasturtean dirulaguntzaren kopuru zehatza kalkulatzeko, onuradun bakoitzari dagokion jarduera-unitate kopurua eta dagokion laguntza-modulu doitua biderkatuko da. Jarduera-unitateak II. eranskineko taulan jasota daude.

         Jarduera-unitate bakoitzeko laguntza-moduluak honako hauek dira:

         Gehieneko modulua: 75,18 euro, irakasleen ordainsarian antzinatasuna ordaintzen denean.

         Gehieneko modulua: 69,07 euro, irakasleen ordainsarian antzinatasuna ordaintzen ez denean.

         Gutxieneko modulua: 47,12 euro.

         Aipatutako laguntza-moduluak hurrengo irizpideak jarraituz doituko dira:

         Eskabidean aurkeztutako ordainsarien taulan (Ordainsariak 2026-2027) jasotako datuen arabera, 6.1 oinarriaren c) azpiatalean ezarritako eskola-orduaren erreferentziazko kostu-koefizientea berdindu edo gainditzen bada, dagokion gehieneko laguntza-modulua aplikatuko da. Gehieneko laguntza-modulua ezberdina izango da antzinatasuna ordaintzen den ala ez kontuan hartuta.

         2026-2027 ikasturterako 6.1 oinarriaren c) azpiatalean ezarritako koefizientera iristen ez bada, euskaltegiak ordainsarien taulan (Ordainsariak 2026-2027) aurkeztutako datuak eta erreferentziazko koefizientea alderatuko dira, eta dagokion gehieneko laguntza-modulua proportzio berean doituko da, betiere gutxieneko laguntza-modulua errespetatuta.

      3. Finantzaketa publikoa.

         Europako edo Estatuko erakundeetatik, Eusko Jaurlaritza, foru aldundietatik, udaletatik edo Administrazio Publikoaren baitako beste erakunde autonomoetatik edo zuzenbide pribatuaren menpeko erakunde publikoetatik datorrena, gehienez, diruz lagundutako jardueraren gastuaren % 75 izango da.

      7. oinarria. Dirulaguntzarako esleipen-ebazpena.

         1. HABEko zuzendari nagusiaren Ebazpenaren bitartez erabakiko da onuradun bakoitzari esleitzen zaion dirulaguntzaren zenbatekoa, deialdi honetako 6. oinarrian ezarritako irizpideen arabera. Esleipen-ebazpenak ez du Administrazio-bidea agortzen eta, beraz, interesdunek gora jotzeko errekurtsoa jar dezakete horren aurka, Jaurlaritzako lehenengo lehendakariorde eta Kultura eta Hizkuntza Politikako sailburuaren aurrean, hilabeteko epean, urriaren 1eko 39/2015 legeari eta bertako 121 eta 122 artikuluei jarraikiz.

         2. Lehen esleipen-ebazpena 2026ko abenduaren 22a baino lehen emango da. Epe horretan organo erabakitzaileak jakinaraziko ez balu, eskabidea ez dela onartua izan ulertuko da.

         3. Izapidetze elektronikoa denez, jakinarazpena egindakotzat joko da euskaltegiak edo autoikaskuntzarako zentro homologatuak hura elektronikoki sinatzen duenean. Hala ere, hamar egun natural igaro eta jakinarazpena ireki ez bada, izapidea egindakotzat joko da, eta prozedurak bere horretan aurrera egingo du.

         4. Interesdun bakoitzari egindako ebazpenaren jakinarazpenaz gain, Euskal Herriko Agintaritzaren Aldizkarian ere argitaratuko da emandako dirulaguntzen esleipen-ebazpena.

         5. Betiere, onuradunei dirulaguntza aitortu, eta hala badagokio, ordaindu ahal izateko, nahitaezko baldintza da amaituta egotea dirulaguntzen itzulketa- edo zehapen-prozedura oro, eta baita, dagokionean, dirulaguntzak itzultzearen ondoriozko obligazioak ordainduta izatea ere, Euskadiko Autonomia Erkidegoaren Administrazio Orokorrari.

         6. Bigarren esleipen-ebazpena 2027ko abenduaren 22a baino lehen eman beharko da. Epe horretan organo erabakitzaileak ebazpenik emango ez balu, eskabidea ez dela onartua izan ulertuko da. Bigarren eskaera-aldiko baldintzak betetzen badira, egoki zuritutako jarduera-unitate gehigarriak hartuko dira kontuan esleipena egiteko.

      8. oinarria. Beste dirulaguntzen bateragarritasuna.

