Ingurumen-inbentarioa eta elkarreragin ekologiko edo ingurumen-elkarreragin garrantzitsuenen deskribapena.

Atal honetan, ingurunea deskribatuko da, osagai baliotsuenak eta proiektuko ekintzen eragina gehien pairatu dezaketenak nabarmenduta. Ingurumen-ebaluazioari buruzko abenduaren 9ko 21/2013 Legeak xedatzen duena betez, proiektua egin aurretik lekuaren egoera eta ingurumen-baldintzak aztertuko dituen txostena ere sartu behar da, baita oraingo ingurumen-egoera eta ebaluatzen den proiektutik eratorritako jarduketaren ondoriozko egoera alderatzeko azterketa bat ere, aztertutako alternatiba bakoitzaren kasuan.

Ingurumen-inbentarioa apartatuz apartatu baloratuko da. Balorazio horretan, elementuen garrantzi erlatiboa aztertuko da erreferentzia-esparru baten barnean (tokiko mailan, eskualdekoan eta abar).

Kasu guztietan, datuak eskuratzeko iturri dokumentalak adieraziko dira, material bibliografikoak izan, norberak prestatuak edo bestelakoak.

Orokorrean, ingurumen-inbentarioaren azalpena modu laburrean egingo da, ingurumen-inpaktuaren ebaluazioaren ikuspuntutik ekarpenik egiten ez duten azalpen orokorrak saihesturik, eta proiektuak ingurumenean izan litzakeen eraginak ulertzeko behar dena kontuan hartuta.

Ezertan eragotzi gabe aurretik esandakoa, proiektuaren eraginpean dagoen eremuaren ezaugarriak ikusita, ingurumen-inbentarioak honako alderdi hauek hartuko ditu barne:

Geologia eta geomorfologia:

Proiektuaren eraginpeko eremuaren ezaugarri geologiko eta geomorfologikoak. Baldintza geoteknikoak.

Interes geologiko/geomorfologikoa duten leku, gune eta eremuen identifikazioa.

Material litologikoen iragazkortasuna. Akuiferoen kalteberatasuna. Kalteberatasun handiko guneak, kargatze-eremuak, hustutegiak eta abar identifikatzea, halakorik badago, eta gune horien eta proiektuaren arteko erlazioa.

Lurrazaleko eta lurpeko hidrologia:

Proiektuaren eragin-eremuko sare hidrografikoa. Proiektuak eragindako ibilguen eta haien ertzen egoera.

Akuiferoak eta interes hidrogeologikoko guneak kutsatzeko arriskua.

Uren kalitatea. Proiektuak eragindako zatien egoera ekologikoaren zehaztapena (biologikoa, fisiko-kimikoa eta hidromorfologikoa).

Eremuan dauden ur-puntuak. Horien ezaugarriak deskribatzea, erabilera adierazita, eta xehetasun-kartografian kokatzea.

Eremuan dauden biozenosien eta ekosistemen deskribapena:

Atal honetan, ukitutako komunitateak identifikatu, eta honako hauek adieraziko dira: kontserbazio-maila; egiturazko konplexutasuna; espezie bereizgarri, enblematiko edo adierazgarriak, etab. Kontuan hartuko da, bereziki, ea badagoen espezie mehatxaturik eskualde, estatu, Europa eta nazioarte mailan.

Ingurumen-inpaktuaren azterketak xehetasunez zehaztuko ditu, azterketa partikularizatu baten bidez, proiektuaren jarduketek eragindako intereseko habitat bakoitzaren eta landare autoktonoen masen azalera, haien osaera, kontserbazio-egoera eta balio ekologikoa. Bereziki, proiektuaren kalteak jasan ditzakeen ibaiertzeko basoaren azalerari eta kontserbazio-egoerari buruzko datuak emango dira.

Botanikako aditu batek proiektuaren eragin-eremuari buruzko prospekzio zehatzak egin beharko ditu. Haren eginkizuna izango da proiektuaren eragin-eremuan dauden mehatxatutako flora-populazioak edo -aleak non dauden identifikatzea eta xehetasunezko kartografian seinaleztatzea. Halaber, landarediaren azterketak jasoko du zein balizko landare-espezie aloktono inbaditzaile dauden eta zehazki non dauden.

