Uztailaren 6ko 176/2021 Dekretuak oinarrizko heziketa-zikloak emateko eskumena eskuordetu zien zenbait udali eta mankomunitate bati, horretarako araubide juridikoa, antolatzailea eta finantzarioa ezarriz.

Dekretua indarrean izan den bitartean, Oinarrizko Lanbide Heziketaren hurbiltasuna eta jarraitutasuna bermatu ahal izan dira hari esker, eta, hala, eragindako udalerrietan hezkuntza-zerbitzuak behar bezala ematea segurtatu da.

Dekretuaren indarraldia amaitzear dago. Hori dela eta, zerbitzuaren jarraitutasunari eusteko aukera ematen duen erabaki bat hartu behar da, hezkuntza-plangintza egin eta eskuordetze-eredua aztertu bitartean.

Helburu hauek lortzeko da beharrezkoa 176/2021 Dekretua luzatzea:

Hezkuntza-zerbitzu publikoaren etenik gabeko jarraitutasuna bermatzea.

Eskuordetutako udalen antolakuntza- eta aurrekontu-egonkortasuna segurtatzea.

Indarrean dagoen hezkuntza-plangintzarekiko koherentziari eustea, eredua ebaluatu bitartean.

Ikasturte akademikoaren programazioari eragingo lioketen eskumen-hutsuneak saihestea.

176/2021 Dekretuak berak luzapena aurreikusten du 9.2 artikuluan, Eusko Jaurlaritzako organo eskudunaren erabaki bitartez: «2. Modu positiboan ebaluatu ondoren eskumenak dekretu honetan adierazitako bost ikasturteetan eskuordetu izana, eta udalek eta/edo toki-erakundeek eskuordetzarekin jarraitzeko interesa dutela adierazi ondoren, dekretu hau bost ikasturterik behin luzatu ahal izango da Gobernu Kontseiluaren erabaki bidez, dekretuaren eranskinak eguneratuz».

Zenbait bilera egin dira bai taldeka, bai banaka udalekin eta mankomunitatearekin luzapenaren baldintzen berri emateko, eta denak azaldu dira proiektuak aurrera egitearen alde.

Jaurlaritzari buruzko 7/1981 Legeak, bai eta Eusko Jaurlaritzaren antolaketa- eta funtzionamendu-araubideak ere, 26.3 artikuluan Gobernu Kontseiluari esleitzen dio indarraldi mugatuko dekretuak luzatzeko eskumena.

Euskadiko Toki Erakundeei buruzko 2/2016 Legeak eta Lanbide Heziketako araudiak aukera ematen dute hezkuntza-eskumenak toki-erakundeei eskuordetzeko, baldin finantzaketa egokia bermatzen bada eta Hezkuntza Sailak gainbegiratzen badu.

ERABAKIA

Lehenengoa. Uztailaren 6ko 176/2021 Dekretuaren indarraldia bost ikasturtez luzatzea lehenengoa 2026-2027 ikasturtea izango da, eta azkena 2030-2031 ikasturtea, haren egungo indarraldia amaitzen den egunetik aurrera (176/2021 Dekretua, uztailaren 6koa, zeinaren bitartez udal eta/edo toki-erakunde jakin batzuei oinarrizko mailako heziketa-zikloak emateko eskumena eskuordetzen baitzaie).

Bigarrena. Eskuordetzeari lotutako finantzaketa aldatzea, eta ezartzea guztizko zenbatekoa 41.869.827,66 eurokoa izango dela 2026/2027 ikasturtetik 2030/2031 ikasturtera bitarteko bost urteetarako.

Hirugarrena. Baimena ematea, Euskal Autonomia Erkidegoko 2026ko Aurrekontu Orokorrak onartzen dituen abenduaren 23ko 7/2025 Legearen 38. artikuluarekin bat etorriz, 5.000.000,00 eurotik gorako gastua egiteko, berrogeita bat milioi zortziehun eta hirurogeita bederatzi mila zortziehun eta hogeita zazpi euro eta hirurogeita sei zentimokoa (41.869.827,66).

Laugarrena. Hezkuntza Sailari agintzea erabaki hau betearazteko eta berau aplikatzeko behar diren administrazio-tresnak eguneratzeko.

Bosgarrena. Erabaki hau Euskal Herriko Agintaritzaren Aldizkarian argitaratzeko agintzea.

(Ikus .PDF)

(Ikus .PDF)

(Ikus .PDF)