         1. Deialdi honen kontura ematen diren dirulaguntzak bateragarriak izango dira helburu bererako beste edozein entitatek eman ditzakeen laguntzekin, betiere diruz lagundutako jardueraren gehiegizko finantzaketarik gertatzen ez bada, hau da, diruz lagundutako jardueraren kostua gainditzen ez badute. Onuradunak konpromisoa hartzen du gainfinantzaketa ez gertatzeko, eta hori saihesteko beharrezko neurriak hartuko dituela, Dirulaguntzen Araubidea Erregulatzeko 2023ko abenduaren 21eko 20/2023 Legeak ezarritakoaren arabera.

         2. Gehiegizko finantzazioa gertatzen bada, edota finantzaketa publikoetan aurreikusitako mugak gainditzen badira, murriztu egingo da dirulaguntza, dagokion neurrira doitu arte.

      9. oinarria. Dirulaguntzen ikuskapena eta jarraipena.

         1. HABEren Ikuskatzailetza arloko langile baimenduek ikuskaritzak egin ahal izango dituzte edozein unetan, euskaltegiak eta autoikaskuntzarako zentroak berauek emandako datuak egiaztatzeko helburuarekin. Horretarako, eska diezaiekete euskaltegietako arduradunei, eskolak emateko erabiltzen diren lokalen inguruko informazioa, baita jardun, ikasle, ikastalde, irakasle, gainerako langile eta material didaktikoari buruzkoa ere.

         2. HABEk ikuskaritza-bisitak egin ahal izango ditu euskaltegietan eta autoikaskuntzako zentroetan, dirulaguntzen jarraipena eta egiaztapena egiteko. Bisita horiek laginketa bidez egingo dira, irizpide objektiboak aplikatuta, hala nola lurraldearen araberako banaketa, zentroaren tamaina edo jarduera-bolumena, edota ausazko hautaketa; beharrezkoa denean, beste irizpide batzuk ere kontuan hartu ahal izango dira.

            Bisita horietan egiaztatu ahal izango dira, besteak beste, jardueraren benetako garapena, ikastaldeen funtzionamendua, irakasleen jarduna, ikasleen presentzia eta kopurua, instalazioak eta baliabide didaktikoak, bai eta HABEri emandako informazioaren eta zentroaren jarduera errealaren arteko egokitasuna ere. Ikuskapen horiek aldez aurretik jakinarazi gabe egin ahal izango dira.

         3. Ikusketan bertan bildutako informazioa ikusketa-akta batean jasoko da, eta akta hori HABEko ikuskatzaileak eta euskaltegiaren arduradunak sinatuko dute. Ondoren, ikuskatzaileak informazio gehigarria eskatu ahal izango dio euskaltegiari, eta honek hamar laneguneko epea izango du informazio hori aurkezteko.

         4. HABEren Ikuskatzailetzak aldian-aldian egiten dituen ikusketetan jasotako informazioa euskaltegiak edo autoikaskuntzarako zentroak HABEri ematen dion informazioarekin bat ez badator, edo deialdi honetan ezarritako baldintzak betetzen ez badira, HABEko zuzendari nagusiari helaraziko dio akta, besterik ezean, aitortutako dirulaguntzei dagozkien ondorioak erabaki ditzan.

         5. Ikusketa baten ondorioz ez-betetze bat ohartuko balitz, HABEko zuzendari nagusiak behin betiko erabakia hartu baino lehen, euskaltegiaren edo autoikaskuntzarako zentroaren arduradunari ikuskatutakoaren akta helarazi beharko dio, honek 10 laneguneko epean dagozkion alegazioak egin ahal izateko.

         6. HABEk, dirulaguntzen jarraipenaren eta ebaluazioaren barruan, diruz lagundutako talde edo ikastaroetako ikasleei gogobetetze-inkestak egitea eskatu ahal izango die euskaltegiei. Horretarako, HABEk zehaztutako eredua edo jarraibideak erabiliko dira, eta euskaltegiek beharrezko lankidetza eskaini beharko dute inkesta horiek egiteko eta emaitzak helarazteko. Inkestak anonimoak izango dira, eta datuen babeserako araudia errespetatuko dute.

      10. oinarria. Dirulaguntzen ordainketa.

      1. Lehen eskaeraren ordainketa.

         Lehen eskaerari dagokion dirulaguntza 2026ko abenduan emango den esleipen-ebazpenean zehaztuko da, eta ikasturtean zehar hiru ordainketa gauzatuko dira, ondorengo epeetan:

         1. Lehen ordainketa (% 17): dirulaguntzen esleipen-ebazpena ematen den momentuan erabakitakoaren % 17 ordainduko da, gehienez hilabeteko epean.