Bertako faunari dagokionez, ingurumen-inpaktuaren azterketak, funtsean, xede izan behar du proiektuaren eragin-eremuan dauden edo egon daitezkeen fauna-espezieen habitatak zaintzea eta lehengoratzea. Baloratu beharko du eremuan interesekoa den edo mehatxatuta dagoen faunarako intereseko eremurik badagoen (hazkuntza-eremuak, babeslekuak eta elikadura-guneak). Alde horretatik, faunaren diagnostikoa osatzeko, fauna-talde guztiak barne hartzen dituzten azterketak egin beharko dira, proiektuaren eremuan dauden espezieei eta espazioaren erabilerari buruzko informazio zehatza lortzeko.

Bai Artika ibaian, bai ibaiadarretan, ibai-karramarro autoktonoaren (Austropotamobius pallipes) presentziaren zantzuak antzeman dira. Artika ibaiaren arroan, proiektuaren eremutik ibaian gora eta ibaian behera, ibai-karramarro autoktonoaren populazioen presentzia eta banaketa sakon aztertu beharko da.

Proiektuaren eremuak bisoi europarraren (Mustela lutreola) kudeaketa-planeko eremua ukitzen du; zehaztu behar da, edo baztertu, espezie mehatxatu horren edo beste batzuen intereseko kokalekurik badagoen (hazkuntza-, babes- eta elikadura-eremuak). Bisoi europarraren (Mustela lutreola) kudeaketa-planean xedatutakoa bete beharko da.

Proiektua gauzatzeko eremuak Urdaibaiko Ibai Sarea kontserbazio bereziko eremua ukitzen du (ES2130006 KBEa) (358/2013 Dekretua, ekainaren 4koa, zeinaren bidez kontserbazio bereziko eremu izendatzen baitira Urdaibai eta Gaztelugatxeko Donieneko eremuan dauden Batasunaren garrantzizko 4 leku, eta KBE horien eta Urdaibaiko Itsasadarreko HBBEaren kontserbazio-neurriak onartzen baitira; HBBE horrek Artika ibaia eta haren adarrak barne hartzen ditu). Espazioa kontserbatzeko helburuak zehaztuko dira eta egiaztatuko da proposatutako jarduketak bat datozela espazio hori kudeatzeko tresnetan xedatutakoarekin.

Ingurumen-inpaktuaren azterketan, proiektuak lurraldeko konektagarritasun ekologikoan duen eragina baloratu beharko da.

Paisaia:

Inguruko paisaia-baliabideei dagokienez, paisaiaren kalitatea eta hauskortasuna aztertuko dira.

Kultura-ondarea:

Proiektuaren eragin-eremuan dauden kultura-interesekotzat deklaratutako elementuetarako, Euskal Kultura Ondareari buruzko maiatzaren 9ko 6/2019 Legean xedatutakoari jarraituko zaio.

Dokumentazio grafikoa:

Jarduketa-eremuaren ingurumen-inbentarioaren alderdi garrantzitsuenen irudi kartografiko geoerreferentziatuak txertatu beharko dira, hala eskala orokorrean nola xehatuan, eta kasuan-kasuan erabili den eskala adierazi beharko dute.

Proiektua egin nahi den eremuaren eta aurreikusitako jardueren kartografiaren kopia gehigarria erantsiko da, shape formatuan, eta Eusko Jaurlaritzak egindako Ingurumen-ebaluazioko prozedurak izapidetzean dokumentazioa aurkezteko gidaren jarraibideen arabera aurkeztuko da.

Inpaktuen identifikazioa eta balorazioa.