         2. Bigarren ordainketa (% 73): euskaltegiek lehenengo ordainketa osorik zuritu ondoren eta HABEk egiaztatu ahala, espedienteen hurrenkeraren arabera, dirulaguntzaren ebazpenean ezarritako zenbatekoaren % 73 ordainduko da.

         3. Hirugarren ordainketa (% 10): gainerako % 10a (esleitutako dirulaguntza osoaren azken zatia) 2026-2027 ikasturte akademiko osoari dagozkion diruz lagundutako jarduerekin lotura duten gastuen zuriketa egin ondoren ordainduko da, HABEk egiaztapenak egin eta dirulaguntzaren kitapena burutu ondoren, HABEko zuzendari nagusiak egingo duen kitapen-ebazpenaren araberakoa.

      2. Bigarren eskaera-aldiko ordainketa.

         Bigarren eskaera-aldian, dirulaguntzen ordainketa aparteko ebazpen baten bidez gauzatuko da. Bigarren eskaera-aldiko esleipen-ebazpena 2027ko abenduaren 22a baino lehen ordainduko da osorik, lehen eskaeraren aldiko azken ordainketarekin batera. Ordainketa % 100ean egingo da, baldin eta ebazpenean onartzen diren jarduera-unitate gehigarriak behar bezala justifikatu badira, HABEk ezarritako baldintza eta irizpideei jarraituz.

      3. Dirulaguntzak ordaintzeko baldintzak.

         1. Dirulaguntzak ordaindu ahal izateko, onuradunak Eusko Jaurlaritzaren hirugarrenen datu-basean agertu beharko du. Alta emateko edo datuak aldatzeko, onuradunak Eusko Jaurlaritzaren hirugarrenen erregistro telematikoa erabili beharko du, helbide honetan: https://www.euskadi.eus/hirugarrenak

         2. Dirulaguntzaren ordainketa baldintzatuta egongo da, betiere, Euskal Autonomia Erkidegoko Administrazio Orokorrak edo erakunde autonomoek ezaugarri bereko beste laguntza edo dirulaguntzaren batzuk eman izana dela-eta horiek itzultzeko edo zigortzeko prozesuren bat oraindik ere izapidetzen ari bada, prozesu hori amaitzera.

            11. oinarria. Diruz lagungarriak diren gastuak.

            1. Diruz lagungarriak diren gastuak.

               Gastuen zerrenda 2026-2027 fitxategian ageri diren honako gastu-kontzeptu hauek onartuko dira, betiere, HABEk diruz lagundutako jarduerekin lotura badute:

               1. HABEk diruz lagundutako jardueretan aritutako irakasle eta irakasle ez diren langileen gastuak: soldata gordina eta gizarte segurantza. Erakunde onuradunek diruz lagundutako jarduera gauzatzen parte hartu duten langile guztien zerrenda aurkeztu beharko dute, egoitza elektronikoan eskuragarri dagoen formularioaren arabera.

               2. Lokalen alokairuak: soilik euskaltegien edo autoikaskuntzarako zentroen Erregistroan jasotako lokalen alokairuak hartuko dira kontuan. Legezko gutxienekoak (BEZa barne eta Ogasunerako atxikipena jasotzen dutenak...) betetzen dituzten agiriak soilik onartuko dira. Alokatzailea erakunde publikoa denean, bankuaren ordainagiriak onartuko dira.

               3. Barnetegi iraunkorretako pentsioetarako mantenu-gastuak eta jabari publikoko emakidei dagokien tasa.

               4. Azpiegituren garbiketa-gastuak eta mantentze-lanak.

               5. Gastu didaktikoak: klaseak ematearekin zuzenki lotuta dauden gastu arruntak (material didaktikoa, liburuak, dokumentazioa, etab.).

               6. Irakaskuntzaren kalitatea hobetzeko helburuarekin sortutako beste edozein gastu: irakasleen formazioan (barruko zein kanpoko formazio-jarduerak), Informazio eta Komunikaziorako Teknologietan (IKT), materialgintzan eta kudeaketaren hobekuntzan.

               7. Hirugarrenekin kontratatutako jardueren gastuak, baita kanpoko enpresa batek egindako irakaskuntza-lanak ere, baldin eta dirulaguntzaren helburuarekin zuzenean lotuta badaude eta 11.2 oinarrian ezarritako baldintzak betetzen badituzte. Kasu horietan, kontratatutako jarduera eta enpresa edo pertsona kontratatuaren inguruko informazioa aurkeztu beharko da.

               8. Dirulaguntzen Lege Orokorraren 31. artikuluaren arabera diruz lagungarria izan eta diruz lagundutako jarduerarekin zuzenean lotuta dagoen beste edozein gastu.

                  2. Hirugarrenekin kontratazioa eta kontratazio-prozeduraren baldintzak.

                     1. Onuradunak aukera izango du diruz lagundutako jarduera osoa edo haren zati bat hirugarrenekin kontratatzeko. Kontratazio hori gauzatzen bada, 20/2023 Legearen 31. artikuluan ezarritako baldintzak bete beharko dira.

                     2. Kontratazioak ez du onuradunaren erantzukizuna kentzen ez dirulaguntzaren helburuak betetzean, ezta jardueraren justifikazioan ere. Onuraduna izango da, betiere, dirulaguntzaren xede diren jardueren gauzatze egokiaren eta emaitzen arduradun bakarra.

                     3. Kontratazio-prozesuek gardentasun-, lehiakortasun- eta objektibotasun-printzipioak bermatu beharko dituzte. Aurkeztutako eskaintzen artean aukeraketa eraginkortasun- eta ekonomia-irizpideen arabera egingo da, eta eskaintza onuragarriena ez dena hautatzen bada, espresuki justifikatu beharko da memoria batean.

                     4. Onuradunak HABEri jakinarazi beharko dio kontratazioaren berri eta, hala eskatzen bazaio, kontratuaren kopia eta kontratazio-prozesuaren inguruko informazio osagarria aurkeztu beharko du.

                     5. Ezingo dira kontratatu dirulaguntzaren xede diren jardueretan parte hartzeko gaitasunik ez duten pertsona edo entitateak, ezta dirulaguntzak jasotzeko ezgaituta daudenak ere, indarrean dagoen araudiaren arabera.

                        12. oinarria. Zuriketa.

                            Euskaltegiak zuriketarako erabili beharko ditu egoitza elektronikoan eskuragarri dauden fitxategiak: (https://www.euskadi.eus/zerbitzuak/1045510). Fitxategi horien azken bertsioa erabili beharko da, eta ezin izango da haien egitura aldatu.

                            Diruz lagundutako jardueraren zuriketa 2026-2027 ikasturtean zehar bi alditan egingo da.

                        1. Lehen zuriketa.

                           Lehen zuriketa ikasturteko lehen ordainketaren ondoren egingo da, bigarren ordainketa egiteko oinarri gisa. Lehen zuriketan, nahikoa izango da lehen ordainketaren zenbatekoa estaltzeko adina gastu eta justifikazio-agiri aurkeztea, betiere diruz lagundutako jarduerari lotutakoak badira.

                        2. Bigarren zuriketa eta bigarren eskaera-aldiko zuriketa.

                           Bigarren zuriketa ikasturtearen amaieran egingo da, eta horren arabera egingo da dirulaguntzaren kitapena. Bigarren zuriketa horretan, lehen eskaera-aldian esleitutako dirulaguntzaren zuriketa egin beharko da bai eta, hala badagokio, bigarren eskaera-aldian esleitutakoaren dirulaguntzarena ere. Onuradunek diruz lagundutako jarduera osoa zuritu beharko dute, jarduera horri lotutako sarrera eta gastu guztiak aurkeztuz eta justifikazio-dokumentazioa HABEk ezarritako eredu normalizatuen arabera aurkeztu beharko da.

                        3. Lehen zuriketan aurkeztu beharreko dokumentuak:

                           1. Pertsonalaren fitxa: HABEk diruz lagundutako jarduerarekin lotura duten langile guztien zerrenda aurkeztea egoitza elektronikoan dagoen Ordainsariak 2026-2027 izeneko formularioari jarraikiz. Diruz lagundutako jardueretan parte hartu duten langileek HABEren kudeaketa-sistemetan (Q87) behar bezala identifikatuta eta erregistratuta egon beharko dute.

                           2. HABEk diruz lagundutako jarduerarekin lotura duten langile guztien nominak eta horiek ordaindu direla egiaztatzen duten banku-agiriak edo ordainketa-frogagiriak.

                           3. Gastuen zerrenda 2026-2027 izeneko fitxategiaren bidez, lehen ordainketaren zuriketari dagokion aldiko diruz lagundutako jarduerari lotutako gastu guztiak egiaztatu beharko ditu.

                           4. Bestelako gastuen kasuan, lehen ordainketa zuritzeko beharrezkoa balitz, dagokion faktura eta ordainketa-egiaztagiria.

                           5. Zerga eta Gizarte Segurantza arloko betebeharren egiaztagiriak, baldin eta erakunde eskatzaileak ez badu HABEk ofizioz egiaztatzea baimentzen.