Inpaktuen identifikazioa, kuantifikazioa eta balorazioa egiteko, kontuan hartuko da ingurumen-inbentarioko elementuen eta inpaktuak sor ditzaketen proiektuko ekintzen arteko interakzioa. Eraginaren munta zenbatesteko, kontuan hartu behar dira proiektuak zuzenean nahiz zeharka eragingo dien baliabideen kalitatea eta kantitatea. Zulatze-faseko (obrak), funtzionamendu-faseko (saiakuntza) eta eraispen-faseko inpaktuak bereiziko dira.

Inpaktuen identifikazio eta balorazio hori ongi arrazoitu beharko da kasu bakoitzean, eta, horretarako, Ingurumen-ebaluazioari buruzko abenduaren 9ko 21/2013 Legearen VI. eranskinean adierazitako terminologia erabiliko da. Kasu honetan, funtsean, egungo egoera eta etorkizunekoa konparatuko dira, zuzenketa-neurriak erabiliz.

Ingurumen-inpaktuak baloratzeko erabilitako metodologiak eta zenbatespen-prozesuak zehaztuko dira. Erabilitako adierazle edo parametroak aipatuko dira, ahal den heinean oro har onartutako arauak edo azterketa teknikoak erabiliz, inpaktu mota bakoitzaren arabera muga-balioak edo gida-balioak ezartzeko.

Inpaktuak neurtzeko, proiektutik eratorritako jarduketa guztiak hartuko dira kontuan, honako hauek barne: aldi baterako okupazio-eremuko jarduketak, zundaketaren zulaketa, aldi baterako sarbideak eta iraunkorrak, instalazio lagungarriak, lurren eta materialen aldi baterako pilaketak eta abar.

Bizkaiko Foru Aldundiko Ingurumen Zuzendaritza Nagusiaren txostenaren arabera, kontuan hartu beharko dira ibai-karramarro autoktonoaren (Austropotamobius pallipes) presentziaren zantzuak daudela proiektuaren eremutik ibaian gora, bai Artika ibaian, bai haren ibaiadarretan; izan ere, Espezie Mehatxatuen EAEko Katalogoaren arabera «galtzeko arriskuan» dago.

Bereziki, eta beste batzuk alde batera utzi gabe, proiektuaren eta eragindako ingurunearen ezaugarriak kontuan hartuta, ingurumen-inpaktuaren azterketak aztertu beharko ditu lurzoruaren okupazioarekin zerikusia duten ingurumen-inpaktuak eta eremu babestuen gaineko eragina (Natura 2000 Sarea eta Urdaibaiko Biosfera Erreserba); Artika ibaiaren gaineko afekzioarekin zerikusia duten ingurumen-inpaktuak, bai eta hauen gaineko eragina ere: eraiki beharreko zundaketaren bidez urak hartzearen ondoriozko iturburuen gainekoa, ibai-karramarro autoktonoak (Austropotamobius pallipes) beharrezkoak dituen ur-ibilguen emarien gainekoa, landaretza natural autoktonoaren eta Batasunaren intereseko habitaten (HIC 91E0*) gainekoa eta bisoi europarraren gainekoa.

Proiektuaren ondorioz gainazaleko ur-masan aldaketa hidromorfologikoak gertatzeko arriskua dagoenean epe luzera, eta horrek haren egoera edo ahalmena ona izatea eragozten duenean edo hondatzeko arriskua dakarrenean, apartatu espezifiko bat gehitu beharko da, eragindako ur-masen egoera edo ahalmena definitzen duten kalitate-elementuetan (biologikoak, fisiko-kimikoak eta hidromorfologikoak) epe luzera izango dituen ondorioak ebaluatzeko.

Era berean, proiektuak oro har eragindako landaredi mota bakoitzaren azalera kuantifikatuko da. Hala ere, obren faseko aldi baterako okupazioa eta okupazio iraunkorra bereiziko dira. Landarediaren eta Batasunaren intereseko habitaten gaineko inpaktua balioesteko, eragindako eremua ez ezik, kontuan hartuko dira haien kontserbazio-egoera, adierazgarritasun-maila eta konektagarritasunean betetzen duten lekua ere. Urdaibaiko Ibai Sarea KBEan (ES2130006) sartuta dauden eremuak identifikatu eta kuantifikatuko dira.

Gainera, baloratuko dira kutsadura akustikoak eta hondakinen, isurketen eta emisioen kudeaketa egokiak obren fasean eragin ditzaketen inpaktuak.

Ildo horretan, zaratari dagokionez, obren eragin akustikoaren balorazioa jasoko da. Horretarako, kontuan hartu beharko dira azaroaren 17ko Zaratari buruzko 37/2003 Legean zein urriaren 16ko 213/2012 Dekretuan, EAEko hots-kutsadurari buruzkoan, obretako zaratari buruzko xedapen espezifikoak. Aintzat hartu beharko dira obrako makineriaren potentzia akustikoa, zonifikazio akustikoa eta gune bakoitzean kalitate akustikoari dagokionez ezarritako helburuak.

Baliabide estetiko-kulturalei dagokienez, baloratuko da ea proposamena bateragarria den kultura-ondareko elementuekin.

Ingurumen-inpaktuaren azterketak behar bezala aztertu behar dituen beste inpaktu batzuk dira, hain zuzen, hurbil dauden habia-guneetan edo hegaztien umatzeko beste eremu batzuetan obren fasean eragozpenak sortzearen ondoriozkoak, alderdi hori bereziki garrantzitsua baita arriskuan den fauna-espezie ororentzat.

Azkenik, ingurumen-inpaktuaren azterketak klima-aldaketa barne hartu behar du proiektuaren balizko eragin garrantzitsuak identifikatzeko, deskribatzeko, analizatzeko eta kuantifikatzeko.

Natura 2000 Sareko eremuen gaineko eragina.

Ingurumen-inpaktuaren azterketari buruzko Legearen (21/2013, abenduaren 9koa) 35. artikuluak adierazten duen eran, berariazko atal bat sartuko da proiektuak bere eraginpeko eremuan dagoen Natura 2000 Sareko Urdaibaiko Ibai Sarea KBEan (ES2130006) izango dituen eraginei buruz, eremu osoaren kontserbazio-helburu eguneratuak kontuan hartuta. Batasunaren intereseko habitatetan zuzenean nahiz zeharka eragindako afekzioak zehaztuko eta ebaluatuko dira, eta arreta berezia jarriko zaie eremu horietako lehentasunezko habitatei eta eremu horren kudeaketarako funtsezkoak diren elementuei, eta, horretarako, proiektatutako jarduketa bakoitzaren eraginpean gera daitekeen eremuaren inguruko azterlan xehatua egingo da: mehatxupeko flora eta fauna espezieen gainekoa eta Natura 2000 Sarearen koherentzia gordetzen laguntzen duten ingurunearen beste baliabide batzuen gainekoa.

Analisi horri ekiteko, interesgarria izan daiteke gida hau kontsultatzea: «Natura 2000 Sareko ingurumen-inpaktua ebaluatzeko gida metodologikoa. Biodibertsitatearen eta Natura Ingurunearen Zuzendariordetza Nagusiak erabilitako irizpideak, Natura 2000 Sareko guneen osotasunari egindako kaltea zehazteko, Batasunaren intereseko habitatei erasateagatik».

Natura 2000 Sarearen osotasunari kalte egingo zaiola egiaztatzen bada, sustatzaileak agiri bidez justifikatu beharko du ez dagoela beste alternatibarik eta badaudela lehen mailako interes publikoko ezinbesteko arrazoiak, Natura-ondareari eta biodibertsitateari buruzko abenduaren 13ko 42/2007 Legearen 46. artikuluaren 5., 6. eta 7. apartatuetan aipatzen diren horietakoak, hain zuzen.

Proiektuaren kalteberatasuna.

Istripu larriak edo hondamendi handiak gertatzeko arriskua dela eta proiektuak ingurumenean eragin ditzakeen ondorio kaltegarrien deskribapena, azterketa eta, hala badagokio, kuantifikazioa egingo da, baita istripu edo hondamendi horiek gertatzeko arriskuari buruzkoak ere. Helburu hori lortze aldera, erabili ahal izango da proiektuari aplikatu beharreko beste arau batzuei jarraituz egindako arrisku-ebaluazioen bitartez lortutako informazio esanguratsua.