                        4. Bigarren zuriketan aurkeztu beharreko dokumentuak:

                           1. Lehen zuriketan aurkeztutako dokumentuak, ikasturte osoaren datuekin osatuta.

                           2. Diruz lagundutako jarduerarekin lotura duten gastu guztiak, Gastuen zerrenda 2026-2027 izeneko fitxategiaren bidez.

                           3. Diruz lagundutako jarduera osoaren sarrera eta gastu guztiak, Gastuen zerrenda 2026-2027 fitxategian dagoen Balantzea izeneko formularioari jarraikiz.

                           4. Bestelako gastuen kasuan, beharrezkoa balitz, dagozkion fakturak eta ordainketa-egiaztagiriak.

                        5. Dokumentazioaren egiaztapena.

                           Onuradunek bermatu beharko dute dirulaguntzaren bidez finantzatutako gastuak identifikatu eta egiaztatu ahal izatea, aurkeztutako justifikazio-dokumentazioaren bidez eta horretarako HABEko zuzendari nagusiak ebazpen bidez ezarritako jarraibideen arabera. Aurkeztutako dokumentazioan hutsuneak, akatsak edo inkoherentziak atzematen direnean, HABEk dagokion zuzenketa edo osatze-eskaera egin ahal izango du. Dokumentazioa zuzentzen denean, HABEk eskatzen duen dokumentu edo fitxategi osoa berriro aurkeztu beharko da.

                           HABEk egiaztapen-lanak egin ahal izango ditu aurkeztutako dokumentazioaren gainean, osorik edo laginketa bidez. Laginketa irizpide objektibo eta orokorren arabera egin ahal izango da, eta irizpide horiek onuradun guztiei berdin aplikatuko zaizkie.

                           Hala ere, egiaztapenaren irismena eta edukia egokitu ahal izango dira euskaltegi bakoitzaren ezaugarrien, aurkeztutako dokumentazioaren egoeraren edo egiaztapen-prozesuan antzemandako gorabeheren arabera.

                           Egiaztapen horren ondorioz, HABEk onuradunari eskatu ahal izango dio dirulaguntzaren erabilera eta gastuen justifikazioa egiaztatzeko beharrezkoa den informazio eta dokumentazio osagarria. HABEk egoitzak elektronikoa erabiliz eskabidea egin diezaioke edozein euskaltegiri edo autoikaskuntzako zentrori, eta eskatzen zaion unetik 10 laneguneko epea izango du onuradunak eskatutakoa aurkezteko.

                        6. Sinadura elektronikoa.

                           Aurkezten diren agiri elektronikoek 3.5 oinarrian ezarritako sinadura elektronikoari eta dokumentuen osotasunari buruzko baldintzak bete beharko dituzte. Ez dira onartuko azken sinaduraren ondoren aldaketak izan dituzten agiriak, ez eta sinadura baliozkotzean dokumentuaren osotasuna bermatzen ez dutenak ere.

                        7. HABEren dirulaguntzen zuriketarako, honako sarrera hauek onartuko dira:

                           1. Babestutako jardueren matrikulak: ikasleek edo euren ordezkari legalek edo tutoreek matrikula kontzeptuan ordaindutako kopuruak. Atal honetan ere, herri langileen ikastaroengatik HABEk edo beste herri administrazioek zein erakunde pribatuek edo enpresek ordaindutako matrikulak sartuko dira.

                           2. Babestutako jardueren ikas-materialak: ikasleek edo euren ordezkari legalek edo tutoreek ikas-materialengatik ordaindutako kopuruak. Atal honetan ere, herri langileen ikastaroengatik HABEk edo beste herri administrazioek zein erakunde pribatuek edo enpresek ordaindutako ikas-materialak sartuko dira.

                           3. Babestutako jarduerengatik erakunde pribatuetatik, enpresetatik edo beste iturrietatik jasotako beste sarrerak.

                           4. Deialdiaren bidez HABEtik jasotako dirulaguntza.

                           5. Babestutako jarduerengatik beste herri erakundeetatik jasotako dirulaguntzak.

                           6. Dirulaguntzen Lege Orokorraren 30. artikuluaren arabera, funts-propioekin edo beste dirulaguntza edo baliabide batzuekin lortutako sarrerak.

                              Dirulaguntzen Araubidea Erregulatzeko Legearen 32. artikuluarekin bat etorriz, gastuak egiaztatzeko, fakturak eta froga-balio baliokidea duten bestelako agiriak aurkeztuko dira. Horiek guztiek merkataritzako trafiko juridikoan baliodunak izan behar dute edo eraginkortasun administratiboa eduki behar dute. Auditoria-txosten baten bidez ere egiaztatu ahal izango dira gastuak.

                              9. 2026-2027 ikasturteko Memoria.