Hala badagokio, deskribapenak barne hartuko ditu horrelako gertakariek ingurumenean sor dezaketen kalte adierazgarriak prebenitzeko eta leuntzeko aurreikusitako neurri guztiak, baita halako larrialdietarako proposatzen diren prestakuntzari eta erantzunari buruzko xehetasunak ere.

Prebentzio-, zuzenketa- eta konpentsazio-neurriak proposatzea.

Ingurumen-inpaktuaren azterketan adierazi beharko da zer neurri aurreikusten diren aztertutako inguruneko elementu bakoitzak izango dituen ingurumen-ondorio negatibo nabarmenak murrizteko, desagerrarazteko edo konpentsatzeko.

Babes- eta zuzenketa-neurriak eta, beharrezkoa bada, konpentsazio-neurriak diseinatzeko, proiektua gauzatzeko behar diren elementu eta jarduketa guztiak hartu behar dira kontuan, eta bat etorri behar dute inpaktuekin; zehazki, proiektuak hartzen duen espazioko ingurumen-elementu eta balioen gaineko ekintzek eragindakoekin.

Zehatz-mehatz identifikatu eta deskribatuko da inpaktuak prebenitzeko eta zuzentzeko ekintza bakoitza. Deskribapenak xehetasun-maila nahikoa izan beharko du hautemandako ingurumen-inpaktuak modu eraginkorrean murrizten, desagerrarazten edo konpentsatzen direla bermatzeko, egikaritze-proiektuek izan ohi dituzten apartatuak barne hartuta: memoria, neurketen koadroa, obra-unitateen definizioa, aurreikusitako neurri bakoitzari dagokion aurrekontuko partida eta preskripzio teknikoen agiria, baita hori guztia hobeto ulertzeko behar den kartografia ere. Neurri horiek obraren planean integratuko dira, eta neurriak gauzatzeko egutegi koordinatu bat proposatuko da.

Zehazki, eta ezertan galarazi gabe aurreko apartatuetan eskatutako analisien emaitzen ondorioz sartu beharko liratekeen beste neurri batzuk, prebentzio-, babes- eta zuzenketa-neurrien proiektuak neurri hauek hartu eta garatuko ditu, besteak beste:

Natura-ondarea babesteko neurriak:

Proiektuaren diseinuarekin (lan-eremuak mugatzea, etab.) eta obren egikaritzearekin lotutako prebentzio-neurriak, hala nola obren eraginpeko eremua balizatzea sarbide osagarriak, metaketa-guneak eta abar barne hartuta, obra ez dadin balizatutako lurraldetik harago joan.

Mehatxatutako flora- eta fauna-espezieen intereseko lekuak babestea.

Obrak faunarentzako ugalketa-aldi kritikotik kanpo egitea, arriskuan diren espezieak detektatu diren eremuetan.

Landaredia autoktonoa eta intereseko landaredia babesteko neurriak.

Kendu beharreko zuhaitzak seinaleztatzeko aurreikuspena, ezinbesteko gutxienekoa izan dadin.

Landaredi aloktono inbaditzailea desagerrarazteko neurriak.

Prebentzio-neurriak (diseinukoak eta obretan kontuan hartzekoak) eta zuzenketa-neurriak, intereseko fauna-espezieei kalte ez egiteko. Bisoi europarrari eta ibai-karramarro autoktonoari dagokienez, dagozkion prebentzio-neurriak hartu beharko dira, hala nola aldez aurretiko prospekzioak eta obra-egutegiaren doikuntza, baita zuzenketa-neurriak ere, ibaiertzak lehengoratzea, adibidez.

Sistema hidrologikoa eta hidrogeologikoa babesteko neurriak:

Jarduketak egingo den zatian eta ibaian behera uren kutsadura minimizatzeko neurriak, hala nola solido esekien ekarpenak eta makina-parkeen eta instalazio osagarrien guneetatik datozen beste kutsatzaile batzuen isuriak ekiditekoak.

Metaguneak eta eremu osagarriak egoki kokatzea, zuzeneko nahiz jario bidezko kaltea ekiditeko.

Makina-parkeak eta instalazio osagarriak egokitzeko neurriak (iragazgaiztea, drainatze-sarea, etab.).

Obraguneetan, eta batez ere indusketa-lanetako materialekin kargatutako kamioiek ibili behar dutela aurreikusten den irteeretan, ibilgailuak garbitzeko instalazioak ipini beharko dira, dekantazio-putzuetara konektatuta. Azterketak azaldu beharko ditu elementu horien ezaugarriak, kokapen zehatza eta neurriaren justifikazioa.

Lurzoruak babesteko neurriak:

Proiektua lur-mugimenduak minimizatzeko moduan diseinatuko da, jarduketa-eremuetan lurzoruaren jatorrizko profilari eustea kontuan hartuta.

Halaber, neurriak hartuko dira landareztatze-lanetan lurzoruaren landare-geruza berrerabiltzeko.

Biztanleriari eragindako kalteak eta eragozpenak murrizteko neurriak.

Atmosferaren kalitatea babesteko neurriak zehaztuko dira, hautsa, zaratak, usainak eta lurraldearen irisgarritasunarekin eta iragazkortasunarekin lotutako bestelako eragozpenak kontuan hartuta.

Orobat, obrako lanen ordutegia, makinen zirkulazio-abiadura eta abar mugatuko dira.

Hondakinak kudeatzeko neurriak:

Zulatze-fasean eta saiakuntza-fasean hondakinak kudeatzeko proposamena. Bilketa-, biltegiratze- eta tratamendu-sistemen deskribapena.

Hondakinak kudeatzeko hierarkia-printzipioei jarraituz, hondakinen kudeaketarekin lotutako prebentzio- eta zuzenketa-neurriek sustatu behar dute hondakinak sortzea prebenitzea, edo, hala badagokio, apirilaren 8ko 7/2022 Legearen 8. artikuluan ezarritako lehentasun-hurrenkerari jarraituz kudeatzea, hau da: prebenitzea, berrerabiltzeko prestatzea, birziklatzea eta balorizatzeko beste modu batzuk erabiltzea, balorizazio energetikoa eta deuseztatzea barne. Hondakinak ezabatzeko, ezinbestekoa izango da aldez aurretik behar bezala justifikatzea teknikoki, ekonomikoki edo ingurumenaren aldetik ez dela bideragarria haiek balorizatzea.

Kultura-ondarea babesteko neurriak:

Ingurumen-inpaktuaren azterketak inguruko arkeologia- eta kultura-ondarea babesteko behar diren neurriak jasoko ditu. Euskal Kultura Ondareari buruzko maiatzaren 9ko 6/2019 Legearen 65. artikulua betez, azterlan arkeologiko bat egiteko beharra ezarriko da, bai eta, Bizkaiko Foru Aldundiko Kultura Zuzendaritza Nagusiak hala irizten badio, Ferrerie burdinola izeneko 37 zenbakiko balizko arkeologia gunean proiektu arkeologiko bat egiteko beharra ere, obrak hasi aurretik.

Paisaiarako eta obrek ukitutako lurrak leheneratzeko neurriak:

Proiektuari lotutako ingurumena lehengoratzeko proiektu bat aurkeztuko da. Dagokion dokumentazio grafikoa izango du, eta aurrekontu banakatua proiektuaren gainerakoaren xehetasun maila bera duena. Lehengoratzearen xehetasunak zehaztuko dira: erabiliko diren espezieak, landarearen/haziaren jatorria, tamaina, ereintzaren/hidroereintzaren dentsitatea edo landaketa-esparrua, aurreikusitako mantentze-lanak, etab.

Leheneratzeko neurriak proposatuko dira proiektuak ukitutako eremu guztietarako, baita aldi baterako okupatzen direnetarako ere; espezie autoktonoak erabiliko dira, eskualde bioklimatikoaren baldintza edafiko eta klimatikoetara egokituak.