                                 Euskaltegiak edo autoikaskuntzarako zentroak 2026-2027 ikasturteko Memoria aurkeztu beharko du 2027ko urriaren 15erako.

                              10. Oinarri honetan eskatutako agiriak aurkezteko epeak honakoak dira:

                                  1. Lehen eskaerari dagokion lehen ordainketaren zuriketa: 2027ko urtarrilaren 15etik otsailaren 19ra arte, biak barne.

                                  2. Lehen eskaerari dagokion dirulaguntza osoaren zuriketa: 2027ko irailaren 1etik urriaren 15era arte, biak barne.

                                  3. Bigarren eskaera-aldiko dirulaguntza osoaren zuriketa: 2027ko urriaren 15era arte.

                                  4. 2026-2027 ikasturteko Memoria: 2027ko urriaren 15era arte.

                              11. Ez-betetzea.

                                  Zuriketan egindako ez-betetzeak dirulaguntzarako eskubidea galtzea eta jasotako zenbatekoa itzultzea ekarriko du, ez-betetzeak dituen gainontzeko lege-ondorioez gain.

                              13. oinarria. Esleitutako dirulaguntzaren kitapena.

                              1. Jarduera-unitateen kitapena.

                                 Ikasturtearen amaieran, jarduera-unitateen kitapena egingo da, ondoren zehazten diren irizpideei jarraikiz:

                                 1. Lehen eskaera-aldiko onuradunen kasuan, betetze-maila % 97 eta % 103 bitartekoa bada, esleipena mantenduko da.

                                    Talde-irakaskuntzan nahiz autoikaskuntzan, ikasturtean benetan gauzatutako jarduera-unitate kopurua, behetik nahiz goitik, II. eranskineko jarduera-unitate kopuruarekiko % 3ko gorabehera-urkilaren barruan badago, esleitutako jarduera-unitate kopurua hartuko da aintzat kitapenean. Hau da, esleitutako jarduera-unitate kopuruaren % 97 eta % 103 bitartean badago, ez da doikuntza ekonomikorik egingo, eta jatorrizko esleipena mantenduko da.

                                 2. Lehen eskaera-aldiko onuradunen kasuan, burutze-maila % 97tik beherakoa bada.

                                    Euskaltegiak, ikasturtearen amaieran II. eranskinean esleitutako jarduera-unitateen % 97tik beherako jarduera burutu badu, lehenik eta behin, % 97ra heldu ez diren euskaltegien galeraren batez bestekoa kalkulatuko da.

                                    1. Bataz besteko galera % 3 baino handiagoa bada, % 97tik beherako jarduera burutu duten euskaltegiei bataz besteko galera aplikatuko zaie, gehienez % 5eko muga ezarrita. Galeraren bataz bestekoa kalkulatzeko, % 97ra heldu ez diren euskaltegiek burutu gabe utzi dituzten jarduera-unitateen kopurua zenbatuko da (hau da, esleitutako eta benetan egindako jarduera-unitateen arteko aldea zenbatuko da). Falta izan zaizkien jarduera-unitateen batura egingo da, eta haien ehunekoa kalkulatuko da beherapena duten euskaltegiei esleitutako unitate guztiekiko.

                                    2. Bataz besteko galera % 3 eta % 5 bitartekoa bada, bataz besteko galera horren barruan dauden euskaltegiei jatorrizko esleipena mantenduko zaie kitapenean. Euskaltegiak galeren bataz bestekotik behera burutu badu jarduera, % 5aren barruan badago ere, galeren bataz bestekotik beherako jarduera-unitate horiengatik epealdiko azken ordainketan murrizketa aplikatuko da. Murrizketaren zenbatekoa honela kalkulatuko da: burututako jardueraren eta galeren batezbestekoaren arteko aldea bider jarduera-unitateen laguntza-modulua.

                                    3. Bataz besteko galera % 5 baino handiagoa bada, eta euskaltegia esleitutako jarduera-unitateen % 95aren barruan badago, jatorrizko esleipena mantenduko zaio kitapenean eta ez zaio doikuntzarik egingo. Euskaltegiak, aldiz, esleitutakoaren % 95etik behera jardun badu, % 95era heltzeko falta zaizkion jarduera-unitateen arabera doituko zaio dirulaguntza, hurrengo kalkuluaren arabera: burututako jardueraren eta % 95era heltzeko falta den jarduera-unitate kopurua bider dagokion jarduera-unitateen laguntza-modulua biderkatuz.