Zehazki, zuzenketa-neurri gehigarri hauek ezarri behar dira obra egikaritzean eta horren ondorengo ustiapenean:

Belardi, laborantza eta aprobetxamenduetatik erretiratzen den lurzoruaren azaleko geruzaren landare-lur emankorrena gainerako indusketa-lurretik aparte pilatu behar da, ondoren jatorrizko lekuan jartzeko, beheko geruzetara irauli gabe.

Makinen, materialen eta abarren erabileraren pean dauden belardi- eta laborantza-eremuetan, dagokion berrereintza egingo da. Belardiak berrereiteko, aldez aurretik lurra pixka bat landu edo aitzurtu beharko da lurraren trinkotasuna desegiteko, era horretan egokiak izan daitezen ondorengo berrereintza eta erneketa.

Eragindako laborantzak birlandatzea, dagozkien kalte-ordainekin, hala badagokie.

Itxiturak eta lurzatietan nahiz eragindako laboreetan dauden gainerako azpiegitura-elementuak (drainatzeak, etab.) ordeztu behar dira.

Ingurumena zaintzeko programa.

Ingurumena zaintzeko programa bat eratuko da. Programa horren helburu nagusia izango da sistema bat ezartzea, ingurumen-inpaktuaren azterketan finkatutako kalitate-helburuak betetzen direla bermatzeko, bai eta bertan adierazitako jarraibideak eta zuzenketa-neurriak ere.

Programaren helburuak zehaztuko dira, eta, helburu bakoitzarentzat, bildu beharreko datuak, erabiliko den metodologia, neurketa-puntuak (puntu horiek zehazki kokatzeko egoera-planoa eta krokisa barne) eta neurketen maiztasuna.

Kalitate-helburuak, hala dagokionean, legediak zehazten dituen muga-balioen edo gida-balioen araberakoak izango dira, edota oro har onartuta dauden azterketa teknikoen araberakoak. Hala ere, proiektuak eragindako eremuaren xehetasun eta ezaugarriek hala eskatzen badute, balio zorrotzagoak ezarri beharko dira beharrezkoa irizten zaien parametroetan.

Era berean, dagokion aurrekontua erantsi beharko da, behar bezainbat banakatua, proiektua garatzearen ondoriozko eraginen jarraipen egokia egin ahal izateko. Proiektuari buruz eta proiektuak inguruan duen eraginari buruz jasotako datuen ondorioz beharrezkoak diren kontrolez gain, programa horrek jarraian adierazitako kontrolak izan beharko ditu:

Obrek okupatzen duten eremuaren mugen kontrola.

Obrek irauten duten bitartean ur-ibilguaren eta uren kalitatearen gaineko kalteen kontrola.

Landarediaren gaineko kaltearen kontrola.

Mehatxupeko flora- eta fauna-espezieen gaineko kaltearen kontrola.

Espezie inbaditzaileen presentziaren kontrola eta espezie inbaditzaileak (zebra-muskuiluak) ez ugaltzeko hartutako neurrien kontrola.

Obrako jardunbide egokien kontrola, hauek saihesteko: hondakinak botatzea, lurzorua edo urak kutsatzea olio-jarioen, hormigoi-esneen eta lur-arrasteen ondorioz, eta herritarrei eragozpenak sortzea zarataren, hautsaren eta abarren ondorioz.

Lur-mugimenduen eta indusketa-materialen kudeaketaren kontrola.

Sortutako hondakinen kudeaketaren kontrola.

Lehengoratze-lanen kontrola.

Arkeologia-ondarearen gaineko eraginaren kontrola.

Aurreikusitako prebentzio-, zuzenketa- eta konpentsazio-neurrien leheneratze-plana barne eraginkortasuna egiaztatzeko beste kontrol batzuk.

Ingurumen-inpaktuaren azterketaren laburpena.