                                 3. Bigarren aldiko eskabideen kasuan, dirulaguntzaren kitapena egindako zuriketaren arabera egingo da, eta ondorioz, ordainketa, ebazpen bakar baten bidez gauzatuko da. Bigarren eskaera-aldian zuritutako jarduera-unitate kopurua IV. eranskinean euskaltegiak eskatu zen kopurua baino txikiagoa bada, kitapena eta ordainketa zuritutako jarduera-unitate horien arabera egingo dira.

                              2. Barnetegi iraunkorren kasuan, jarduera-unitateen kitapena honela egingo da:

                                 Ikasturtean benetan gauzatutako jarduera-unitate kopurua II. eranskinean ezarritakoaren % 97 eta % 103 bitartekoa bada, ez da doikuntza ekonomikorik egingo, eta jatorrizko esleipena mantenduko da.

                                 Barnetegiek, egitura iraunkor eta egonaldi osoko zerbitzuek eragiten dituzten gastu finkoak direla eta, babes-irizpide osagarri bat izango dute % 97tik beherako betetze-mailen kasuan. Zehazki, barnetegiek egindako jarduera-unitateei 1.660 jarduera-unitate gehituko zaizkie kitapenerako oinarri modura, babes-neurri gisa.

                                 Oinarri horren arabera honako kitapena egingo da:

                                 Oinarri modura hartutako (egindako unitateei 1.660 unitate gehituta) kopuruarekin % 97ra heltzen bada, esleipena mantenduko da.

                                 Galerak % 97 baino handiagoak balira, 13.1 atalean ezarritakoa aplikatuko zaie, hau da, b) azpiatala, % 97tik beherako burutze-mailari dagokiona.

                              3. Alderdi ekonomikoen kitapena, euskaltegi, zentro homologatu eta barnetegi iraunkorrentzat.

                                 Honela egingo da deialdi honen ikasturtearen amaieran esleitutako dirulaguntzaren kitapena: ikasturtearen amaieran behin betiko jarduera-unitateak eta zuriketaren agiriak jasoko dira, 11. oinarrian zehaztutako kontzeptuen bitartez, kitapena egiteko. HABEko zuzendari nagusiak kitapen-ebazpen bat emango du, beharrezkoa balitz laguntza-kopuruak doituz. Aipatutako doikuntza era eta hurrenkera honetan egingo da:

                                 Koefizientearen aplikazioa: 6. oinarrian aipatu den koefizientearen betetze-maila. Betetzen ez bada, proportzio berean doitu egingo da esleitutako dirulaguntza.

                                 Euskaltegi edo autoikaskuntzarako zentro bati esleitutako dirulaguntzaren zenbatekoak deialdi honetako 6.3. oinarrian ezarritako % 75eko dirulaguntza-muga gainditzen badu, esleitutako dirulaguntza ehuneko berean doitu egingo da, aipatutako muga errespetatzeko.

                                 Lagundutako jardueraren sarrerak gastuak baino handiagoak badira, doitu egingo da esleitutako dirulaguntza aldea kenduz.

                              4. Salbuespen-egoerak.

                                 1. Jardueraren exekuzioan gorabeherak gertatzen badira, bereziki grebak, ezinbesteko arrazoiak edo antzeko egoerak direla medio, eta horren ondorioz onartutako jardueren orduak ezin badira eman, egoera hori kontuan hartuko da kitapena zehazteko, egindako jardueraren arabera. Horretarako, onuradunak egoera horren berri eman beharko dio HABEri, egoitza elektronikoan 2026-2027 ikasturte hasierako Ebazpenean zehaztutako jarraibideen arabera.

                                 2. Salbuespen-egoeraren bat gertatuz gero, HABEk Ebazpen honetako baldintzak egokitu ahal izango ditu ebazpen berri baten bidez, egoera horri modu egokian eta eraginkorrean erantzuteko.

                                    14. oinarria. Onuradunaren betebeharrak.

                                        Ebazpen honetan araututako dirulaguntzen erakunde onuradunek Dirulaguntzen Araubidea Erregulatzeko abenduaren 21eko 20/2023 Legearen 14. artikuluan eta Dirulaguntzen Lege Orokorraren 14. artikuluan araututako betebehar hauek izango dituzte:

                                        1. Emandako dirulaguntza onartzea.

                                        2. Jarduera aurrera eramatea edo dirulaguntza ematea bidezko egiten duen egoeran egotea.

                                        3. Dirulaguntza eman duen erakundearen aurrean justifikatzea emate hori eragin duten edo laguntzaz baliatzea eragin duten baldintzak betetzen direla eta jarduera bera aurrera eramango dela.

                                        4. Kontrol Ekonomikoko Bulegoari eta Herri-Kontuen Euskal Epaitegiari eskatzen duten informazio oro ematea, deialdi honen bitartez esleitutako dirulaguntzak kontrolatzeko duten eginkizuna betetzeko. Era berean, beste edozein administrazio, erakunde publiko edo pribatuk helburu bererako emandako dirulaguntzak, laguntzak, baliabide ekonomikoak edo bestelakoak jaso izana jakinarazi beharko zaio HABEri. Halaber, dirulaguntza ematerakoan kontuan hartutako egoera objektibo edo subjektiboan aldaketarik geratzen bada, horren berri eman beharko zaio HABEri.

                                        5. Aitortutako dirulaguntzaren izaera publikoari publizitate egokia ematea, abenduaren 21eko 20/2023 Legea, Dirulaguntzen araubidea erregulatzen duen 18. artikuluari jarraikiz.

                                           Horretarako, laguntza-mota honen bidez diruz lagundutako egitasmo orok HABEk emandako babesaren berri adierazi beharko du egitasmoaren argitan kaleratutako euskarri guztietan, Eusko Jaurlaritzaren eta HABEren logotipo normalizatua eta HABEk diruz lagundua esaldia agerian jarriz.

                                        6. Dirulaguntza hauen onuradunek giza eskubideak eta pertsonen arteko bizikidetzaren balioak errespetatuko dituzte eta, ondorioz, ezin izango dituzte agerian eduki, horiei dagokienez, herritarrentzako laidogarriak izan daitezkeen, erabiltzaileen duintasuna urra dezaketen edo indarkeria iradokitzen duten ikurrak edo elementuak.

                                    15. oinarria. Arau-hausteak eta ez-betetzeak.

                                        Edozein kasutan, deialdi honetako dirulaguntzen erakunde onuradunak abenduaren 21eko Dirulaguntzen Araubidea Erregulatzeko 20/2023 Legearen 36. eta 44. artikuluetan jasotako arau-hauste eta ez-betetzeen erregimenaren menpe daude.

                                        Ez-betetze kasuetan, onuradunak jasotako diru-kopurua, bere legezko interesekin, Euskal Autonomia Erkidegoko Diruzaintza Nagusira itzuli beharko du, Dirulaguntzen Araubidea Erregulatzeko Legearen 40. eta 41. artikuluekin bat etorriz.

                                    16. oinarria. Datuen tratamendua.

                                        Erakunde onuradunek, dirulaguntza-deialdi honetan, HABEri bidalitako datu pertsonalak honako tratamendu-jardueretarako erabiliko dira: Euskaltegien eta autoikaskuntzarako zentro homologatuen Erregistroaren kudeaketa eta Ikaslegoaren kudeaketa.

               Tratamendu hau abenduaren 5eko 3/2018 Lege Organikoan eta Europako Parlamentuaren eta Kontseiluaren 2016/679 Erregelamenduan (EB) ezarritakoaren arabera egingo da, ondoren zehazten diren helburuetarako:

               HABEk euskaltegien eta autoikaskuntzarako zentro homologatuen finantzaziorako bideratzen dituen dirulaguntzen kudeaketa.

               HABEri atxikita dagoen euskaltegien eta euskararen autoikaskuntzarako zentro homologatuen Erregistroa kudeaketa.

               HABEk egingo duen euskaltegien eta autoikaskuntzarako zentro homologatuetako ikasleen kudeaketarako: ikas-prozesua, euskara-mailaren egiaztapena eta dirulaguntzen proposamena.

               HABEko zuzendari nagusia izango da tratamenduaren administrazio-organo arduraduna.

               Tratamendua beharrezkoa da legez ezarritako betebeharrak gauzatzeko eta interes publikokoa den jarduera sustatzeko.

               Interesdunak bere datuak ikusteko, zuzentzeko zein ezabatzeko eskubidea izango du, baita haien tratamendua mugatzeko nahiz haren aurka egiteko, informazio gehigarrian adierazten den moduan.

               Halaber, bere datuen tratamenduari buruzko informazio osagarria eskura dezake helbide honetan: https://www.habe.euskadi.eus/datu-pertsonalen-babesa-haben/webhabe00-edukiak/eu/

            17. oinarria. Aplikagarriak diren arauak.

                Ebazpen honetan aurreikusitakoaz gain, azaroaren 11ko 1/1997ko legegintzako dekretua onartzen duen Euskal Autonomia Erkidegoko Ogasun Nagusiaren antolarauei buruzko legearen testu bategina, dirulaguntzei buruzko azaroaren 17ko 38/2003 Lege orokorra eta abenduaren 21eko 20/2023 Legea, dirulaguntzen araubidea erregulatzekoa aplikatuko dira, aplikagarri diren neurrian.