Ingurumen-inpaktuaren azterketaren eta haren ondorioen laburpen-dokumentu bat idatzi beharko da, abenduaren 9ko 21/2013 Legeak VI. eranskinean ezarritako ezaugarriak izango dituena. Dokumentuan labur-labur eta edonork ulertzeko moduan bildu beharko dira proiektuaren izaerari buruzko informazioa, proiektuak inguruneari eragiten dion modua eta aurreikusitako inpaktuak saihesteko edo minimizatzeko proposatutako neurriak. Halaber, dokumentazio grafikoa sartzea ere gomendatzen da, jendeari informazioa emateko.

Hala badagokio, ingurumen-inpaktuaren azterketa egitean izan diren zailtasun tekniko edo informatiboak aipatu beharko dira.

Dokumentazio kartografikoa.

Irudikapen kartografikoak lortu beharko dira, behar bezala geoerreferentziatuta (pdf-ek eremuaren koordenatuak jaso beharko dituzte UTM30N ETRS89 erreferentzia-sistema ofizialean). Adierazpen horren esparruak proiektuaren eraginpeko eremu guztiak hartuko ditu, honako hauek barne: instalazio osagarriak, metaketa-eremuak, obraren eremura sartzeko irekitzen diren bide berriak, eta, hala badagokio, soberakin-biltegien kokapena.

Kartografia xehetasun nahikoaz egingo da, aurreikusten diren trazaduren, lursailen okupazioaren eta obra horietako bakoitzaren ezaugarri orokorren egokitasuna aztertu ahal izateko, ingurumenaren ikuspegitik.

Beharrezkoak diren xehetasun-planoak gehituko dira (adibidez, sarbideen xehetasuna, puntu kritikoetan edo ibilguen gaineko bidegurutzeetan), proiektua eta bere elementu bakoitzak sortuko dituen eraginak behar bezala aztertu ahal izateko.

Gainera, eta analisi teknikoa errazteko, planoak shape formatuan aurkeztuko dira, eta obrako elementu nagusiak jasoko dituzte.

Dokumentazioa aurkezteko argibideak:

Euskadiko Ingurumen Administrazioaren abenduaren 9ko 10/2021 Legearen 77. artikuluan eta Ingurumen-ebaluazioari buruzko abenduaren 9ko 21/2013 Legearen 39.3 artikuluan xedatutakoaren arabera, egiaztapen batzuk egin ondoren, organo substantiboak ingurumen-organoari hauek bidali behar dizkio: ingurumen-inpaktuaren ebaluazio arrunta abiarazteko eskaera eta harekin batera aurkeztu behar diren dokumentuak, hala nola proiektuaren dokumentu teknikoa, ingurumen-inpaktuaren azterketa, informazio publikoaren eta kontsulten emaitza, eta sustatzaileak egindako oharren dokumentu bat, jasotako alegazio eta txostenetako ingurumen-edukiari eta kontuan hartzeko moduari dagokienez.

Jendaurreko informazioaren eta kontsulten prozesuari dagokienez, adierazi behar da kasu honetan beharrezkotzat jotzen dela kontsulta egitea, Urdaibaiko Biosfera Erreserbari ez ezik, baita Eusko Jaurlaritzako Natura Ondare eta Klima Aldaketa Zuzendaritzari ere.

Dokumentazioa xede horretarako egin diren jarraibideak betez aurkeztu behar da. Jarraibideak Industria, Trantsizio Energetiko eta Jasangarritasunaren Sailaren webgunean daude eskuragarri (https://www.euskadi.eus/eusko-jaurlaritza/ingurumen-ebaluazioa/), atal honetan: Tramiteak > Ingurumen Ebaluazioa > Proiektuen ingurumen-inpaktuaren ebaluazio-prozedura izapidetzea > Eskaerak aurkeztea.

Eskabidearekin batera aurkeztu beharreko dokumentazioa gidaliburuaren arabera egin eta aurkeztu beharko da. Gidaliburua ingurumen-organoaren webgunean dago eskuragarri, esteka honetan:

https://www.euskadi.eus/contenidos/informacion/eia/eu_def/adjuntos/2022_Dokumentuak-aurkezteko-GIDA_v4.pdf